2 Já ree̱ 9
9
Néná jaꞌájin Jeuu̱ tsi̱ꞌe̱ nga ree̱ na̱xi̱ńdá Israee̱l ka̱ma
1Kósꞌe̱ nda̱chji̱ni̱e̱ꞌe̱én Néná xi ꞌmí Eliseoo̱ tsíchji̱a̱a̱ ngo ndií jáchji̱ni̱e̱ꞌe̱én Néná, kó bi̱ katsoó:
—Tꞌínde yojòo̱, kó chjábé jí kui ti̱jì istii̱, kó tꞌen ji ki̱a̱ Ramoo̱t nangi Ngalaa̱nd. 2Kó ngije kjóchí ji ki̱a̱a̱, ti̱ndyi̱sé ji Jeuu̱ ndií Josafaa̱t, ndíndeè Nimsii̱, kó ngije ku̱i̱tjásꞌi̱n, bo̱a̱ tꞌíi̱n nga kjo̱stjíe̱n ngi̱jii̱n já ntsꞌi̱e̱, kósꞌe̱ tꞌenje̱ ji ngo ngi̱yaꞌma xi tikón ngi̱ya kjin jàn. 3Kósꞌe̱ chjábé jí ti̱jì istii̱, kó tatiéjìn ji to̱ko̱ nga bi̱ tꞌíi̱n: Bi̱ tsó Ndi̱a̱ná: Án boá xi tsꞌéntsjaxaá nga ji xi ka̱ma ji nda̱ ree̱ na̱xi̱ńdá Israee̱l. Kósꞌe̱ chjáxꞌé ji nga̱ntjo̱a̱a̱, kó ti̱yi jí ngijee̱.
4Kó kui nda̱ xo̱ngò xí nda̱chji̱ni̱e̱ꞌe̱én Néná kamaá, kijí Ramoo̱t kui xi tikón nangi Ngalaa̱nd. 5Kó nga jachó ki̱a̱a̱, kamábe nga ki̱a̱ síndo já ngito̱ko̱o̱ jájuún. Kó bi̱ katsoó:
—Ji nda̱ xaá, ngo ni tikónna xi xiyaá ji.
Kó bi̱ katsó Jeuu̱:
—ꞌYání ngayeje ji̱n xi kꞌuiyée̱.
Kó bi̱ katsó kui nda̱a̱:
—Ji boá nda̱ xaá.
6Kó Jeuu̱ jastjíe̱n, kó tsꞌasꞌien kui ndiꞌaa̱, kó Eliseoo̱ atiéjón isti̱ to̱ko̱, kó bi̱ katsoó:
—Bi̱ tsó Néná xí tsi̱ꞌe̱ xota̱ Israee̱l: Án boá xi katsjaxaá nga ji xi ko̱ti̱xome ji na̱xi̱ńdá Israee̱l, kui xi xota̱ na̱xi̱ńdaá Néná. 7Chjiéngá si̱ꞌinkꞌin ji xota̱ ndiꞌaa̱ Akaa̱b, kui xi ndi̱a̱ tse̱ ma, tsi̱ꞌe̱ nga an sa̱ꞌingojo an jiín moso̱na kui xi jáchji̱ni̱e̱ꞌénna, ko̱jo jiín ngayeje mosoo̱ Néná xí na̱ Jesabee̱ katsꞌénkꞌién. 8Kó ko̱yà ngayeje xota̱ ndiꞌaa̱ Akaa̱b, kó sa̱ꞌinkjié an ngayeje jáxíꞌín xi chji̱a̱ni kui, ti̱ kuínií tsi moso̱, ko̱jo tsi xota̱ xi tjimándé. 9Kó bo̱a̱ sa̱ꞌinjo̱ an xota̱ ndiꞌaa̱ Akaa̱b, xikoó xota̱ ndiꞌaa̱ Jeroboaa̱n ndií Nabaa̱t, ko̱jo xikoó xota̱ ndiꞌaa̱ Baasaa̱ ndií Ayiaa̱. 10Kó ńñaá skji̱ni̱e̱ yojoo̱ na̱ Jesabee̱, kó jmíjín xi ko̱ónijín.
Kósꞌe̱ tji̱e̱nmá iskjíxꞌá nga̱ntjo̱a̱a̱, sꞌe̱ tsanga. 11Kósꞌe̱ ngije jatjo Jeuu̱, ngo já mosoo̱ ndi̱a̱a̱, kó bi̱ katsoó:
—A xió kjiꞌi. Míkjo̱a̱a̱ nga kꞌi̱e̱ jeꞌekoón kui nda̱ tsobeé.
