1 Já ree̱ 1
1
Re Ndabii̱
1Ni̱xtjin nga je ꞌniú kamáxchá nda̱ re Ndabii̱, ndatsi kjín chi̱ntsja̱ akjaꞌmani nga kisꞌie, ngiti̱ kamáꞌasojiín. 2Kuíni nga já xí koón nda̱ ree̱, bi̱ katsoó: Ji ndi̱a̱ chjiéngá ku̱i̱ndyi̱seé ji ngo tsa̱kjìn xo̱ngò tsi̱ꞌe̱ nga ki̱a̱ kjojñátꞌaa kó sa̱ꞌínꞌasoo̱.
3Kó ikindyisé ngo tsa̱kji̱ín xí achichí tsjákjiꞌi ngayeje nangi Israee̱l, kó ngo na̱ xi chji̱a̱ni nangi Sunee̱n kasako, xi na̱ Abisaa̱j kiꞌmí, kó tsangínjoo̱ nda̱ ree̱ kui naa̱. 4Achichí tsjá kisꞌie kui naa̱, kó nijan kistsoꞌbájo̱ nda̱ ree̱, kó askoo̱n, ta̱nga jmíni̱xtjin nga chjo̱ón nda̱ ree̱ kamá.
Andoniyaa̱ kamá mejeén nga re kamá
5Kósꞌe̱ nda̱ xi ꞌmí Andoniyaa̱ ndií Angii̱t katsꞌénxchán, kó bi̱ katsó: ¡Án boá xi kotixoma an! Kó íjñanda karro̱ ko̱jo jájún ndi̱je̱, kó ichítié kamá já xí askoo̱n kui nda̱a̱ xi kisꞌiṉtso̱matjoón. 6Kó Ndabi̱ na̱ꞌmii̱ jmíni̱xtjin katsꞌénxchánjo̱ nga bi̱ katsoó: Míkjo̱a̱a̱ nga bo̱a̱ kiniꞌín kon ji. Achichí tsjá kisꞌie kui nda̱ xo̱ngo̱ò, kuí boá xi jaskan katsen ngije katsen ntsꞌi̱e̱ kui xi ꞌmí Absaloo̱n. 7Kó nijan kamá nda̱ xi ꞌmí Joaa̱b, kui xi ndií na̱ Sarbiaa̱ ko̱jo chináꞌmi Abiataa̱r kamá, kó kui jaá kijítji̱ngii̱ Andoniyaa̱ nga asíko̱jo.
8Ta̱nga chináꞌmi Sandoo̱k, ko̱jo Benaiyaa̱, ndií Joyandaa̱, ko̱jo nda̱chji̱ni̱e̱ꞌén Nataa̱n, ko̱jo Simeii̱, ko̱jo Reii̱, ko̱jo ngayeje xota̱ xi chꞌokon kamá xi chji̱a̱ni nda̱ re Ndabii̱, ki̱a̱jín nijan kamá Andoniyaa̱.
9Kó Andoniyaa̱ katsꞌénkꞌién cho̱tsa̱nga̱, ko̱jo cho̱yojo xo̱ngò, ko̱jo cho̱ xi ꞌniú yiꞌi ki̱a̱ tꞌa ndi̱jo̱ xi ꞌmí Soelee̱t, kui xi tikón ki̱a̱ tꞌa ndáńchꞌi̱ Ee̱n-Rongee̱l, kó tsíchji̱a̱a̱ ngayeje já ntsꞌi̱e̱, kui xi ndií nda̱ re Ndabii̱, ko̱jo ngayeje jáxíꞌín xi chji̱a̱ni nangi Jundáa̱, kui xi mosoo̱ nda̱ ree̱ kamá, 10ta̱nga tsíchji̱a̱jiín nda̱chji̱ni̱e̱ꞌén Nataa̱n, ko̱jo Benaiyaa̱, ko̱jo xota̱ xi chꞌokoo̱n, ko̱jo Salomo̱ ntsꞌi̱e̱.
