2 Samuee̱ 15
15
Absaloo̱n kamámejeén re kamá
1Jaskan ngije jaꞌa ni̱xtjin nga kamá kui nii̱, Absaloo̱n katsꞌénda karreta̱ ko̱jo kisꞌiee̱ ndi̱je̱, kó ichítié jáxíꞌín kisꞌiee̱ xi kijítjoón. 2Kó xki̱ nga ta̱jño̱ó jastjíe̱n Absaloo̱n, kó ki̱a̱ kisꞌijña tꞌa ndi̱ya̱à ki̱a̱ xtji̱e̱e̱n nga̱ntjo̱a̱a̱, kó ta̱ꞌyaní xi kisꞌiee̱ ngo kjo̱a̱xti xi tsꞌénfíkoón nda̱ ree̱ tsi̱ꞌe̱ nga sa̱ꞌíndajin kjo̱a̱a̱ katsaki, Absaloo̱n tsíchji̱a̱a̱, kó bi̱ katsoó nga asíyaá:
—Ñá na̱xi̱ńdaá ndokjo̱e̱ni ji. Kó kui nda̱a̱, bi̱ katsó: Kui nda̱ mosòo̱ xi̱ꞌbi̱ ki̱a̱ chji̱a̱ni ngo xtín xota̱ tji̱e̱e̱ Israee̱l. 3Kósꞌe̱ Absaloo̱n, bi̱ katsoó:
—Jéꞌe̱n, nda kjiꞌi ko̱jo kixi̱ kjíꞌí kjo̱a̱ tse̱, ta̱nga jmíjín xota̱ xi ka̱ma ku̱i̱ntꞌie̱é, xi chji̱a̱ni nda̱ ree̱. 4Kó bi̱ katsó Absaloo̱n:
—¡ꞌYá xí ka̱maa̱ nga nendiꞌamasien ku̱i̱ꞌíjñana an katsaki tsi̱ꞌe̱ kui tꞌanangii̱. Ngatꞌa̱ kjiꞌanga ngo xota̱ xi tjiín ngo kjo̱a̱xti ko̱jo tsi ngo ni, kó tsi an kji̱ndi̱bákónna, án boá xi kixi̱ tsꞌén sa̱ꞌinsée̱n!
5Kó kjiꞌanga ngo xota̱ xi jachókón tiñaa̱ tsi̱ꞌe̱ nga kꞌuijñáxtien katsaki, Absaloo̱n yejeén tsja, kó katsꞌénkjastjíe̱n, sꞌe̱ katsjaá ngo ndsó tꞌanijon. 6Kó bo̱a̱ katsꞌénjo̱ ngayeje xota̱ Israee̱l xi jachókoón nda̱ ree̱, tsi̱ꞌe̱ nga sa̱ꞌíndajin kjo̱a̱a̱, kó bo̱a̱ tsꞌén nga ngayeje xota̱ Israee̱l nda kasasiee̱n Absaloo̱n.
7Ngije jaꞌa nijón nó, ngo ndi̱yà Absaloo̱n, bi̱ katsoó nda̱ ree̱:
—ꞌNiú míꞌaá nga ko̱e̱ꞌéndièní nga kjuín án nangi Ebroo̱n, tsi̱ꞌe̱ nga sa̱ꞌinkjatjosón an ngo ni xi je kixiyatjóo̱n Néná. 8Ngatꞌa̱ kjiꞌanga kisꞌijña ki̱a̱ nangi Ngesuu̱r, ngi̱ndie xi chji̱a̱ni nangi Araa̱n, kui mosòo̱, bi̱ katsó: Tsi Néná xí ja̱koxi̱ nga tsja̱ndièna nga kjuín ngiñá an na̱xi̱ńdáꞌniú Jerusale̱n, ja̱ an sa̱ꞌin an xaá Néná.
