2 Já ree̱ 10
10
Jeuu̱ katsꞌénkꞌién ngayeje xota̱ ndiꞌaa̱ Akaa̱b
1Ichítié ko̱jo kan kamá ndií Akaa̱b ki̱a̱ na̱xi̱ńdáꞌniú Samaria̱, kó Jeuu̱ katsꞌénda xo̱jo̱n xi katsangiyaa̱ ki̱a̱ na̱xi̱ńdá Samaria̱, xota̱ ngito̱ko̱ xi chji̱a̱ni nangi Jesree̱l, ko̱jo xota̱ xi xchaá, ko̱jo xota̱ chji̱ni̱e̱xo̱jo̱o̱n ndií Akaa̱b, kó bi̱ tsó kui xo̱jo̱o̱n:
2Ngije kjo̱chójnú kui xo̱jo̱o̱n, jún xi tikónjnú ndií ndi̱a̱jnú, ko̱jo nga jún síndojnú karro̱ kjo̱a̱xcha̱án, ko̱jo ndi̱je̱e̱, ko̱jo na̱xi̱ńdáꞌniuú, ko̱jo ni xi niꞌánkjién nga bixkánni kjo̱a̱xcha̱án, 3chje̱ꞌéjinjnú kui ndí xí chꞌokon ngasee̱, ko̱jo xi ꞌniú kixi̱ ngi̱jii̱n ndií ndi̱a̱jnú, kó kuí tꞌíjñájnú ngi̱ndie nínga botixómá na̱ꞌmii̱, kó ti̱xkántjéjnú xota̱ ndiꞌaa̱ ndi̱a̱jnú.
4Ta̱nga kui jaá achichí katsakjónní, ngatꞌa̱ bi̱ katsó: Jè jó já re kisꞌińdo kꞌi̱e̱e̱ xi kamájiín katsꞌeén, kó kótsꞌèn ka̱máná ñá nga kui ku̱i̱xkánjo̱. 5Kósꞌe̱ nda̱ xi tikóntjoón ndo̱bo̱a̱xa̱á, ko̱jo nda̱ xtitjoón na̱xi̱ńdáꞌniuú, ko̱jo xota̱ xi xchaá, ko̱jo já chji̱ni̱e̱xo̱jo̱o̱n, katsangiyaa̱ én nda̱ re Jeuu̱, nga bi̱ katsoó: Moso̱ tse̱ boá ji̱n, kó ta̱ ni xi mejeénri xi si̱ꞌanjne̱, ta̱nga jmíjín xi chja̱ꞌájinjne̱ nga nda̱ re ka̱ma, ta̱sá ji ti̱ꞌin ji ni xi nda sa̱si̱eén.
6Kósꞌe̱ Jeuu̱ katsꞌénꞌindó nginí ingo xo̱jo̱n xi ma joó ndi̱yà, nga bi̱ katsó: Tsi an nijan májnú jún, kó tsi ko̱nda̱ꞌyáꞌénjnúu̱ ni xi xian án, ti̱chásénjnú ndií ndi̱a̱jnú, kó ndyiojón kui chi̱bo̱a̱a̱ ndibájnú kꞌi̱e̱ nínga tikón an, kꞌi̱e̱ na̱xi̱ńdáꞌniuú Jesree̱l.
Kó ndií nda̱ ree̱, kui xi ichítié ko̱jo kan kamaá, ki̱a̱ kisꞌińdojo̱ já ngito̱ko̱o̱ na̱xi̱ńdáꞌniuú, ngatꞌa̱ kuí boá xi katsꞌénxchá kuí ndií. 7Kó ngije jachó kui xo̱jo̱o̱n, kui jaá katsoboá ndií nda̱ ree̱, kó tsatiesen nga ichítié ko̱jo kan kui jaá, kó ki̱a̱ indyiá to̱ko̱ ngo ni̱se̱nyá, kósꞌe̱ katsangiya ki̱a̱ na̱xi̱ńdáꞌniú Jesree̱l.
8Kó ngo nda̱ chji̱ni̱e̱ꞌe̱én Néná jachó, xi bi̱ katsoó Jeuu̱:
—¡Jè jeꞌe kꞌi̱e̱e̱ to̱ko̱ jaá nda̱ ree̱!
Kó Jeuu̱, bi̱ katsó:
—Jó tjín ti̱ꞌánjnú nga kꞌuíndojnú ki̱a̱ nínga bitjasꞌi̱e̱nnii̱ nga̱ntjo̱a̱a̱ na̱xi̱ńdáꞌniuú, kó ki̱a̱ tꞌíndojnú ngaskande ndyiojón ta̱jño̱ó.
