2 Samuee̱ 12
12
Néná katsꞌénxchánjo̱ Ndabii̱
1Kó Néná katsangiya Nataa̱n tsi̱ꞌe̱ nga ko̱e̱je̱koo̱n Ndabii̱, kó bi̱ katsoó:
—Ngo na̱xi̱ńdáꞌniú kisꞌińdo jó já, ngo xi cho̱n, kó ngo xi ni̱ma̱ xi jmí to̱njiín. 2Nda̱ xi cho̱o̱n achichí cho̱tsa̱nga̱ ko̱jo cho̱yojo kisꞌiee̱, 3ta̱nga kui nda̱ ni̱ma̱a̱, ta̱ ngo tsí ndí cho̱tsa̱nga̱ chjo̱on xí kisꞌiee̱, xi tsꞌatsie kó katsꞌénxchá, kó kui cho̱o̱ nijan kamáxchá ko̱jo ndií, kó nijan iskjinie nichinie, ko̱jo nijan katsꞌe ni xi ꞌyó, kó ki̱a̱ kisꞌifé nga̱són ni̱se̱e̱n, kó xikoó tsi ndí tsa̱kji̱ín kamá.
4Ta̱nga ngo nda̱ xi fotsoꞌbá kjin ngi̱ndie, jachókoón nda̱ xi cho̱o̱n, kó kui nda̱ cho̱o̱n kamámejénjiín iskjíbé ngo cho̱tsa̱nga̱ ko̱jo tsi ngo cho̱yojo xi tjiín, tsi̱ꞌe̱ nga sa̱ꞌínchjaán nichinie nda̱ xi jachókoón, kó ta̱sá iskjíbé kuí cho̱tsa̱nga̱a̱ nda̱ xi ni̱ma̱a̱, kó katsꞌéndaa̱ nichinie nda̱ xi jachókoón.
5Kósꞌe̱ Ndabii̱ achichí katsꞌénxchánjo̱ kui nda̱a̱, kó bi̱ katsoó Nataa̱n:
—¡Ja̱koxi̱ nga tikón boá Néná nga kui nda̱ xi bo̱a̱ katsꞌeén, chjiéngá ko̱yà! 6Kó chjiéngá nijón bo̱a̱ kjiꞌi ku̱i̱ꞌíchjí xikótjín chjií kui ndí cho̱tsa̱nga̱a̱, ngatꞌa̱ bo̱a̱ kjiꞌi ni xi katsꞌén, kó ni̱ma̱jín kamaá.
7Kósꞌe̱ Nataa̱n, bi̱ katsoó Ndabii̱:
—¡Jí boá kui nda̱ xi̱ꞌba̱! Kó bi̱ tsó Néná, kui xi Nee̱ xota̱ Israee̱l:
Án boá xi jaꞌajii̱n nga katsjaa xá nga jí xi ko̱ti̱xomée̱ na̱xi̱ńdá Israee̱l, kó án boá xi tsꞌaxiéꞌaá ngi̱ya tsja Sauu̱l, 8kó katsjaa ndiꞌaa̱ ndi̱a̱a̱, kó ti̱ indoo ínchjiín ndi̱a̱a̱ tꞌa ni̱se̱e̱n, kó ti̱ katsjaa xota̱ ndiꞌaa̱ xota̱ Israee̱l, ko̱jo xota̱ na̱xi̱ńdá Jundáa̱, kó tsi chiboa maa̱ kui nii̱, achichí tsie ngase ni xi katsjaa.
9Míkjo̱a̱a̱ nga kiniꞌínchꞌí ji eén Néná, nga ni xi ndajín kjiꞌi xi kiniꞌín ji ngindyi̱ko̱n kui. Ki̱cha̱ndojó kiniꞌínkꞌínni ji Uriyaa̱ nda̱ xi xota̱ tji̱e̱e̱ Ee̱t, kósꞌe̱ chjóo̱n kiniꞌín ji chjo̱ón, kó ki̱cha̱ndojoó xota̱ amonitaa̱ kiniꞌínkꞌínni ji.
10Kuíni nga ngotꞌe̱ ꞌne̱, ngatsjéni̱xtjin nga kꞌuieé kjo̱a̱xti ndiꞌàa̱, ngatꞌa̱ kiniꞌínchꞌíní, kó kachjábé jí chjo̱ón Uriyaa̱, nda̱ xi xota̱ Ee̱t, sꞌe̱ chjóo̱n kiniꞌín ji.
