2 Já ree̱ 8
8
Ni xi kisꞌiee̱ xota̱chjo̱on xí chji̱a̱ni nangi Sunee̱n kiniꞌánkꞌasꞌiee̱n nginí
1Kó Eliseoo̱, tsíchji̱a̱jo kui xota̱chjo̱on xí katsꞌénkjaꞌáꞌyaá ndií nga bi̱ katsoó: Ti̱sítji̱n ji, kó tꞌen ji ko̱jo xota̱ ndiꞌàa̱, kó ta̱ nínga ka̱ma ti̱ndyiónjnú, ngatꞌa̱ Néná jè bo̱a̱ katsó nga yito nó kꞌuié ngo kjindiá kui tꞌanangii̱.
2Kó kui xota̱chjo̱on jastjíe̱n, kó katsꞌén ni xi katsoó kui nda̱ xi chji̱a̱ni Néná, kó kijíjo̱ xota̱ ndiꞌaa̱, kó yito nó kisꞌijña nangii̱ xota̱ Filisteaa̱, xikoó ngo xota̱ xi xín nangi chji̱a̱ni. 3Kó ngije jaꞌa xi yito noó, kui xota̱chjo̱on jatjo nginí nangii̱ xota̱ Filisteaa̱, kósꞌe̱ kijíkoón nda̱ ree̱, tsi̱ꞌe̱ nga ꞌniú ku̱i̱ꞌaa̱ kjo̱a̱a̱ ndiꞌaa̱ ko̱jo tꞌanangii̱.
4Kó nda̱ ree̱ kjiꞌá má tsꞌénchji̱a̱jo nda̱ xi ꞌmí Ngiesii̱, nda̱ xi mosoo̱ kui nda̱ xi chji̱a̱ni Néná, kó bi̱ katsoó: ꞌNiú míꞌaá, tꞌíyéní ngayeje kjo̱a̱ndikón xí katsꞌén Eliseoo̱. 5Kó tji̱e̱nga Ngiesii̱ tsꞌénchji̱a̱jo nda̱ ree̱ kótsꞌèn katsꞌénkjaꞌáꞌyaá ngo ini̱ma̱, ta̱niján má jachókoón nda̱ ree̱ kui xota̱chjo̱on xí kiniꞌánkjaꞌáꞌyaá ndií, kó ꞌniú tsíꞌaá nda̱ ree̱ kjo̱a̱a̱ ndiꞌaa̱ ko̱jo kjo̱a̱a̱ tꞌanangii̱. Kósꞌe̱ Ngiesii̱, bi̱ katsó: Ji ndi̱a̱a̱, kuí bí kui xota̱chjo̱on, kó kuí bí ndií, kui xi Eliseoo̱ katsꞌénkjaꞌáꞌyaá.
6Kósꞌe̱ nda̱ ree̱ asíyaá kui xota̱chjo̱on, kó kui xota̱chjo̱on katsóyaà ni xi kamaá. Sꞌe̱ jaskan nda̱ ree̱ katsjaákjo̱a̱ ngo nda̱ xi tsꞌénxájo̱, nga bi̱ katsoó: Te̱ꞌéꞌoyé nginíi̱ ngayeje ni xi kisꞌiee̱ kui xota̱chjo̱on, ko̱jo ngayeje ni xi je kamáxchá ki̱a̱ tꞌanangii̱, ndeskande ni̱xtjin nga jatjoni kui na̱xi̱ńdaá, ngaskande ngotꞌe̱.
Asaee̱l katsꞌénkꞌién Bee̱n-Andaa̱nd
7Kó Eliseoo̱ kijí na̱xi̱ńdáꞌniú Ndamasko̱, kó Bee̱n-Andaa̱nd, nda̱ ree̱ nangi Siria̱ ndajíntjiín, kó bi̱ kiꞌmií: Nda̱ xi chji̱a̱ni Néná jeꞌe kꞌi̱e̱e̱. 8Kó nda̱ ree̱, bi̱ katsoó Asaee̱l: Chjábé jí ngo ni xi tsjakjiꞌi, kó tꞌenchje̱ꞌéyindi̱ye ji nda̱ xi chji̱a̱ni Néná, kó tasíyée̱ Néná nga si̱ꞌinkjìn jí kui nda̱a̱, nga bi̱ tꞌíi̱n: A ka̱mandaya an kjo̱a̱a̱ kui chiꞌin xi tjínna.