9Kó nga kamángindyiojón jataxie Jeuu̱, kó nga sikónkixi̱, bi̱ katsoó ngayeje xota̱ na̱xi̱ńdaá:
Jún boá xi xota̱ xi kixi̱jnú, ngatꞌa̱ án boá xi kondraa̱ ndi̱a̱na kisꞌijña an, kó án boá xi katsꞌenkꞌién an kui, ta̱nga, ꞌyá xí katsꞌénkꞌién ngayeje kui jaá. 10Ngatamajnú ngotꞌe̱ ꞌne̱, nga ngojín én xi tsíchji̱a̱ Néná, kjiꞌanga bo̱a̱ katsó kjo̱a̱a̱ xota̱ ndiꞌaa̱ Akaa̱b xi tꞌanangii̱ kꞌo̱ka, ngatꞌa̱ Néná jè katsꞌénkjatjosón ni xi katsó nga katsꞌénkíchji̱a̱ nda̱ mosoo̱ xi ꞌmí Eliyaa̱.
11Kósꞌe̱ Jeuu̱ katsꞌénkꞌién ngayeje xota̱ xi kisꞌińdo ngase xi xota̱ ndiꞌaa̱ Akaa̱b kamá, ki̱a̱ na̱xi̱ńdáꞌniuú Jesree̱l, kó katsꞌénkjiesón ngayeje xota̱ xi nkꞌa xaá, ko̱jo xota̱ xi nda yaꞌa, ko̱jo chináꞌmii̱, ngaskande nga nde ingojín xi kisꞌińdo ngase.
12Sꞌe̱ jatjo ki̱a̱a̱, kó kijí xtji̱e̱e̱n nangi Samaria̱, kó kui ndi̱ya̱à kijí ngaskande nga jachó ndiꞌa nínga síndo xota̱ xi botie tsja̱a̱ cho̱tsa̱nga̱a̱. 13Kó Jeuu̱ ki̱a̱ kasakoo̱ já ntsꞌi̱e̱ Okosiyaa̱, nda̱ ree̱ nangi Jundáa̱, kó bi̱ katsoó:
—ꞌYá jún bo̱a̱.
Kó kui jaá bi̱ katsó:
—Ntsꞌi̱e̱ Okosiyaa̱ boá ji̱n, kó kꞌi̱e̱ kjindibájayajne̱ tsi̱ꞌe̱ nga si̱ꞌantindejne̱ ndií nda̱ ree̱, ko̱jo ndií na̱ ree̱ nga.
14Kósꞌe̱ bi̱ katsó Jeuu̱:
—¡Ndo̱ba̱ tikónjnú kui jaá! Kó ngije kandobá tikón, ki̱a̱ kiniꞌánkjiesón nga yichán jó kui jáxíꞌiín, ki̱a̱ tꞌa ndáńchꞌi̱ xi tikón ki̱a̱ Bee̱t-Ekee̱nd, kó nde ingojín xi kisꞌińdo ngase.
15Sꞌe̱ kijíni kui ngi̱ndiee̱, kó kasakoo̱ Jonandaa̱b ndií Rekaa̱b, kó ngije katsꞌéntinde, bi̱ katsoó:
—A kixi̱ tikón ini̱màa̱, xikótsꞌèn kixi̱ tikón ini̱ma̱na kjo̱a̱a̱ ji.
Kó bi̱ katsó Jonandaa̱b:
—Jo̱o̱n, kixi̱ tikón.
Kó bi̱ katsó ngase Jeuu̱:
—Ja̱ tsi bo̱a̱ kjiꞌi, te̱ꞌéní ndse̱.
Kó Jonandaa̱b katsjaá tsja, kósꞌe̱ katsꞌénkijin ngi̱ya karroo̱ Jeuu̱, 16kó bi̱ katsoó:
—Ja̱bíchinní, kó xche̱ ji nga achichí chi̱ni̱ án kjo̱a̱a̱ Néná. Kósꞌe̱ kijíjo̱ Jeuu̱ ngi̱yaa̱ kui karro̱ xi tsi̱ꞌe̱. 17Kó nga jachó Jeuu̱ na̱xi̱ńdá Samaria̱, katsꞌénkꞌién ngayeje xota̱ xi kisꞌińdo ngase xi chji̱a̱ni Akaa̱b ki̱a̱ na̱xi̱ńdá Samaria̱, ngaskande nga katsꞌénkjié yeje xota̱ xi chji̱a̱ni kui, xikó má tsó Néná nga katsꞌénkíchji̱a̱ Eliyaa̱.
