2 Samuee̱ 19
19
1Kó tjín xí bi̱ katsoó Joaa̱b:
—Nda̱ ree̱ achichí tsꞌénkjandá, kó ndasen tikón ta̱ngatꞌanii̱ Absaloo̱n. 2Kó kui ni̱xtjii̱n nga kiniꞌán kui kjo̱a̱xcha̱án, kjo̱a̱ndasee̱n ngayeje xota̱ na̱xi̱ńdaá kamá, ngatꞌa̱ tsintꞌié xotaa̱, nga nda̱ ree̱ achichí ndasen tikón kjo̱a̱a̱ ndií. 3Kó kui ni̱xtjii̱n xota̱ na̱xi̱ńdaá si̱e̱n si̱e̱n tsꞌasꞌien na̱xi̱ńdáꞌniuú, xikó má tsꞌén nga ꞌma ko̱jo nga soboá maá xotaa̱ nga monga ndikón nga ma ngo kjo̱a̱xcha̱án. 4Ta̱nga nda̱ ree̱ yíꞌmá kje̱n, kó achichí ꞌniú askjandáyà nga bi̱ katsó:
—¡Ji xi ndína Absaloo̱n, Ji Absaloo̱n, ji xi ndína, ji xi ndína!
5Kósꞌe̱ Joaa̱b tsꞌasꞌien ndiꞌa nínga tikón nda̱ ree̱, kó bi̱ katsoó:
—Ngotꞌe̱ ꞌne̱, achichí kjo̱a̱soboá tiboeꞌée̱ ngayeje mosòo̱, kui xi kui ni̱xtjii̱n tsꞌaxiéꞌá kjo̱a̱mindyiòo̱n, ko̱jo tsi̱ꞌe̱ ndí xíꞌíi̱n, ko̱jo tsi̱ꞌe̱ ndí ínchjíi̱n, ko̱jo tsi̱ꞌe̱ ínchjíi̱n, ko̱jo kjo̱a̱mindyioo̱n ínchjín xí tindyinje̱ ji, 6nga tjó kjimaa̱ xota̱ xi chꞌoo̱ ji, kó nga chꞌoo̱ xota̱ xi tjoó ji, ngatꞌa̱ ngotꞌe̱ ꞌne̱, jè akake ji, nga jmí ndasénjiín já xí botixómaá, ko̱jo mosòo̱, ngatꞌa̱ ngotꞌe̱ je akake cha̱n cha̱n ji nga tsi tikón Absaloo̱n, kó tsi ngayeje ji̱n xi akaya ji̱n, tsjara̱ kamaá.
7Ti̱sítji̱n ji ngotꞌe̱ ꞌne̱, tji̱taxi̱e̱ ji ndi̱tsee̱n, kó nda tsꞌén ndokjo̱e̱je ji já mosoo̱, ngatꞌa̱ ta̱ngatꞌanii̱ Néná nga tsi ku̱i̱taxi̱e̱jín ji, nde ngojín xi kꞌo̱ngi kui ni̱xtji̱e̱e̱n. Kó kui nii̱ xi ꞌniú ndajín ngase ka̱maa̱ ta̱bo̱a̱jiín ngayeje ni xi ndajín xi je kamaá ndeskande koó nga xo̱ngò ji, ngaskande ngotꞌe̱.
8Kósꞌe̱ nda̱ ree̱ jastjíe̱n, kó ki̱a̱ kisꞌijña tꞌa nga̱ntjo̱a̱a̱, kó kiꞌmíyaà ngayeje xota̱ na̱xi̱ńdaá nga bi̱ kiꞌmií:
—¡Ki̱a̱ tikón nda̱ ree̱ ki̱a̱ tꞌa nga̱ntjo̱a̱a̱! Kó ngayeje xota̱ na̱xi̱ńdaá jachó ngindyi̱ko̱n nda̱ ree̱, ta̱nga xota̱ Israee̱l ja̱bo̱a̱ je tsanga má nga kijí ndiꞌa nínga síndo.
