2 Samuee̱ 16
16
Ndabii̱ ko̱jo Sibaii̱
1Kó kjiꞌanga Ndabii̱ jaꞌa ki̱a̱ ngi̱chí nínga nkꞌaa̱ na̱xi̱i̱, ki̱a̱ jachó Sibaa̱ nda̱ mosoo̱ Mefii̱-Bosee̱t, kui nda̱a̱ jachókjaꞌayíndi̱yà nga tsoꞌbájo̱ jó bórró xí ndyi̱yaꞌa jó úchán pan, ko̱jo úchán én tostsi̱je̱è kixí, ko̱jo úchán pan xi toꞌingo̱ kixí kamándani, ko̱jo ngo ti̱jìtjíxin bino̱. 2Kó nda̱ ree̱, bi̱ katsoó Sibaa̱:
—Mí ni xi mejeén tsó kui nii̱.
Kó Sibaa̱, bi̱ katsó:
—Bórroó, kuí boá xi tsi̱ꞌe̱ nga kꞌuíndosoón xota̱ ndiꞌaa̱ nda̱ ree̱, kó pan ko̱jo tostsi̱je̱è, tsi̱ꞌe̱ nga skji̱ni̱e̱ já xo̱ngo̱ò boá, kó binoo̱, tsi̱ꞌe̱ nga kꞌuí xota̱ xi kju̱i̱e̱nda ki̱a̱ nangi kixií boá.
3Kósꞌe̱ bi̱ katsó nginí nda̱ ree̱:
—Ñá tikón ndií ndi̱a̱a̱. Kó Sibaa̱, bi̱ katsoó nda̱ ree̱:
—Ki̱a̱ kisꞌijña ki̱a̱ na̱xi̱ńdáꞌniú Jerusale̱n, ngatꞌa̱ bi̱ katsó:
—¡Ngotꞌe̱ má bi̱ nga xota̱ ndiꞌaa̱ xota̱ Israee̱l tsja̱a nginína ngi̱ndie nínga botixómá na̱ꞌmina!
4Kósꞌe̱ nda̱ ree̱, bi̱ katsoó Sibaa̱:
—Ngotꞌe̱ ꞌne̱, nga ngayeje ni xi tjiín Mefii̱-Bosee̱t jè tse̱. Kó Sibaa̱, bi̱ katsó:
—Ji ndi̱a̱ xi tsa̱ꞌa̱n, ni̱ma̱kjo̱a̱ sa̱ꞌin an yojona, kó skoya an nga nda sa̱sieén án.
Simei̱ chꞌo katsoó Ndabii̱
5Kó nga jachó nda̱ re Ndabii̱ ki̱a̱ nangi Baurii̱n, kamábe nga tsꞌénfotjoni ngo nda̱ xi chji̱a̱ni xota̱ ndiꞌaa̱ Sauu̱l, xi ꞌmí Simei̱ ndií Jeraa̱, kó nga tsꞌénfotjo chꞌo katsó nga tsíchji̱a̱taꞌin, 6ko̱jo ndi̱jo̱ tsꞌaya Ndabii̱, ko̱jo ngayeje mosoo̱ nda̱ ree̱, tji̱e̱nga ngayeje xota̱ na̱xi̱ńdaá, ko̱jo ngayeje já xí ꞌniú chꞌokon ngasee̱, ki̱a̱ nijan kijí nga skoón ko̱jo nga fojnií Ndabii̱. 7Kó Simeii̱ chꞌo katsoó Ndabii̱, nga bi̱ katsoó:
—¡Tji̱taxi̱e̱ ji, tji̱taxi̱e̱ ji, nda̱ xi tsꞌenkꞌién ini̱ma̱, ko̱jo nda̱ xi chji̱a̱ni xi ndajín! 8Néná boá xi je katsꞌénkꞌíchjií, kjo̱a̱a̱ ngayeje xota̱ ndiꞌaa̱ Sauu̱l xi kiniꞌínkꞌín ji, ngatꞌa̱ jí boá xi kachjábé kjo̱a̱ꞌniú jí ngi̱ndie nínga botíxomaa̱, kó Néná jè katsꞌénkꞌasꞌiee̱n ndíi̱ Absaloo̱n kui ngi̱ndiee̱, kó ngotꞌe̱ ꞌne̱, achichí kijíndikoón kjo̱a̱a̱ ni xi ndajín xi tiniꞌín ji, ngatꞌa̱ nda̱ xi tsꞌenkꞌién ini̱ma̱ boá ji.
9Kósꞌe̱ Abisaii̱ ndií Sarbiaa̱, bi̱ katsoó nda̱ ree̱:
—Ánní nga to̱kó kꞌuijñá kon kui ńñá kꞌieén nga chꞌo tsꞌén tsꞌénchji̱a̱taꞌin nda̱ ree̱, kui xi ndi̱a̱na. Tsi ko̱e̱ꞌéndièní, kjo̱a̱ꞌatjón an, tsi̱ꞌe̱ nga kotiesen an.
10Ta̱nga bi̱ katsó nda̱ ree̱:
—Kó mí xí yàjnú jún kjo̱a̱a̱ kui nii̱, jún ndií Sarbiaa̱. Xióchónjnú chꞌo tsꞌén ngatíchji̱a̱ra, ngatꞌa̱ tsi Néná xí bi̱ katsoó: ¡Chꞌo tsꞌén ndokjo̱e̱taꞌin ji Ndabii̱! ꞌYá xí bi̱ ka̱tso̱o̱: Ánní nga bo̱a̱ kjiꞌi kon ni xi tiniꞌín ji.