9Kó Asaee̱l kijíkoón kui ndaa̱ nga yaꞌaa̱ ni xi tsjakon ngase xi tjín ki̱a̱ na̱xi̱ńdáꞌniú Ndamasko̱, kó yichán cho̱toꞌoyitsꞌe̱n ma chꞌià xí yaꞌa, kó kijíkjaꞌáyíndi̱yà, kó nga jachó, ki̱a̱ kisꞌijña ngindyi̱ko̱n kui nda̱a̱ nga bi̱ katsoó:
—Jí ndíi̱ Bee̱n-Andaa̱nd, nda̱ ree̱ nangi Siria̱ boá xi katsangiyana, kó kuí boá xi bi̱ tsó nga bosíyá: A ka̱mandaya an kjo̱a̱a̱ kui chiꞌin xi tjínna.
10Kó Eliseoo̱, bi̱ katsoó:
—Tꞌenchíi̱n, kó bi̱ tꞌíi̱n:
Ja̱koxi̱ boá nga ka̱mandaya ji. Ta̱nga Néná jè akóna nga ko̱yà kuí nda̱a̱.
11Kó kui nda̱ xi chji̱a̱ni Néná askotsijen ndá ndaá kui nda̱a̱ ngaskande nga soboá kamaá, kósꞌe̱ nda̱ xi chji̱a̱ni Néná ítsꞌi̱yanii̱ nga askjandá. 12Kó Asaee̱l, bi̱ katsoó:
—Ánní nga ticheꞌé kón ji ndi̱a̱.
Kó bi̱ katsó kui nda̱a̱:
—Ngatꞌa̱ jè be an ni xi ndajín xi si̱ꞌinje̱ ji xota̱ Israee̱l, kꞌuítꞌe ndiꞌí jí ngi̱ndie xi ꞌniuú, kó ki̱cha̱ndojó si̱ꞌinkꞌinni ji já xo̱ngo̱ò, kó ndí xi̱xi̱i̱ kjotójé ji, kó chjáxꞌé ji ndo̱bo̱a̱ndií ínchjín xí ndí ndyi̱yaꞌaa̱.
13Kó Asaee̱l, bi̱ katsó:
—Ta̱nga ja̱ ꞌyání bo̱a̱ kui mosòo̱ xi̱ꞌbi̱, xi kuí boá xi xikoó ngo ńñá, tsi̱ꞌe̱ nga bo̱a̱ kjiꞌi ni yiꞌi xi sa̱ꞌín.
Kó Eliseoo̱, bi̱ katsó:
—Néná boá xi je akóna nga jí boá xi ka̱ma ji nda̱ ree̱ nangi Siria̱.
14Kó Asaee̱l katsꞌénkjii̱n yojoo̱ Eliseoo̱, kó kijíkoón ndi̱a̱a̱, kó ndi̱a̱a̱, bi̱ katsoó nga asíyaá:
—Mí xí katsoó Eliseoo̱.
Kó bi̱ katsó Asaee̱l:
—Katsóyana nga ja̱koxi̱ xò nga ka̱mandaya ji.
15Kó nga kamángindyiojón, Asaee̱l iskjíbé ngo ńjñotjibé xi ndáfoa katsꞌénkꞌandyi̱ni, kósꞌe̱ katsangijon kje̱n Bee̱n-Andaa̱nd, kósꞌe̱ kꞌien kui nda̱a̱, kó Asasee̱l kisꞌijña re ngajoo̱ kui.
Joraa̱n atíxoma na̱xi̱ńdá Jundáa̱
(2Kr 21:1-20)
16Nó xí ma uún nga kisꞌijña Joraa̱n ndií Akaa̱b, nda̱ ree̱ na̱xi̱ńdá Israee̱l, Josafaa̱t kamá nda̱ ree̱ nangi Jundáa̱, kjiꞌa ítsꞌi̱yanii̱ nga atíxoma Joraa̱n ndií Josafaa̱t, nda̱ ree̱ nangi Jundáa̱. 17Kantié jó noó Joraa̱n nga ítsꞌi̱yanii̱ nga atíxoma, kó jin nó kamaá ki̱a̱ na̱xi̱ńdáꞌniú Jerusale̱n. 18Kó bo̱a̱ má katsꞌén xikoó já re xi chji̱a̱ni na̱xi̱ńdá Israee̱l, xikó katsꞌén xota̱ ndiꞌaa̱ Akaa̱b, ngatꞌa̱ ngo tsa̱kji̱ín Akaa̱b kisꞌijñajo̱. Kó katsꞌén ni xi ndajín ngindyi̱ko̱n Néná. 19Ta̱nga Néná kamámejénjiín katsꞌénkjié xota̱ Jundáa̱, ta̱ngatꞌanii̱ nda̱ mosoo̱ Ndabii̱, kui nda̱ xi ja̱bo̱a̱ je katsóyàtjoón nga bo̱a̱ katsoó nga ngatsjéni̱xtjin tsja̱á kuí ko̱jo ndií ngo ndiꞌí xí tsꞌentsíjen ngatsjéni̱xtjin.
