2 Samuee̱ 20
20
Sebaa̱ askjanjo̱ Ndabii̱
1Ta̱nga ki̱a̱ kisꞌijña ngo nda̱ xi ta̱nisién ndajiín xi ꞌmí Seba̱, ndií Bikrii̱, nda̱ xi chji̱a̱ni xota̱ tji̱e̱e̱ Benjaa̱, kui nda̱a̱ katsꞌénkjanie tjioo̱, kó bi̱ katsó:
Jmí nijínjne̱ kjo̱a̱a̱ Ndabii̱, ti̱nde jmí ni sa̱kójínjne̱ kjo̱a̱a̱ ndií Isaii̱.
¡Jún xota̱ Israee̱l, tangínjnú nga ngo nga ngojnú ki̱a̱ ndiꞌa nínga tindyiónjnú!
2Kósꞌe̱ ngayeje já Israee̱l ngiti̱ kijítji̱ngíjiín Ndabii̱, kó ki̱a̱ kijítji̱ngii̱ Sebaa̱, ndií Bikrii̱, ta̱nga já xí chji̱a̱ni Jundáa̱ ꞌniú kamáꞌniátakón nga ki̱a̱ kijítji̱ngii̱ nda̱ ree̱, ndeskande ndejèꞌ Jorndaa̱n ngaskande na̱xi̱ńdáꞌniú Jerusale̱n.
3Kó ngije jachó Ndabii̱ ndiꞌaa̱ ki̱a̱ na̱xi̱ńdáꞌniú Jerusale̱n, nda̱ ree̱ iskjíbé nga tie kui ínchjín xí kisꞌińdojo̱ nga askoo̱n ndiꞌaa̱, kó ngo ndo̱bo̱a̱yà índo, kó ndatsi katsjaá nichinie, ngiti̱ kisꞌiejo̱jín kui ínchjiín, kó ki̱a̱ kisꞌińdoꞌniú ngaskande nga jesón, ko̱jo ínchjín kꞌán xi je kꞌien xi̱ꞌii̱n kamá ngatsjéni̱xtjin.
4Sꞌe̱ jaskan nda̱ ree̱, bi̱ katsoó Amasaa̱:
—Tꞌíkikímání ngayeje já xí chji̱a̱ni Jundáa̱ ngotꞌe̱ ján ni̱xtjii̱n, kó kꞌi̱e̱ ndibéje̱ ji kꞌi̱e̱e̱.
5Kó Amasaa̱ kijí nga katsóyaà xota̱ Jundáa̱, ta̱nga tsie ngase tsꞌandíyaá kjo̱a̱a̱ kui ni̱xtjin xi kiꞌmií. 6Kuíni nga Ndabii̱, bi̱ katsoó Abisaii̱:
—Sebaa̱, ndií Bikrii̱, tsie ngase ni xi ndajín sa̱ꞌínjo̱ná ngotꞌe̱ ta̱bo̱a̱jiín Absaloo̱n, kuíni nga tꞌenje̱ ji já mosoo̱ ndi̱a̱a̱, kó tꞌentji̱ngìi̱, ngatꞌa̱ tsájmi̱ sa̱ko̱ó na̱xi̱ńdáꞌniú xi tjiín xó xí tjíchjáꞌyáni, kó kuí boá xi sa̱ꞌínniꞌínná ngijee̱.
