2 Samuee̱ 13
13
Amnoo̱n chꞌo katsꞌénjo̱ kjo̱a̱ꞌniú ndíchjá
1Jaskan ngije kamá kui nii̱, Absaloo̱n ndií Ndabii̱ kisꞌiee̱ ngo ndichja xi kiꞌmí na̱ Tamaa̱r, xi achichí tsjá kisꞌie, kó Amnoo̱n ndií Ndabii̱ kamámejeén kui naa̱. 2Kó achichí ni xi kamaá Amnoo̱n kjo̱a̱a̱ na̱ Tamaa̱r ndichja, ngaskande kamáꞌon maá, ngatꞌa̱ kui naa̱, kji̱e̱ jmí xi̱ꞌin ꞌbéjiín, kó katsꞌénkjó Amnoo̱n nga ka̱májín ta̱xkiya sa̱ꞌínjo̱ ngo ni xi ndajín kjiꞌi.
3Ta̱nga Amnoo̱n kisꞌiee̱ ngo nda̱ amingo̱ xi kiꞌmí Jonandaa̱b ndií Simeaa̱, ntsꞌi̱e̱ Ndabii̱, kó Jonandaa̱b achichí maña̱ kamá. 4Kó bi̱ katsoó Amnoo̱n:
—Ji ndií nda̱ ree̱, míkjo̱a̱a̱ nga ndyiojón ndyiojón kjimaxkꞌién kón ji. A kꞌuiyéjínní kuí nii̱.
Kó Amnoo̱n, bi̱ katsoó:
—Achichí mejénna na̱ Tamaa̱r, ndichja ntsꞌié án Absaloo̱n.
5Kósꞌe̱ Jonandaa̱b, bi̱ katsoó:
—Tsjajni ji ki̱a̱ ṉchàa̱n xikoó tsi oo̱n, kó kjiꞌanga kjo̱e̱ꞌekoón na̱ꞌmíi̱ nga kjo̱e̱ꞌekátsijee̱n, bi̱ tꞌíi̱n: Ngo kjo̱a̱nda míꞌaá na̱ꞌmi, ngatjandibakón chiína ndichja án na̱ Tamaa̱r, tsi̱ꞌe̱ nga tsja̱ana nichinie, kó ngatsꞌénda chií nichinie ngindyikón án tsi̱ꞌe̱ nga skuie an ni xi sa̱ꞌínda, kósꞌe̱ nga tsja̱a chiína tsi̱ꞌe̱ nga skjíni̱e̱ an.
6Kósꞌe̱ Amnoo̱n kisꞌie, kó xikoó tsi katsꞌénꞌoón yojoo̱, kó kjiꞌanga nda̱ ree̱ kijíkatsijee̱n, Amnoo̱n, bi̱ katsoó nda̱ ree̱:
—ꞌNiú míꞌaá na̱ꞌmi, nga ngatjandibá chií ndichja án na̱ Tamaa̱r, tsi̱ꞌe̱ nga sa̱ꞌíntsjangíxinié chiína jó ndí ṉño tje̱n pan tsi̱ꞌe̱ nga tsja̱ana kó skjíni̱e̱ an.
7Kósꞌe̱ Ndabii̱ katsangiya na̱ Tamaa̱r, ki̱a̱ ndiꞌaa̱ Amnoo̱n nga bi̱ katsoó:
—Tꞌen ji ndiꞌaa̱ ntsꞌie ji Amnoo̱n, kó ti̱ꞌindèe̱ nichinie.
8Kó kijí na̱ Tamaa̱r ki̱a̱ ndiꞌaa̱ Amnoo̱n ntsꞌi̱e̱, kó kui nda̱a̱ kjiꞌijña, kó kui naa̱ iskjíbé to ndso̱ko̱a̱n ṉño̱pan kó katsꞌénda̱ꞌyo̱, sꞌe̱ katsꞌénda ndí ṉño̱ tje̱n ngindyi̱ko̱n kui nda̱a̱, kósꞌe̱ katsꞌéntsjangíxinié. 9Kósꞌe̱ kui naa̱ tsꞌaxiéni nichiniee̱ ngi̱ya sartee̱n, ngindyi̱ko̱n Amnoo̱n, ta̱nga kui nda̱a̱ kamámejénjiín iskjinie. Kó Amnoo̱n, bi̱ tsꞌén atíxoma:
—Tji̱taxiejnú ngayejejnú ngindyikón án. Kó ngayejee̱ nga jatjoxieni kui ngi̱ndiee̱.
