2 Samuee̱ 22
22
Só xi kisie Ndabii̱.
(Xsl 18)
1Ndabii̱ tsíchji̱a̱jo Néná én xí tjítꞌa kui soó, ni̱xtjin nga Néná tsꞌaxiéꞌáni ngi̱ya tsja ngayeje kondraa̱, ko̱jo ngi̱ya tsja Sauu̱l. 2Kó bi̱ tsó:
Néná boá xi ndi̱jo̱jena ko̱jo xi ngaꞌniúna, ko̱jo xi katsꞌéndéna,
3Néná boá xi ndi̱jo̱jena, kó kuí boá xi kjuinkóo̱n nga kotíjña̱ꞌma an,
kuí boá xí xikoó tsi ni xi ꞌbíchjaá ni xi ndajín,
kui boá xi ngaꞌniú xí ꞌboxiéꞌána,
ngi̱ndie nkꞌa nínga botíjña an, kuí boá xí ꞌboxiéꞌána,
jí boá xi kaꞌnaxiéꞌéní ngi̱jii̱n ni xi ndajiín.
4Kuichjiáa̱ Néná, ngatꞌa̱ tsoboárií nga si̱ꞌantsjaa̱,
kó kuí boá xi kꞌo̱xiéꞌána kjo̱a̱a̱ kondra̱na.
5Kjiꞌanga jaꞌatjiyajonna kjo̱a̱bo̱yaa̱,
achichí katsakjonña an kjo̱a̱a̱ kui ngaꞌniú xí tsꞌenkjiéná.
6Kó xikoó tsi ńꞌniú ítꞌana nga̱tsjo̱ó,
ko̱jo tsi jachótji̱ngina ńꞌniuú kjo̱a̱bo̱yaa̱.
7Ta̱nga kjiꞌanga nga nda̱ kamána tsíchji̱a̱a̱ Néná,
jo̱o̱n, tsíchji̱a̱a̱ Ne tsa̱ꞌa̱n, kó kuí tsintꞌié nda̱na ndeskande nínga tikón,
kó kjiꞌanga ni̱ma̱ kixiáa̱n askayánijon kui eén.
8Kó tꞌanangii̱ ꞌniú janie, kó jatsié,
sꞌe̱ kamátíyaá ngindie nínga tikónsón ndiꞌakꞌajmii̱,
jatsié ngatꞌa̱ katsꞌénxchán Néná.
9Kó ṉtjo̱n jatjoni ṉdi̱,
kó tsꞌoa jatjoni ngo ndiꞌí xi tsꞌenkjié ta̱jmì niní,
xi jatjonii̱ xꞌué xí tjítí.
10Íjñatꞌién nkꞌajmii̱, sꞌe̱ jatjajen,
kó ngo ṉdi̱ jñó kisꞌijña ngindie se.
11Ngo keruu̱b kisꞌijñasoón, kó kijítji̱e̱n,
nga̱són nga̱a̱ tjo̱o̱ kisꞌijñasón nga kijítji̱e̱n.
12Ki̱a̱ kisꞌijñajin ngo ṉdi̱ xi jñó nga ngo foaꞌatjiyajoo̱n,
nínga tjín ndáfoa xi jñó tikón, ko̱jo ṉdi̱ xi ꞌniú jñó.
13Kó ꞌna̱a̱ kjo̱a̱jee̱, ítꞌandiꞌí má xꞌueé.
14Néná katsꞌéntsen nkꞌa jàn,
kósꞌe̱ kandaꞌyá nda̱a̱ Néná xí tikón ndiꞌakꞌajmii̱,
15iskjiní yáyojoó, kó katsꞌéntsojoboa kondra̱a̱,
katsꞌénkjaꞌatꞌe, kó katsꞌénkjié.
16Kósꞌe̱ kamátsijen nínga tjo ndáfoaa̱,
kó kamátsijen ngindie nínga tikónsón nga̱sondiee̱,
nga katsꞌénxchán Néná, nga tsꞌaxié tjo̱o̱ ṉtjo̱n.
17Ndeskande nkꞌa jàn, katsjána tsja,
kó tsꞌaxiéna ngi̱jin ndáfoa xi ta̱nisién ꞌniú jee̱.