Na̱ Besabee̱ nda tsíchji̱a̱ kjo̱a̱a̱ Salomoo̱
11Kósꞌe̱ Nataa̱n tsíchji̱a̱jo na̱ Betsabee̱, na̱aa̱n Salomoo̱, nga bi̱ katsoó:
—A kji̱e̱ ndaꞌyéjín ji nga Andoniyaa̱, kui xi ndií Angii̱t, kuí boá xi je tsꞌénbotixómá, kó nde kji̱e̱ bejín kui nii̱ ndi̱a̱na Ndabii̱. 12Ngotꞌe̱ ꞌne̱, ja̱bíꞌi̱n, kó ndaꞌyé ji kui kjo̱a̱botíxoma xi tsjaa, tsi̱ꞌe̱ nga kjo̱tjoꞌàa̱ yojòo̱, ko̱jo kjo̱tjoꞌàa̱ ndíi̱ Salomoo̱ nga: 13Tꞌen ji ngindyi̱ko̱n nda̱ re Ndabii̱, kó bi̱ tꞌíi̱n: Ji ndi̱a̱, a jejín katseꞌé ji ndso̱ꞌbe, nga bo̱a̱ kase ji nga ndíi̱ Salomoo̱ boá xi ko̱tíxoma jaskan ngije akatíxome ji. Kó míkjo̱a̱a̱ nga Andoniyaa̱ tsꞌénbotixómá kon ngotꞌe̱ ꞌne̱. 14Kó tji̱e̱nga ta̱kó tindokjo̱e̱je ji nda̱ ree̱, an kꞌosꞌi̱e̱n an xtji̱e̱e̱n nga̱xten ji, kó án boá xi bo̱a̱ kjiꞌi xián án, kjo̱a̱a̱ ni xi tindokjo̱e̱ ji.
15Kósꞌe̱ na̱ Betsabee̱ tsꞌasꞌien ngi̱yaꞌma nínga kjiꞌijña nda̱ ree̱, kó nda̱ ree̱ jè ꞌniú xchá kamá, kó na̱ Abisaa̱j xi chji̱a̱ni nangi Sunee̱n tsꞌénkoón. 16Kó na̱ Betsabee̱ asiéntikoó ngaskande nga kisitꞌaa̱ xtjien tꞌanangii̱ nga kamábendikón nda̱ ree̱. Kó nda̱ ree̱, bi̱ katsoó:
—Mí xi mejeén ji.
17Kó bi̱ katsó na̱ Betsabee̱:
—Ji Ndi̱a̱, jí boá xi katseꞌé ji ndso̱ꞌbe ngindyi̱ko̱n Néná, kui xi Nèe̱ nga bi̱ kasení: Ndíi̱ Salomoo̱ boá xi ko̱tíxoma jaskan an, kó kuí boá xi kꞌuijñásón ngi̱ndie nínga botixoma an. 18Ta̱nga ngotꞌe̱ ꞌne̱, Andoniyaa̱ boá xi tsꞌénbotixómá, kó ji ndi̱a̱, nde kji̱e̱ yejín ji kui nii̱. 19Kó kuí ngaskande jè katsꞌénkꞌién cho̱yojo xi̱ꞌin, ko̱jo cho̱ xi ꞌniú yiꞌi, ko̱jo cho̱tsa̱nga̱, kó jè tsíchji̱a̱a̱ ngayeje ndií ree̱, ko̱jo chináꞌmi Abiataa̱r, ko̱jo Joaa̱b, xota̱ ngito̱ko̱o̱ juu̱n, ta̱nga katsóyàjín Salomoo̱ kui xi mosòo̱. 20Kó ngayeje xota̱ Israee̱l nga ji ndyi̱koyaa̱ re, tsi̱ꞌe̱ nga kꞌuiyée̱ ꞌyání xi ko̱tíxoma ngajòo̱ ndi̱a̱. 21Ngatꞌa̱ tsi bo̱a̱jín si̱ꞌin ji, kjiꞌanga ji ndi̱a̱, ki̱a̱ nijan ka̱matikójo̱ ji xota̱ xi xcháa̱, an ko̱jo ndína Salomoo̱ xota̱ xi katsꞌénjé kꞌuínjne̱.
