2 Samuee̱ 21
21
Ndabii̱ ko̱jo xota̱ xi chji̱a̱ni Ngabaóo̱n
1Kui ni̱xtjin jàn nga kisꞌijña Ndabii̱ kisꞌie ngo kjindiá xí ján nó tsꞌandíyaá, kó Ndabii̱ asíyaá Néná kjo̱a̱a̱ kui nii̱, kó Néná, bi̱ katsó: Ta̱ngatꞌanií Sauu̱l nga kjima kui nii̱, ko̱jo kjo̱a̱a̱ kui xtín xota̱ xi tsꞌenkꞌién ini̱ma̱a̱, ngatꞌa̱ katsꞌénkꞌién xota̱ xi chji̱a̱ni Ngabaóo̱n.
2Kósꞌe̱ nda̱ ree̱ tsíchji̱a̱a̱ xota̱ Ngabaóo̱n, kó tsíchji̱a̱jo. Xota̱ Ngabaóo̱n jmí tsi xota̱ Israee̱l chji̱a̱ni, ki̱a̱ chji̱a̱ni xota̱ Amoo̱r xi tsꞌangii̱, kui xi xota̱ Israee̱l ja̱bo̱a̱ je katsóyàtjoón nga jmí ni sa̱ꞌínjo̱jín, ta̱nga Sauu̱l kamámejeén katsꞌénkꞌién kui xotaa̱ ta̱ngatꞌanii̱ nga chi̱ni̱ kamá kjo̱a̱a̱ xota̱ Israee̱l ko̱jo xota̱ Jundáa̱.
3Kó Ndabii̱, bi̱ katsoó xota̱ xi chji̱a̱ni Ngabaóo̱n:
—Mí xí ka̱ma sa̱ꞌin an nganda tsa̱jún, kó mí ni xi ka̱ma tsjajnúꞌun tsi̱ꞌe̱ nga si̱ꞌanchikonñéjnú ngi̱ndie xi tsi̱ꞌe̱ Néná.
4Kó xota̱ Ngabaóo̱n, bi̱ katsoó:
—Jmí ndasenjínjne̱ to̱ntiboa ko̱jo tsi to̱nsinié ko̱jo xota̱ ndiꞌaa̱ Sauu̱l, ti̱nde ji̱njín tsoboájne̱ nga tjín xota̱ Israee̱l xi si̱ꞌankꞌienjne̱.
Kó Ndabii̱, bi̱ katsó:
—Bo̱a̱ sa̱ꞌinjo̱jnúꞌun xikó kiꞌmíjnú jún.
5Kó kui jaá, bi̱ katsoó nda̱ ree̱:
—Kui nda̱ xi katsꞌénkjiéjne̱, kó katsꞌén kjo̱a̱ꞌniú nga si̱ꞌankjiejne̱, tsi̱ꞌe̱ nga nde ngojín ji̱n xi kꞌuíndo ki̱a̱ ngi̱ya tꞌanangii̱ na̱xi̱ńdá Israee̱l, 6mejénjne̱ nga si̱ꞌankꞌasꞌienjne̱ yito jáxíꞌín xi ndií kui xotaa̱, kó ki̱a̱ kjuienboáꞌájne̱ ngindyi̱ko̱n Néná, ki̱a̱ nangi Ngabaa̱ xi tsi̱ꞌe̱ Sauu̱l, kui nda̱ xi Néná jaꞌájii̱n.
