2 Já ree̱ 4
4
Ngo xota̱chjo̱on xí ni chjieén
1Ngo xota̱chjo̱on xí chji̱a̱ni ínchjín xí tsi̱ꞌe̱ ndií jáchji̱ni̱e̱ꞌe̱én Néná, ꞌniú tsíꞌaá Eliseoo̱ ngo ni, nga bi̱ katsoó:
—Jè kꞌien xi̱ꞌinna, kui xi mosòo̱, kó jè yé ji nga kui xotaa̱ achichí kamábendikón Néná, kó ngotꞌe̱ ꞌne̱, kui xota̱ xi tsꞌénkíyà to̱o̱n je jeꞌe kꞌi̱e̱e̱, tsi̱ꞌe̱ nga jó ndína xi sa̱ꞌín moso̱ xi tsi̱ꞌe̱.
2Kó Eliseoo̱ bi̱ katsoó:
—Mí xí ka̱ma sa̱ꞌin an kjo̱a̱a̱ ji. Tꞌíyéní, mí ni xi tjiín ngi̱ya ndiꞌàa̱.
Kó bi̱ katsó kui naa̱:
—Kui na̱ mosòo̱, nde ngojiín ni ndiꞌaa̱, ta̱ ngo tsí ti̱jì isti̱.
3Kó kui nda̱a̱, bi̱ katsoó:
—Tꞌen ji, kó chji̱e̱ꞌèe̱ ngayeje xota̱ tꞌa ndiꞌàa̱ ti̱jì xi jmí nijiín, kó kjín ti̱jì chjìye ji. 4Sꞌe̱ jaskan ti̱tjásꞌi̱e̱njnú ngi̱ya ndiꞌàa̱ jí ko̱jo ndíi̱, kó tꞌíchjé ji nga̱ntjo̱a̱a̱, sꞌe̱ tindyie ji ngayeje kui ti̱ji̱ì isti̱, kó xi je kisꞌikitsiee̱, tꞌíndetꞌaxín ji.
5Kó kijíboaꞌá kui xota̱chjo̱on, sꞌe̱ íchjá nga̱ntjo̱a̱a̱, ngije tsꞌasꞌien kui ko̱jo ndií, kó kui jaá kijíjo̱boaꞌaá ti̱ji̱ì, kósꞌe̱ kui xota̱chjo̱on indyiá kui istii̱. 6Kó ngije kisꞌikitsie ngayeje kui ti̱ji̱ì, bi̱ katsoó ngo ndií:
—Ndibéje̱boeꞌéní ingo ti̱ji̱ì.
Kó bi̱ katsó kui nda̱a̱:
—Jè ngiti̱ jmíjín ngase ti̱ji̱ì.
Kósꞌe̱ ngiti̱ kisꞌiejín ngase isti̱. 7Kósꞌe̱ kui xota̱chjo̱on kijítsóyaà kui nii̱ nda̱ chji̱ni̱e̱ꞌe̱én Néná, kó kui nda̱a̱ bi̱ katsoó:
—Tꞌen ji, kó tatíñí ji kui istii̱, kó tꞌíchjíi̱ xota̱ xi tjitjiée̱n to̱o̱n, kó ji ko̱jo ndíi̱ ti̱ꞌankjiénjnú ni xi kꞌo̱ngii̱.
Ngo xota̱chjo̱on xí chꞌokon
8Kó ngo ndi̱yà nga jaꞌa Eliseoo̱ xtji̱e̱e̱n nangi Sunee̱n, ki̱a̱ kisꞌijña ngo xota̱chjo̱on xí ꞌniú yandikón, xi ꞌniú tsíꞌaá nga ko̱e̱je̱ kjinie nichinie ndiꞌaa̱, kó xki̱ nga jaꞌa Eliseoo̱ ki̱a̱a̱, kijí ndiꞌaa̱ kui xota̱chjo̱on nga iskjinie nichinie. 9Kó kui naa̱, bi̱ katsoó xi̱ꞌii̱n:
—Ngotꞌe̱ ꞌne̱, nga je be an nga kui xota̱ xi ngatsjéni̱xtjin nga foaꞌa ndiꞌaná, xota̱ tsjiee̱ Néná boá. 10ꞌNiú míꞌaá tsi̱ꞌe̱ nga si̱ꞌanda ngo ngi̱yaꞌma nínga niꞌánkjaꞌyá xi nkꞌa, kó ki̱a̱ kꞌuijñá ngo ṉchan, ko̱jo ngo yámíxa̱, ko̱jo ngo yáxíríe̱, ko̱jo ngo ni xi ꞌbítíyá ndiꞌí xí tsꞌentsíjen, tsi̱ꞌe̱ nga kjiꞌanga kjo̱e̱ꞌe kꞌi̱e̱e̱, ki̱a̱ ka̱ma kꞌuijñá kui ngi̱ndiee̱.
