2 Samuee̱ 14
14
Nga jachóꞌoyá nginí Absaloo̱n
1Kó Joaa̱b ndií Sarbiaa̱ kamákjiín nga ini̱ma̱a̱ nda̱ ree̱ kamámejeén sku̱i̱e̱ Absaloo̱n. 2Kó kuíni nga Joaa̱b katsangiyakjaꞌá ki̱a̱ na̱xi̱ńdáꞌniú Tekoaa̱ ngo xota̱chjo̱on xí maña̱, kó bi̱ katsoó:
—ꞌNiú míꞌaá nga ti̱ꞌin ji xikoó tsi tindyin xa̱ꞌya̱ ji, kó che̱je ji ńjño xa̱ꞌya̱, kó ngata̱ nangínjín ji isti̱ yojòo̱, kó bo̱a̱ ngatꞌié ji xikoó ngo xota̱chjo̱on xí je kjín ni̱xtjinnii̱ nga tikón xa̱ꞌya̱ kjo̱a̱a̱ ngo xota̱ xi kꞌiee̱n, 3kósꞌe̱ tꞌenchíi̱n nda̱ ree̱, kó bi̱ tsꞌén ko̱ndókjo̱e̱je ji. Kó Joaa̱b katsóyaà ni xi ka̱tso̱o̱ nda̱ ree̱.
4Kósꞌe̱ kui xota̱chjo̱on xí chji̱a̱ni na̱xi̱ńdáꞌniú Tekoaa̱ tsíchji̱a̱jo nda̱ ree̱, kó nga jachó asiéntikoó ngaskande nga kisitꞌaa̱ xtjien tꞌanangii̱ nga kamábendikón, kó bi̱ katsoó:
—¡Tasíke̱jení ji re!
5Kósꞌe̱ nda̱ ree̱, bi̱ katsoó:
—Kó kamaá jí. Kó bi̱ katsó kui naa̱:
—Nga ja̱koxi̱ chjo̱on kꞌán án, ngatꞌa̱ jè kꞌien xi̱ꞌinna. 6Jó kamá ndí xí kisꞌiee̱ kui na̱ mosòo̱, kó nga joó askjan ki̱a̱ ngi̱jin kꞌijñaá, kó nga jmíjín xi katsꞌénkꞌíxió, ngo katsꞌénꞌoón xi ingoo̱, kó katsꞌénkꞌién. 7Kó ngotꞌe̱ ꞌne̱ ngayeje xota̱ ndiꞌaa̱, kondra̱ síndonii̱ kui na̱ mosòo̱, kó bi̱ ndyi̱tsó: Ti̱ꞌinkꞌasꞌin ji kui xi katsꞌénkꞌién ntsꞌi̱e̱, tsi̱ꞌe̱ nga si̱ꞌankꞌien ji̱n kui, ta̱ngatꞌanii̱ nga ntsꞌi̱e̱ katsꞌénkꞌién, kó ti̱ si̱ꞌankꞌienjne̱ kui xi tsi̱ꞌe̱ kui ndiꞌaa̱ nga. Kó bo̱a̱ tsꞌén nga si̱ꞌankꞌo kui xꞌué xí tsꞌangina, kó xi̱ꞌinna ngiti̱ kꞌuiéjiín xota̱ tji̱e̱ xi ko̱a̱ꞌa ngase jaꞌeén kꞌi̱e̱ tꞌanangii̱.
8Kósꞌe̱ nda̱ ree̱, bi̱ katsoó kui naa̱:
—Tꞌen ndiꞌàa̱, kó án boá xi tsja an kjo̱a̱ kjo̱a̱a̱ ji.
9Kó kui xota̱chjo̱on xí chji̱a̱ni na̱xi̱ńdáꞌniú Tekoaa̱, bi̱ katsoó nda̱ ree̱:
—Ji ndi̱a̱, an ko̱jo xota̱ ndiꞌaa̱ na̱ꞌmina ngatꞌákaniéjne̱ kui ni xi ndajiín, ta̱nga ree̱ ko̱jo ngi̱ndie nínga botixómá nga jmí jé kꞌuiéjiín.
10Kó nda̱ ree̱, bi̱ katsoó:
—Xi ku̱i̱chji̱a̱ kondra̱ tse̱, ngatjandibakónna kꞌi̱e̱e̱, kó ngiti̱ jmí ni sa̱ꞌínjo̱jiín jí.
11Kósꞌe̱ bi̱ katsó kui xota̱chjo̱on:
—ꞌNiú míꞌaá ji re, nga ngatjaꞌátsjiee̱n Néná kui xi Ne tse̱, tsi̱ꞌe̱ nga kui xi tsꞌénngojoó ngiti̱ sa̱ꞌíntsiejín ngase kui kjo̱a̱xtii̱, ti̱nde ngiti̱ jmí ni sa̱ꞌínjo̱jín ndína.
