2 Samuee̱ 1
1
Nga tsintꞌié Ndabii̱ nga je kꞌien Sauu̱l
1Jaskan ngije kꞌien Sauu̱l, kó ngije Ndabii̱ askjanjo̱ xota̱ Amalee̱k nga katsꞌeén, jó ni̱xtjin kamaá nga kisꞌijña ki̱a̱ na̱xi̱ńdáꞌniú Siklaa̱j. 2Kó xi ma ján ni̱xtjin ki̱a̱ na̱xi̱ńdáꞌniú Siklaa̱j, jachó ngo nda̱ xi kjindibáni nínga kisꞌijña Sauu̱l xi yajá ngo ńjño xi katjondiyá, kó ndyi̱a̱ maá ńdie to̱ko̱, kó nga jachókoón Ndabii̱, kisꞌijñaxtien ngaskande nga kisitꞌaa̱ xtjien tꞌanangii̱ nga katsꞌéndikón.
3Kó Ndabii̱, bi̱ katsoó:
—Ñá kjindibéni ji.
Kó bi̱ katsó kui nda̱a̱:
—Jatjoꞌma án ki̱a̱ nínga síndo ndiꞌańjñoo̱ xota̱ Israee̱l.
4Kó Ndabii̱ bi̱ tsꞌén asíyaá:
—Mí ni xi kamá. Tꞌíyéní ngotꞌe̱ má bi̱.
Kó bi̱ katsó kui nda̱a̱:
—Xota̱ na̱xi̱ńdaá tsanga ki̱a̱ kjo̱a̱xcha̱án, kó achichí má xota̱ xi je ixó ko̱jo je jesón, ti̱ je kꞌien Sauu̱l ko̱jo ndií xi ꞌmí Jonataa̱n nga.
5Kósꞌe̱ Ndabii̱, bi̱ katsoó kui nda̱ xi tsꞌéntsóyà kui nii̱:
—Kótsꞌèn ye ni ji nga je kꞌien Sauu̱l, ko̱jo Jonataa̱n ndií nga.
6Kó kui nda̱a̱, bi̱ katsoó:
—Ki̱a̱ má tikòn an ki̱a̱ tji̱ngi̱ Ngilboaa̱ nga kamábe an Sauu̱l nga asiénnijín ki̱cha̱ndojoó nga tsꞌénkjininkꞌá ngase yojoo̱ katsaki, ta̱nga karroo̱ ko̱jo já ndi̱je̱e̱ já Filisteaa̱ je mejeén ma kjachótjíngií. 7Kó nga askotsijen nga̱xto̱n, kamábena kó tsíchji̱a̱na, kó kijíkóo̱n, sꞌe̱ bi̱ kixiáa̱n: Mí xí mejeén, kꞌi̱e̱ tikòn an kꞌi̱e̱e̱.
8Kó kuí, bi̱ katsóna: ꞌYá jí bo̱a̱. Kó an bi̱ kixiáa̱n: Nda̱ Amalee̱k boá an. 9Sꞌe̱ bi̱ katsó nginína: Ja̱bíkindyintꞌéní, kó tsá ti̱ꞌinkꞌinní, ngatꞌa̱ achichí je nda̱ kjimana, kó tsájín ꞌme an.
10Kó ki̱a̱ kisꞌijñatꞌàa̱, sꞌe̱ katsꞌenkꞌién an, ngatꞌa̱ kamábe an nga ngiti̱ kꞌuijñájín ngase ngije bo̱a̱ tsꞌén tsꞌáka, kó iskjíbé an korona̱ xi tikoón to̱ko̱, ko̱jo ni ꞌbíkjá ndsa̱ xi tikoón tsja, kó kꞌi̱e̱ yaꞌa an kui nii̱ kꞌi̱e̱e̱.
11Kósꞌe̱ Ndabii̱ ko̱jo xota̱ xi síndojo̱ iskjíndiyájón ńjño xi ndyi̱yajá nga on kamaá kui nii̱. 12Achichí askjandá ndasen kui xotaa̱, kó kisꞌińdo kjindiá ngaskande nga kamángixoón ta̱ngatꞌanii̱ nga bo̱a̱ kamaá Sauu̱l ko̱jo Jonataa̱n ndií, kó ti̱ askjandátjé xota̱ na̱xi̱ńdaá Néná, ko̱jo xota̱ Israee̱l xi ki̱cha̱ndojó je kiniꞌánkjiesónnii̱. 13Kósꞌe̱ Ndabii̱, bi̱ katsoó kui nda̱ xi jachójo̱ eén:
—Ñá ndókjo̱e̱ni ji.
Kó kui nda̱a̱, bi̱ katsó:
—Xota̱ xi xín nangi án, xota̱ Amalee̱k boá an.
14Kó Ndabii̱, bi̱ katsoó:
—Kótsꞌèn kamá takín nga kiniꞌínkꞌín ji ngo nda̱ re xi Néná jaꞌájin.