10Kósꞌe̱ Amnoo̱n, bi̱ katsoó na̱ Tamaa̱r:
—Ndibéje̱ní nichiniee̱ kꞌi̱e̱ ngi̱yaꞌmana, kó jí má te̱ꞌéní tsi̱ꞌe̱ nga skjíni̱e̱ an. Kó na̱ Tamaa̱r iskjíbé kui nichinie xi katsꞌénda, sꞌe̱ kijíjoo̱ Amnoo̱n ntsꞌi̱e̱ ki̱a̱ ngi̱yaꞌmaa̱. 11Ta̱nga kjiꞌanga kui naa̱ kijíkón tiñaa̱ tsi̱ꞌe̱ nga skji̱ni̱e̱ nichiniee̱, Amnoo̱n iskjíbé tsja kui naa̱, kó bi̱ katsoó:
—Ja̱bítsjanije̱ní ndichja.
12Kósꞌe̱ bi̱ katsó kui naa̱:
—Jmí ntsꞌie, ngata̱ bo̱a̱jín niꞌín ji, che̱ndikínní, ngatꞌa̱ kꞌi̱e̱ na̱xi̱ńdá Israee̱l niꞌánjín kui nii̱. Ngata̱ niꞌínjín ji kui ni chꞌokjiꞌii̱, 13ngatꞌa̱ ñá kjuínjo̱ an kui kjo̱a̱soboaá. Kó ngaskande ji, ngo xota̱ xi ndajín ka̱ma ji kꞌi̱e̱ na̱xi̱ńdá Israee̱l. Ngotꞌe̱ ꞌne̱, ꞌniú míꞌaá, tsi̱ꞌe̱ nga ko̱ndokjoéje ji ree̱, ngatꞌa̱ kui jmí ni ka̱tso̱jín nga sa̱ꞌínkabina nga chjóo̱n ka̱ma an.
14Ta̱nga Amnoo̱n kamámejénjiín tsintꞌié ni xi katsó kui naa̱, kó nga ꞌniú ngase kamá kuí, bo̱a̱ katsꞌénjo̱ kjo̱a̱ꞌniú kui naa̱. 15Sꞌe̱ tji̱e̱n má Amnoo̱n achichí ꞌniú chꞌo kamaá na̱ Tamaa̱r, ꞌniú ngase chꞌo kamaá, ta̱bo̱a̱jiín xikó kjiꞌi tjó kamaá ngasꞌe̱. Kó Amnoo̱n, bi̱ katsoó:
—Ti̱sítji̱n, kó tꞌen ji.
16Ta̱nga kui naa̱ ꞌniú tsíꞌaá nga bi̱ katsoó:
—Jmí, ngatꞌa̱ tsi ko̱ꞌna̱xiéni kuí ndiꞌaa̱, chꞌo ngase kjiꞌi kui nii̱ ta̱bo̱a̱jiín ni xi kiniꞌínje̱ní. Ta̱nga Amnoo̱n kamámejénjiín tsintꞌié ni xi katsó, 17ta̱sá tsíchji̱a̱a̱ nda̱ moso̱ xi tsꞌénxájo̱, kó bi̱ katsoó: Ti̱yítji̱ngìi̱ kui naa̱ kꞌi̱e̱e̱, kó tꞌíchjé ji nga̱ntjo̱a̱a̱ ngije jatjoxie.
18Kó kui naa̱ ngo ńjño ndio xi tiyá tsja tsꞌényajá, ngatꞌa̱ ínchjiín nda̱ ree̱ xi kji̱e̱ jmí xi̱ꞌin ꞌbéjiín bo̱a̱ kon ńjño tsajá. Kó kui nda̱ mosoo̱, tsꞌaxié kui naa̱, sꞌe̱ íchjá nga̱ntjo̱a̱a̱ ngijee̱. 19Kósꞌe̱ Tamaa̱r iskjíbé ndiso, kó indyiaá to̱ko̱, sꞌe̱ iskjíndiyá ńjño xi yajá, kui ńjño xi tiyá kamá tsja kui xi yajaá, kó achichí askjandáyà nga kijí nga íjñasoón tsja to̱ko̱.