Kó bi̱ katsó nda̱ ree̱:
—¡Ja̱koxi̱ boá nga tikón Néná, nga nde ngojín tsja̱tokó ndíi̱ xi kꞌo̱ka tꞌanangi!
12Kó bi̱ katsó kui xota̱chjo̱on:
—ꞌNiú míꞌaá nga te̱ꞌéndiè ji nga kui na̱ mosòo̱ ngo én ku̱i̱chji̱a̱jo ndi̱a̱na.
Kó bi̱ katsó nda̱ ree̱:
—Ndókjo̱e̱ ji. 13Kósꞌe̱ bi̱ katsó kui xota̱chjo̱on:
—Ánní nga bo̱a̱ tsꞌén kiniꞌínkjé jí kjo̱a̱a̱ kondraa̱ xota̱ na̱xi̱ńdaá Néná. Ngatꞌa̱ nga bo̱a̱ katsó ni xi tsíchji̱a̱ ree̱, ti̱kuíní bo̱a̱ xi tsꞌénmongii̱ jé yojoo̱, ngatꞌa̱ ree̱ ngiti̱ tsjandièjiín nga kjo̱e̱ꞌe nginí kui xi ikiyotji̱ngii̱.
14Ngatꞌa̱ ja̱koxi̱ boá nga kju̱i̱e̱són ñá, ngatꞌa̱ ñá xikónií ndáfoa xi katjon nga̱són tꞌanangii̱, xi ngiti̱ májín chjaꞌáꞌyá nginí, ta̱nga Néná foaꞌáxínjínná kjo̱a̱mindyioo̱n, ta̱sá tsjáná ni xi machjiénná tsi̱ꞌe̱ nga kui xota̱ xi je kjin kijií kji̱ndi̱báꞌoyá nginí.
15Kó ngotꞌe̱ ꞌne̱ nga kꞌi̱e̱ jéꞌe̱chji̱a̱jo an ree̱ kui eén, kjo̱a̱a̱ nga xota̱ na̱xi̱ńdaá boá xi indyiándikónna, kuíni nga kui na̱ mosòo̱, bi̱ katsó: Kuichjiájo mára an ngotꞌe̱ ree̱, tsi ta̱ꞌa nga sa̱ꞌínkjatjosón ni xi ku̱i̱ꞌaa̱ kui na̱ mosòo̱. 16Ngatꞌa̱ ree̱ ku̱i̱ntꞌiè kuí eén, tsi̱ꞌe̱ nga kꞌo̱xiéꞌá kui na̱ mosòo̱ ngi̱ya tsja kui xota̱ xi mejeén sa̱ꞌínkjiéjne̱ an ko̱jo ndína, kó nga kjo̱a̱ꞌáxínjne̱ ngi̱ndie xi katsjájne̱ Néná. 17Kó kuíni nga bi̱ kixian an: Eén ree̱, ndi̱a̱na, kui ngatsꞌéndajónna, ngatꞌa̱ kui xikónií tsi ngo ndítsjiee̱ Néná, kó be boá ni xi ndaa̱ ko̱jo ni xi ndajiín. Ngatꞌa̱ Néná kui xi Nèe̱, kuí boá tikónjoo̱ ji.
18Kósꞌe̱ Ndabii̱, bi̱ katsoó kui xota̱chjo̱on:
—Ngata̱ jmí ni ꞌbíꞌmíjínní kjo̱a̱a̱ ni xi kosíyaá.
Kó kui xota̱chjo̱on, bi̱ katsó:
—ꞌNiú míꞌáa̱ ndi̱a̱na kui xi ree̱ nga ngatíchji̱a̱.
19Kósꞌe̱ nda̱ ree̱, bi̱ katsó nga asíyaá:
—A jmí tsí Joaa̱b boá xi tsꞌénmindyiaꞌaá kjo̱a̱a̱ ngayeje kui nii̱. Kó bi̱ katsó kui naa̱:
—Ja̱koxi̱ boá nga tikón ini̱màa̱ ji re, ji xi ndi̱a̱na ji, nga ngojín xi xín ko̱e̱je̱ tsi nínga kixi̱i̱ ko̱jo tsi nínga skoón kjo̱a̱a̱ ngayeje ni xi ree̱ je tsíchji̱a̱. Kjénní nga mosòo̱ xi ꞌmí Joaa̱b boá xi katsangiyana, kó kuí boá xi katsjána kui eén tsi̱ꞌe̱ nga kuichjiá an. 20Mosòo̱ Joaa̱b boá xi katsꞌén kui nii̱, tsi̱ꞌe̱ nga asíkjo xikó kamaá, ta̱nga ji ndi̱a̱ achichí kjínkón ji, xikó kjiꞌi kjo̱a̱kjínkón xi tjiín ngo ndítsjiee̱ Néná, tsi̱ꞌe̱ nga xche̱ ji ngayeje ni xi tjín tꞌanangii̱.