Jeuu̱ katsꞌénkjié nga niꞌántsjaà Baa̱l
18Sꞌe̱ jaskan Jeuu̱ ítikó ngayeje xota̱ na̱xi̱ńdaá, kó bi̱ katsoó:
—Akaa̱b chiboa tsí katsꞌénxátꞌaa̱ ne Baa̱l, ta̱nga Jeuu̱ achichí ꞌniú sa̱ꞌínxátꞌaa̱. 19Kuíni nga ngotꞌe̱ ꞌne̱, ndokjoée̱ ngayeje jáchji̱ni̱e̱ꞌe̱én ne Baa̱l, ko̱jo ngayeje mosoo̱, ko̱jo ngayeje chináꞌmii̱, nga ngojín xi ngachaja nga kjo̱e̱ꞌe, ngatꞌa̱ ngo kjo̱a̱tjó xi ꞌniú je sa̱ꞌinkꞌasꞌièe̱n ne Baa̱l, kó ngayeje xi xcha̱ja, ko̱yà.
Bo̱a̱ tsꞌén tsíchji̱a̱a̱ Néná Jeuu̱ nga katsꞌénkjién kjo̱a̱mañaa̱, ta̱ tsi̱ꞌe̱ nga sa̱ꞌínkjié ngayeje xota̱ xi tsꞌénxátꞌaa̱ ne Baa̱l. 20Kó Jeuu̱ bi̱ katsó: ¡Tꞌíyájnúu̱ xotaa̱ tsi̱ꞌe̱ nga ka̱matikó, nga ngo sꞌué si̱ꞌaa̱n ne Baa̱l! Kó katsóyà kui jaá. 21Kó Jeuu̱ katsangiya chji̱ni̱e̱ꞌe̱én ngayeje nangi Israee̱l, kó jachó ngayeje xota̱ xi ndyi̱tsꞌéndíkón ne Baa̱l, nde ngojín xi kichajá nga jachó kui ngi̱ndiee̱. Kó tsꞌasꞌien na̱ngo̱xi̱i̱ ne Baa̱l, kó kui ngi̱ndiee̱ kisꞌikitsié má, ndeskande ngo ndiè, ngaskande xi ingo ndieè. 22Kósꞌe̱ Jeuu̱, bi̱ katsoó nda̱ xi tikóntjoón ńjño xi boajá já chináꞌmii̱: ¡Ndibéje̱ ji ńjño xi ko̱a̱ja̱ ngayeje xota̱ xi mosoo̱ ne Baa̱l! Kó kui nda̱a̱ tsꞌaxié ńjño xi chajá tsi̱ꞌe̱ kui jaá. 23Sꞌe̱ Jeuu̱ ko̱jo Jonandaa̱b ndií Rekaa̱b, tsꞌasꞌien na̱ngo̱xi̱i̱ ne Baa̱l, kó bi̱ katsoó xota̱ xi mosoo̱ ne Baa̱l: Tsitsíjenjnúu̱ nga kꞌi̱e̱jín kꞌuíndojinjnú ngo xota̱ xi tsꞌénxátꞌaa̱ Néná, ta̱kuítsí xota̱ xi tsꞌénxátꞌaa̱ ne Baa̱l xi kꞌi̱e̱ ngatꞌíndo.
24Kó kjiꞌanga tsꞌasꞌien kui xotaa̱, tsi̱ꞌe̱ nga sa̱ꞌínkꞌasꞌien kjo̱a̱tjó ko̱jo nga ku̱i̱ꞌítí kjo̱a̱tjó, Jeuu̱ índo ichítié ko̱jo kantié já ki̱a̱ ndi̱tsee̱n, kó bi̱ katsoó: Ta̱ꞌyaní xi tsja̱ndiè nga ko̱nga ngo kui já xí je íjñá an ngi̱ya ndsa̱jnú, kuí boá xí chjiéngá ku̱i̱ꞌíchjí nga ko̱yà.
25Kó ngije kamaá nga katsꞌénkꞌasꞌien ngayeje kui kjo̱a̱tjó xi ikꞌítií, kui xi síndo kui ngi̱ndiee̱, Jeuu̱ bi̱ katsoó jájún xi kondaa̱, ko̱jo já ngito̱ko̱o̱ jájuún: Ti̱tjásꞌi̱e̱njnú, kó ti̱ꞌankꞌiènjnú, kó nga ngojín xi fotjoꞌaa̱ yojoo̱.