11Kó Ndabii̱, bi̱ katsoó Abisaii̱ ko̱jo ngayeje já mosoo̱:
—Ngotꞌe̱ ꞌne̱, ti̱kuii ndí tsa̱ꞌa̱n, kui xi an jatjojinna, mejeén sa̱ꞌínkꞌiénna, akja̱ꞌmíra̱ nga bo̱a̱jín sa̱ꞌín kui nda̱ xi xota̱ tji̱e̱e̱ Benjaa̱ chji̱a̱ni. Te̱ꞌéndièjnúu̱ nga chꞌo nga tsóra kondra̱na, ngatꞌa̱ Néná boá xi bo̱a̱ katsoó. 12A bena tsí Néná skotsíjee̱n kjo̱a̱ni̱ma̱na, kó ta̱sá ni xi nda tsja̱ana kjo̱a̱a̱ ni xi ndajín xi kandokjo̱a̱taꞌinna ngotꞌe̱.
13Kó bo̱a̱ tsꞌén Ndabii̱ ko̱jo xota̱ xi tsoꞌbájo̱ kijíra ndi̱ya̱à, tji̱e̱nga Simeii̱ ki̱a̱ kijí xtji̱e̱e̱n na̱xi̱i̱, xtji̱e̱e̱n kje̱n nínga tsꞌénfí Ndabii̱, nga chꞌo katsó, ko̱jo ndi̱jo̱ iskjiní xtji̱e̱e̱n kje̱n Ndabii̱, ko̱jo iskjitjón xa̱ nga.
14Kó nda̱ ree̱ ko̱jo ngayeje xota̱ na̱xi̱ńdá xí nijan síndojo̱, achichí jè jenda nga jachó, kó ki̱a̱ katsꞌénkjaꞌyá.
Absaloo̱n tsꞌasꞌien na̱xi̱ńdáꞌniú Jerusalee̱n
15Kó Absaloo̱n ko̱jo ngayeje xotaa̱, kui xi já Israee̱l, tsꞌasꞌien ki̱a̱ na̱xi̱ńdáꞌniú Jerusalee̱n, ko̱jo nda̱ xi ꞌmí Aitofee̱l nga. 16Kó kjiꞌanga nda̱ xi ꞌmí Usaii̱ nda̱ arkitaa̱, kui xi nda tsaꞌa Ndabii̱, jachó ngindyi̱ko̱n Absaloo̱n, bi̱ katsoó: ¡Tsie ngatamaa̱ nda̱ ree̱! ¡Tsie ngatamaa̱ nda̱ ree̱!
17Ta̱nga Absaloo̱n, bi̱ katsoó Usaii̱:
—A bi̱ tsꞌén tjoó nda̱ xi nda kichꞌié ji. Kó ánní nga ki̱a̱jín kꞌinje̱ kon ji kui nda̱a̱.
18Kósꞌe̱ Usaii̱, bi̱ katsoó Absaloo̱n:
—Jmí, ngatꞌa̱ kui xi Néná jè jaꞌájin, ko̱jo kui xota̱ na̱xi̱ńdaá, ko̱jo ngayeje jáxíꞌín xi chji̱a̱ni Israee̱l, ki̱a̱ kuichjiáni an, kó ki̱a̱ kotíjña̱jo an. 19Kó xi ma joó ni. ꞌYá xí sa̱ꞌinsée̱n. A ki̱a̱jín kotíjña̱ an ngindyi̱ko̱n ndíi̱. Xikó tsꞌén katsꞌenxá án ngindyi̱ko̱n na̱ꞌmíi̱, ti̱ bo̱a̱ ti̱ tsꞌén kotíjña̱ an ngindyikin ji nga.
20Kósꞌe̱ Absaloo̱n, bi̱ katsoó Aitofee̱l:
—Te̱ꞌé ji kjo̱a̱botíxoma kjo̱a̱a̱ ni xi si̱ꞌanjne̱.
21Kó Aitofee̱l, bi̱ katsoó Absaloo̱n:
—Tsjajnije̱ ji ínchjín xí índo na̱ꞌmíi̱, tsi̱ꞌe̱ nga skondá ndiꞌaa̱, ki̱a̱ ka̱maa̱ nga ngayeje xota̱ Israee̱l sku̱i̱e̱ nga ta̱nisién ndajín kjiꞌi ni xi kiniꞌínje̱ ji na̱ꞌmíi̱, kó bo̱a̱ tsꞌén nga ꞌniú ngase ka̱ma ngayeje xota̱ xi síndojoo̱ ji.
22Kó bo̱a̱ tsꞌén kiniꞌándaa̱ Absaloo̱n ngo ndiꞌańjño ki̱a̱ nga̱són nkꞌaá ndiꞌaa̱, kó Absaloo̱n kisꞌiejo̱ ínchjiín na̱ꞌmii̱, kó ngayeje xota̱ Israee̱l xi kamábe kuí nii̱. 23Kui ni̱xtjin jàn kjo̱a̱botíxoma xi katsjá Aitofee̱l xikó maá tsi eén Néná xí akasíyaá. Bo̱a̱ má tsó ngayeje kjo̱a̱botíxoma xi katsjá Aitofee̱l, tsi tsi̱ꞌe̱ Ndabii̱ ko̱jo tsi tsi̱ꞌe̱ Absaloo̱n.
Currently Selected:
2 Samuee̱ 16: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