Ndabii̱ kijí nginí na̱xi̱ńdáꞌniú Jerusalee̱n
9Kó ngayeje xota̱ na̱xi̱ńdaá askjotíjo̱ xkjín ngayeje tji̱e̱e̱ xota̱ Israee̱l, nga bi̱ katsó:
Nda̱ ree̱ kuí boá xi tsꞌaxiéꞌáná ngi̱ya tsja kondra̱ná, kó kuí boá xi tsꞌaxiéꞌáná ngi̱ya tsja xota̱ Filisteaa̱ nga, ta̱nga ngotꞌe̱ ꞌne̱ tsangani kui na̱xi̱ńdaá ngatꞌa̱ katsakjónnií Absaloo̱n. 10Kó Absaloo̱n, kui nda̱ xi ji̱n kachjeꞌéjinjne̱ nga kui xi ko̱tíxomajne̱, je kꞌien ngi̱jii̱n kjo̱a̱xcha̱án. Kó kuíni nga, míkjo̱a̱a̱ nga jmí ni ndyi̱ꞌmìjínjnú kjo̱a̱a̱ nga chjiéngá kji̱ndi̱bájo̱ꞌoyá nginí nda̱ ree̱.
11Kó nda̱ re Ndabii̱ katsangiya chináꞌmi Sandoo̱k ko̱jo Abiataa̱r, nga bi̱ katsoó:
—Ndókjo̱a̱jojnú xota̱ xi xchaá na̱xi̱ńdá Jundáa̱, kó bi̱ tꞌínjnúu̱: Ánní nga jún kon xi kju̱i̱e̱tꞌanijnú nga kji̱ndi̱bájo̱ꞌoyá nginíjnú nda̱ ree̱ ki̱a̱ ndiꞌaa̱, ngatꞌa̱ ngayeje ni xi tsíchji̱a̱ xota̱ Israee̱l je jachótꞌaa̱ nda̱ ree̱ tsi̱ꞌe̱ nga ko̱e̱je̱joꞌoyá nginí ndiꞌaa̱. 12Jún ntsꞌié án májnú jún, jún boá xi ńdana ko̱jo xi yojona. Kósꞌe̱, míkjo̱a̱a̱ nga jún boá xi kju̱i̱e̱tꞌani ka̱majnú nga kongínjo̱ꞌoyájnú nda̱ ree̱.
13Kó bi̱ tꞌínjnúu̱ Amasaa̱ nga:
—A jijín bo̱a̱ xí ńdana ko̱jo xi yojona ji. Néná ngatsꞌénjéna, kó ngaskande ngatásón ngasee̱ ni, tsi jijín xi ka̱ma ji ngito̱ko̱o̱ jájún ngindyikón án ngatsjéni̱xtjin, nga ji xi ku̱i̱ndyin ji ngajoo̱ Joaa̱b.
14Kó bo̱a̱ tsꞌén ta̱ ngo ini̱ma̱ katsꞌén ngayeje já xí chji̱a̱ni Jundáa̱, kósꞌe̱ katsangiyaa̱ én nda̱ ree̱, nga bi̱ ka̱tso̱o̱: Ndibéꞌóyé nginí ji ko̱jo ngayeje mosòo̱. 15Kósꞌe̱ nda̱ ree̱ kijíꞌoyá nginí, kó kijí ngaskande ndejèꞌ Jorndaa̱n. Kó xota̱ tji̱e̱e̱ Jundáa̱ kijí Ngilngaa̱l tsi̱ꞌe̱ nga kijíkjaꞌáyíndi̱yà nda̱ ree̱, ko̱jo tsi̱ꞌe̱ nga jaꞌatio ndejèꞌ Jorndaa̱n.