15Kósꞌe̱ Ndabii̱ tsíchji̱a̱a̱ ngo nda̱ xo̱ngò xí xota̱ tsi̱ꞌe̱, kó bi̱ katsoó:
—Ti̱ꞌinkꞌin ji kui nda̱a̱.
Kó kui nda̱ xi xotaa̱ Ndabii̱ katsꞌénꞌoón, sꞌe̱ katsꞌénkꞌién kui nda̱ Amalee̱k.
16Kósꞌe̱ Ndabii̱, bi̱ katsoó:
—Ti̱ jíní xi kiniꞌínkꞌín ji yojoo̱, ngatꞌa̱ ndso̱ꞌbe boá xi kamá chistiko̱ kondra̱ tse̱ nga bi̱ kase ji: Án boá xi katsꞌénkꞌién an nda̱ xi Néná jaꞌájii̱n.
Nga askjandá ndasen Ndabii̱ kjo̱a̱a̱ Sauu̱l ko̱jo Jonataa̱n
17Kó Ndabii̱ kui én ndaseén xi tsíchji̱a̱ kjo̱a̱a̱ Sauu̱l ko̱jo Jonataa̱n, ndií kui nda̱a̱, 18kó katsjákjo̱a̱ nga ko̱ko̱yaá ndií xota̱ tji̱e̱e̱ Jundáa̱ kui nii̱. Kuí bí xi̱ꞌbi̱ ni xi kjitꞌa Chꞌo̱ Xo̱jo̱n xi katsꞌénda Jasee̱r:
19¡Jè kichajá kjo̱a̱jee̱ na̱xi̱ńdá Israee̱l ki̱a̱ ngi̱jin na̱xi̱i̱!
¡Kótsꞌèn je jesón xota̱ xi ꞌniú chꞌokoón!
20Ngata̱ ꞌbíni̱jmìjín ji kui nii̱ ki̱a̱ na̱xi̱ńdáꞌniú Ngaa̱t,
ti̱nde ngata̱ ꞌbíni̱jmìjín ji ki̱a̱ ndi̱tse̱e̱n na̱xi̱ńdáꞌniú Askaloo̱n,
ngata̱ tsjajín maá ínchjín xí chji̱a̱ni xota̱ Filisteaa̱,
ngata̱ tsjajín maá ínchjín xí chji̱a̱ni xota̱ xi kiniꞌánjiín sirkunsisioo̱n.
21Jún na̱xi̱ xi chji̱a̱ni nangi Ngilboa̱,
ngata̱ jmí xoño, ko̱jo ngata̱ jmí stsé bixójinjínjnú,
xi tsja̱angaꞌniuú tꞌanangijnú.
Ngatꞌa̱ ki̱a̱ boá nínga kajnánié ni xi ꞌbíchjaá ni xi ndajín xi boaꞌa já chꞌókoón,
ni xi ꞌbíchjaá ni xi ndajín xi tsi̱ꞌe̱ Sauu̱l,
jmí tsi isti̱ xi tsajájón,
22jiín xota̱ xi tsiejénꞌón, ko̱jo xinieé xota̱ xi chꞌokoo̱n boá.
¡Kó yáchjonyá xí tsaꞌa Jonataa̱n jmíni̱xtjin kijíꞌoyá nginí!
¡Kó ki̱cha̱ndojoó Sauu̱l, jmíni̱xtjin kjindibá tiya!
23Sauu̱l ko̱jo Jonataa̱n, achichí tjó katsꞌén xkjín nga kisꞌińdo nga̱sondie,
kó ngaskande nga jesón nga jatjoxíntꞌajiín xkjín.
Achichí tsá ngase kamá ta̱bo̱a̱jiín ja̱a̱,
kó ꞌniú ngase kamá ta̱bo̱a̱jiín xandi̱je̱e̱.
24¡Jún ínchjín Israee̱l, chaꞌátjéjnú Sauu̱l!
Ngatꞌa̱ kuí boá katsꞌénkajájnú ńjño xi iní ꞌniú,
kó ni to̱nsinié má índoo̱ ńjño xi kichajájnú.
25¡Kótsꞌèn nga je jesón xota̱ xi chꞌokoo̱n ngi̱jii̱n kjo̱a̱xcha̱án!
¡Jonataa̱n ki̱a̱ kiniꞌánkꞌién ki̱a̱ ngi̱jin na̱xi̱i̱!
26¡Achichí on mana kjo̱a̱a̱ ji Jonataa̱n, ji xi ntsꞌié án má ji!
Achichí tjó kamána ji.
ꞌNiú ngase kiniꞌíntjéní jí, ta̱bo̱a̱jiín kjo̱a̱tjó xí tsjáná ínchjiín.
27¡Kótsꞌèn nga je jesón xota̱ xi chꞌokoo̱n,
kó je kiniꞌánkjatsón ni xi bixkánjo̱ ngi̱jii̱n kjo̱a̱xcha̱án!
Currently Selected:
2 Samuee̱ 1: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