9Kó nda̱ ree̱, bi̱ katsoó:
—Tꞌen xió xió ji. Kó Absaloo̱n jastjíe̱n, sꞌe̱ kijí nangi Ebroo̱n. 10Ta̱nga Absaloo̱n katsangiya já xí kijíkatsijenꞌmá nínga síndo ngayeje xota̱ tji̱e̱e̱ xota̱ Israee̱l, kó bi̱ katsoó: Nga ko̱nda̱ꞌyájnú nga kjo̱ni̱e̱ tjioo̱, bi̱ tꞌínjnú: Absaloo̱n boá xi tikón ree̱ ki̱a̱ nangi Ebroo̱n. 11Kó Absaloo̱n nijan kijíjo̱ni ki̱a̱ na̱xi̱ńdáꞌniú Jerusale̱n jó úchán jáxíꞌín xi katsóyaà, ta̱nga kui jaá ta̱xkiya kijí, kó nde bejín mí ni xi kjima.
12Kó tji̱e̱nga Absaloo̱n tjítsꞌénkꞌásꞌién kjo̱a̱tjó, tsíchji̱a̱a̱ nda̱ xi ꞌmí Aitofee̱l, nda̱ xi chji̱a̱ni na̱xi̱ńdáꞌniú Jiloo̱, nda̱ xi katsjaá kjo̱a̱botíxoma Ndabii̱, ki̱a̱ kui na̱xi̱ńdáꞌniuú. Kó kamáꞌniú ngase ni xi ndajín xi índa kondra̱a̱ Ndabii̱, kó ta̱sasá kamákjín ngase xota̱ xi kijítji̱ngii̱ Absaloo̱n.
Ndabii̱ tsanga ki̱a̱ na̱xi̱ńdáꞌniú Jerusalee̱n
13Kó ngo nda̱ chji̱ni̱e̱ꞌén kijíkoón Ndabii̱ nga bi̱ katsoó: Jáxíꞌín xi chji̱a̱ni na̱xi̱ńdá Israee̱l jè katsjaákon nga ki̱a̱ je tjimátji̱ngii̱ Absaloo̱n.
14Kó Ndabii̱, bi̱ katsoó ngayeje já mosoo̱ xi nijan kisꞌińdojo̱ ki̱a̱ na̱xi̱ńdáꞌniú Jerusale̱n:
—Ti̱sítji̱e̱njnú kó ku̱i̱yò, ngatꞌa̱ ka̱májín kjo̱tjonginá yojoná ngindyi̱ko̱n Absaloo̱n, tsá tjiàn, ngatꞌa̱ tsi tsá sa̱ꞌiín yojoo̱, kjo̱chótji̱nginá, kósꞌe̱ ni xi ndajín sa̱ꞌínjo̱ná, kó ki̱cha̱ndojó sa̱ꞌínkꞌiénni xota̱a̱ kui na̱xi̱ńdáꞌniuú.
15Kó já mosoo̱ nda̱ ree̱, bi̱ katsoó:
—Jè tindyiondajne̱ ji̱n xi moso̱jne̱, tsi̱ꞌe̱ nga si̱ꞌanjne̱ ngayeje ni xi ka̱tso̱jne̱ nda̱ ree̱.
16Kósꞌe̱ nda̱ ree̱ jatjoni, kó kijítji̱ngii̱ ngayeje xota̱ ndiꞌaa̱, ta̱nga tie ínchjiín índo tsi̱ꞌe̱ nga askondá ndiꞌaa̱. 17Kó jatjo nda̱ ree̱ ko̱jo ngayeje xota̱ na̱xi̱ńdá xí kijítji̱ngii̱, kó ki̱a̱ xió kixindyia ki̱a̱ Bee̱t-Meraa̱k. 18Kó ngayeje já mosoo̱ nda̱ ree̱ ki̱a̱ jaꞌatꞌaa̱, ko̱jo ngayeje xota̱ Sereteoo̱, ko̱jo xota̱ Peleteoo̱, ko̱jo ngayeje xota̱ Jeteoo̱, jun úchán jáxíꞌín kamá xi kjindibáyiseni ndeskande nangi Ngaa̱t, xi kijítjoón nda̱ ree̱.
