2 Samuee̱ 23
23
Én xí fetꞌani xi tsíchji̱a̱ Ndabii̱
1Kuí bí én xí fetꞌani xi tsíchji̱a̱ Ndabii̱. Bi̱ katsó Ndabii̱ ndií Isaii̱, bi̱ tsó kui nda̱ xi kachjaninkꞌaa̱, kui xi jaꞌájin Néná kui xi chji̱a̱ni xota̱ tji̱e̱e̱ Jakoo̱b, kui nda̱ xi tsjatsꞌèn siee̱, xi chji̱a̱ni na̱xi̱ńdá Israee̱l:
2A̱si̱énni̱xtjii̱n Néná boá xi tsꞌénchji̱a̱ ngajona,
kó Néná je íjñasón eén ki̱a̱ nga̱són najén án.
3Néná xí tsi̱ꞌe̱ xota̱ Israee̱l, je bo̱a̱ katsó, jè tsíchji̱a̱jona Ndi̱jo̱jee̱ na̱xi̱ńdá Israee̱l,
Kui xi kixi̱ botixómaá xotaa̱, kui xi nga botixómá bendikón Néná.
4Kuí boá xi xikoó ndiꞌí xí tsꞌentsíjen nga ta̱jño̱ó, kjiꞌanga tjo tsꞌueé,
kui xi xikoó ngo ta̱jñó nga jmí ṉdi̱jín, ngije tsaꞌá stseé,
kui xi tsꞌentjó kꞌijñá xí ńtsꞌieén ki̱a̱ nga̱són tꞌanangii̱.
5Kó ndatsi xota̱ ndiꞌana ndajín síndo ngindyi̱ko̱n Néná,
ta̱nga Kuí boá xi índajo̱na ngo ni ngatsjéni̱xtjin,
kó índonda ngayeje nii̱, kó je nda síndo ngotꞌe̱,
kuí boá xi sa̱ꞌín nga nda kjo̱tjosón ngayeje ni xi mejénna nga ka̱ma.
6Ta̱nga xota̱ xi ꞌniú ndajiín, ngayejee̱ nga bo̱a̱ ka̱maa̱,
xikoó ngo ndaꞌyá xí bichijmi, kó nde ngojín xi foaꞌátikó,
7Nde ngojín xi mejeén fíkóntiñaa̱,
ta̱sá tsꞌénkjién ki̱cha̱ ko̱jo yáyojoó,
kó ndiꞌií boá xi ꞌbítí, ngaskande ki̱a̱ ngi̱ndie nínga síndo.
Já xí ꞌniú chꞌókoón Ndabii̱
(1Kr 11:10-47)
8Kuí bí jaꞌeén já chꞌokon xi kisꞌiee̱ Ndabii̱: Josee̱b-Basebee̱t nda̱ takmonitaa̱, kui xi nda̱ ngito̱ko̱ xi ꞌniú nkꞌa xaá kamá ki̱a̱ ngi̱jii̱n já ngito̱ko̱o̱ jájuún, kó Andino̱-Esnitaa̱ kamá nga, ngo ndi̱yà jin úchán jáxíꞌín katsꞌénkꞌién nga ta̱ ngo ndi̱yà.
9Xi ma joó kui nda̱a̱, Eleasaa̱ kiꞌmí ndií Ndondoo̱, xota̱ tji̱e̱e̱ Aoii̱, kuí bí xi ngo nga ján já chꞌokon xi nijan kisꞌińdojo̱ Ndabii̱, kjiꞌanga katsꞌénkjaán xota̱ Filisteaa̱, nga kamátikó kuí ngi̱ndiee̱ tsi̱ꞌe̱ nga skjánjo̱, ndatsi xota̱ Israee̱l ja̱bo̱a̱ je kijíni kui ngi̱ndiee̱. 10Kui nda̱a̱ jastjíe̱n, kó katsꞌénꞌoón nga katsꞌénkꞌién xota̱ Filisteaa̱ ngaskande nga jenda tsja, kó ki̱a̱ kisꞌitꞌaa̱ tsja ki̱cha̱ndojoó. Kui ni̱xtjii̱n Néná katsjaá nga kui xi katsꞌén kui kjo̱a̱xcha̱án, kó xota̱ Israee̱l kijíngátji̱ngii̱ kui nda̱a̱, tsi̱ꞌe̱ nga iskjíbé ni xi niꞌán kjo̱a̱xcha̱án.