11Kó jachó ni̱xtjin nga jaꞌa kui nda̱a̱ ki̱a̱a̱, kó ki̱a̱ kisꞌifé kui ngi̱yaꞌma nkꞌaa̱, 12kósꞌe̱ bi̱ katsoó nda̱ moso̱ xi ꞌmí Ngiesii̱:
—Ndokjoée̱ kui xota̱chjo̱on xí chji̱a̱ni nangi Sunee̱n.
Kó ngije tsíchji̱a̱a̱, kui xota̱chjo̱on kijíkoón. 13Kó Eliseoo̱, bi̱ katsoó Ngiesii̱:
—Bo̱a̱ tꞌíi̱n kui xota̱chjo̱on nga achichí nda tjítsꞌènsénjne̱, kó mí ni xi mejeén nga sa̱ꞌin an nganda tsi̱ꞌe̱. A mejeén nga kuichjiájo an nda̱ ree̱ ngandaa̱ tsi̱ꞌe̱, axa̱ nga kuichjiájo an nda̱ ngito̱ko̱o̱ jájuún.
Ta̱nga kui xota̱chjo̱on, bi̱ katsó:
—Ki̱a̱ tikòn an ngamasiee̱n xota̱ na̱xi̱ńdána.
14Kó bi̱ katsó Eliseoo̱:
—Mí ni xi ka̱ma si̱ꞌan kjo̱a̱ndaa̱ kui xota̱chjo̱on tsobo̱a̱.
Kósꞌe̱ Ngiesii̱, bi̱ katsó:
—Nga ja̱koxi̱ kui xota̱chjo̱on jmí ndíjiín, kó xi̱ꞌii̱n jè ꞌniú xchá.
15Kó Eliseoo̱, bi̱ katsoó:
—Ndokjoée̱.
Kósꞌe̱ Ngiesii̱ tsíchji̱a̱a̱, kó kui xota̱chjo̱on ki̱a̱ jachó ki̱a̱ tꞌa nga̱ntjo̱a̱a̱. 16Kó Eliseoo̱ bi̱ katsoó:
—Xikó kjima kui ni̱xtjii̱n, ngotꞌe̱ ngo noó, ngo ndí kꞌuieé xi tsja̱níkjé jí.
Ta̱nga kui xota̱chjo̱on, bi̱ katsó:
—Jmí ndi̱a̱ xi tsa̱ꞌa̱n, ji xi xota̱a̱ Néná jí, ngata̱ chꞌíṉche̱jejín ji kui na̱ mosòo̱.
17Ta̱nga kui xota̱chjo̱on tsaꞌa ndí, kó nó xí ingoo̱ katsen ndií, ti̱kuii ni̱xtjin xi katsoó Eliseoo̱. 18Kó kui ndií kamáxchá. Kó ngo ndi̱yà kijítji̱ngii̱ na̱ꞌmii̱ nga tsoꞌbájo̱ já xí foaꞌáꞌyá to ndso̱ko̱a̱n ṉño̱paa̱n, 19kó bi̱ katsoó na̱ꞌmii̱:
—¡Ai, on tokó án, on tokó án!
Kó na̱ꞌmii̱, bi̱ katsoó ngo mosoo̱: ¡Tꞌenjèe̱ na̱aa̱n! 20Kó ngije tsangínjoo̱ na̱aa̱n kui nda̱chií, na̱aa̱n iskjíbé, kó ki̱a̱ yíjñasón tikoó ngaskande nga kamándisꞌueé, sꞌe̱ kꞌien ngijee̱. 21Kósꞌe̱ kui xota̱chjo̱on kijínijíngí, kó ki̱a̱ kisꞌie nínga tikón ṉchaa̱n nda̱ chji̱ni̱e̱ꞌe̱én Néná, sꞌe̱ jaskan jatjoxie, kó íchjá nga̱ntjo̱a̱a̱. 22Sꞌe̱ tsíchji̱a̱a̱ xi̱ꞌii̱n, kó bi̱ katsoó:
—Nangíyéní ngo mosòo̱ ko̱jo ngo bórró chjo̱on, tsi̱ꞌe̱ nga konga má an nga kjuinkóo̱n xota̱a̱ Néná, sꞌe̱ kjoéꞌe̱ ngiñá an.