22Kó tji̱e̱nga na̱ Betsabee̱ to̱kó tsꞌénchji̱a̱jo ngase nda̱ ree̱, jachó nda̱chji̱ni̱e̱ꞌén Nataa̱n. 23Kó kiꞌmíyaà nda̱ ree̱, nga bi̱ kiꞌmií:
—Kꞌi̱e̱ tikón kꞌi̱e̱e̱ nda̱chji̱ni̱e̱ꞌén Nataa̱n. Kó kui nda̱a̱ jachó ngindyi̱ko̱n nda̱ ree̱, kó asiéntikoó ngaskande nga kisitꞌaa̱ xtjien tꞌanangii̱. 24Kó Nataa̱n, bi̱ katsó:
—Ji ndi̱a̱, ji xi re ji, a jí boá xi bi̱ kase ji: Andoniyaa̱ boá xi ko̱tíxoma jaskan an, kó kuí boá xi kꞌuijñásón yáxíríe̱ nínga botixoma an. 25Ngatꞌa̱ Andoniyaa̱, ngotꞌe̱ jè kijíjaya, kó je katsꞌénkꞌién cho̱yojo xi̱ꞌin, ko̱jo cho̱ xi ꞌniú yiꞌi, ko̱jo kjín cho̱tsa̱nga̱, kó je katsóyaà ngayeje ndií nda̱ ree̱, ko̱jo já ngito̱ko̱o̱ jájuún, ko̱jo chináꞌmi Abiataa̱r, kó ngotꞌe̱ ꞌne̱, je ndyi̱kjinie ko̱jo ndyi̱ꞌbi nganda tsi̱ꞌe̱ nga bi̱ ndyi̱tsó: ¡Tsie ngatamaa̱ nda̱ re Andoniyaa̱! 26Ta̱nga tsíchji̱a̱jínna an xi nda̱ mosòo̱ ma an, ti̱nde tsíchji̱a̱jiín chináꞌmi Sandoo̱k, ti̱nde tsíchji̱a̱jiín Benaiyaa̱ ndií Joyandaa̱, ti̱nde tsíchji̱a̱jiín Salomoo̱ nda̱ mosòo̱ nga. 27Kui ni xi tjítsꞌén, a nda̱ ree̱ boá xi atíxomaa̱, kó a katsóyàjínrií moso̱ tse̱ ꞌyání xi ko̱tíxoma ngajoo̱ ndi̱a̱na, jaskan ngije atíxoma kui.
Ndabii̱ katsjáxaá nda̱ re Salomoo̱
28Kósꞌe̱ nda̱ re Ndabii̱, bi̱ katsó:
—Ndokjoée̱ na̱ Betsabee̱. Kó kui naa̱ tsꞌasꞌien ngindyi̱ko̱n nda̱ ree̱, kó ki̱a̱ kasasienkixi̱ kje̱n nda̱ ree̱. 29Kó nda̱ ree̱, bi̱ katsó nga katsjá tsꞌoa:
—Ja̱koxi̱ boá nga tikón Néná, kó kuí boá xi tsꞌaxiéꞌá ini̱ma̱na kjo̱a̱a̱ ngayeje kjo̱a̱ni̱ma̱ xi jaꞌatio an, 30kó xikótsꞌèn je katsjaa̱ ndso̱ꞌba án ngindyi̱ko̱n Néná, kui xi Nee̱ xota̱ Israee̱l, nga bi̱ kixiaan: Ndíi̱ Salomoo̱ boá xi ko̱tíxoma jaskan ngije atixoma an, kó kuí boá xi kꞌuijñásón yáxíríe̱ nínga botixoma an, kuíni nga ngotꞌe̱ má bi̱, nga bo̱a̱ kjiꞌi ni xi sa̱ꞌin an.
31Kó na̱ Betsabee̱ asiéntikoó ngaskande nga kisitꞌaa̱ xtjien tꞌanangii̱ ngindyi̱ko̱n nda̱ ree̱, sꞌe̱ bi̱ katsoó:
—¡Ngatsjéni̱xtjin ngatꞌieé kjo̱a̱mindyion ndi̱a̱na re Ndabii̱!
32Kó nda̱ re Ndabii̱, bi̱ katsó:
—Ndókjo̱a̱jnúu̱ chináꞌmi Sandoo̱k, ko̱jo nda̱chji̱ni̱e̱ꞌén Nataa̱n, ko̱jo Benaiyaa̱ ndií Joyandaa̱. Kó kui jaá jachó ngindyi̱ko̱n nda̱ ree̱. 33Kó nda̱ ree̱ bi̱ katsoó:
—Tangínjo̱jnú já mosoo̱ ndi̱a̱jnú, kó ti̱ꞌankꞌíjñasónjnúu̱ ndína Salomoo̱ ngo ndi̱je̱tajá xí tsa̱ꞌa̱n, kó tangínjo̱jayajnú ki̱a̱ nangi Ngijoo̱n, 34kó chináꞌmi Sandoo̱k, ko̱jo nda̱chji̱ni̱e̱ꞌén Nataa̱n ki̱a̱ sa̱ngínjón isti̱ nga tsja̱axaá nga kui xi ka̱ma ree̱ na̱xi̱ńdá Israee̱l, kó ti̱ꞌankjaniéjnú tjioo̱, ko̱jo ꞌniú chaꞌayàjnú nga bi̱ kꞌuínjnú: ¡Ngatsjéni̱xtjin ngatꞌieé kjo̱a̱mindyion nda̱ re Salomoo̱! 35Jaskan tangíntji̱ngíjnúu̱ kui, kó kji̱ndi̱bá, sꞌe̱ kui kꞌuijñásón yáxíríe̱ nínga botixoma an, kósꞌe̱ kui ko̱tíxoma ngajona, ngatꞌa̱ kuí boá xi je jaꞌajin an nga kui xi ka̱ma ngito̱ko̱o̱ na̱xi̱ńdá Israee̱l, ko̱jo nangi Jundáa̱.