Kó Jeuu̱, bi̱ katsó:
—Jún jè yàjnú kui nda̱a̱ ko̱jo én xí chji̱a̱.
12Ta̱nga kui jaá bi̱ katsó nginií:
—Bo̱a̱jín kjiꞌi kui nii̱.
Ta̱sá tꞌíyéjne̱ ngotꞌe̱ má.
Kó bi̱ katsó Jeuu̱:
—Kjín ni xi tsíchji̱a̱jona, nga bi̱ katsó: Bi̱ tsó Néná: Án boá xi katsjaxaá nga ji xi ka̱ma ji ree̱ na̱xi̱ńdá Israee̱l.
13Kósꞌe̱ nga ngo nga ngo xi tsá xi boaꞌa iskjíbé ńjñobichitjeé, kó ki̱a̱ índo ngindie se Jeuu̱, ngo ngi̱ndie xi nkꞌa, kó ngayejee̱ nga katsꞌénkjanie tjioo̱, nga bi̱ katsó: ¡Jeuu̱ boá xí nda̱ re!
Jeuu̱ katsꞌénkꞌién Joraa̱n
14Kó bo̱a̱ tsꞌén Jeuu̱ ndií Josafaa̱t, ndíndeè Nimsii̱, índa ngo ni kondraa̱ Joraa̱n. Kui ni̱xtjin jàn Joraa̱n ko̱jo ngayeje xota̱ Israee̱l askoo̱n na̱xi̱ńdáꞌniú Ramoo̱t, xi tikón ki̱a̱ nangi Ngalaa̱nd, ta̱ngatꞌanii̱ nda̱ re Asaee̱l xi chji̱a̱ni nangi Siria̱, 15ta̱nga nda̱ re Joraa̱n kijí nginí nangi Jesree̱l, tsi̱ꞌe̱ nga sa̱ꞌíndaya nínga xota̱ Siriaa̱ katsꞌénꞌoón kjiꞌanga askjanjo̱ Asaee̱l, nda̱ ree̱ nangi Siriaa̱. Kó Jeuu̱, bi̱ katsó: Tsi jún xi bo̱a̱ ꞌmíjnú, ja̱ nga ngojín xi kjo̱tjoxieni kui na̱xi̱ńdaá tsi̱ꞌe̱ nga ko̱e̱je̱tsóyà kuí eén ki̱a̱ nangi Jesree̱l. 16Kósꞌe̱ Jeuu̱ kisꞌijñaa̱ ngo ndi̱je̱, kó kuí má bo̱a̱ xi kijí nangi Jesree̱l, ngatꞌa̱ ki̱a̱ kisꞌijñaꞌon Joraa̱n. Kó ko̱jo Okosiyaa̱ nda̱ ree̱ nangi Jundáa̱, ti̱ ki̱a̱ jaꞌajaya nga kijíkatsijee̱n Joraa̱n nga.
17Kó nda̱ xi konda ki̱a̱ nangi Jesree̱l kamábe nga tsꞌéndibá ngo xtín jájún xi tsi̱ꞌe̱ Jeuu̱, kó bi̱ katsó: Ngo xtín jájún tsꞌén be an. Kó Joraa̱n bi̱ katsó: Nangíyé ji ngo nda̱ xi tikónsoón ndi̱je̱, xi ngatjíkaꞌayíndi̱yà, kó bi̱ nga tsoó: A tjín kjo̱a̱xió.
18Kó kui nda̱ xi tjísoón ndi̱je̱e̱, kijíkjaꞌáyíndi̱yà kui jaá, kó bi̱ katsoó:
—Bi̱ tsó nda̱ ree̱: A tjín xò kjo̱a̱xió.
Kó Jeuu̱, bi̱ katsó:
—Kó jí, mí xí ye ji kjo̱a̱a̱ kjo̱a̱xioó. ¡Ndibétji̱ngíní!
Kó kui nda̱ xi kondaa̱, bi̱ katsó:
—Kui nda̱ chji̱ni̱e̱ꞌe̱én, jè jachó nínga síndo kui jaá, ta̱nga ngiti̱ kjindibáꞌoyájín. 19Kósꞌe̱ katsangiya nginí kje̱ꞌe nda̱ xi tjísoón ndi̱je̱, kó kijí nínga síndo kui jaá, kó bi̱ katsoó:
—Bi̱ tsó nda̱ ree̱: A tjín xò kjo̱a̱xió.