23Kó bi̱ katsó xi̱ꞌii̱n kui xota̱chjo̱on:
—Míkjo̱a̱a̱ nga ngotꞌe̱ kꞌuin kón ji. Jmí tsi ni̱xtjin sꞌueé sá tja̱tsi̱e̱e̱, ti̱nde jmí tsi ni̱xtjin ndikón ngotꞌe̱.
Kó kui xota̱chjo̱on, bi̱ katsó:
—Ngatꞌieé kjo̱a̱xió.
24Sꞌe̱ ísoón xiri̱e̱ bórró chjo̱ón, kó bi̱ katsoó mosoo̱:
—¡Tjiàn kó chjábéngí ji kui cho̱o̱, kó ngata̱ bosínjín ji ngi̱ya ndi̱ya̱à, ngaskande nga an xi bo̱a̱ xian án!
25Kó kijí kui xota̱chjo̱on, sꞌe̱ jachó nínga tikón nda̱ xi tsi̱ꞌe̱ Néná ki̱a̱ na̱xi̱ Karmeloo̱. Kó nda̱ chji̱ni̱e̱ꞌe̱én Néná nga kamábe nga ta̱ kjin tsꞌéndibání kui xota̱chjo̱on, bi̱ katsoó nda̱ mosoo̱ xi ꞌmí Ngiesii̱:
—Kꞌi̱e̱ tikón kꞌi̱e̱e̱ kui xota̱chjo̱on xí chji̱a̱ni nangi Sunee̱n. 26Ti̱yi má ji nga tꞌenchje̱ꞌéyindi̱ye, kó bi̱ tꞌíi̱n:
A tjiín kjo̱a̱xió. Kó, a tjiín kjo̱a̱xió xi̱ꞌíi̱n ko̱jo ndíi̱.
Kó bi̱ katsó kui xota̱chjo̱on:
Ngatꞌieé kjo̱a̱xió.
27Ta̱nga ngije jachó ki̱a̱ na̱xi̱ nínga tikón kui nda̱ xi chji̱a̱ni Néná, kui xota̱chjo̱on ki̱a̱ kisꞌijñando ngindie se kui nda̱a̱. Kó Ngiesii̱ kijíkóntiñaa̱ tsi̱ꞌe̱ nga kjo̱a̱ꞌáxín, ta̱nga nda̱ xi chji̱a̱ni Néná, bi̱ katsoó:
Xióchíi̱n, ngatꞌa̱ achichí ndasen tikón ini̱ma̱a̱, kó Néná íjñaꞌmana kui nii̱, katsóyàjínna.
28Kósꞌe̱ bi̱ katsó kui xota̱chjo̱on:
—A ndí tsíꞌáa̱ ndi̱a̱na. A mí tsí bo̱a̱ kixiáa̱n nga ngata̱ chꞌíṉche̱jejínní.
29Kósꞌe̱ Eliseoo̱, bi̱ katsoó Ngiesii̱:
—Tꞌínde yojòo̱, kó chjábé jí yánísiéna, kó tꞌen ji, kó tsi tjín xí sa̱ko̱ó, ngata̱ niꞌíntindejín ji, kó tsi tjín xí sa̱ꞌíntindee̱ ji, ngata̱ ndokjo̱e̱jejín ji, kó chjábé jí yánísiéna, kó ki̱a̱ tꞌíjñí ji kje̱n kui ndií.
30Kó bi̱ katsó na̱aa̱n kui ndií:
—Ja̱koxi̱ boá nga tikón Néná, ko̱jo tikón ini̱màa̱, nga kꞌuijñámasiénjaán.
Kósꞌe̱ jastjíe̱n Eliseoo̱, se kijítji̱ngii̱ kui xota̱chjo̱on.
