2 Samuee̱ 11
11
Ndabii̱ ko̱jo na̱ Betsabee̱
1Kó nga jachó cho̱ndoboaá kui nó jàn, ni̱xtjin kjiꞌanga já ree̱ fí kjo̱a̱xchán, Ndabii̱ katsangiya Joaa̱b, ko̱jo já mosoo̱, ko̱jo ngayeje xota̱ Israee̱l, kó kui jaá katsꞌénkjié xota̱ amonitaa̱, kó íchjáꞌyá na̱xi̱ńdáꞌniú Rabáa̱, ta̱nga Ndabii̱ ki̱a̱ kisꞌijña na̱xi̱ńdáꞌniú Jerusale̱n.
2Kó ngo ndi̱yà nga ngije kjimangixoón, Ndabii̱ jastjíe̱n nga kjiꞌijña nga̱són ṉchaa̱n, kó bo̱a̱ fí bo̱a̱ ndibá katsꞌén nga kistsoꞌbá ki̱a̱ nkꞌaa̱ ndo̱bo̱a̱xa̱á nda̱ ree̱, kó ndeskande ki̱a̱ nkꞌaa̱ ndiꞌaa̱ kamábe nga ngo na̱ xi tsꞌénmongóyá, kó achichí tsjákjiꞌi kui naa̱. 3Kósꞌe̱ Ndabii̱ katsangiya nga akasíyá ꞌyání bo̱a̱ kui naa̱, kó ngo xi bi̱ katsoó: Na̱ Betsabee̱ boá kui naa̱, tsa̱kji̱ín Eliaa̱n, chjo̱ón Uriyaa̱, nda̱ xi xota̱ tji̱e̱e̱ Ee̱t.
4Kó Ndabii̱ katsangiyaa̱ chji̱ni̱e̱ꞌén xí kijíkjaꞌá kuí xota̱chjo̱on, kó nga jachókoón Ndabii̱, Ndabii̱ kisꞌiejo̱ kui naa̱. Jaskan kui xota̱chjo̱on katsꞌéntsjie yojoo̱ kjo̱a̱a̱ ni ndándí xí tjítsꞌén, kósꞌe̱ kijí ndiꞌaa̱.
5Kó kui naa̱ tsaꞌa ndí, kó katsangiyaa̱ én Ndabii̱, nga bi̱ katsoó: Ndí jè yaꞌa an.
6Kósꞌe̱ Ndabii̱, bi̱ katsó nga tsíchji̱a̱jo Joaa̱b:
—¡Ndibéje̱ní Uriyaa̱ nda̱ xi xota̱ Ee̱t! Kó Joaa̱b katsangiya Uriyaa̱ nínga tikón Ndabii̱. 7Nga nga jachó Uriyaa̱ ngindyi̱ko̱n, Ndabii̱ asíyaá kótsꞌèn tikón Joaa̱b, ko̱jo kótsꞌèn síndo xota̱ na̱xi̱ńdaá, ko̱jo kótsꞌèn kjima kjo̱a̱xcha̱án. 8Sꞌe̱ jaskan Ndabii̱, bi̱ katsoó Uriyaa̱:
—Tꞌen ndiꞌàa̱, kó taníjín ji ndsa̱ki. Kó ngije jatjo Uriyaa̱ ndo̱bo̱a̱xa̱á nda̱ ree̱, Ndabii̱ katsangiyaa̱ ngo ni xi ta̱ boeꞌéná xi katjóbení yámíxa̱a̱. 9Ta̱nga Uriyaa̱, ki̱a̱ kisꞌifé nga̱ntjo̱a̱ ndiꞌaa̱ nda̱ ree̱, ko̱jo ngayeje mosoo̱ ndi̱a̱a̱, kó kijíjín ndiꞌaa̱.
