2 Samuee̱ 24
24
Ndabii̱ jaꞌáꞌyá xki̱i̱ xota̱ na̱xi̱ńdaá
(1Kr 21:1-27)
1Kó Néná ti̱ katsꞌénxchán nginí kondraa̱ xota̱ Israee̱l, kó indyiáꞌá Ndabii̱ kondraa̱ kui xotaa̱, nga bi̱ katsoó: Tꞌen ji, kó tꞌíxki̱ ji xota̱ Israee̱l ko̱jo xota̱ tji̱e̱e̱ Jundáa̱. 2Kó nda̱ ree̱, bi̱ katsoó Joaa̱b, nda̱ ngito̱ko̱o̱ jájuún xi nijan tikónjo̱:
—Tꞌen ji nínga síndo ngayeje tji̱e̱e̱ xota̱ Israee̱l, ndeskande nangi Ndaa̱n, ngaskande nangi Beersebaa̱, kó tꞌíxki̱ ji xota̱ na̱xi̱ńdaá, tsi̱ꞌe̱ nga skuie an kótjín má kui xotaa̱.
3Ta̱nga Joaa̱b, bi̱ katsoó nda̱ ree̱:
—Néná, kui xi Nèe̱ ngatsjaá ngaskande úchán bo̱a̱ kjiꞌi ngase kui xota̱ na̱xi̱ńdaá, kó ngatamabe kui nii̱ nda̱ ree̱, ta̱nga, míkjo̱a̱a̱ nga kui nii̱ xi mejeén nda̱ ree̱.
4Ta̱nga kjo̱a̱ xi katsjá nda̱ ree̱ ꞌniú atíxomaa̱ Joaa̱b ko̱jo já ngito̱ko̱o̱ jájuún. Kuíni nga Joaa̱b ko̱jo já ngito̱ko̱o̱ jájuún jatjoni ngindyi̱ko̱n nda̱ ree̱, tsi̱ꞌe̱ nga ko̱e̱je̱kꞌíxki̱ xota̱ na̱xi̱ńdá Israee̱l. 5Kó ngije jaꞌatio ndejèꞌ Jorndaa̱n, ki̱a̱ katsꞌénkjaꞌyá ki̱a̱ Aroee̱r, xtji̱e̱e̱n nínga kixi̱i̱ kui na̱xi̱ńdáꞌniú xí tikón ngamasiee̱n nangi soón Ngaa̱nd, ki̱a̱ tꞌa na̱xi̱ńdáꞌniú Jasee̱r.
6Sꞌe̱ jaskan kijí nangi Ngalaa̱nd, ko̱jo nangi Tajtii̱n-Jondsii̱, jaskan kijí nangi Ndaa̱n-Jaa̱n ko̱jo nangi xi jaꞌatjiyajoo̱n nangi Sindoo̱n.
7Sꞌe̱ jaskan kijí ngi̱ndie nínga ꞌniuú na̱xi̱ńdáꞌniú Tiroo̱, ko̱jo ngayeje na̱xi̱ńdáꞌniú xí chji̱a̱ni xota̱ Ee̱b, ko̱jo xota̱ Kanaa̱n, sꞌe̱ nga fetꞌani kijí xtji̱e̱e̱n na̱ngii̱ nangi Jundáa̱, ngaskande Beersebaa̱.
8Jaskan ngije kijí ngayeje na̱xi̱ńdaá, jachó nginí na̱xi̱ńdáꞌniú Jerusale̱n, kó nijan sá ko̱jo kan ni̱xtjin kamaá. 9Kó Joaa̱b katsjaá nda̱ ree̱ xki̱i̱ xota̱ na̱xi̱ńdaá, kó xota̱ Israee̱l, jin úchán mi̱ kamá jáxíꞌín xi ꞌniú xi maa̱ fí kjo̱a̱xchán xi tsꞌénkjién ki̱cha̱ndojoó, kó xota̱a̱ Jundáa̱ ún úchán mi̱ kamá jáxíꞌiín.