Kó Jeuu̱, bi̱ katsó:
—Kó jí, mí xí ye ji kjo̱a̱a̱ kjo̱a̱xioó. ¡Ndibétji̱ngíní!
20Kó kui nda̱ xi kondaa̱, bi̱ katsoó nda̱ ree̱: Jachó ngaskande nínga síndo kui jaá nga, ta̱nga ngiti̱ kjindibáꞌoyájín. Kó xikótsꞌèn fí Jeuu̱ ndií Nimsii̱ bo̱a̱ má tsꞌén fí, ngatꞌa̱ achichí ꞌniú tsꞌéndibá. 21Kósꞌe̱ Joraa̱n, bi̱ katsó: Títꞌajnú ngo ndi̱je̱ karroo̱.
Kó ngije ikítꞌa ngo ndi̱je̱ karroo̱, jataxie Joraa̱n nda̱ ree̱ Israee̱l, ko̱jo Okosiyaa̱, nda̱ ree̱ nangi Jundáa̱, nga ngo nga ngo síndoyá karroo̱, kó kijí xtji̱e̱e̱n nínga tsꞌéndibá Jeuu̱, kó ki̱a̱ kasakoo̱ Jeuu̱ ki̱a̱ tꞌanangii̱ Naboo̱t, nda̱ xi chji̱a̱ni nangi Jesree̱l. 22Kó nga kamábe Joraa̱n Jeuu̱, bi̱ katsoó:
—A tjín kjo̱a̱xió.
Kó Jeuu̱, bi̱ katsó:
—Mí kjo̱a̱xió xi kꞌuiéjne̱, tji̱e̱nga na̱áa̱n na̱ Jesabee̱ tjítsꞌén kjo̱a̱tondo̱ ko̱jo tsie kjo̱a̱tjiꞌe.
23Kósꞌe̱ Joraa̱n katsꞌénkjaꞌatjiya karroo̱, tsi̱ꞌe̱ nga ko̱nga, kó bi̱ katsoó Okosiyaa̱: ¡Akatíñíní Okosiyaa̱!
24Ta̱nga Jeuu̱ ikjienyá yáchjonyaá, kó katsꞌénꞌoón tjiaa̱ Joraa̱n, kó kui yáyojóo̱ xi iskjinií, xtji̱e̱e̱n ini̱ma̱a̱ jatjoni, kó Joraa̱n ki̱a̱ tsꞌénkayà ngi̱ya karroo̱. 25Kó Jeuu̱, bi̱ katsoó Bindkaa̱r, nda̱ ngito̱ko̱o̱ jájuún:
—Chjábé jí kui nda̱a̱, kó ki̱a̱ tjajmijin ji nínga fetꞌaa̱ tꞌanangii̱ Naboo̱t, nda̱ xi chji̱a̱ni nangi Jesree̱l. Ngatjaꞌátsjiee̱n nga kjiꞌanga ji ko̱jo an nijan kixindyiosóo̱n ndi̱je̱ nga tsangíntji̱ngíi̱ Akaa̱b na̱ꞌmii̱, kjiꞌanga Néná, bi̱ katsó kjo̱a̱a̱ kui nda̱a̱: 26Én xi tsi̱ꞌe̱ Néná: A ngojña̱jín boá nga kamábe an nga katjon jiín Naboo̱t ko̱jo jiín ndií. Án boá xí tsjaa ngo chjí kꞌi̱e̱ kui tꞌanangii̱, katsó Néná. Kuíni nga chjábé jí kui nda̱a̱, kó ki̱a̱ tjajmi ji ki̱a̱ kui tꞌanangii̱, xikó katsó én xí tsíchji̱a̱ Néná.
Jeuu̱ katsꞌénkꞌién Okosiyaa̱
(2Kr 22:7-9)
27Nga kamábe kui nii̱ Okosiyaa̱, nda̱ ree̱ nangi Jundáa̱, tsanga xtji̱e̱e̱n ndi̱yà nínga tjitjíe̱ nii̱, ta̱nga Jeuu̱ kijíngátji̱ngii̱, nga bi̱ katsoó: Ti̱ ti̱ꞌankꞌiènjnú kui nda̱a̱ xi tjiyá karroo̱ nga.