10Kó tjín xí katsóyaà Ndabii̱, nga bi̱ katsoó: Uriyaa̱ kijíjín ndiꞌaa̱. Kó Ndabii̱, bi̱ katsoó Uriyaa̱:
—A kjinjín kjindibéni ji. Kó ánní nga kꞌinjín ji ndiꞌàa̱.
11Kó Uriyaa̱, bi̱ katsoó Ndabii̱:
—Koxa̱a̱ kjo̱a̱ꞌbíndaa̱ Néná, ko̱jo xota̱ Israee̱l, ko̱jo xota̱ Jundáa̱ ki̱a̱ síndo ndiꞌańjñoo̱, kó ndi̱a̱na Joaa̱b, ko̱jo já mosoo̱ ndi̱a̱na ki̱a̱ ngi̱jin kꞌijñá jàn síndo, kó án, a ndiꞌana kjuín án tsi̱ꞌe̱ nga skjíni̱e̱ an nichinie ko̱jo kjuínkꞌi̱ an niꞌyó, ko̱jo nga kjojñajo̱ an chjo̱onna. Ja̱koxi̱ nga ta̱ngatꞌanii̱ kjo̱a̱mindyiòo̱n, ko̱jo ini̱màa̱, nga bo̱a̱jín sa̱ꞌin an.
12Kó Ndabii̱, bi̱ katsoó Uriyaa̱:
—Ti̱ndyinra ji kꞌi̱e̱e̱ ngotꞌe̱, ngatꞌa̱ ndyiojón sa̱ꞌinkjí ngiñaá. Kó bo̱a̱ tsꞌén nga Uriyaa̱ ki̱a̱ kisꞌijña na̱xi̱ńdáꞌniú Jerusale̱n kui ni̱xtjii̱n ko̱jo nga kamángindyiojón. 13Kósꞌe̱ jaskan Ndabii̱ tsíchji̱a̱a̱ Uriyaa̱ tsi̱ꞌe̱ nga nijan skji̱ni̱e̱ ko̱jo nijan katsꞌe niꞌyó, kó katsꞌénchꞌi̱, sꞌe̱ ngije kamájñoó ki̱a̱ kijíkjajña nínga tikón ṉchaa̱n já mosoo̱ ndi̱a̱a̱, kó kijíjín ndiꞌaa̱.
14Nga kamángindyiojón nga ta̱jño̱ó, Ndabii̱ katsangiyaa̱ ngo xo̱jo̱n Joaa̱b, kó Uriyaa̱ kijíjo̱ kui xo̱jo̱o̱n. 15Kó bi̱ tsó ni xi kjitꞌa kui xo̱jo̱o̱n: Uriyaa̱ ti̱ꞌankꞌijñájnú xtji̱e̱e̱n kje̱n jájuún, kui ngi̱ndie nínga ꞌniú ngasee̱ kjo̱a̱xcha̱án, tsi̱ꞌe̱ nga si̱ꞌanꞌoo̱n kósꞌe̱ ngatꞌien ngijee̱.
16Kó bo̱a̱ tsꞌén ngije Joaa̱b askjanjo̱ xota̱ na̱xi̱ńdáꞌniuú, ki̱a̱ katsꞌénkꞌíjñá Uriyaa̱ ki̱a̱ nínga síndo jáxíꞌín xi ꞌniú chꞌokon ngasee̱. 17Kósꞌe̱ xota̱ xi chji̱a̱ni na̱xi̱ńdáꞌniuú jataxie nga askjanjo̱ Joaa̱b, kó tjín jájún xi chji̱a̱ni xota̱ na̱xi̱ńdaá xi mosoo̱ Ndabii̱ kamá xi jesón, kó ti̱ kiniꞌánkꞌién Uriyaa̱, nda̱ xi xota̱ tji̱e̱e̱ Ee̱t nga.