10Ta̱nga ngije Ndabii̱ íxki̱ xota̱ na̱xi̱ńdaá, on kamaá ini̱ma̱a̱ kui nii̱, kó kuíni nga bi̱ katsoó Néná: Achichí ꞌniú katsꞌenjé án nga bo̱a̱ kjiꞌi ni xi katsꞌen an, ta̱nga ngotꞌe̱ ꞌne̱ ji Ndi̱a̱, ꞌniú míꞌaá nga si̱ꞌinjetakíi̱n kui ni xi ꞌniú ndajín xi katsꞌén kui mosòo̱, ngatꞌa̱ ta̱ kjo̱a̱kitikjo̱a̱ boá nga bo̱a̱ katsꞌen an.
11Kó kjiꞌanga ta̱jño̱ó, ngije jastjíe̱n Ndabii̱, Néná tsíchji̱a̱jo nda̱chji̱ni̱e̱ꞌén xi ꞌmí Ngaa̱nd, nda̱ xi katsꞌénkjién Ndabii̱ nga kamámejeén tjín ni xi kamábe, kó bi̱ katsoó:
12—Tꞌen ji, kó bi̱ tꞌíi̱n Ndabii̱: Bi̱ tsó Néná: Ján ni xi mejénna tsjaa, ngo chje̱ꞌéjin ji, tsi̱ꞌe̱ nga sa̱ꞌin an. 13Kósꞌe̱ Ngaa̱nd kijíkoón Ndabii̱, kó bi̱ katsoó:
—A mejeén nga kꞌuié ngo kjindiá xí yito nó kꞌo̱ndíyaá nga ka̱ma ki̱a̱ nangi nínga tindyin ji. Axa̱ mejeén nga ján sá ku̱i̱yíi̱ kondra̱a̱ tse̱ nga ko̱ngatji̱ngi. Axa̱ mejeén nga ján ni̱xtjin kꞌuié chiꞌin nangi nínga tindyin ji. Nda ti̱ꞌinkjé jí ngotꞌe̱, kó tsitsíjìi̱n mí ni xi xiáa̱n xi katsangiyana. 14Kósꞌe̱ Ndabii̱ bi̱ katsoó Ngaa̱nd:
—Achichí nda̱ kjimana, ta̱nga nda ngase kjiꞌi nga ngi̱ya tsja Néná kꞌo̱ka, ngatꞌa̱ achichí tsie kjo̱a̱ni̱ma̱takón tjiín kuí, ta̱bo̱a̱jiín nga ki̱a̱ ngi̱ya tsja xotaa̱ kꞌo̱ka an.
15Kó Néná katsangiyaa̱ chiꞌin xota̱ Israee̱l ndeskande nga ta̱jño̱ó kui ni̱xtjii̱n, ngaskande nga jachó ni̱xtjin xi kiꞌmií, ndeskande nangi Ndaa̱n ngaskande nangi Beersebaa̱, kó ichítié ko̱jo kan mi̱ kamá jáxíꞌín xi jesón ngi̱jii̱n xota̱ na̱xi̱ńdaá.
Néná katsꞌénjetakoón xota̱ na̱xi̱ńdaá
(1Kr 21:15-27)
16Kó kjiꞌanga kui ndítsjiee̱ yején tsja xtji̱e̱e̱n na̱xi̱ńdáꞌniú Jerusale̱n tsi̱ꞌe̱ nga sa̱ꞌínkjié, Néná ni̱ma̱ kamaá kjo̱a̱a̱ kui ni xi ndajín xi ka̱maa̱, kó bi̱ katsoó kui ndítsjie xi je tjítsꞌénkjié xota̱ na̱xi̱ńdaá:
—Jè ndakjiꞌi ꞌne̱, chje̱ꞌéxín ji ndse̱. Kó kui ndítsjie xi Néná ki̱a̱ kisꞌijña ngi̱ndie nínga tsꞌéntsjie to ndso̱ko̱a̱n ṉño̱pan Araunaa̱, nda̱ jebuseoo̱. 17Kó nga kamábe Ndabii̱ nga kui ndítsjiee̱ tjítsꞌénꞌoón xota̱ na̱xi̱ńdaá, tsíchji̱a̱jo Néná, nga bi̱ katsoó:
—Án boá xi katsꞌenjé án, kó án boá xi ꞌniú ndajín kjiꞌi ni xi katsꞌen an, ta̱nga kui cho̱tsa̱nga̱a̱ mí ni xí katsꞌén kuí. ꞌNiú míꞌaá nga ta̱sá án ko̱jo xota̱ ndiꞌaa̱ na̱ꞌmina xí tatíjéjne̱.