18Tsꞌaxiéꞌána ngi̱ya tsja ngo kondra̱ xi ꞌniú,
kó kui boá, kui xota̱ xi katsꞌénchꞌona,
ngatꞌa̱ ꞌniú ngase kamá ta̱bo̱a̱jiín an.
19Ikixkánjo̱na ni̱xtjin nga nda̱ kamána,
ta̱nga Néná boá xi asíko̱jona,
20kó tsꞌaxiéna ngo ngi̱ndie nínga tiyá,
kó katsꞌéndéna, ngatꞌa̱ tjó kamaá an.
21Néná katsjána ni xi tsoboána, kjo̱a̱a̱ nga kixi̱ kamá an,
kó katsjána ni xi tsoboána, kjo̱a̱a̱ nga tsjie kamá ndsa̱ án.
22Ngatꞌa̱ ki̱a̱ kijítji̱ngi an ndi̱ya̱à Néná,
kó kjinjín katsꞌée̱n yojona Néná nga ni xi ndajín katsꞌen an.
23Ngatꞌa̱ ngayeje kjo̱a̱botíxomaa̱ ngindyi̱ko̱n án kisꞌijña,
kó kjinjín katsꞌée̱n yojona kjo̱a̱kitii̱.
24Kixi̱ kamá an ngindyi̱ko̱n kui,
kó ngiti̱ tjítsꞌenjín an ni xi ndajín.
25Kuíni nga Néná tsꞌéntsjána ni xi tsoboána kjo̱a̱a̱ kjo̱a̱kixi̱na,
ko̱jo kjo̱a̱a̱ xikó tsꞌén tsjie ndsa̱ án.
26Xota̱ xi tjiín kjo̱a̱ni̱ma̱takón, ni̱ma̱ ngatamaa̱ ji,
kó xi tjiín kjo̱a̱kixi̱, kixi̱ ti̱ꞌinje̱ ji.
27Xota̱ xi tsjiee̱, tsi̱ꞌe̱ ti̱ꞌinje̱ ji,
kó xota̱ xi mañaa̱, tajá ti̱ꞌinje̱ ji.
28Jí boá xi ꞌnaxiéꞌé ji xota̱ na̱xi̱ńdá xí kjo̱a̱ni̱ma̱ ndyi̱foaꞌatioo̱,
kó ni̱ma̱kjo̱a̱ niꞌínje̱ ji xota̱ xi nkꞌakon maá yojoo̱.
29Jí boá ndiꞌí xí tsꞌentsíjenná, ji Ne,
Jí boá xi niꞌíntsijíi̱n ngi̱ndie nínga jñó xi foaꞌa an.
30Tsi ji xi ko̱si̱ke̱jení, ka̱mana sa̱ꞌinkjié an xtín jájún,
tsi Ne tsa̱ꞌa̱n xí ko̱síko̱jona, ka̱ma skjítjé an ngo xó.
31Kjo̱a̱a̱ Néná, kixi̱ boá ndi̱ya̱à,
kó tsjie boá eén Néná, kó xota̱ xi ndyi̱koyaa̱ kui eén,
kuí boá xi xikoó ngo ki̱cha̱ xi ꞌbíchjaá ni xi ndajín kjimaa̱ kui.
32Ngatꞌa̱, ꞌyání xi Néná, ja̱ ta̱kuítsí xi Ndi̱a̱ná.
Kó mí ndi̱jo̱je xi tjín ngase tsi kuijín Néná.
33Néná boá xi tsjána ngaꞌniú,
kó kuí boá xi ꞌniú kixi̱ tsꞌén ndi̱yàna.
34Kuí boá xi tsꞌén ndsa̱ko án, xikoó tsi se ndi̱kꞌijñá chjo̱on,
kó kuí boá xi ꞌniú tsꞌénkꞌijñána, nga nínga nkꞌaa̱ botíjña̱ an.
35Kuí boá xi bokoyána tsi̱ꞌe̱ nga fi an kjo̱a̱xcha̱án,
ko̱jo bokoyána tsi̱ꞌe̱ nga tsꞌenkjién án yáchjonyá xi ki̱cha̱ bronsee̱.