19Kósꞌe̱ nda̱ ree̱, bi̱ katsoó Itaii̱ nda̱ Jeteoo̱:
—Ánní nga ko̱jo ji kꞌi̱e̱ nijan kjindibéje̱jne̱. Tꞌen nginí ji, kó ki̱a̱ ti̱ndyinje̱ ji nda̱ ree̱, ngatꞌa̱ xota̱ xi xín nangi boá ji, ko̱jo jè ikiyotji̱ngii̱ nangìi̱. 20Ngojña̱ boá nga jéꞌe̱ ji, kó a ngotꞌe̱ má sa̱ꞌin an nga nijan kꞌuínje̱jne̱ ji, tji̱e̱nga kjuín án nínga tsꞌénfí an, ta̱sá tꞌen nginí ji, kó ti̱ꞌin ji nga kji̱ndi̱bá nginí já ntsꞌie ji, kó Néná ngatsjaá kjo̱a̱ni̱ma̱takón ko̱jo kjo̱a̱kixi̱.
21Ta̱nga Itaii̱, bi̱ katsoó nda̱ ree̱:
—Tikón boá Néná, ko̱jo ti̱ tikón boá ndi̱a̱na nda̱ ree̱, nga ta̱ nínga tikón ndi̱a̱na nda̱ ree̱, nga ki̱a̱ ko̱yà án ko̱jo tsi ki̱a̱ kotíjña̱ an, ja̱koxi̱ boá nga ki̱a̱ kꞌuijñá kui mosòo̱ nga.
22Kó Ndabii̱, bi̱ katsoó Itaii̱:
—Ja̱bíꞌi̱n, kó ti̱tjétjén ji. Kó Itaii̱ nda̱ Jeteoo̱ jaꞌa kui, ko̱jo ngayeje já ko̱jo ngayeje jákjíndí xi nijan kisꞌińdojo̱. 23Kó ngayeje xota̱ na̱xi̱ńdaá askjandáyà má nga askjandá kjiꞌanga kui jaá jaꞌatio, kó ti̱ jaꞌatio nda̱ ree̱ xo̱ngàndántꞌié Sendroo̱n nga, ko̱jo ngayeje xota̱ xi jaꞌa nga kijí xtji̱e̱e̱n ndi̱yà xí fíni nangi kixií.
24Kó ti̱ jaꞌatio Sandoo̱k nga, ko̱jo ngayeje xota̱ tji̱e̱e̱ Lebii̱ xi síndojo̱ nga ndyi̱yaꞌankꞌá koxa̱a̱ kjo̱a̱ꞌbíndaa̱ Néná, kó íjñá koxa̱a̱ kjo̱a̱ꞌbíndaa̱ Néná ngaskande nga kamaá nga jatjoni xotaa̱ ki̱a̱ na̱xi̱ńdáꞌniuú. Kósꞌe̱ kjiꞌa kijínijíngí Abiataa̱r. 25Sꞌe̱ jaskan nda̱ ree̱, bi̱ katsoó Sandoo̱k:
—Ti̱ꞌin ji nga ko̱e̱je̱ nginí koxa̱a̱ kjo̱a̱ꞌbíndaa̱ Néná ki̱a̱ na̱xi̱ńdáꞌniuú. Kó tsi nda kasasiee̱n an Néná, kuí boá xi sa̱ꞌín nga kjuínꞌóyá nginí an, kó tsja̱ndièna nga skuie nginí an koxa̱a̱ ki̱a̱ ngi̱ndie nínga tikón. 26Kó tsi bi̱ ka̱tso̱ kui: Tsjajín mana ji, ja̱ kꞌi̱e̱ tikòn an, nga ta̱sá ngatsꞌénjo̱na ni xi nda máa kui. 27Kó nda̱ ree̱, bi̱ katsó ngasee̱ chináꞌmi Sandoo̱k:
—A jijín bo̱a̱ xi ye ji ni xi jaskan ka̱maa̱. Tꞌen xió xió nginí ji na̱xi̱ńdáꞌniuú, kó tꞌenje̱ ji nga jó ndíi̱ kui xi Aimaa̱, ko̱jo Jonataa̱n ndií Abiataa̱r. 28Tsitsíjenjnúu̱ nga an ki̱a̱ skoya an ki̱a̱ tꞌa nínga bitjasꞌi̱e̱nnii̱ nangi kixií, ngaskande nga kji̱ndi̱bájo̱jnú ngo én tsi̱ꞌe̱ nga kꞌuiyájnúꞌun. 29Kósꞌe̱ Sandoo̱k ko̱jo Abiataa̱r kijíjo̱ꞌoyá nginí koxa̱a̱ kjo̱a̱ꞌbíndaa̱ Néná ki̱a̱ na̱xi̱ńdáꞌniú Jerusale̱n, kó ki̱a̱ kisꞌińdo ngijee̱.
