2 Samuee̱ 18
18
Nga kꞌien Absaloo̱n
1Kósꞌe̱ Ndabii̱ íxki̱ xota̱ na̱xi̱ńdá xí nijan síndojo̱, kó índo ngito̱ko̱ xi ngo mi̱ xota̱, ko̱jo ngito̱ko̱ xi úchán xota̱ ko̱tíxomaa̱. 2Sꞌe̱ katsangiya Ndabii̱ ki̱a̱ nangii̱, ngo nga ján tjiín xotaa̱ xi Joaa̱b kamá ngito̱ko̱o̱, sꞌe̱ ngo nga ján tjiín xotaa̱ xi Abisaii̱, kui xi ndií na̱ Sarbiaa̱, ntsꞌi̱e̱ Joaa̱b xi kamá ngito̱ko̱o̱, kó xi ingo nga ján tjiín xotaa̱, Itaii̱ nda̱ jeteoo̱ xi kamá ngito̱ko̱o̱. Kó nda̱ ree̱, bi̱ katsoó xota̱ na̱xi̱ńdaá:
—Ko̱jo án boá xi kjuínjo̱jnúꞌun nga.
3Ta̱nga xota̱ na̱xi̱ńdaá, bi̱ katsó:
—Kꞌuínjín ji, ngatꞌa̱ tsi ku̱i̱yo̱ ji̱n, sa̱ꞌínsénjínjne̱ kui xotaa̱, kó ndatsi masien ji̱n xi ko̱yà, sa̱ꞌínsénjínjne̱ nga, ta̱nga ji, ngotꞌe̱ ꞌne̱, xikónií tsi tie mi̱ ji̱n chjínií ji. Kuíni nga ta̱sá ndatsi ki̱a̱ ndeskande na̱xi̱ńdáꞌniuú ko̱si̱ke̱jejne̱.
4Kósꞌe̱ nda̱ ree̱, bi̱ katsó:
—Ni xi nda ngase sasiénjnú sa̱ꞌin an. Kó nda̱ ree̱ ki̱a̱ kisꞌijña ki̱a̱ nínga bitjasꞌi̱e̱nnii̱ na̱xi̱ńdáꞌniuú, tji̱e̱nga ngayeje xota̱ na̱xi̱ńdaá xki̱ úchán ko̱jo mi̱ ma nga ndyi̱fotjo. 5Kó nda̱ ree̱ katsjaá ngo kjo̱a̱ Joaa̱b, ko̱jo Abisaii̱, ko̱jo Itaii̱, nga bi̱ katsoó:
—Nda ti̱ꞌanjo̱jnú nda̱ xo̱ngo̱ò xi ꞌmí Absaloo̱n, ta̱ngatꞌanii̱ nga tjójnú án. Kó ngayeje xota̱ na̱xi̱ńdaá tsintꞌié nga nda̱ ree̱ katsjaá ngo kjo̱a̱ ngayeje já ngito̱ko̱o̱ kjo̱a̱a̱ Absaloo̱n.
6Kó bo̱a̱ tsꞌén xota̱ na̱xi̱ńdaá jataxie nínga jno̱o̱ nga kijíkjánjo̱ xota̱ Israee̱l, kó kui kjo̱a̱xcha̱án ki̱a̱ kꞌijñá xí tsi̱ꞌe̱ xota̱ tji̱e̱e̱ Efraii̱n kamá. 7Kó ki̱a̱ kiniꞌánchaja xota̱ Israee̱l ngindyi̱ko̱n mosoo̱ Ndabii̱, kó kui ni̱xtjii̱n, kan mi̱ ma jáxíꞌín xi jesón. 8Kó kui kjo̱a̱xcha̱án kamá tsie ngase ngayeje kui ngi̱ndiee̱, kó kui ni̱xtjii̱n kjín ngase xota̱ xi katsꞌénkꞌién kui kꞌijñaá, ta̱bo̱a̱jiín xi ki̱cha̱ndojó kiniꞌánkjiesónni.