16Kó Simeii̱, ndií Ngeraa̱, nda̱ xi xota̱ tji̱e̱e̱ Benjaa̱, kui xi chji̱a̱ni nangi Baurii̱n, tsá katsꞌeén yojoo̱ kó kijíjo̱ já xí chji̱a̱ni Jundáa̱ nga kijíkjaꞌáyíndi̱yà nda̱ re Ndabii̱. 17Kó nijan kijíjo̱ ngo mi̱ jáxíꞌín xi chji̱a̱ni xota̱ tji̱e̱e̱ Benjaa̱, ti̱ kijí Sibaa̱, nda̱ mosoo̱ ndiꞌaa̱ Sauu̱l, kó jachójo̱ nga tjiꞌún ndií, ko̱jo kan moso̱ xi síndojo̱, kui jaá tsá jaꞌatio ndejèꞌ Jorndaa̱n ngindyi̱ko̱n nda̱ ree̱. 18Kó jaꞌatio ki̱a̱ ngi̱ndie nínga bitjatioó, tsi̱ꞌe̱ nga asíko̱jo xota̱ ndiꞌaa̱ nda̱ ree̱, tsi̱ꞌe̱ nga sa̱ꞌín ni xi nda kui nda̱a̱. Kósꞌe̱ Simeii̱, ndií Ngeraa̱, asiéntikoó ngaskande nga kisitꞌaa̱ xtjien tꞌanangii̱ ngindyi̱ko̱n nda̱ ree̱ ngije kjo̱a̱ꞌatio ndejèꞌ Jorndaa̱n, 19kó bi̱ katsoó nda̱ ree̱:
—Ngata̱ ánjín tsꞌénkaꞌána ngo jé ndi̱a̱na, kjo̱a̱a̱ ngo ni xi ndajín xi katsꞌen an, ti̱nde ngata̱ foaꞌátsjienjiín ni xi ndajín xi katsꞌén kui mosòo̱, kjiꞌanga jatjoni na̱xi̱ńdáꞌniú Jerusale̱n nda̱ re xi ndi̱a̱na. Ngata̱ ki̱a̱jín boaꞌaxki̱ nda̱ ree̱ kui nii̱. 20Ngatꞌa̱ kui xi mosòo̱, be boá nga katsꞌenjé, kuíni nga kꞌi̱e̱ jéꞌe̱ an ngotꞌe̱, án boá xi tjón jéꞌe̱ an ngi̱jii̱n xota̱ tji̱e̱e̱ Kosiee̱, tsi̱ꞌe̱ nga kji̱ndi̱bá an nga jéꞌe̱kjaꞌayíndi̱yà án nda̱ ree̱ kui xi ndi̱a̱na.
21Ta̱nga Abisaii̱, ndií Sarbiaa̱, bi̱ katsó:
—A chjiénjín nga si̱ꞌankꞌien Simeii̱ ta̱ngatꞌanii̱ nga chꞌo katsoó nda̱ xi jaꞌájin Néná.
22Kósꞌe̱ Ndabii̱, bi̱ katsó:
—Mí ni xi be an kjo̱a̱a̱ jún, ndií na̱ Sarbiaa̱, tsi̱ꞌe̱ nga ngotꞌe̱ ꞌne̱ kondra̱na kjimajnú jún. A tjín xí chjiéngá ko̱yà ngotꞌe̱ ki̱a̱ na̱xi̱ńdá Israee̱l. A bejín an nga ngotꞌe̱ má bo̱a̱ nga an xi ree̱ na̱xi̱ńdá Israee̱l.
23Kó nda̱ ree̱, bi̱ katsoó Simeii̱:
—Ko̱yèjín ji. Kó katsjaá tsꞌoa nda̱ ree̱.
24Kó ko̱jo Mefii̱-Bosee̱t, ndií Sauu̱l kijíjaya nga kijíkjaꞌáyíndi̱yà nda̱ ree̱ nga, kó nde kji̱e̱ moniejónjín sé, ti̱nde kji̱e̱ botiejín tsja̱ ngiꞌboa, ti̱nde kji̱e̱ moniejónjín ńjñoo̱, ndeskande ni̱xtjin nga jatjo nda̱ ree̱, ngaskande ni̱xtjin nga kisꞌiee̱ kjo̱a̱xió nga jachó nginí. 25Kó kjiꞌanga jachó Mefii̱-Bosee̱t ki̱a̱ na̱xi̱ńdáꞌniú Jerusale̱n nga kijíkjaꞌáyíndi̱yà nda̱ ree̱, nda̱ ree̱, bi̱ katsoó:
—Ánní nga kꞌinje̱jínní jí Mefii̱-Bosee̱t.