11Xi ma jaá kui jaá, Samaa̱ kiꞌmí xi ndií Ajee̱, xota̱ tji̱e̱e̱ Araa̱r kamá. Xota̱ Filisteaa̱ kamátikó xki̱ xtín jájuún nínga tikón ngo ngi̱ndie nínga tjitjíe̱ lenteja̱, kó xota̱ na̱xi̱ńdaá tsanga ngindyi̱ko̱n xota̱ Filisteaa̱. 12Ta̱nga kui nda̱a̱ jastjíe̱nni ngamasiee̱n kui ngi̱ndiee̱, kó tsꞌaxiéꞌá xota̱ Israee̱l, sꞌe̱ katsꞌénkꞌién já Filisteaa̱, kó Néná katsjandieè nga kui xi katsꞌén kui kjo̱a̱xcha̱án.
13Kó nga jachó ni̱xtjin nga kamáxchá nii̱, nga ján kui já ngito̱ko̱ jatjajenni ngi̱ndie nínga síndo, kó kijíkoón Ndabii̱ ki̱a̱ ti̱xa̱na̱xi̱ xi tikón nangi Andulaa̱n, tji̱e̱nga ki̱a̱ kisꞌińdo ngo xtín já Filisteaa̱ ki̱a̱ nangi nínga soón nangi Refaii̱n.
14Kui ni̱xtjin jàn Ndabii̱ ki̱a̱ kisꞌijña ngi̱ndie xi ꞌniú tikoón, kó ki̱a̱ na̱xi̱ńdáꞌniú Belee̱n kisꞌińdo ngo xtín já Filistea̱. 15Kó Ndabii̱ ngo ni kamámejeén nga bi̱ katsó:
—¡ꞌYá xí ka̱maa̱ tsja̱ana ndáfoaa̱ ndáńchꞌi̱ xi tikón ki̱a̱ na̱xi̱ńdáꞌniú Belee̱n, kui xi tikón tꞌa nga̱ntjo̱a̱a̱! 16Kó nga ján kui já xí ꞌniú chꞌokoón tsꞌasꞌien kjo̱a̱ꞌniú ki̱a̱ nínga síndo ndiꞌaa̱ xota̱ Filisteaa̱, kó tsꞌaxié ndáfoa ki̱a̱ ndáńchꞌi̱ xi tikón tꞌa nga̱ntjo̱a̱a̱ na̱xi̱ńdáꞌniú Belee̱n, ta̱nga Ndabii̱ kamámejénjiín katsꞌe, kó ta̱sá iskjitjónjón ndáfoaa̱, xikoó tsi ngo kjo̱a̱tjó xi Néná katsꞌénkꞌasꞌiee̱n, kó bi̱ katsó:
17—Nga bo̱a̱jín sa̱ꞌin an, ji Ndi̱a̱, ngatꞌa̱ tsi bo̱a̱ sa̱ꞌin an. A án xí kꞌuí an jiín kui já xí ndasénjín kamaá yojoo̱ nga kiniꞌánkꞌién katsaki. Kó kamámejénjiín katsꞌe. Kuí boá kui nii̱ xi katsꞌén nga ján kui já xí chꞌokoo̱n.
Nga kantié já xí ꞌniú chꞌokon ngasee̱
18Kó Abisaii̱, ntsꞌi̱e̱ Joaa̱b, ndií na̱ Sarbiaa̱, kuí boá xi ngito̱ko̱o̱ kui já xí kantié kamaá. Kui nda̱a̱ ngo ndi̱yà iskjininkꞌa yáyojoó nga askjanjo̱ ján úchán jáxíꞌín, kó katsꞌénkjaꞌaxtikjaá, kó bo̱a̱ tsꞌén nga ꞌniú kamáyàndikón kui já xí jaán. 19Kuí boá xi ꞌniú ngase kamáyàndikón ngi̱jii̱n kui já xí kantieé, kó ngito̱ko̱ kamá, ta̱nga ki̱a̱jín nijan ndse̱je̱n ikꞌíndo ko̱jo já xí jaán.