36Kósꞌe̱ Benaiyaa̱, ndií Joyandaa̱, bi̱ katsoó nda̱ ree̱:
—¡Bo̱a̱ kjiꞌi! ¡Bo̱a̱ nga tsó Néná, kui xi Nee̱ ndi̱a̱na nda̱ ree̱! 37Xikó tsꞌén Néná kisꞌijñajo̱ nda̱ ree̱, kui xi ndi̱a̱na, bo̱a̱ ti̱ tsꞌén ngatꞌíjñajo̱ Salomoo̱ nga, kó ngatsꞌèntsié ngi̱ndie nínga botíxomaa̱, ta̱bo̱a̱jiín ngi̱ndie nínga atíxoma ndi̱a̱na nda̱ re Ndabii̱.
38Kó chináꞌmi Sandoo̱k, ko̱jo nda̱chji̱ni̱e̱ꞌén Nataa̱n, ko̱jo Benaiyaa̱ ndií Joyandaa̱, ko̱jo xota̱ sereteoo̱, ko̱jo xota̱ peleteoo̱ jatjajen, kó kui jaá katsꞌénkꞌíjñasoón Salomoo̱ ndi̱je̱tajaá nda̱ re Ndabii̱, kósꞌe̱ kijíjo̱ ki̱a̱ nangi Ngijoo̱n. 39Kósꞌe̱ chináꞌmi Sandoo̱k iskjíbé kui ndi̱ja̱ xi ndyi̱a̱ isti̱ xi tikón ki̱a̱ Ndiꞌandikoón, sꞌe̱ katsangijon Salomoo̱, sꞌe̱ kiniꞌánkjanie tjioo̱, kó ngayeje xota̱ na̱xi̱ńdaá, bi̱ katsó nga askjandáyà: ¡Ngatsjéni̱xtjin ngatꞌieé kjo̱a̱mindyion nda̱ re Salomoo̱!
40Kó ngayeje xota̱ na̱xi̱ńdaá kijítji̱ngii̱ nda̱ ree̱, kó kisie xota̱ xi katsꞌénkjanie yána̱xo̱, kó achichí tsjá kamaá, nga ngaskande xikoó tsi kijíjaya tꞌanangii̱ nga askjandáyà kui xotaa̱.
41Kó nga tsintꞌié kuí nii̱ Andoniyaa̱ ko̱jo ngayeje xota̱ xi síndojo̱, ngije má kamaá nga ndyi̱kjinie nichinie. Kó kjiꞌanga tsintꞌieé tjioo̱ Joaa̱b, bi̱ katsó: Míkjo̱a̱a̱ nga achichí kjo̱a̱se ko̱jo nga xiyé xibó ndyi̱tsó xota̱ na̱xi̱ńdáꞌniuú.
42Tji̱e̱nga to̱kó tsꞌénchji̱a̱ ngase kui nda̱a̱, jachó ki̱a̱a̱ Jonataa̱n, ndií chináꞌmi Abiataa̱r, kó Andoniyaa̱ bi̱ katsoó:
—¡Ti̱tjásꞌi̱n ji, ngatꞌa̱ nda̱ chꞌokon ji, kó én nda boá xi kjoéꞌe̱je ji!
