2 Samuee̱ 17
17
Usaii̱ katsꞌénkjiékjo̱a̱ ni xi índa Aitofee̱l
1Kósꞌe̱ Aitofee̱l, bi̱ katsoó Absaloo̱n:
—Te̱ꞌéndièní nga kjo̱a̱ꞌájin an tiejó mi̱ jáxíꞌín, kó kui ni̱xtji̱e̱e̱n kjuín án nga kjuíntjíngíi̱ Ndabii̱, 2kó ki̱a̱ stsoboa an kjiꞌanga je jenda, ngije ngiti̱ jmí ngaꞌniújiín, kó ku̱i̱ndyiandikóo̱n, nga ngaskande ko̱ngandikón ngayeje xota̱ xi nijan tjimájo̱, kósꞌe̱ ta̱kuítsí nda̱ ree̱ xi sa̱ꞌínkꞌién an. 3Ngatꞌa̱ kuí boá kui nda̱ xi timindyisé ji. Kó bo̱a̱ tsꞌén ngije kjoéꞌe̱jo ngiñaá ngayeje xota̱ na̱xi̱ńdaá, kó ngije ji tjimátꞌaa̱ kui xotaa̱, ngayeje xota̱ na̱xi̱ńdaá kꞌuieé kjo̱a̱xió.
4Kó kui kjo̱a̱botíxomaa̱ nda kasasiee̱n Absaloo̱n ko̱jo ngayeje xota̱ xi xchaá na̱xi̱ńdá Israee̱l. 5Ta̱nga Absaloo̱n, bi̱ katsó:
—Mejénna nga ti̱ ko̱ndókjoaá Usaii̱ nga, nda̱ arkitaa̱, tsi̱ꞌe̱ nga ko̱nda̱ꞌyá ñá ni xi ka̱tso̱ kuí. 6Kó Usaii̱ kijíkoón Absaloo̱n, kó Absaloo̱n, bi̱ katsoó:
—Bi̱ má katsó Aitofee̱l nga tsíchji̱a̱, ta̱nga a bo̱a̱ si̱ꞌán xikó katsó kuí, axa̱ jmí. Jí xí ndókjo̱e̱ ji.
7Kósꞌe̱ Usaii̱, bi̱ katsoó Absaloo̱n:
—Ndajín kjo̱a̱botíxoma xi katsjá Aitofee̱l ngotꞌe̱. 8Kó bi̱ katsó ngase Usaii̱:
—Jè yé ji kó kón na̱ꞌmíi̱ ko̱jo xota̱a̱, kui já xí chꞌokoo̱n, kó xtìrií a̱si̱énni̱xtjii̱n, xikó maá ngo cho̱ꞌoso̱ xi tikón ki̱a̱ ngi̱jin kꞌijñaá xi kachjeꞌéxiín ndií. Kó na̱ꞌmíi̱ ti̱ nda̱ xi kján boá ndatsa kui nga, kó ki̱a̱jín kjo̱a̱ꞌaa̱ ni̱xtji̱e̱n ngi̱jii̱n xota̱ na̱xi̱ńdaá. 9Ngotꞌe̱ ꞌne̱, je jera̱ tikónꞌmá ngo ngi̱ya ti̱xa̱na̱xi̱ ko̱jo tsi kje̱ꞌe ngi̱ndie je tikón, kó tsi nga ku̱i̱ꞌítsꞌi̱ya kjo̱a̱xcha̱án ko̱yà chiboa xota̱ xi tse̱, ta̱ꞌyaní xi ku̱i̱ntꞌiè, bi̱ ka̱tso̱: Xota̱ na̱xi̱ńdá xí tjimátji̱ngii̱ Absaloo̱n jè kiniꞌánchaja. 10Kó ngaskande kui nda̱ xi chꞌokoo̱n, kui xi xikó maá tsi ngo xandi̱je̱ a̱si̱énni̱xtjii̱n, ko̱yayà, ngatꞌa̱ ngayeje xota̱ Israee̱l be nga na̱ꞌmíi̱ nda̱ xi fí kjo̱a̱xchán boá, kó nga xota̱ xi nijan síndojo̱ kui, xota̱ xi chꞌokon boá.