18Kósꞌe̱ Joaa̱b katsangiyaa̱ én nda̱ re Ndabii̱ kjo̱a̱a̱ ngayeje ni xi kamá ngi̱jii̱n kjo̱a̱xcha̱án. 19Kó bi̱ katsoó nda̱ xi kijíjo̱ eén:
—Ngije kiꞌmíyée̱ nda̱ ree̱ ngayeje ni xi kamá ngi̱jii̱n kui kjo̱a̱xcha̱án, 20tsi ꞌniú sa̱ꞌínxchán nda̱ ree̱, kó tsi bi̱ tsꞌén ko̱síyaá: Míkjo̱a̱a̱ nga achichí tiñaa̱ na̱xi̱ńdáꞌniuú tsangínkonjnú nga ikixkánjnú. A yàjínjnú nga tjín xí ni kꞌo̱jminiéjnú ndeskande nínga tikón xoó. 21ꞌYá xi katsꞌénꞌoón Abimelee̱k, ndií Jerobaa̱l. A mí tsí ngo xota̱chjo̱on xí tsꞌajminieé ngo chikjan ndi̱jo̱o̱ molino̱ nga kꞌien ki̱a̱ na̱xi̱ńdáꞌniú Tebee̱. Ánní nga achichí tiñaa̱ kui xoó tsangínkonjnú. Kósꞌe̱ ji bi̱ tꞌíi̱n: Ko̱jo mosòo̱ xi ꞌmí Uriyaa̱ nda̱ xi xota̱ tji̱e̱e̱ Ee̱t je kꞌien nga.
22Kósꞌe̱ kijí kui nda̱ xi yaꞌa eén, kó nga jachó ngindyi̱ko̱n Ndabii̱ katsóyaà ngayeje ni xi katsó Joaa̱b. 23Kó kui nda̱ xi yaꞌa eén, bi̱ katsoó Ndabii̱:
—Kui jaá je mejeén sa̱ꞌínjne̱ katsaki, ki̱a̱ kijítji̱ngijne̱ ki̱a̱ ngi̱jin kꞌijñá jàn, ta̱nga ki̱a̱ kixindyionchjájne̱ ki̱a̱ tꞌa nga̱ntjo̱a̱a̱ tsi̱ꞌe̱ nga kijíꞌoyá nginí, 24kósꞌe̱ já xí ndyi̱yaꞌa yáchjonyaá asieén yáyojó mosòo̱ ndeskande ki̱a̱ nkꞌaa̱ xoó, kó tjín mosoo̱ nda̱ ree̱ xi jesón, kó ti̱ kꞌien nda̱ mosòo̱ xi ꞌmí Uriyaa̱ nda̱ xi xota̱ tji̱e̱e̱ Ee̱t nga.
25Kó Ndabii̱, bi̱ katsoó kui nda̱ xi jachójo̱ eén:
—Bi̱ tꞌíi̱n Joaa̱b: Ngata̱ nda̱jín maá ji kjo̱a̱a̱ kui nii̱, ngatꞌa̱ ki̱cha̱ndojoó tsꞌenkjié xota̱ chji̱a̱ni ngo ndiè, kó ti tsꞌenkjié xí chji̱a̱ni xi ingo ndieè nga. ꞌNiú ti̱ꞌin ji nga ku̱i̱xkénje̱ ji kui na̱xi̱ńdáꞌniuú ngaskande nga si̱ꞌinkjie ji. Kó ji te̱ꞌéngaꞌníi̱ yojòo̱.
26Nga tsintꞌié chjo̱ón Uriyaa̱ nga je kꞌien xi̱ꞌii̱n, askjandátjé ndi̱a̱a̱. 27Kó ngije jaꞌa ni̱xtjin xa̱ꞌya̱a̱, Ndabii̱ katsangiyakjaꞌá tsi̱ꞌe̱ nga kjo̱chó ndiꞌaa̱, kó kui naa̱, chjo̱ón katsꞌén, kó ngo ndí kisꞌiee̱ xi tsi̱ꞌe̱ Ndabii̱, ta̱nga kui nii̱ tsjájín kamaá Néná.
Currently Selected:
2 Samuee̱ 11: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