11Bi̱ katsó Néná:
—Án boá xi sa̱ꞌin an nga ni xi ndajiín kji̱ndi̱bánié xota̱ ndiꞌàa̱. Skjíbé án ínchjíi̱n ngindyikin ji, kó xota̱ xingi̱ ji tsjáa̱, kó kuí kjojñájo̱ ínchjíi̱n nga ngayeje xi sku̱i̱e̱. 12Ngatꞌa̱ ji ꞌma kiniꞌín ji kui nii̱, ta̱nga án boá xi sa̱ꞌin an kui nii̱ ngindyi̱ko̱n ngayeje xota̱ Israee̱l, ko̱jo nga ngayeje xi sku̱i̱e̱.
13Kó Ndabii̱, bi̱ katsoó Nataa̱n:
—¡Katsꞌenjé án kondraa̱ Néná!
Kó Nataa̱n, bi̱ katsó nginií Ndabii̱:
—Kó Néná jè katsꞌénjetakoón jée̱, kuíni nga ko̱yèjín ji. 14Ta̱nga kui nii̱ xi katsꞌén nga ji chꞌo kase ji kondraa̱ Néná, kuíni nga kui ndíi̱ xi sꞌe̱ katsee̱n, ja̱koxi̱ boá nga ko̱yà.
15Kó Nataa̱n kijí nginí ndiꞌaa̱. Kó Néná katsꞌénꞌoón ndí xí sꞌe̱ katsee̱n chjo̱ón Uriyaa̱ kui xi tsi̱ꞌe̱ Ndabii̱, kó ꞌniú kamáꞌoón kui ndií. 16Kó Ndabii̱ ꞌniú tsíꞌaá Néná kjo̱a̱a̱ kui ndií, kó katsꞌénkjaꞌa kjindiá yojoo̱, sꞌe̱ kijí ndiꞌaa̱, kó tꞌanangi jajña kui ni̱xtji̱e̱e̱n. 17Kó xota̱ xchá xí chji̱a̱ni ndiꞌaa̱, kijíkoón Ndabii̱ tsi̱ꞌe̱ nga sa̱ꞌínkjastjíe̱n, ta̱nga kamámejénjiín, ti̱nde jmí ni iskjiniejo̱jín kui jaá nga.
18Kó xi ma yito ni̱xtjin kꞌien kui ndií, kó já mosoo̱ Ndabii̱ katsakjónní nga kijítsóyaà nda̱ ree̱ nga je kꞌien kui ndií, ngatꞌa̱ ja̱kꞌi̱e̱ ja̱ngaján, bi̱ katsoó xkjín: Kjiꞌanga to̱kó tikón kui ndií, kandokjo̱a̱jo, ta̱nga tsintꞌiéꞌénjínná, achichíra̱ ndasen ka̱ma ngasee̱ tsi kꞌuiyáa̱ nga je kꞌien kui ndií. 19Kó nga kamábe Ndabii̱ nga já mosoo̱ ndyi̱chji̱a̱jo si̱e̱n xkjín, kamákjiín nga je kꞌien kui ndií, kó bi̱ katsó nga asíyaá já mosoo̱:
—A jè kꞌien kui ndií.
Kó kui jaá, bi̱ katsó:
—Jo̱o̱n jè kꞌien.
20Kósꞌe̱ Ndabii̱ jastjíe̱nni nga kjiꞌijña tꞌanangii̱, tsangóyá, katsangijon ndásíje̱n yojoo̱, sꞌe̱ asíkjo ńjñoo̱, kó tsꞌasꞌien ndiꞌaa̱ Néná nga asiéntikoó. Jaskan ngije kijí ndiꞌaa̱, kó ngije tsíꞌá nichinie, katseꞌeé, kó iskjinie.
21Kó bi̱ katsoó já mosoo̱:
—Míkjo̱a̱a̱ nga bo̱a̱ kjiꞌi kon ni xi kiniꞌín ji. Tji̱e̱nga tikón kui ndií, kiniꞌínkjeꞌe ji kjindiá yojòo̱ ko̱jo kichieꞌé jí, ta̱nga ngije kꞌien kui ndií, ikìstji̱n ji, kó kichini ji pan.