20Kó Absalo̱n ntsꞌi̱e̱ kui naa̱, bi̱ katsoó:
—A ki̱a̱ kisꞌijñajoo̱ ntsꞌie ji xi ꞌmí Amnoo̱n. Xió ti̱ndyin ji ndichja, ngatꞌa̱ ntsꞌié boá. Ngata̱ nda̱jín maá ini̱màa̱ kjo̱a̱a̱ kui nii̱. Kó na̱ Tamaa̱r achichí askjandá nga kisꞌijña ndiꞌaa̱ Absalo̱n ntsꞌi̱e̱.
21Kó kjiꞌanga tsintꞌié kuí nii̱ nda̱ re Ndabii̱, achichí katsꞌénxchán. 22Kó Absaloo̱n ti̱nde ni xi nda ti̱nde ni xi ndajín tsíchji̱a̱jojín Amnoo̱n, ta̱nga achichí chꞌo kamaá Amnoo̱n, ta̱ngatꞌanii̱ nga bo̱a̱ katsꞌénjo̱ kjo̱a̱ꞌniú na̱ Tamaa̱r ndichja.
Absaloo̱n katsꞌénkꞌién Amnoo̱n
23Ngije jaꞌa jó nó, ngo ndi̱yà nga Absaloo̱n kijíkatie tsja̱a̱ cho̱tsa̱nga̱ ki̱a̱ nangi Baa̱l-Asoo̱r, kui ngi̱ndie xi tikóntꞌaa̱ nangi Efraii̱n, kó Absaloo̱n katsóyaà ngayeje ndií nda̱ ree̱. 24Kó Absaloo̱n kijíkoón nda̱ re, kó bi̱ katsoó:
—Kꞌi̱e̱ tikón kꞌi̱e̱e̱ mosòo̱ nga tsꞌénbotie tsja̱a̱ cho̱tsa̱nga̱a̱, ꞌniú míꞌaá nga kji̱ndi̱bá nda̱ ree̱ ko̱jo já mosoo̱ tsi̱ꞌe̱ nga ko̱e̱je̱jo kui mosòo̱.
25Ta̱nga nda̱ ree̱, bi̱ katsoó Absaloo̱n:
—Jmí xi̱ꞌin, kongínjínjne̱ ngayejejne̱, tsi̱ꞌe̱ nga niꞌínjín ka̱maa̱ ji. Kó ndatsi ꞌniú katsꞌén Absaloo̱n, tsi̱ꞌe̱ nga ko̱e̱je̱, ta̱nga kamámejénjiín kijí, kó ta̱sá katsꞌénchikonñé. 26Kósꞌe̱ Absaloo̱n, bi̱ katsó:
—Tsi kꞌuínjín ji, ꞌniú míꞌaá nga ta̱sá ngatjíjo̱jne̱ ntsꞌié án Amnoo̱n. Kó nda̱ ree̱, bi̱ katsó:
—Kó ánní nga ji kon ko̱e̱je̱joo̱.
27Kó nga Absaloo̱n achichí ꞌniú katsꞌén, nda̱ ree̱ katsjandiè nga kijíjo̱ Amnoo̱n, ko̱jo ngayeje ndií nda̱ ree̱. 28Kó Absaloo̱n atíxomaa̱ já mosoo̱ nga bi̱ katsoó:
ꞌNiú míꞌájnúꞌun jún nga tsitsíjenjnúu̱ kjiꞌanga je tsjakjiꞌii̱ ini̱ma̱a̱ Amnoo̱n kjo̱a̱a̱ binoo̱, kó nga bi̱ xiánjnúꞌun: ¡Ti̱ꞌanꞌonjnúu̱ Amnoo̱n! Kó ti̱ꞌankꞌiènjnú, kó ngata̱ ndakonjínmájnú, ngatꞌa̱ án boá xi katsjajnúꞌun ngo kjo̱a̱. Ti̱ꞌangaꞌniújnú, kó chꞌokon ti̱ꞌánjnú yojojnú.