26Kó bi̱ katsó Mefii̱-Bosee̱t:
—Ji ndi̱a̱, ji xi rena, kjo̱a̱a̱ nga moso̱na tsꞌenṉcha̱jona, ngatꞌa̱ mosòo̱ bi̱ katsó: Ngo bórró kꞌuijñánda an, tsi̱ꞌe̱ nga kotíjña̱sóo̱n nga kjuín án nínga nda̱ ree̱, ngatꞌa̱ kui mosòo̱ fí ni̱ma̱tꞌa boá. 27Ta̱nga kui índisotaꞌin kui mosòo̱ ngindyikin ji nda̱ re, ji xi ndi̱a̱na, ta̱nga ji nda̱ re, xikónií tsi ngo ndítsjiee̱ Néná jí. Kuíni nga ta̱sá ti̱ꞌin ji ni xi nda bee takín ji. 28Ngatꞌa̱ ndatsi ngayeje xota̱ ndiꞌaa̱ na̱ꞌmina chjiéngá si̱ꞌankꞌien ngindyikin ji nda̱ ree̱ kui xi ndi̱a̱na, ta̱nga jí boá xi ikꞌíjñí ji kui mosòo̱ ngi̱jii̱n xota̱ xi síndotꞌa yámíxa̱a̱ ndiꞌáa̱, kó mí kjo̱a̱nda xi tjínna an nga nga ka̱ma ngase kuíꞌáa̱ ngo ni nda̱ ree̱.
29Kó nda̱ ree̱, bi̱ katsó:
—Míkjo̱a̱a̱ nga to̱kó tindokjo̱e̱ ngase ji kjo̱a̱a̱ kui nii̱. Jè bo̱a̱ kixian an nga ji ko̱jo Sibaa̱ ko̱kjangajnú tꞌanangijnú.
30Kó Mefii̱-Bosee̱t, bi̱ katsoó nda̱ ree̱:
—Kui ngakjíbé ngayejee̱, ngatꞌa̱ jè xió jeꞌe nginí ndiꞌàa̱ nda̱ ree̱, kui xi ndi̱a̱na.
Barsilai̱ katsꞌénkixotꞌa Ndabii̱
31Kó Barsilai̱, nda̱ xi chji̱a̱ni Ngalaa̱nd, kjindibájayani ki̱a̱ Rogelii̱n, kó nijan jaꞌatiojo̱ nda̱ ree̱ ki̱a̱ ndejèꞌ Jorndaa̱n, tsi̱ꞌe̱ nga ki̱a̱ ndejèꞌ Jorndaa̱n katsꞌénkixotꞌa. 32Kó Barsilai̱ jè ꞌniú xchá kamá, je jachó ichítié ko̱jo kantié noó, kó kuí boá xi katsjaá nichinie nda̱ ree̱ kjiꞌanga kisꞌijña ki̱a̱ nangi Maanaii̱n, ngatꞌa̱ achichí cho̱n kamá kui nda̱a̱.
33Kó nda̱ ree̱, bi̱ katsoó Barsilai̱:
—Ndibé jí nínga tikòn an, kó án tsjaa nichinie ki̱a̱ na̱xi̱ńdáꞌniú Jerusale̱n.
34Ta̱nga Barsilai̱, bi̱ katsoó nda̱ ree̱:
—Kótjín ni̱xtjin kotíjña̱ ngase an nga̱sondie, tsi̱ꞌe̱ nga kjuínjo̱ an nda̱ ree̱ ki̱a̱ na̱xi̱ńdáꞌniú Jerusale̱n. 35Ngotꞌe̱ kjifena ichítié ko̱jo kantié nó. A ka̱ma skuie ngase an mí ni xi nda, ko̱jo mí ni xi ndajín. A ka̱marií kui mosòo̱ sku̱i̱e̱ ngase ni xi nda chinie ko̱jo ni kꞌuí. A tokó kuintꞌie ngase an nda̱a̱ já ko̱jo ínchjín xí siee̱. Kósꞌe̱, míkjo̱a̱a̱ nga kui mosòo̱ chjiéngá ngo ni xi é ka̱maa̱ ndi̱a̱na, kui xi nda̱ ree̱. 36Kui mosòo̱ xi̱ꞌbi̱, ta̱kuítsí ni xi mejeén nga nijan kjo̱a̱ꞌatiojo̱ ndejèꞌ Jorndaa̱n nda̱ ree̱, kó míkjo̱a̱a̱ nga kui nda̱ ree̱ tsja̱ana ngo xi tsoboána.