22Kó bi̱ katsoó Ndabii̱:
—Tji̱e̱nga tikón ngase kui ndií, katsꞌenkjaꞌa an kjindiá yojona, ko̱jo askjandá an, ngatꞌa̱ bi̱ kixian an: ꞌYá xí bená tsi ni̱ma̱ka̱maa̱ an Néná, sꞌe̱ kꞌuijñá ngase nga̱sondie kui ndií. 23Ta̱nga ngotꞌe̱ ꞌne̱ ngije kꞌien, mítsjà nga kjindiá sa̱ꞌinkjaꞌa an yojona. A ka̱mana sa̱ꞌinkjaꞌáꞌyá ngiñáa̱. Án ka̱mana kjuínkátsijée̱n, ta̱nga kui ka̱májín kjo̱e̱ꞌe̱kónna kui.
Nga katsen Salomoo̱
24Kó Ndabii̱ katsꞌéndajoo̱n na̱ Betsabee̱ chjo̱ón. Kó ti̱ kisꞌiejo̱ nginí, sꞌe̱ jachó ni̱xtjin nga kisꞌiee̱ ingo ndí, kó Salomo̱ ítꞌajaꞌén. Kó Néná achichí tjó kamaá kui ndií, 25kó katsangiyaa̱ nda̱chji̱ni̱e̱ꞌén Nataa̱n tsi̱ꞌe̱ nga tsíchji̱a̱jo, kó Jendindiya̱ ítꞌajaꞌén kuí ndií, ta̱ngatꞌanii̱ nga Néná katsꞌéntjó.
Ndabii̱ katsꞌeén xota̱ amonitaa̱
(1Kr 20:1-3)
26Kó tji̱e̱nga Joaa̱b tsꞌénkjánjo̱ xota̱ amonitaa̱ ki̱a̱ na̱xi̱ńdáꞌniú Rabáa̱, katsꞌéntsi̱ꞌe̱ na̱xi̱ńdáꞌniú nínga tikón nda̱ ree̱. 27Kósꞌe̱ Joaa̱b katsangiyaa̱ xota̱ chji̱ni̱e̱ꞌén Ndabii̱, nga bi̱ katsoó:
—Án boá xi tsꞌénkjanjo̱ an na̱xi̱ńdáꞌniú Rabáa̱, kó jè ichjáa̱ ndáfoa xi fochó ki̱a̱ na̱xi̱ńdáꞌniuú. 28Ngotꞌe̱ ꞌne̱, tꞌítikí jí xota̱ na̱xi̱ńdá xí ngasee̱, kó ki̱a̱ ti̱ꞌinkjaꞌyé ji tꞌa kui na̱xi̱ńdáꞌniuú, kó chjábé jí, ngatꞌa̱ tsájmi̱, an sa̱ꞌin tsa̱ꞌa̱n an kósꞌe̱ jaꞌénna sꞌi̱jñaa̱ ngijee̱.
29Kó Ndabii̱ ítikó ngayeje xota̱ na̱xi̱ńdaá, sꞌe̱ kijí xtji̱e̱e̱n na̱xi̱ńdáꞌniú Rabáa̱, kó askjanjo̱, sꞌe̱ katsꞌéntsi̱ꞌe̱. 30Kósꞌe̱ jaꞌáxiín korona̱ to̱nsinié xi tjiꞌá to̱ko̱ nda̱ ree̱, kui xi kan tié ján kilo̱ kamá é, kó ngo ndi̱jo̱ tsjakjiꞌi kisꞌijñaa̱, kósꞌe̱ kui koronaa̱ to̱ko̱ Ndabii̱ ikꞌíjñaá. Kó achichí ni xi niꞌán xi tsꞌaxiéni ki̱a̱ na̱xi̱ńdáꞌniuú. 31Kó ti̱ tsꞌaxié xota̱ xi kisꞌińdo kui ngi̱ndiee̱ nga, kó katsꞌeén kjo̱a̱ꞌniú nga katsꞌénxájo̱ ki̱cha̱ṉꞌni̱u̱, ko̱jo ki̱cha̱bokjánnangí, ko̱jo jacha̱, kó ki̱a̱ katsangiya nga katsꞌénxá ki̱a̱ ngi̱ndie nínga niꞌánda ńdiekachjaán. Bo̱a̱ katsꞌénjo̱ ngayeje na̱xi̱ńdáꞌniú xí tsi̱ꞌe̱ xota̱ amonitaa̱. Kó Ndabii̱ ko̱jo ngayeje xota̱ na̱xi̱ńdaá kijí nginí na̱xi̱ńdáꞌniú Jerusale̱n.
Currently Selected:
2 Samuee̱ 12: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