9Kó Absaloo̱n ki̱a̱ kasakoo̱ já mosoo̱ Ndabii̱, ngo ndi̱je̱tajá tikónsoón, kó nga jaꞌa kui ndi̱je̱tajaá ngindie tjiaa̱ yáꞌáxka̱a̱ xi jee̱, ki̱a̱ kisitsakjájin to̱ko̱ Absaloo̱n ki̱a̱ ngi̱jii̱n kui yáꞌáxka̱a̱, kó Absaloo̱n ngamasiee̱n ndiꞌakꞌajmii̱ ko̱jo tꞌanangii̱ kitsjienboaꞌa, kó kui ndi̱je̱tajá xí tsoꞌbájoo̱ kijíra ndi̱ya̱à.
10Kó ngo nda̱ xi kamábe kui nii̱, katsóyaà Joaa̱b, nga bi̱ katsoó:
—Ngotꞌe̱ má kamábe an nga Absaloo̱n ki̱a̱ kitsjienboaꞌa ngo yáꞌáxka̱. 11Kó Joaa̱b, bi̱ katsoó kui nda̱ xi katsóyaà kui nii̱:
—Kó tsi ji xi kamáyè ji, ánní nga kiniꞌínꞌínjíi̱n tsi̱ꞌe̱ nga tsꞌáka tꞌanangii̱. Kamára̱ katsjaa ji tie to̱ntiboa ko̱jo ngo tji̱xin xí nda katsaki.
12Ta̱nga kui nda̱a̱, bi̱ katsoó Joaa̱b:
—Ndatsi ngo mi̱ to̱ntiboa ko̱e̱ꞌéní, ta̱nga jmí ni sa̱ꞌinjáa̱n ndií nda̱ ree̱, ngatꞌa̱ ji̱n má xi kandaꞌyájne̱ nga nda̱ ree̱ katsangiyaa ji ko̱jo Abisaii̱, ko̱jo Itaii̱, nga bi̱ katsójnú: Chónjnú nga jmíjín xi ndajín sa̱ꞌínjo̱ nda̱ xo̱ngo̱ò xi ꞌmí Absaloo̱n. 13Kó tsi an so̱bo̱a̱ xi katsꞌen an kui ni xi ndajiín, ngije ku̱i̱ntꞌiè nda̱ ree̱ ngayeje kui nii̱, ti̱ jira̱ xi kondra̱ ku̱i̱ndyinni tsobo̱a̱.
14Kó bi̱ katsó Joaa̱b:
—Ngiti̱ mejénjínna nga ta̱xkiya kuichjiájo ngasee̱ kjo̱a̱ ngo ni xi tse̱. Kó iskjíbé ján yáyojó, kó ki̱a̱ asieén ini̱ma̱a̱ Absaloo̱n, kui xi to̱kó tikón ngase ki̱a̱ ngi̱jii̱n yáꞌáxka̱a̱. 15Kósꞌe̱ tie já xo̱ngò xí tsoꞌbájo̱ Joaa̱b jaꞌatjiyajoo̱n Absaloo̱n, kó katsꞌénꞌoón, sꞌe̱ katsꞌénkꞌién kjin ngijee̱. 16Kósꞌe̱ tji̱e̱n má Joaa̱b katsꞌénkjanie tjioo̱, kó xota̱ na̱xi̱ńdaá ngiti̱ kijítji̱ngíjiín xota̱ Israee̱l, ngatꞌa̱ Joaa̱b íchjaá xota̱ na̱xi̱ńdaá.
17Kósꞌe̱ jaskan kachjábé Absaloo̱n, kó ngo ti̱xa̱ xi tikón ngi̱jin kꞌijñá jàn ikꞌíyá, kó achichí kjín ndi̱jo̱ ikꞌíndoo̱ nga̱soón, kó ngayeje xota̱ Israee̱l tsanga má nga kijí ndiꞌańjño nínga síndo.