11An tsjaa̱ ngo kjo̱a̱botíxoma, nga ta̱sá ngayeje xota̱ Israee̱l ki̱a̱ ngatamatikó nga ngo foaꞌatjiyajòo̱n, ndeskande nangi Ndaa̱n ngaskande nangi Beersebaa̱, kó kjín ngatama xikó maá tsomí xí tjín tꞌa ndáchíkoón, kó ji ki̱a̱ ti̱ńtje̱ ji ki̱a̱ ngamasiee̱n kui xotaa̱. 12Kósꞌe̱ bo̱a̱ tsꞌén ku̱i̱xkánjo̱ ngo ngi̱ndie, ta̱ nínga tikón, ki̱a̱ ku̱i̱chíjminiée̱ yojoná, xikó má tsꞌén ꞌbóka xoñoo̱ ki̱a̱ nga̱són tꞌanangii̱, kó nde ngojín xi kꞌuíndo ngase, ti̱nde kui, ti̱nde ngojín já xí nijan tjimájo̱.
13Kó tsi ngo na̱xi̱ńdáꞌniú kꞌo̱sꞌien tsi̱ꞌe̱ nga ki̱a̱ kꞌuijñáꞌmá, ngayeje xota̱ Israee̱l ko̱a̱ꞌa̱ ńꞌniú, kó kui na̱xi̱ńdáꞌniuú chjaféjne̱ ngaskande nangi soón, ngaskande nga nde ngo ndi̱jo̱ sa̱kójín ngase kui ngi̱ndiee̱.
14Kósꞌe̱ Absaloo̱n ko̱jo ngayeje já Israee̱l, bi̱ katsó: —Kjo̱a̱botíxoma xi katsó Usaii̱, nda̱ arkitaa̱, nda ngase, ta̱bo̱a̱jiín ni xi katsó Aitofee̱l. Ngatꞌa̱ Néná boá xi íngoo̱kon nga bo̱a̱ katsó nga kjo̱a̱botíxomaa̱ Aitofee̱l ka̱machjíjínnii̱, tsi̱ꞌe̱ nga Néná sa̱ꞌínkjindibánié ni xi ndajiín Absaloo̱n.
15Kó Usaii̱, bi̱ katsoó chináꞌmi Sandoo̱k ko̱jo Abiataa̱r:
—Aitofee̱l bi̱ kjiꞌi ni xi atíxomaa̱ Absaloo̱n ko̱jo xota̱ xi xchaá na̱xi̱ńdá Israee̱l, kó án bi̱ kjiꞌi ni xi atixomáa̱. 16Kuíni nga tsá nangíyájnúu̱ én Ndabii̱, kó bi̱ tꞌínjnúu̱: Ngata̱ ki̱a̱jín bitje ji kui ni̱xtji̱e̱e̱n ki̱a̱ nínga bitjani nangi kixií, ta̱sá xín ti̱tje̱ní ji, ngatꞌa̱ tsita̱ si̱ꞌankjiesón nda̱ ree̱ ko̱jo xota̱ xi nijan tjimájo̱.
17Kó Jonataa̱n ko̱jo Aimaa̱ ki̱a̱ kisꞌińdo xió ki̱a̱ tꞌa ndáńchꞌi̱ xi ꞌmí Rojee̱l, kó nga kamájín kamáyá nga kꞌo̱sꞌienni na̱xi̱ńdáꞌniuú, ngo na̱ chji̱ni̱e̱ꞌbo kijítsóyaà kui jaá, kó kui jaá kijítsóyaà nda̱ re Ndabii̱. 18Ta̱nga ngo nda̱ xo̱ngò kamábe kui jaá, kó kijítsóyaà Absaloo̱n, kósꞌe̱ nga joó, tsá kijí, kó jachó ndiꞌaa̱ ngo nda̱ xi tikón na̱xi̱ńdáꞌniú Baurii̱n xi tikoón ngo ndáńchꞌi̱ ndi̱tsee̱n, kó ki̱a̱ tsꞌasꞌien. 19Kó kui xota̱chjo̱on iskjíbé ngo ńjñotjibé xi yíꞌmáni nga̱ntjo̱a̱a̱ kui ndáńchꞌií, kósꞌe̱ iskjitjónjón to ndso̱ko̱a̱n ṉño̱pan xi ikꞌínieé, kó nde ta̱ꞌyajín xi kamábe ni xi kamaá.
20Kósꞌe̱ já mosoo̱ Absaloo̱n kijí ki̱a̱ ndiꞌaa̱ kui xota̱chjo̱on, kó bi̱ katsoó:
—Ñá síndo Aimaa̱ ko̱jo Jonataa̱n. Kó kui xota̱chjo̱on, bi̱ katsoó:
—Jè jaꞌa ki̱a̱ ngi̱ndie nínga ma bitjatioó ndejeèꞌ, ta̱nga nga kasakojiín jún, kijíꞌoyá nginí na̱xi̱ńdáꞌniú Jerusale̱n.