20Kui ni̱xtjin jàn xota̱ tji̱e̱e̱ Endoo̱n kondra̱ kijií nínga botixómá Jundáa̱, kó kui xotaa̱ íjñaá ngo nda̱ re xi ko̱tíxomaa̱. 21Kó Joraa̱n kijí xtji̱e̱e̱n nangi Saii̱r nga kijíjo̱ ngayeje karro̱ kjo̱a̱xcha̱án, kó nga jñoó jastjíe̱n, kó askjanjo̱ xota̱ tji̱e̱e̱ Endoo̱n, kó katsꞌeén, kui xi je íchjáꞌyáni kui ko̱jo já ngito̱ko̱o̱ karroo̱, kó xota̱ na̱xi̱ńdaá tsanga má nga kijí ndiꞌańjñoo̱. 22Ta̱nga xota̱ Endoo̱n to̱kó askjanra kondra̱a̱ ngi̱ndie nínga botixómá Jundáa̱ ngaskande ngotꞌe̱. Kó kui ni̱xtjin jàn nga na̱xi̱ńdáꞌniú Libnaa̱, ti kondra̱ kijií kui ngi̱ndiee̱ nga.
23Ni xi ngase xi katsꞌén Joraa̱n ko̱jo ngayeje ni xi kamaá, a ki̱a̱jín kjitꞌa ki̱a̱ Chꞌo̱ Xo̱jo̱n xi kjitꞌa ni xi katsꞌén já ree̱ nangi Jundáa̱. 24Kó Joraa̱n ki̱a̱ nijan kisꞌijñajo̱ xi xchaá, kó ki̱a̱ nijan akjanijínjo̱ na̱ꞌmii̱ ko̱jo na̱aa̱n ki̱a̱ na̱xi̱ńdáꞌniuú Ndabii̱, kó ndií Joraa̱n kui xi kiꞌmí Okosiyaa̱ kisꞌijña ngajoo̱.
Nga atíxomaa̱ Okosiyaa̱ ki̱a̱ nangi Jundáa̱
(2Kr 22:1-6)
25Nó tiejó nga kisꞌijña Joraa̱n ndií Akaa̱b, nda̱ ree̱ na̱xi̱ńdá Israee̱l, ítsꞌi̱yanii̱ nga atíxoma Okosiyaa̱ ndií Joraa̱n, nda̱ ree̱ nangi Jundáa̱. 26Kan jó noó Okosiyaa̱ nga ítsꞌi̱yanii̱ nga atíxoma, kó ngo nó kamaá nga atíxoma ki̱a̱ na̱xi̱ńdáꞌniú Jerusale̱n. Na̱aa̱n Atalía̱ kiꞌmí, kó kui naa̱ tsa̱kji̱ín Omrii̱, nda̱ ree̱ na̱xi̱ńdá Israee̱l kamá. 27Kó bo̱a̱ katsꞌén xikó katsꞌén xota̱ ndiꞌaa̱ Akaa̱b, kó katsꞌén ni xi ndajín ngindyi̱ko̱n Néná, xikó katsꞌén xota̱ ndiꞌaa̱ Akaa̱b, ngatꞌa̱ xkandaa̱ kui nda̱a̱ kamá.
28Kó Okosiyaa̱ kijíjo̱ Joraa̱n ndií Akaa̱b nga kijí kjo̱a̱xcha̱án kondra̱a̱ Asaee̱l, nda̱ ree̱ nangi Siria̱ ki̱a̱ nangi Ramoo̱t xi chji̱a̱ni Ngalaa̱nd, ta̱nga xota̱ Siriaa̱ katsꞌénꞌoón Joraa̱n. 29Kó nda̱ re Joraa̱n kijíꞌoyá nginí nangi Jesree̱l, tsi̱ꞌe̱ nga si̱ꞌandaya nínga katsꞌénꞌoón xota̱ Siriaa̱ ki̱a̱ nangi Ramoo̱t, kjiꞌanga askjanjo̱ Asaee̱l, nda̱ ree̱ nangi Siria̱. Kósꞌe̱ Okosiyaa̱ ndií Joraa̱n, nda̱ ree̱ nangi Jundáa̱ kijíjaya nangi Jesree̱l, tsi̱ꞌe̱ nga sku̱i̱e̱ Joraa̱n ndií Akaa̱b, ngatꞌa̱ oo̱n.
Currently Selected:
2 Já ree̱ 8: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