18Nga kisꞌijña nga̱sondie Absaloo̱n, ngo xó iskjininkꞌaa̱ yojoo̱, xi tikón ki̱a̱ nínga tikón Nangi Soón Nda̱ Ree̱, ngatꞌa̱ bi̱ katsó: Nde ngojínna ndí xí sa̱ꞌínkjaꞌátsjien jaꞌénna. Kó kui xoó jaꞌeén ítꞌaa̱, kó ngaskande ngotꞌe̱ Xoó Absaloo̱n ꞌmí.
Nga kandaꞌyá nga je kꞌien Absaloo̱n
19Kósꞌe̱ Aimaa̱ ndií Sandoo̱k, bi̱ katsó:
—ꞌNiú míꞌaá nga ko̱e̱ꞌéndièní nga kjuinkóo̱n nda̱ ree̱, tsi̱ꞌe̱ nga xiyàa̱ ngo én nda, nga Néná jè katsꞌéndé kjo̱a̱a̱ xota̱ kondra̱a̱.
20Ta̱nga Joaa̱b, bi̱ katsoó:
—Ka̱májín ngo nda̱ xi fíjo̱ ngo én nda ka̱ma ji ngotꞌe̱, kje̱ꞌe ni̱xtjin kꞌuínje̱ ji kui én ndaa̱, ngatꞌa̱ ndií nda̱ ree̱ boá xi kꞌien ngotꞌe̱.
21Kósꞌe̱ tji̱e̱n má Joaa̱b, bi̱ katsoó nda̱ Etiopíaa̱:
—Tꞌen ji, kó tꞌíyée̱ nda̱ ree̱ ni xi kamáyè ji. Kó kui nda̱ Etiopíaa̱ asiéntikoó ngaskande nga kisitꞌaa̱ xtjien tꞌanangii̱ nga kamábendikón Joaa̱b, kó tsanga má kijí kui nda̱a̱. 22Ta̱nga Aimaa̱ ndií Sandoo̱k, ti̱ bi̱ ti̱ katsó nginií Joaa̱b:
—Ta̱ xikó tsꞌénnií, ta̱nga ꞌniú míꞌaá nga ko̱e̱ꞌéndièní nga ko̱jo an kjuíntjíngíi̱ nda̱ Etiopíaa̱.
Kó Joaa̱b, bi̱ katsó:
—Ji xi̱ꞌin, mí tsjá nga ku̱i̱yì jí xi jmí tsi sa̱kójiín xi niꞌán, nga ngo én nda ꞌmíyà.
23Ta̱nga bi̱ katsó nginí Aimaa̱:
—Ta̱ xikó tsꞌénnií, te̱ꞌéndièní nga konga an.
Kósꞌe̱ bi̱ kiꞌmií:
—Ja̱ ti̱yi ji tsobo̱a̱. Kó Aimaa̱ tsanga má kijí xtji̱e̱e̱n ndi̱ya̱à nangi soón, kó jaꞌatjoón nda̱ Etiopíaa̱.
24Kó Ndabii̱ ki̱a̱ xió tikón ngamasiee̱n nga jó nga̱ntjo̱a̱a̱ na̱xi̱ńdaá, kó kui nda̱ xi konda na̱xi̱ńdáꞌniuú, ki̱a̱ kijínijíngí nkꞌaa̱ ndiꞌaa̱ ki̱a̱ nga̱ntjo̱a̱ xi tikón nga̱soón xoó na̱xi̱ńdáꞌniuú, kó nga iskjininkꞌa kje̱n, kamábe ngo nda̱ xi tsꞌénmonga soboá. 25Kó kui nda̱ xi kondaa̱ askjandáyà má nga kijítsóyaà nda̱ ree̱. Kó nda̱ ree̱, bi̱ katsó:
—Tsi tsoꞌbá soboá, én xí nda boá xi kjoeꞌejo̱.