21Kó ngije kijí kui jaá, jatjo xi síndoyá kui ndáńchꞌií, sꞌe̱ kijí, kó kijítsóyaà nda̱ re Ndabii̱, nga bi̱ katsoó:
—Ti̱sítji̱e̱njnú, kó tsá ti̱tjatiòjnú ndáfoaa̱, ngatꞌa̱ Aitofee̱l, bi̱ katsó nga atíxoma kondra̱ tsa̱jún.
22Kósꞌe̱ Ndabii̱ jastjíe̱n, ko̱jo ngayeje xota̱ xi nijan tjimájo̱, kó ngindiee̱ nga sisi̱én, jaꞌatio ndejèꞌ Jorndaa̱n, kó ngayejee̱ nga jaꞌatio nga. 23Ta̱nga nga kamábe Aitofee̱l nga kiniꞌánkjatjosónjín ni xi atíxoma, ísoón xiri̱e̱e̱ bórroó, kisꞌijñasoón, sꞌe̱ kijí ndiꞌaa̱ ki̱a̱ na̱xi̱ńdáꞌniuú, kó ngije íjñanda ndiꞌaa̱, katsꞌénxíndo yojoo̱ nga kꞌien, kó ki̱a̱ akjanijín nínga kjiꞌinijín na̱ꞌmii̱.
Ndabii̱ katsꞌénkꞌién xota̱ ki̱a̱ Maanaii̱n
24Kó Ndabii̱ jachó na̱xi̱ńdáꞌniú Maanaii̱n, kó Absaloo̱n kjiꞌa má jaꞌatio ndejèꞌ Jorndaa̱n ko̱jo ngayeje já Israee̱l xi nijan tsoꞌbájo̱. 25Kó Absaloo̱n katsjaá xá Amasaa̱ nga kui xi ka̱ma ngito̱ko̱o̱ jájuún ngajoo̱ Joaa̱b. Amasaa̱ kuí boá xi ndií ngo nda̱ xi chji̱a̱ni Israee̱l xi ꞌmí Itraa̱, kui xi kisꞌijñajo̱ na̱ Abingaii̱l, tsa̱kji̱ín Naa̱, ndichja na̱ Sarbiaa̱, na̱aa̱n Joaa̱b. 26Kó xota̱ Israee̱l ki̱a̱ nijan katsꞌénkjaꞌyá ko̱jo Absaloo̱n ki̱a̱ nangi Ngalaa̱nd.
27Kó kjiꞌanga jachó Ndabii̱ ki̱a̱ na̱xi̱ńdáꞌniú Maanaii̱n, Sobii̱ ndií Naa̱, xi chji̱a̱ni na̱xi̱ńdáꞌniú Rabáa̱, xota̱ tji̱e̱e̱ Amoo̱n, ko̱jo Makii̱r ndií Amiee̱l xi chji̱a̱ni Londebaa̱r, ko̱jo Barsilai̱, nda̱ Ngalaa̱nd xi chji̱a̱ni Rogelii̱n, 28jachójoo̱ ṉchaa̱n, ko̱jo tasa̱ yiꞌii̱, ko̱jo ni xi niꞌánkjién xí ńdie kachján kamándani, ko̱jo to ndso̱ko̱a̱n ṉño̱pan, ko̱jo to sebanda̱, ko̱jo ndso̱ko̱a̱n ṉño̱pan, ko̱jo to ndso̱ko̱a̱n ṉño̱pan xi kiniꞌántsjó, ko̱jo aba̱, ko̱jo lenteja̱, ko̱jo to xi kiniꞌántsjó, 29ko̱jo ntsjién, ko̱jo ntsjén, ko̱jo cho̱tsa̱nga̱, ko̱jo kjixoo̱ cho̱yojo, kó ki̱a̱ ikꞌíndo kui nii̱ ngindyi̱ko̱n Ndabii̱ tsi̱ꞌe̱ nga skji̱ni̱e̱, ngatꞌa̱ bi̱ tsꞌén katsꞌénkjó: Xota̱ na̱xi̱ńdaá jè bojoó, ko̱jo jè jenda, ko̱jo jè xíndaá nga ki̱a̱ nangi kixií síndo.
Currently Selected:
2 Samuee̱ 17: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