36Ti̱ bo̱a̱ ti̱ tsꞌén katseꞌéní ni xi ꞌbíchjaá ni xi ndajín xi tjiín kjo̱a̱ꞌnaxiéꞌáa̱,
kó kjo̱a̱ndàa̱ boá xi je asíko̱jona, nga ꞌniú kjimayandikón ngase jaꞌénna.
37Jí boá xi katseꞌée̱ ngo ngi̱ndie xi tiyá nínga iskjien an ndsa̱ko án,
kó ndsa̱ko án jmíni̱xtjin kjimongajon.
38Kongatji̱ngìi̱ kondra̱na, kó sa̱ꞌinkjié an,
kó kjuinꞌóyájín an ngaskande nga sa̱ꞌinkjié an.
39Jo̱o̱n, sa̱ꞌinkjié an ngayejee̱, kó sa̱ꞌinꞌóo̱n,
tsi̱ꞌe̱ nga ngiti̱ ka̱májiín kjo̱stjíe̱n ngase.
40Ngatꞌa̱ jí boá xi katseꞌéní ngaꞌniú, tsi̱ꞌe̱ nga kjuín án kjo̱a̱xcha̱án,
kó kiniꞌín ji nga kichajá kondra̱na ngindie ndsa̱ko án,
41Kó ti̱ jí boá xi kiniꞌín ji nga kondra̱na ko̱e̱je̱ni nga̱xto̱n,
tsi̱ꞌe̱ nga sa̱ꞌinkjié an xi chꞌoo̱ an.
42Askotsijen nga ngo foaꞌatjiyajoo̱n, kó nde ngojín xi tsꞌaxiéꞌá,
ngaskande Néná tsíchji̱a̱a̱, ta̱nga kui tsintꞌiéjiín.
43Katsꞌenxi̱ ndso̱ko̱a̱n ndso̱ko̱a̱n an xikó maá xa̱a̱ tꞌanangii̱,
kó katsjánié an xikó maá ndásee̱ ndi̱yàtié.
44Jí boá xi akasíke̱jení kjo̱a̱a̱ xota̱ na̱xi̱ńdána xi askjanjo̱na,
kó jí boá xi ngito̱ko̱o̱ na̱xi̱ńdaá kiniꞌínní,
kó xota̱ na̱xi̱ńdá xi nde bejín an, kuí boá xi sa̱ꞌínsénna.
45Ndií xota̱ xi xín nangi chji̱a̱ni, an kotixomáa̱,
kó nga ku̱i̱ntꞌièna, ku̱i̱ntꞌiéꞌénna.
46Xota̱ xi xín nangi chji̱a̱nii̱, ngiti̱ jmí ngaꞌniú kꞌuiéjiín,
kó kjo̱tsiè má nga kjo̱tjoni ngi̱ndie nínga síndoꞌmá.
47¡Tsie ngatamaa̱ Néná! Kó ngatamachikonñé kui xi ndi̱jo̱jena.
Ngachjaninkꞌa kui Néná xi ꞌboxiéꞌána.
48Kui Néná xí tsꞌéngojo ni xi ndajín xi niꞌánjo̱na,
kuí boá xi tsꞌénkꞌíndo xota̱ na̱xi̱ńdaá ngindie ndsa̱ko án.
49Kui Néná xi ꞌboxiéꞌána kjo̱a̱a̱ kondra̱na,
kó nkꞌa ngase tsꞌénkꞌijñána kjo̱a̱a̱ xota̱ xi kondra̱na síndoni.
Jí boá xi kaꞌnaxiéꞌéní ngi̱ya tsja xota̱ xi ꞌniú ndajiín.
50Kuíni nga ji Ne, án boá xi xiyà an kjo̱a̱a̱ ji ngi̱jii̱n na̱xi̱ńdaá,
kó siee só xi sa̱ꞌintsjaà jaꞌée̱n.
51Kuí boá xi achichí tsjatsꞌèn ꞌboxiéꞌá nda̱ ree̱,
kó bokoó kjo̱a̱ni̱ma̱takoón nda̱ xi jaꞌájin kui:
¡Ndabii̱ ko̱jo xota̱ tji̱e̱e̱ ngatsjéni̱xtjin!
Currently Selected:
2 Samuee̱ 22: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