37Kuíni nga ꞌniú míꞌaá nga te̱ꞌéndièe̱ kui mosòo̱ tsi̱ꞌe̱ nga ki̱a̱ ko̱yà na̱xi̱ńdáꞌniuú, kó ki̱a̱ ngatjanijín ki̱a̱ tꞌa nga̱tsjo̱ó na̱ꞌmina ko̱jo na̱ana, ta̱nga kꞌi̱e̱ tikón mosòo̱ xi ꞌmí Kimaa̱n, kó kuí boá xi ngatjíjoo̱ ji nda̱ re, kó ta̱ ni nda xi mejeénri ti̱ꞌinje̱ ji kui.
38Kósꞌe̱ nda̱ ree̱ bi̱ katsoó:
—Ja̱ Kimaa̱n nijan ngatjíjo̱na, kó ta̱ ni xi nda mejeén ji xi sa̱ꞌinjo̱ an, kó ngayeje ni xi chji̱e̱ꞌéní jí, an sa̱ꞌinkjatjosón an.
39Kó ngayeje xota̱ na̱xi̱ńdaá jaꞌatio ndejèꞌ Jorndaa̱n, kó jaꞌa nda̱ ree̱ nga, sꞌe̱ jaskan nda̱ ree̱ katsjaá ngo ndsó tꞌanijon Barsilai̱, ko̱jo katsꞌénchikonñé, kósꞌe̱ Barsilai̱ kijí nginí ngi̱ndiee̱. 40Kó nda̱ ree̱ jaꞌa nangi Ngilngaa̱l, kó nijan kijíjo̱ Kimaa̱n, kó ngayeje xota̱ na̱xi̱ńdá Jundáa̱ ko̱jo masien xota̱ na̱xi̱ńdá Israee̱l xi nijan kijíjo̱ nda̱ ree̱ nga.
41Kó ngayeje xota̱ Israee̱l xi jachókoón nda̱ ree̱, kó bi̱ katsoó:
—Míkjo̱a̱a̱ nga ntsꞌiejne̱, kui xi xotaa̱ na̱xi̱ńdá Jundáa̱ ꞌma ꞌma kijíjoo̱ ji, kó jaꞌatiojo̱ nda̱ ree̱ ndejèꞌ Jorndaa̱n ko̱jo xota̱ ndiꞌaa̱, ko̱jo ngayeje já mosoo̱ Ndabii̱ nga.
42Kósꞌe̱ ngayeje xota̱ xi chji̱a̱ni Jundáa̱, bi̱ katsoó ngayeje já Israee̱l:
—Ngatꞌa̱ nda̱ ree̱ xingi̱jne̱ má, ta̱nga míkjo̱a̱a̱ nga jún ndyi̱niꞌánxchánkonjnú kjo̱a̱a̱ kui nii̱. A tjín ni xi kichiniejne̱ ta̱ngatꞌanii̱ nda̱ ree̱. Axa̱ tjín ni xi je katseꞌéjne̱.
43Kósꞌe̱ xota̱ Israee̱l, bi̱ katsoó xota̱ Jundáa̱:
—Ji̱n, tie ngase kjo̱a̱nda xi tjínjne̱ kjo̱a̱a̱ nda̱ ree̱, kó ti̱ tjín ngasejne̱ kjo̱a̱nda kjo̱a̱a̱ Ndabii̱ ta̱bo̱a̱jiín jún. Ja̱, kó míkjo̱a̱a̱ nga ndyi̱niꞌánchꞌójnú ji̱n. A ji̱njín bo̱a̱ katseꞌéjne̱ ndso̱ꞌbajne̱ nga bo̱a̱ kiꞌmíjne̱ nga tjón ni xi mejeén nda̱ ree̱ xi si̱ꞌankjatjosónjne̱.
Ta̱nga én xí tsíchji̱a̱ xota̱ Jundáa̱ kisꞌie ngasee̱ ngaꞌniú kjo̱a̱a̱ én xí tsíchji̱a̱ xota̱ Israee̱l.
Currently Selected:
2 Samuee̱ 19: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