Kó tji̱e̱nga kui nda̱a̱ kijíkón tiña ngasee̱, 26kó kui nda̱ xi kondaa̱, kamábe ingo nda̱ xi tsꞌénmonga nga, kó kui nda̱ xi kondaa̱, bi̱ katsoó nda̱ xi konda nga̱ntjo̱a̱a̱:
—¡Kꞌi̱e̱ tikón kꞌi̱e̱e̱ ingo nda̱ xi tsꞌénmonga soboá! Kó bi̱ katsó nda̱ ree̱:
—Ko̱jo kui nda̱a̱ ti̱ én nda boá xi tsꞌényaꞌa nga.
27Kó kui nda̱ xi kondaa̱, bi̱ katsó nginí:
—Bee̱ko̱n an nga nda̱ xi tjón tsꞌénmongaa̱, bo̱a̱ má tsꞌén monga xikoó Aimaa̱ ndií Sandoo̱k. Kó bi̱ katsó nda̱ ree̱:
—¡Nda̱ xi nda boá kui nda̱a̱, kó én nda boá xi tsꞌéndibájo̱!
28Kósꞌe̱ Aimaa̱ ꞌniú askjandáyà, nga bi̱ katsoó nda̱ ree̱:
—¡Tjínná kjo̱a̱xió! Kósꞌe̱ asiéntikoó ngaskande nga kisitꞌaa̱ xtjien tꞌanangii̱ ngindyi̱ko̱n nda̱ ree̱, kó bi̱ katsó:
—Ngatamachikonñé Néná kui xi Nèe̱, ngatꞌa̱ katsꞌénkꞌasꞌien xota̱ xi iskjininkꞌa tsja kondra̱a̱ ndi̱a̱na kui nda̱ ree̱.
29Kó nda̱ ree̱, bi̱ katsó:
—A nda tikón nda̱ xo̱ngo̱ò Absaloo̱n.
Kó Aimaa̱, bi̱ katsó:
—Kamábe an ngo xtín xota̱ xi katsꞌén kjo̱a̱xti, kjiꞌanga katsangiya Joaa̱b nda̱ mosoo̱ nda̱ ree̱, ta̱nga bejín an mí ni xi kamá.
30Kósꞌe̱ nda̱ ree̱, bi̱ katsó:
—Ti̱tjè jí, kó ki̱a̱ tindyin ji ki̱a̱a̱. Kó Aimaa̱ jaꞌa, kó ki̱a̱ xió kasasien. 31Kó nda̱ ree̱, bi̱ katsoó nda̱ Etiopíaa̱:
—Chjábé jí kuí éntja̱tsi̱e̱e̱ ji nda̱ ree̱, ngatꞌa̱ ngotꞌe̱ ꞌne̱ Néná jè katsꞌéndeé ngi̱ya tsja xota̱ xi kondra̱ tse̱ kisꞌińdoni.
32Kó nda̱ ree̱, bi̱ katsoó nda̱ Etiopíaa̱:
—A nda tikón kui nda̱ xo̱ngo̱ò xi ꞌmí Absaloo̱n.
Kó bi̱ katsó kui nda̱ Etiopíaa̱:
—Xikoó kui nda̱ xo̱ngo̱ò ngatama kondra̱a̱ ndi̱a̱na nda̱ ree̱, ko̱jo ngayeje xota̱ xi kondra̱ tse̱ kꞌuíndoni nga ndajín sa̱ꞌínjoo̱.
Ndabii̱ askjandátjé ndií
33Kó achichí ni xi kamaá nda̱ ree̱, kó kijínijíngí nínga tikón ngi̱yaꞌma xi tikón xtji̱e̱e̱n nga̱ntjo̱a̱a̱, kó achichí askjandá, kó tji̱e̱nga tsꞌénfí, bi̱ katsó: ¡Ji ndína Absaloo̱n! ¡Ji ndína, ji ndína, Absaloo̱n! ¡Achichíra̱ ndakjiꞌi tsi ta̱ bo̱a̱a̱ an aya an ngajòo̱! ¡Ji Absaloo̱n, jí ndína, jí ndína!
Currently Selected:
2 Samuee̱ 18: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