7Kósꞌe̱ kijítji̱ngii̱ kui nda̱a̱ já xí chji̱a̱ni Joaa̱b, ko̱jo já sereteoo̱, ko̱jo já peleteoo̱, ko̱jo ngayeje já xí chꞌokon ngasee̱, kó jatjoni na̱xi̱ńdáꞌniú Jerusale̱n nga kijítji̱ngii̱ Sebaa̱, ndií Bikrii̱. 8Kó nga síndo ngije makjachó má nínga tikón ndi̱jo̱je xi tikón ki̱a̱ Ngabaóo̱n, Amasaa̱ ki̱a̱ jachó, kó Joaa̱b ngo ńjño xi fotꞌa nga̱xton tsꞌényajá, kó nga̱són ńjñoo̱ ngo ki̱cha̱ndojó kjitꞌaa̱ ki̱a̱ xtji̱e̱e̱n ndáyaá, kó kui ki̱cha̱ndojoó tsꞌákangií tji̱e̱nga tsꞌénfí. 9Kó Joaa̱b bi̱ katsoó Amasaa̱ nga asíyaá:
—A tjiínri kjo̱a̱xió ji ntsꞌie. Kó Joaa̱b tsja kixi̱ iskjíbéní tsja̱ ngiꞌboa Amasaa̱ tsi̱ꞌe̱ nga ngo ndsó tsja̱á tꞌanijon katsaki, 10ta̱nga Amasaa̱ kamábejín ki̱cha̱ yojó xi tjiyátsjà Joaa̱b xi ingo tsja, kó Joaa̱b ki̱a̱ yeꞌeé ki̱cha̱ xtji̱e̱e̱n xi ma uún ńdanisee̱n, kó ixóngí má tꞌanangii̱ tsiꞌee̱, kó nde ngiti̱ yeꞌéjiín ingo ndi̱yà nga tsꞌáka sꞌe̱ kꞌien.
Sꞌe̱ jaskan Joaa̱b ko̱jo ntsꞌi̱e̱ xi ꞌmí Abisaii̱, kijítji̱ngii̱ Sebaa̱, ndií Bikrii̱. 11Kó ki̱a̱ tiña kisꞌijña ngo nda̱ mosoo̱ Joaa̱b xi bi̱ katsoó: —Ta̱ꞌyaní xi fíni kjo̱a̱ndaa̱ Joaa̱b ko̱jo Ndabii̱, ki̱a̱ ngatjítji̱ngii̱ Joaa̱b. 12Kó Amasaa̱ ki̱a̱ kjiꞌijñajin jiín tjítsakjájón ki̱a̱ ngamasiee̱n ndi̱ya̱à, kó nga kamábe kui nda̱a̱ nga ngayeje xota̱ xi jaꞌa ki̱a̱a̱ kixindyia xió, jaꞌáxín Amasaa̱ ki̱a̱ ngi̱ya ndi̱ya̱à, sꞌe̱ ki̱a̱ kijíjo̱ ngi̱jin kꞌijñá jàn, kó ngo ńjño yíꞌmá, ngatꞌa̱ kamábe nga ngayeje xota̱ xi ki̱a̱ jaꞌaa̱, kixindyia xió nga askotsijee̱n nínga kjiꞌijña kui nda̱a̱. 13Ngije kachjeꞌéxínni ki̱a̱ ngi̱ya ndi̱ya̱à, ngayeje xota̱ jáxíꞌiín kijítji̱ngii̱ Joaa̱b tsi̱ꞌe̱ nga ko̱ngatji̱ngii̱ Sebaa̱, ndií Bikrii̱.
14Kó jaꞌa ki̱a̱ nínga síndo ngayeje tji̱e̱e̱ xota̱ Israee̱l ngaskande Abee̱-Bee̱t-Maakaa̱, kó ngayeje xota̱ Barii̱n kamátikó, kó ti̱ kijítji̱ngii̱ kui nda̱a̱ nga.
15Kó nga jachó íchjáꞌyá ki̱a̱ Abee̱-Bee̱t-Maakaa̱, kó ngo xó katsꞌénda nga̱ndee̱ kui na̱xi̱ńdáꞌniuú, kó ngayeje xota̱ xi nijan kisꞌińdojo̱ Joaa̱b yeꞌétꞌaa̱ kui xoó tsi̱ꞌe̱ nga kꞌo̱jmi.
16Kósꞌe̱ ngo xota̱chjo̱on xí kjínkón askjandáyà ngi̱jii̱n na̱xi̱ńdáꞌniuú, nga bi̱ katsó:
—Ndaꞌyájnú, ndaꞌyájnú, ngo kjo̱a̱nda míꞌájnúꞌun, bo̱a̱ tꞌínjnúu̱ Joaa̱b nga kji̱ndi̱bá kꞌi̱e̱e̱, tsi̱ꞌe̱ nga kuichjiájo an.
17Kó kjiꞌanga kijíkóntiñaa̱ kui naa̱, bi̱ katsoó kui naa̱:
—A jí boá xi Joaa̱b ji.
Kó bi̱ katsó Joaa̱b:
—Án boá. Kó kui naa̱ bi̱ katsó:
—Ndaꞌyé ji ni xi tsó kui na̱ mosòo̱.