Kó bi̱ katsó nda̱ ree̱:
—Án boá xi sa̱ꞌinkꞌasꞌienjnúꞌun. 7Ta̱nga nda̱ ree̱ ni̱ma̱ kamaá Mefii̱-Bosee̱t, ndií Jonataa̱n, ndíndeè Sauu̱l, ta̱ngatꞌanii̱ nga Ndabii̱, ko̱jo Jonataa̱n ndií Sauu̱l katsjaá tsꞌoa nga índa ngo ni nga katsꞌénkjién jaꞌeén Néná. 8Kósꞌe̱ nda̱ ree̱ iskjíbé nga jó ndií na̱ Rispaa̱, tsa̱kji̱ín na̱ Ajaa̱, kui xi tsi̱ꞌe̱ Sauu̱l kamá, kui xi ꞌmí Armonii̱ ko̱jo Mefii̱-Bosee̱t, ko̱jo nga ún ndií na̱ Mikaa̱l tsa̱kji̱ín Sauu̱l, kui xi tsi̱ꞌe̱ Andriee̱l, ndií Barsilai̱ xi chji̱a̱ni nangi Meolaa̱t kamá, 9kó katsꞌénkꞌasꞌien ngi̱ya tsja xota̱ xi chji̱a̱ni Ngabaóo̱n, kó kui xotaa̱ ki̱a̱ yejénboaꞌa nga katsꞌénkjiesón ki̱a̱ nga̱soón na̱xi̱i̱ ngindyi̱ko̱n Néná, kó bo̱a̱ tsꞌén nijan jesón nga yito kui jaá, kui xi jesón ni̱xtjin tjón nga kamá xchá ni tjieé, kjiꞌanga ítsꞌi̱yanii̱ nga kamáxchaá sebandaa̱.
10Kósꞌe̱ na̱ Rispaa̱, tsa̱kji̱ín Ajaa̱ iskjíbé ngo ńjño tokjuie, kó yítie nga̱soón ndi̱jo̱jee̱, ndeskande koó nga ítsꞌi̱yanii̱ nga kamáxchá ni tjieé, ngaskande nga ixó stsé ki̱a̱ ndiꞌakꞌajmii̱, kó katsjandièjiín nga ngo ni̱sie jachó nínga kjiꞌi ni tjieé, ti̱nde katsjandièjiín nga ngo cho̱ tamá jachó nga jñoó.
11Kó kjiꞌanga kiꞌmíyaà Ndabii̱ ni xi katsꞌén na̱ Rispaa̱ tsa̱kji̱ín Ajaa̱, kui xota̱chjo̱on xí kisꞌijñajo̱ Sauu̱l, 12Ndabii̱ kijí, kó iskjíbé ńdaa̱ Sauu̱l ko̱jo ńdaa̱ Jonataa̱n, ndií kui nda̱a̱, kui xi chji̱a̱ni Jabee̱, nangi Ngalaa̱nd, kui xi kiniꞌánchejé ki̱a̱ ndi̱tse̱e̱n Bee̱t-Saa̱n, nínga xota̱ Filisteaa̱ yejénboaꞌa kui jaá, ni̱xtjin nga xota̱ Filisteaa̱ katsꞌénkꞌién Sauu̱l ki̱a̱ nangi Ngilboa̱.
13Kó Ndabii̱ kijíjo̱ ńdaa̱ Sauu̱l ko̱jo ńdaa̱ Jonataa̱n, ndií kui nda̱a̱, kó ti̱ jaꞌátikó ńdaa̱ xota̱ xi ikjienboaꞌaa̱ nga, 14kó ki̱a̱ yínijín ńdaa̱ Sauu̱l, ko̱jo ńdaa̱ Jonataa̱n ndií kui nda̱a̱, ki̱a̱ nangii̱ xota̱ tji̱e̱e̱ Benjaa̱, ki̱a̱ na̱xi̱ńdáꞌniú Selaa̱, ki̱a̱ nga̱tsjo̱ó Sii̱ kui xi na̱ꞌmii̱ kamá, kó bo̱a̱ tsꞌén kiniꞌán ngayeje ni xi katsó nda̱ ree̱. Jaskan ngije kamá kui nii̱, Néná xió katsꞌénkꞌijñá tꞌanangii̱.