Kó ki̱cha̱ndojó kiniꞌánkꞌiénni ngayeje kui xotaa̱, kó jájún xi kondaa̱, ko̱jo já ngito̱ko̱o̱ jájuún ndi̱tsén jàn atítsojo yojoo̱ kui xotaa̱. Sꞌe̱ jaskan kijí ngaskande na̱ngo̱xi̱i̱ ne Baa̱l, 26kó tsꞌaxié a̱sie̱én ni xi ne katsoó kui xotaa̱ xi síndo ki̱a̱ na̱ngo̱xi̱i̱ ne Baa̱l, kó ítí. 27Kó katsꞌénkjatsón a̱sie̱én ko̱jo na̱ngo̱xi̱i̱ ne Baa̱l, kó ndiꞌamindí katsꞌén kui ngi̱ndiee̱ ngaskande ngotꞌe̱.
28Kó bo̱a̱ tsꞌén nga Jeuu̱ katsꞌénkjié nga kiniꞌándikón ne Baa̱l ki̱a̱ na̱xi̱ńdá Israee̱l. 29Ta̱nga jé xí katsꞌén Jeroboaa̱n ndií Nabaa̱t, tsi̱ꞌe̱ nga katsꞌénjé xota̱ Israee̱l, Jeuu̱ jaꞌaxíntꞌajiín yojoo̱ kui nii̱, kjo̱a̱a̱ kui cho̱yojo xi to̱nsinié xi kisꞌińdo ki̱a̱ na̱xi̱ńdáꞌniú Betee̱l ko̱jo nangi Ndaa̱n.
30Kó Néná bi̱ katsoó Jeuu̱: Ta̱ngatꞌanii̱ nga ndakjiꞌi ni xi kiniꞌín ji ko̱jo nga kixi̱ kiniꞌín ji ngindyikón Án, kó nga bo̱a̱ kiniꞌínje̱ ji xota̱ ndiꞌaa̱ Akaa̱b, xikoó ni xi je tjíjin ini̱ma̱na, kuíni nga ndíi̱ boá xi ko̱tíxoma na̱xi̱ńdá Israee̱l ngaskande xi ma nijoón xota̱ tji̱e̱e̱.
31Ta̱nga Jeuu̱ askónjiín ngayeje ini̱ma̱a̱ nga ki̱a̱ ko̱e̱je̱tji̱ngi kjo̱a̱kitii̱ Néná, ti̱nde jatjoxíntꞌajiín kui jé xí katsꞌén Jeroboaa̱n, kui xi katsꞌén nga katsꞌénjéní xota̱ Israee̱l.
32Kui ni̱xtjin jàn, Néná ítsꞌi̱yanii̱ nga katsꞌénchichí ngase tꞌanangii̱ xota̱ Israee̱l, kó Asaee̱l katsꞌeén nga askjanjo̱ xota̱ Israee̱l, ngaskande ngayeje tsindioó kui nangii̱, 33ndeskande ndejèꞌ Jorndaa̱n xtji̱e̱e̱n nínga fotjo tsꞌueé, ko̱jo ngayeje nangi Ngalaa̱nd, ko̱jo tꞌanangii̱ xota̱ Ngaa̱nd, ko̱jo tꞌanangii̱ xota̱ tji̱e̱e̱ Rubee̱n, ko̱jo tꞌanangii̱ xota̱ tji̱e̱e̱ Manasee̱, ndeskande nangi Aroee̱r kui xi tikón tꞌa xo̱ngàndántꞌié Arnoo̱n, ngaskande nangi Ngalaa̱nd ko̱jo nangi Basaa̱n.
34Kó ni xi ngase xi katsꞌén Jeuu̱, ko̱jo ngayeje ngaꞌniú xí kisꞌiee̱ kjo̱a̱a̱ ni xi katsꞌén, a ki̱a̱jín kjitꞌa kui Chꞌo Xo̱jo̱n nínga kjitꞌa ni xi katsꞌén já re xi chji̱a̱ni na̱xi̱ńdá Israee̱l. 35Kó Jeuu̱ ki̱a̱ nijan kisꞌijñajo̱ xota̱ xi xchaá, kó ki̱a̱ akjanijín ki̱a̱ na̱xi̱ńdáꞌniú Samaria̱, kó Joakaa̱ atíxoma ngajoo̱. 36Kó kan jin nó kamaá Jeuu̱ nga atíxoma na̱xi̱ńdá Israee̱l, ki̱a̱ na̱xi̱ńdáꞌniú Samaria̱.
Currently Selected:
2 Já ree̱ 10: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