Kó ki̱a̱ kiniꞌánꞌoón ki̱a̱ nínga fínijíngií Nguu̱r, ki̱a̱ tꞌa Ibleaa̱n, ta̱nga Okosiyaa̱ xtji̱e̱e̱n nangi Mengindo̱ tsanga, kó ki̱a̱ kꞌien. 28Kó já mosoo̱ ngo karro̱ yíjñaya nga kijíjo̱ ki̱a̱ na̱xi̱ńdáꞌniú Jerusale̱n, kó ki̱a̱ nijan yínijínjo̱ nínga kjiyojonijín xi xchaá, ki̱a̱ na̱xi̱ńdáꞌniú Ndabii̱.
29Kó nó xí tiengoo̱ nga kisꞌijña Joraa̱n ndií Akaa̱b, nga ítsꞌi̱yanii̱ Okosiyaa̱ nga atíxoma na̱xi̱ńdá Jundáa̱.
Nga kꞌien na̱ Jesabee̱
30Nga jachó Jeuu̱ na̱xi̱ńdáꞌniú Jesree̱l, kó nga tsintꞌié kuí nii̱ na̱ Jesabee̱, kui naa̱ katsꞌénkꞌiyá ndyi̱ko̱n, ko̱jo índoo̱ ni tsjakon to̱ko̱, sꞌe̱ askotsijen xtji̱e̱e̱n nga̱ntjo̱a̱masienkjaá ndiꞌaa̱. 31Kó kjiꞌanga tsꞌasꞌien Jeuu̱ xtji̱e̱e̱n nga̱ntjo̱a̱a̱ na̱xi̱ńdáꞌniuú, bi̱ katsó kui naa̱:
—A kisꞌiérií kjo̱a̱xió Simrii̱, kui ti xi katsꞌénkꞌién ndi̱a̱a̱.
32Kósꞌe̱ Jeuu̱ iskjininkꞌa kje̱n xtji̱e̱e̱n nga̱ntjo̱a̱masienkjaá ndiꞌaa̱, kó bi̱ katsó:
—ꞌYá xí tikónjo̱na kꞌi̱e̱e̱. ꞌYání bo̱a̱.
Kó jó ko̱jo tsi ján já kꞌán xi askotsijen xtji̱e̱e̱n nínga tikón Jeuu̱. 33Kósꞌe̱ Jeuu̱, bi̱ katsó:
—¡Tjajmingíjnú kui naa̱! Kó kui jaá tsꞌajmingí, kó chií jiín iskjíjón xoó kui ndiꞌaa̱, ko̱jo ndi̱je̱e̱, kó Jeuu̱ katsjánié kui naa̱.
34Kó ngije tsꞌasꞌien, iskjinie nichinie, ko̱jo katsꞌe niꞌyó, sꞌe̱ jaskan bi̱ katsó: Tangínjnú kó tjanijínjnú kui na̱ xi ndajiín, ngatꞌa̱ tsa̱kji̱ín ngo nda̱ ree̱ boá.
35Kó kijí kui jaá, tsi̱ꞌe̱ nga ko̱ónijín kui xota̱chjo̱on, ta̱nga ta̱ ngo tsí ńdato̱ko̱, ko̱jo se ko̱jo ngi̱ya tsja xi kasakoo̱. 36Kó kijí nginí kui jaá, kó katsóyaà Jeuu̱ kui nii̱. Kó bi̱ katsó Jeuu̱:
Kuí bí kui nii̱ xi Néná tsíchji̱a̱ nga sa̱ꞌín, nga katsꞌénkíchji̱a̱ mosoo̱ xi ꞌmí Eliyaa̱, nda̱ xi chji̱a̱ni nangi Tisbee̱, nga bi̱ katsó: Ki̱a̱ tꞌanangi xi chji̱a̱ni Jesree̱l, ńñaá skji̱ni̱e̱ yojoo̱ na̱ Jesabee̱, 37kó yojo kꞌiee̱n na̱ Jesabee̱ xikónií yeꞌe kamá, ki̱a̱ nga̱són kꞌijñaá nangi Jesree̱l, tsi̱ꞌe̱ nga jmíjín xi bi̱ ka̱tso̱: Kuí bí xi̱ꞌbi̱ xi na̱ Jesabee̱.
Currently Selected:
2 Já ree̱ 9: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