29Kó já mosoo̱ Absaloo̱n bo̱a̱ katsꞌénjo̱ Amnoo̱n xikó katsoó Absaloo̱n. Kósꞌe̱ ngayeje ndií nda̱ ree̱ jastjíe̱n, kó ńgó ńgó kisꞌińdosoón ndi̱je̱tajaá, sꞌe̱ tsanga.
30Kó tji̱e̱nga ndyi̱fí ngi̱ya ndi̱ya̱à, jachoó ngo én nda̱ re Ndabii̱ nga bi̱ kiꞌmií: Absaloo̱n jè katsꞌénkꞌién ngayeje ndií nda̱ ree̱, kó nde ingojín xi tsꞌangi ngase. 31Kósꞌe̱ nda̱ ree̱ jastjíe̱n, kó iskjíndiyájón ńjño xi yajá, kósꞌe̱ asiéntikoó ngaskande nga kisitꞌaa̱ xtjien tꞌanangii̱, kó ngayeje já mosoo̱ ki̱a̱ kisꞌińdo nga ngo foaꞌatjiyajoo̱n nga ti̱ iskjíndiyá ńjñoo̱ kui nga. 32Ta̱nga Jonandaa̱ ndií Simeaa̱, ntsꞌi̱e̱ Ndabii̱, bi̱ katsoó:
—Ngata̱ bo̱a̱jín tsꞌén tsꞌénkjó ndi̱a̱na, nga je kiniꞌánkꞌién ngayeje já xo̱ngo̱ò nda̱ ree̱, ngatꞌa̱ ta̱ Amnoo̱n tsí bo̱a̱ xi kiniꞌánkꞌieén, ngatꞌa̱ Absaloo̱n boá xi bo̱a̱ katsó nga sa̱ꞌínkꞌién, ni̱xtjin nga Amnoo̱n chꞌo katsꞌénjo̱ kjo̱a̱ꞌniú na̱ Tamaa̱r ndichja. 33Kó kuíni nga ngotꞌe̱ ꞌne̱ nda̱ re, ngata̱ ꞌbíjinjín ji ngi̱jin ini̱màa̱ kui én xí bo̱a̱ tsó nga ngayeje ndií nda̱ ree̱ jè jesón. Ngatꞌa̱ ta̱kuítsí Amnoo̱n xi kꞌien.
34Kó Absaloo̱n tsanga. Kó kui nda̱ xo̱ngò xí kondaa̱ nga iskjininkꞌa kje̱n kamábe nga achichí má xota̱ xi ndyi̱ndibá xtji̱e̱e̱n nga̱xto̱n kui nda̱a̱, ki̱a̱ xtji̱e̱e̱n na̱xi̱i̱. 35Kó Jonandaa̱b, bi̱ katsoó nda̱ ree̱:
—¡Jéꞌe̱n ki̱a̱ ndyi̱ndibá ki̱a̱a̱ ndií nda̱ ree̱! Xikó má katsoó kui mosoo̱, bo̱a̱ má kamá. 36Kó ngije kamaá nga tsíchji̱a̱ kui nda̱a̱, jachó jaá nda̱ ree̱, kó ꞌniú askjandáyà nga askjandá, kó ti̱ bo̱a̱ ti̱ tsꞌén nda̱ ree̱ ko̱jo ngayeje mosoo̱ achichí ꞌniú askjandá nga.
37Kó nda̱ ree̱ kisꞌijña xa̱ꞌya̱ kjo̱a̱a̱ ndií ndyiojón ndyiojón, ta̱nga Absaloo̱n tsanga, kó ki̱a̱ kijíkoón Talmaii̱ ndií Amiuu̱nd, nda̱ ree̱ nangi Ngesuu̱r. Kó Ndabii̱ ndyiojón ndyiojón askjandátjé ndií. 38Kó bo̱a̱ tsꞌén tsanga Absaloo̱n nga kijí nangi Ngesuu̱r, kó ján nó kamaá nga kisꞌijña ki̱a̱a̱. 39Kó nda̱ re Ndabii̱ achichí ni xi kamaá nga kamámejeén sku̱i̱e̱ Absaloo̱n katsaki, ngatꞌa̱ ja̱bo̱a̱ jè kiniꞌándajoo̱n kjo̱a̱a̱ nga kꞌien Amnoo̱n.
Currently Selected:
2 Samuee̱ 13: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