Nga kiniꞌánjo̱ kjo̱a̱xchán xota̱ Filisteaa̱
15Kó já Filisteaa̱ ti̱ askjanjo̱ nginí xota̱ Israee̱l, kó Ndabii̱ ko̱jo já mosoo̱ kijíkjánjo̱ xota̱ Filisteaa̱, kó tji̱e̱nga ndyi̱kjánjo̱ kui xotaa̱, Ndabii̱ jenda. 16Kó Isbii̱-Benoo̱b, ngo nda̱ xi xota̱ tji̱e̱e̱ já xí ꞌniú nkꞌa ko̱jo xi ꞌniú yiꞌi kamaá, xi tsaꞌa ngo yáyojó xi ki̱cha̱ bronse̱, xi tsꞌatio kantié kilo̱ kamá é, kó ngo ki̱cha̱ndojó tja̱tsi̱e̱ kjitꞌaa̱ ndáyaá, kó kui nda̱a̱ kamámejeén katsꞌénkꞌién Ndabii̱, 17ta̱nga Abisaii̱, ndií Sarbiaa̱ asíko̱jo, kó katsꞌénꞌoón ko̱jo katsꞌénkꞌién nda̱ Filisteaa̱. Kósꞌe̱ já xí nijan tjimájo̱ Ndabii̱ katsja tsꞌoa nga bi̱ katsó: Nginijánjín kꞌuínje̱jne̱ kjo̱a̱xchán kꞌi̱e̱e̱, tsájmi̱ si̱ꞌankꞌojnú ndiꞌí xí tsꞌentsíjee̱n xota̱ Israee̱l.
Nga ikixkánjo̱ xota̱ xi ꞌniú nkꞌa ko̱jo xi ꞌniú yiꞌii̱
(1Kr 20:4-8)
18Jaskan ngije kamá kui nii̱, ti̱ kisꞌie nginí ingo kjo̱a̱xchán ki̱a̱ nangi Ngoo̱b nga ikixkánjo̱ xota̱ Filisteaa̱, kó Sibekaii̱ nda̱ Usaa̱, katsꞌénkꞌién Saa̱f, kui xi xota̱ tji̱e̱e̱ Rafaa̱ chji̱a̱ni, xota̱ xi ꞌniú nkꞌa ko̱jo xi ꞌniú yiꞌi kamaá.
19Ingo ndi̱yà ti̱ kisꞌie nginí kjo̱a̱xchán ki̱a̱ nangi Ngoo̱b nga askjanjo̱ xota̱ Filisteaa̱, nínga Elanaa̱n, ndií nda̱ xi ꞌmí Jaare̱-Orengii̱n xi chji̱a̱ni na̱xi̱ńdáꞌniú Belee̱n, katsꞌénkꞌién nda̱ xi ꞌmí Ngoliaa̱t nda̱ Jee̱t, kui xi yáyojó xi tsaꞌa é kamá xikó maá ngo yáńdo xi niꞌándajo̱ni ńjño.
20Jaskan ti̱ kisꞌie ingo kjo̱a̱xchán ki̱a̱ nangi Ngaa̱t, nínga kisꞌijña ngo nda̱ xi achichí nkꞌa ko̱jo xi ꞌniú je kamá, xi tiejó xtín tsja ko̱jo tiejó xtín sé kisꞌiee̱, kan nijón kamá ngayejee̱, kó ti̱ xota̱ tji̱e̱e̱ Rafaa̱ kui já xí ꞌniú yiꞌi ko̱jo xi ꞌniú nkꞌa kamá nga. 21Kó kjiꞌanga kui nda̱a̱ katsꞌénkjaán xota̱ Israee̱l, Jonataa̱n ndií Simeaa̱ ntsꞌi̱e̱ Ndabii̱, katsꞌénkꞌién kui nda̱a̱.
22Nga nijón kui jaá xi ndií Rafaa̱ kamá, kui xota̱ xi ꞌniú nkꞌa ko̱jo xi ꞌniú yiꞌi kamá ki̱a̱ nangi Ngaa̱t, kó ngi̱ya tsja Ndabii̱ ixó, kó já mosoo̱ kui katsꞌénkjiesón.
Currently Selected:
2 Samuee̱ 21: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