18Kó kui ni̱xtjii̱n Ngaa̱nd kijíkoón Ndabii̱, kó bi̱ katsoó:
—Tꞌennijíngí ji, kó ti̱ꞌinde ji ngo ṉchandikón xí tsi̱ꞌe̱ Néná ki̱a̱ nínga tsꞌéntsjie to ndso̱ko̱a̱n ṉño̱pan Araunaa̱, nda̱ jebuseoo̱.
19Kósꞌe̱ Ndabii̱ kijínijíngí, xikó má katsoó Ngaa̱nd, ko̱jo xikó má katsoó Néná nga sa̱ꞌín, 20kó kjiꞌanga Araunaa̱ askotsijen nkꞌa jàn, kamábe nda̱ ree̱ ko̱jo já mosoo̱ nga ki̱a̱ ndyi̱fí xtji̱e̱e̱n nínga tikón kuí, kó jatjoxie Araunaa̱, sꞌe̱ asiéntikoó ngaskande nga kisitꞌaa̱ xtjien tꞌanangii̱ ngindyi̱ko̱n nda̱ ree̱. 21Kó bi̱ katsó Araunaa̱ nga asíyá:
—Míkjo̱a̱a̱ nga kꞌi̱e̱ kji̱ndi̱bá kon nda̱ ree̱ nínga tikón kui mosoo̱.
Kó Ndabii̱, bi̱ katsó:
—Kjo̱a̱a̱ nga kꞌi̱e̱ kjoéꞌe̱kꞌatsiee̱ kui ngindie nínga niꞌíntsjie ji to ndso̱ko̱a̱n ṉño̱paa̱n, tsi̱ꞌe̱ nga ngo ṉchandikón sa̱ꞌindàa̱ Néná, kó nga ngiti̱ ko̱yàjín ngase xota̱ na̱xi̱ńdaá.
22Ta̱nga Araunaa̱, bi̱ katsoó Ndabii̱:
—Chjábé jí ndi̱a̱, kó te̱ꞌé ji kjo̱a̱tjó xi nda sasieén nga si̱ꞌinkꞌasꞌin ji: Kꞌi̱e̱ síndo kꞌi̱e̱e̱ cho̱yojo xi̱ꞌin xi ka̱ma si̱ꞌankꞌasꞌien tsi̱ꞌe̱ kjo̱a̱tjoó, ko̱jo yátie xi tsꞌéntsjie kui too̱, ko̱jo yá xí fongi ngasen cho̱yojoo̱, tsi̱ꞌe̱ nga chikín ka̱ma. 23Ngayeje kui nii̱ ji nda̱ re, án boá xi ji tjítsꞌenkꞌasꞌieen. Kó Araunaa̱ bi̱ katsó ngasee̱ nda̱ ree̱: ¡Néná kui xi Nèe̱ tsja ngatamaa̱ kjo̱a̱a̱ kjo̱a̱tjó xi si̱ꞌinkꞌasꞌíi̱n!
24Ta̱nga nda̱ ree̱, bi̱ katsoó Araunaa̱:
—Jmí, ta̱sá kꞌotsieé, kó kꞌuichjií kótjín chjií, ngatꞌa̱ jmí ni sa̱ꞌinkꞌasꞌienjáa̱n Néná tsi jmí to̱n sꞌi̱ngíjínna. Kó bo̱a̱ tsꞌén Ndabii̱ tsꞌatsie kui ngi̱ndiee̱, ko̱jo cho̱yojoo̱ xi bokján tꞌanangii̱, kó ichítié to̱ntiboa íchjí. 25Kósꞌe̱ Ndabii̱ ki̱a̱ katsꞌéndaa̱ ngo ṉchandikón Néná, kó katsꞌénkꞌasꞌiee̱n kjo̱a̱tjó xi ꞌbítí ko̱jo kjo̱a̱tjó kjo̱a̱a̱ kjo̱a̱xioó. Kó Néná katsꞌénkꞌíxió tꞌanangii̱, kó ngiti̱ kisꞌiejiín ngasee̱ chiꞌin xota̱ Israee̱l.
Currently Selected:
2 Samuee̱ 24: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