43Ta̱nga Jonataa̱n, bi̱ katsoó Andoniyaa̱:
—Ja̱koxi̱ boá nga nda̱ re Ndabii̱, kui xi ndi̱a̱ná, je re katsꞌén Salomoo̱, 44kó nda̱ ree̱ katsangiyajo̱ kui nda̱ ree̱ chináꞌmi Sandoo̱k, ko̱jo nda̱chji̱ni̱e̱ꞌén Nataa̱n, ko̱jo Benaiyaa̱ ndií Joyandaa̱, ko̱jo xota̱ sereteoo̱ ko̱jo xota̱ Peleteoo̱, kó kui jaá katsꞌénkꞌíjñasón Salomoo̱ ndi̱je̱tajaá nda̱ ree̱, 45kó chináꞌmi Sandoo̱k, ko̱jo nda̱chji̱ni̱e̱ꞌén Nataa̱n, jè katsangijon isti̱ nga je katsjáxaá ki̱a̱ nangi Ngijoo̱n, kó ndeskande ki̱a̱a̱ kjindibáni nga achichí tsjátjiín nga ndyi̱fínijíngí, kó ngayeje xota̱ na̱xi̱ńdáꞌniú achichí ni xi ndyi̱tsó nga ndyi̱kjandayà, kó kuí boá kui kjo̱a̱see̱ xi je kandaꞌyájnú. 46Kó Salomoo̱ jè tikónsón yáxíríe̱ nínga botíxomaa̱ nga, 47kó ngaskande já mosoo̱ nda̱ ree̱, je jeꞌe kꞌi̱e̱e̱ nga ndyi̱foeꞌe tsꞌénchíkonñé ndi̱a̱jne̱, nda̱ re Ndabii̱, kó bi̱ katsoó: Ne tse̱ ji ngatsꞌén nga ꞌniú ngase xtjonínkꞌá jaꞌeén nda̱ re Salomoo̱ ta̱bo̱a̱jiín jaꞌée̱n, kó tsie ngase ngatsꞌén ngi̱ndie nínga ko̱tíxoma kui, ta̱bo̱a̱jiín tse̱.
Kó ngaskande ti̱kuii nda̱ ree̱ katsꞌéntsjaà Néná ki̱a̱ nga̱són ṉchaa̱n. 48Kó ti̱ bi̱ ti̱ katsó nda̱ ree̱ nga: Ngatamachikonñé Néná, kui xi Nee̱ xota̱ Israee̱l, ngatꞌa̱ kuí boá xi katsꞌén nga ngotꞌe̱ ꞌne̱ je tjín xí kꞌuijñásón yáxíríe̱ nínga botixoma an, kó nga ndyikón án má xi je kamábe kui nii̱.
49Kósꞌe̱ ngayeje xota̱ xi síndojo̱ Andoniyaa̱ achichí katsakjónní, kó jastjíe̱n, sꞌe̱ nga ngo nga ngo kijí ndi̱ya̱à. 50Ta̱nga Andoniyaa̱ katsakjónnií Salomoo̱, kó jastjíe̱n, sꞌe̱ kijí, kó ki̱a̱ kisꞌijñando nínga tikón kui ni xi ja̱kon ndi̱ja̱a̱ ṉchandikoón kon.
51Kó tjín xí katsóyaà Salomoo̱, nga bi̱ katsoó:
—Andoniyaa̱ achichí tsꞌéntsakjónnií nda̱ re Salomoo̱, ngatꞌa̱ ki̱a̱ kjiꞌiꞌniuú ni xi ja̱kon ndi̱ja̱a̱ ṉchandikoón kon nga bi̱ tjítsó: Te̱ꞌé ji ndso̱ꞌbe nda̱ re Salomoo̱, nga ki̱cha̱jín si̱ꞌinkꞌinni ji kui mosòo̱ xi̱ꞌbi̱.
52Kósꞌe̱ Salomoo̱, bi̱ katsó:
—Tsi ngo nda̱ maꞌniátakón ka̱ma kui nda̱a̱, nde ngojín tsja̱to̱ko̱ kꞌo̱ka tꞌanangii̱, ta̱nga tsi ni xi ndajín tjíjii̱n, ko̱yà boá.
53Kósꞌe̱ nda̱ re Salomoo̱ katsjákjo̱a̱ nga Andoniyaa̱ kaꞌneje̱ngini ki̱a̱ ṉchandikoón, kósꞌe̱ kijíkoón nda̱ ree̱, kó asiéntikoó kje̱n nda̱ re Salomoo̱. Kó Salomoo̱, bi̱ katsoó:
—Tꞌen ndiꞌàa̱ ꞌne̱.
Currently Selected:
1 Já ree̱ 1: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