30Kó Ndabii̱ kijínijíngí ki̱a̱ nínga tjín yáꞌoliboo̱, kó nga kijínijíngí askjandá, nga tjiꞌmaá to̱ko̱ ko̱jo kjiꞌixtí sé. Kó ngayeje xota̱ xi nijan kistsoꞌbájo̱, ti̱ bo̱a̱ ti̱ tsꞌén yíꞌmá to̱ko̱ nga, kó askjandá tji̱e̱nga ndyi̱fínijíngí.
31Kó ngo xi bi̱ katsoó Ndabii̱:
—Nda̱ xi ꞌmí Aitofee̱l ki̱a̱ tikónjii̱n xota̱ xi nijan índajo̱ ni xi ndajín Absaloo̱n. Kósꞌe̱ Ndabii̱, bi̱ katsó:
—Ji Ne, ꞌniú míꞌaá nga si̱ꞌintsobéjìi̱n kjo̱a̱botíxoma xi tsjá Aitofee̱l.
32Kó kjiꞌanga jachó Ndabii̱ nínga ꞌniú nkꞌaá na̱xi̱i̱, ki̱a̱ nínga katsꞌéndikón Néná, Usaai̱ nda̱ arkitaa̱, jatjokjaà kó katjondiyá ńjño xi tsꞌényajá, ko̱jo ńdie ndyi̱a̱a̱ to̱ko̱. 33Kó Ndabii̱, bi̱ katsoó:
—Tsi kꞌi̱e̱ kji̱ndi̱bé ji, ta̱ xikónií tsi ngo ni é ka̱mana ji. 34Ta̱nga tsi kꞌuin nginí ji na̱xi̱ńdáꞌniuú, kó tsi bi̱ sée̱ Absaloo̱n: Ji nda̱ re, án boá mosòo̱ ka̱ma an, ngatꞌa̱ xikótsꞌèn mosoo̱ na̱ꞌmíi̱ kamá an, ngotꞌe̱ ꞌne̱, ti̱ moso̱ tse̱ boá an. Bo̱a̱ tsí tsꞌén nga ka̱ma si̱ꞌinkjie ji kjo̱a̱ ni xi atíxoma Aitofee̱l. 35A ki̱a̱jín nijan kꞌuíndojoo̱ chináꞌmi Sandoo̱k ko̱jo Abiataa̱r. Kuíni nga ngayeje ni xi ko̱nda̱ꞌyé ji ndiꞌaa̱ nda̱ ree̱, ki̱a̱ tꞌíyée̱ chináꞌmi Sandoo̱k ko̱jo Abiataa̱r. 36Kó ki̱a̱ nijan síndojo̱ nga jó ndií, Aimaa̱, kui xi ndií Sandoo̱k, ko̱jo Jonataa̱n, kui xi ndií Abiataa̱r, kui jaá ti̱ꞌinkjìn jí nga kꞌuiyée̱ ngayeje ni xi ko̱nda̱ꞌyé ji.
37Kó bo̱a̱ tsꞌén Usaii̱, nda̱ xi nda tsaꞌa Ndabii̱ jachó na̱xi̱ńdáꞌniuú kjiꞌá má nga Absaloo̱n tsꞌénꞌbosꞌien na̱xi̱ńdáꞌniú Jerusale̱n.
Currently Selected:
2 Samuee̱ 15: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