20Jaskan Benaiyaa̱, ndií Joyandaa̱, kui xi ndií ngo nda̱ xi ꞌniú chꞌokon kamá, ko̱jo xi achichí ni xi fíndikónná xi katsꞌén, xi chji̱a̱ni nangi Kabsee̱l, katsꞌénkꞌién nga jó ndií Ariee̱l, xi chji̱a̱ni nangi Moaa̱b, kó ngo ni̱xtjin nga ixó nchꞌàn, kijíjaya kó ngo xandi̱je̱ katsꞌénkꞌién ngi̱yaa̱ ngo ti̱xa̱.
21Kó ti̱ katsꞌénkꞌién ngo nda̱ Ejipto̱ xi achichí ꞌniú nkꞌa kamá, kui nda̱ Ejiptoo̱ ngo yáyojó tjiyátsjà, kó Benaiyaa̱ ngo yánísié iskjíbé nga kijítsꞌuieé kui nda̱ Ejiptoo̱, kó ti̱ kui yáyojoó katsꞌénkꞌiénni.
22Kui nii̱ xi katsꞌén Benaiyaa̱, ndií Joyandaa̱, kó kamáyàndikón ngi̱jii̱n kui xi kantié já xí ꞌniú chꞌokoo̱n. 23ꞌNiú ton kamáyàndikón ngi̱jii̱n nga kantié já xí ngasee̱, ta̱nga jachótji̱ngijín já xí jaán. Kó Ndabii̱ katsjaá xá nga kui xi kamá ngito̱ko̱o̱ já xí koón kui.
24Kó Asaee̱l ntsꞌi̱e̱ Joaa̱b, kuí boá xi kamá ngo nga kantié kui jaá,
ko̱jo Elanaa̱n ndií Ndondoo̱ xi chji̱a̱ni na̱xi̱ńdáꞌniú Belee̱n,
25ko̱jo Samaa̱ nda̱ aronditaa̱,
ko̱jo Elikaa̱ nda̱ aronditaa̱,
26ko̱jo Elee̱l nda̱ Paltitaa̱,
ko̱jo Iraa̱ ndií Ikee̱ nda̱ tekoitaa̱,
27ko̱jo Abiesee̱r nda̱ anatotitaa̱,
ko̱jo Mebunaii̱ nda̱ usatitaa̱,
28ko̱jo Salmoo̱n nda̱ aoitaa̱,
ko̱jo Maarai̱ nda̱ netofatitaa̱,
29ko̱jo Elee̱b ndií Baanaa̱, nda̱ netofatitaa̱,
ko̱jo Itaii̱ ndií Ribai̱, xi chji̱a̱ni Ngabaa̱ nangii̱ xota̱ tji̱e̱e̱ Benjaa̱,
30ko̱jo Benaiyaa̱ nda̱ piratonitaa̱,
ko̱jo Indai̱ nda̱ xi chji̱a̱ni xo̱ngàndántꞌié Ngaa̱,
31ko̱jo Abii̱-Alboo̱n nda̱ arbatitaa̱,
ko̱jo Asmabee̱t nda̱ barumitaa̱,
32ko̱jo Eliabaa̱ nda̱ saalbonitaa̱,
ko̱jo Jonataa̱n ndií Jasee̱n,
33ko̱jo Samaa̱ nda̱ araritaa̱,
ko̱jo Ayiaa̱n ndií Saraa̱r nda̱ araritaa̱,
34ko̱jo Elifelee̱t ndií Aasbaii̱, ndíndeè Maakaa̱,
ko̱jo ndínde xi ma joó Eliaa̱n, ndínde xi ma jaán Aitofee̱l, nda̱ jilonitaa̱,
35ko̱jo Esraii̱ karmelitaa̱,
ko̱jo Paaraii̱ nda arbitaa̱,
36ko̱jo Ingaa̱l, ndií Nataa̱n, xi chji̱a̱ni Sobaa̱,
ko̱jo Banii̱ nda̱ nganditaa̱,
37ko̱jo Selee̱k nda̱ amonitaa̱,
ko̱jo Naaraii̱ nda̱ beerotitaa̱, nda̱ xi askoo̱n Joaa̱b, ndií na̱ Sarbiaa̱,
38ko̱jo Iraa̱ nda̱ itritaa̱,
ko̱jo Ngaree̱b nda̱ itritaa̱,
39ko̱jo Uriyaa̱ nda̱ Ee̱t.
Kantjiꞌún jó kamá ngayejee̱.
Currently Selected:
2 Samuee̱ 23: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