Kó bi̱ katsó Joaa̱b:
—Ntꞌie an.
18Kósꞌe̱ kui naa̱, bi̱ katsó nginí nga tsíchji̱a̱:
—Ni̱xtjin xchá jàn bi̱ tsó xotaa̱: Ni̱xtjin xchá jàn, bi̱ katsó xotaa̱: Tsi tjín xí skótꞌasón ngo ni, ki̱a̱ ngakotꞌasón ki̱a̱ na̱xi̱ńdáꞌniú Abee̱. Kó bo̱a̱ tsꞌén katsꞌénkjietꞌani ta̱jmì niní. 19Ñá boá xota̱ xi achichí xió ko̱jo xi ma maꞌniátakón ngase xi tjín ki̱a̱ na̱xi̱ńdá Israee̱l, ta̱nga ji mejeén si̱ꞌinkjie ji ngo na̱xi̱ńdáꞌniú xí xikoó tsi na̱aa̱n na̱xi̱ńdá Israee̱l ma. Ánní nga mejeén si̱ꞌinkjie ji ni xi je tsi̱ꞌe̱ Néná.
20Kó Joaa̱b, bi̱ katsó:
—Jmí ni̱xtjin bo̱a̱ ka̱ma, jmí ni̱xtjin nga ka̱ma kui nii̱ nga an sa̱ꞌinkjié an, ko̱jo nga sa̱ꞌinkjatsón an. 21Jmí tsi bo̱a̱ kjiꞌi kui nii̱. Ngo nda̱ xi chji̱a̱ni xtji̱e̱e̱n na̱xi̱i̱ xota̱ tji̱e̱e̱ Efraii̱n xi ꞌmí Sebaa̱, ndií Bikrii̱, xi je iskjininkꞌa tsja kondraa̱ nda̱ re Ndabii̱, ta̱kuítsí kui nda̱a̱ xi ti̱ꞌinkꞌasꞌinní, sꞌe̱ kjo̱tjo an kui na̱xi̱ńdáꞌniuú. Kósꞌe̱ kui naa̱, bi̱ katsoó Joaa̱b:
—To̱ko̱ kui nda̱a̱ ki̱a̱ ku̱i̱chíjminii̱ ndeskande xoó kui na̱xi̱ńdáꞌniuú.
22Jaskan kui xota̱chjo̱on kijí ngayeje na̱xi̱ńdá nga katsꞌénkjién kjo̱a̱kjínkón xi kisꞌiee̱, sꞌe̱ ikichásén to̱ko̱ Sebaa̱, ndií Bikrii̱, sꞌe̱ ki̱a̱ akjajmitꞌaa̱ Joaa̱b.
Kósꞌe̱ kui nda̱a̱ katsꞌénkjanie tjioo̱, kósꞌe̱ jatjoni kui na̱xi̱ńdáꞌniuú, kó nga ngo nga ngo kijí ndiꞌa nínga síndo. Kó Joaa̱b kijí nginí na̱xi̱ńdáꞌniú Jerusale̱n nínga tikón nda̱ ree̱.
Xota̱ xi asíko̱jo Ndabii̱
(2Sa 8:16-18; 1Kr 18:15-17)
23Kó bo̱a̱ tsꞌén Joaa̱b kui kisꞌijñatjoón ngayeje jájuún Israee̱l, kó Benaiyaa̱, ndií Joyandaa̱ kui kisꞌijñatjoón xota̱ sereteoo̱ ko̱jo xota̱ peleteoo̱.
24Kó Andoraa̱n kamá ngito̱ko̱ xi foaꞌáꞌyá to̱n xi machjítjé nii̱, kó Josafaa̱t, ndií Ailuu̱nd, kuí boá xi kamá nda̱ xi katsóyà ni xi kamá kui ngi̱ndiee̱.
25Sebaa̱ kamá nda̱ chji̱ni̱e̱xo̱jo̱o̱n, kó Sandoo̱k, ko̱jo Abiataa̱r kamá já chináꞌmii̱.
26Kó Iraa̱, nda̱ xi Jaii̱r, kamá chináꞌmii̱ ngito̱ko̱o̱ Ndabii̱.
Currently Selected:
2 Samuee̱ 20: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