21Kósꞌe̱ nda̱ ree̱, bi̱ katsoó Joaa̱b:
—Ngotꞌe̱ ꞌne̱, bi̱ sa̱ꞌin an: ¡Tꞌen ji, kó tꞌenchje̱ꞌé ji nda̱ xo̱ngo̱ò Absaloo̱n!
22Kó Joaa̱b asiéntikoó ngaskande nga kisitꞌaa̱ xtjien tꞌanangii̱ nga kamábendikón, sꞌe̱ katsꞌénchikonñé nda̱ ree̱, nga bi̱ katsó:
—Ngotꞌe̱ ꞌne̱, nga be an nga kui mosòo̱ nda tsꞌákaa̱ ji ndi̱a̱, ngatꞌa̱ nda̱ ree̱ jè katsꞌénkjatjosón ni xi tsíꞌá kui mosòo̱.
23Kósꞌe̱ Joaa̱b jastjíe̱n, kó kijí nangi Ngesuu̱r, sꞌe̱ kjindibájo̱ nginí Absaloo̱n kꞌi̱e̱ na̱xi̱ńdáꞌniú Jerusale̱n. 24Ta̱nga nda̱ ree̱, bi̱ katsó: Ngatjí ndiꞌaa̱, ta̱nga sku̱i̱e̱jín kje̱n án. Kó Absaloo̱n kijí nginí ndiꞌaa̱, ta̱nga kamábejín kje̱n nda̱ ree̱.
25Kó nde ngojín nda̱ xi tsja kisꞌie ngase ngayeje na̱xi̱ńdá Israee̱l xikoó Absaloo̱n, achichí ikꞌíndikón, ndeskande ngi̱ya se ngaskande nga̱tsjàtoko̱ nga nda kamá. 26Absaloo̱n íjón taka takaa̱ to̱ko̱, xki̱ nga fetꞌani noó nga íjoón yojoo̱, ngatꞌa̱ tsjajín kamaá tsja̱a̱, ngatꞌa̱ tsja̱to̱ko̱ tsꞌatio jó kilo̱ kamá é. 27Kó Absaloo̱n ján ndí xíꞌín kisꞌiee̱, ko̱jo ngo ndí chjo̱on xí na̱ Tamaa̱r kiꞌmí, kó achichí tsjá kisꞌie kui naa̱.
28Kó jó nó ndo̱jò ndójo̱ kamaá nga kisꞌijña ki̱a̱ na̱xi̱ńdáꞌniú Jerusale̱n, ta̱nga kamábejín kje̱n nda̱ ree̱. 29Jaskan Absaloo̱n katsangiyakjaꞌá Joaa̱b tsi̱ꞌe̱ nga ko̱e̱je̱koo̱n nda̱ ree̱, ta̱nga kui nda̱a̱ kamámejénjiín kijí. Kó Absaloo̱n, ti̱ katsangiya nginí xi ma joó ndi̱yà, kó ti̱ kamámejénjín nginií kijí.
30Kósꞌe̱ bi̱ katsoó já mosoo̱:
—Tsitsíjenjnúu̱ nga kꞌijñá xí tsi̱ꞌe̱ Joaa̱b ki̱a̱ tikóntꞌaa̱ xi tsa̱ꞌa̱n, ki̱a̱ tjiín to sebanda̱, tangínjnú kó tꞌítíjnúu̱. Kó já mosoo̱ Absaloo̱n ítí kui kꞌijñaá. 31Kósꞌe̱ Joaa̱b jastjíe̱n, kó kijí ndiꞌaa̱ Absaloo̱n, nga bi̱ katsoó:
—Ánní nga já mosòo̱ ítꞌa ndiꞌí kón tꞌanangi xi tsa̱ꞌa̱n. 32Kó Absaloo̱n, bi̱ katsoó Joaa̱b:
—Jè katsangiyaa én, nga bi̱ kixiaan: Ndibéchinní, tsi̱ꞌe̱ nga sangiyaa nínga tikón nda̱ ree̱, kó bi̱ sée̱: Ánní nga nangi Ngesuu̱r kjindibáni an. Ta̱sara̱ ndatsi ki̱a̱ kisꞌijña an. Mejénna skuie an kje̱n nda̱ ree̱ ngotꞌe̱, kó tsi tjín ni xi ꞌniú ndajín xi katsꞌen an, ja̱ ti̱kuii ngatsꞌenkꞌiénna.
33Kósꞌe̱ kijí Joaa̱b nínga tikón nda̱ ree̱, kó katsóyaà kui nii̱. Kósꞌe̱ tsíchji̱a̱a̱ Absaloo̱n, kó kui nda̱a̱ kijíkoón nda̱ ree̱, kó nga jachó ngindyi̱ko̱n nda̱ ree̱, asiéntikoó ngaskande nga kisitꞌaa̱ xtjien tꞌanangii̱, kó nda̱ ree̱ katsjaá ngo ndsó tꞌanijon Absaloo̱n.
Currently Selected:
2 Samuee̱ 14: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