31Kó Ngiesii̱ kijítjoón kui jaá, kó kui yánísieé íjñaá kje̱n kui ndií, ta̱nga nde tsintꞌiéjiín ngo nda̱, ti̱nde jmí ni ka̱májín. Sꞌe̱ kijíꞌoyá nginí nínga je tsꞌéndibá Eliseoo̱ nga kijítsóyaà ni xi kamaá, kó bi̱ katsoó:
—¡Foaꞌáꞌyájiín kui ndií!
32Kó nga jachó Eliseoo̱ ki̱a̱ ndiꞌaa̱, kamábe nga je kꞌien kui ndií, nga kjiꞌijñasón ṉchaa̱n. 33Kósꞌe̱ tsꞌasꞌien Eliseoo̱ ko̱jo na̱aa̱n kui ndií, kó íchjá nga̱ntjo̱a̱a̱, sꞌe̱ tsíchji̱a̱a̱ Néná. 34Jaskan kijíkoón kui ndií, kó ki̱a̱ kisꞌiesón nga̱soón, kó tsꞌoa Eliseoo̱ ítꞌaa̱ tsꞌoa kui ndií, ko̱jo ndyi̱ko̱n ítꞌaa̱ ndyi̱ko̱n kui ndií, kó tsja íjñasoón tsja kui ndií, kó bo̱a̱ tsꞌén jajñasón nga̱soón kui ndií, kó inda inda kamá asoo̱ yojoo̱ kui ndií. 35Sꞌe̱ jaskan ja̱kꞌi̱e̱ ja̱ngaján kijí ngi̱ya kui ndiꞌaa̱, sꞌe̱ ti̱ kijínijíngí nginí nínga tikón kui ndií, kó ti̱ kisꞌiesón nginí nga̱soón kui ndií, kó ti̱chaa̱n kui ndií yito ndi̱yà katsꞌéntsjen, kósꞌe̱ iskjíxꞌá ndyi̱ko̱n. 36Kósꞌe̱ Eliseoo̱ tsíchji̱a̱a̱ Ngiesii̱, kó bi̱ katsoó:
—Ndokjoée̱ kui xota̱chjo̱on xí chji̱a̱ni nangi Sunee̱n.
Kó nga jachó kui xota̱chjo̱on, bi̱ katsoó:
—¡Chjanínkꞌé jí ndíi̱!
37Kó kui xota̱chjo̱on tsꞌasꞌien ngi̱ya ndiꞌaa̱, kó asiéntikoó ngaskande nga kisitꞌaa̱ xtjien tꞌanangii̱, sꞌe̱ iskjíbé ndií, iskjininkꞌa, sꞌe̱ jataxie.
Eliseoo̱ katsjaá nichinie já chji̱ni̱e̱ꞌe̱én Néná
38Eliseoo̱ kijí nginí nangi Ngilngaa̱l. Kó kui ni̱xtjin jàn kisꞌie ngo kjindiá ꞌniú kui ngi̱ndiee̱, kó ndií jáchji̱ni̱e̱ꞌe̱én Néná, ki̱a̱ kisꞌińdo kje̱n Eliseoo̱, kó kui nda̱a̱, bi̱ katsoó nda̱ mosoo̱: Tꞌíjñinde ji ngo ti̱jì xí je, kó ti̱ꞌinde ji nichinie tsi̱ꞌe̱ jáchji̱ni̱e̱ꞌe̱én Néná.
39Kó ngo kui jaá xi kijí ngi̱jin jno̱o̱ nga kijíkjaꞌaꞌyá xka̱ xi ma chinie, kó kasakoo̱ xka̱ xi ja̱kon tostsi̱jè má kón, kó tsatie ṉcho̱ xi ꞌbé ngi̱jin kꞌijñaá, kó íkitsie má ńjño xi yaꞌa, kó ngije kijíꞌoyá nginí, ki̱a̱ indyiá ngi̱ya ti̱jì nínga kjimanda nichiniee̱, ngatꞌa̱ nde bejín mí nii̱ bo̱a̱ xi̱ꞌba̱.
40Kó indyiaá ti̱bo̱a̱ kui jaá tsi̱ꞌe̱ nga skji̱ni̱e̱, ta̱nga ngije ndyi̱kjinie kui nichiniee̱, bi̱ katsó nga askjandáyà: ¡Ji nda̱ xi tsi̱ꞌe̱ Néná, kuí ti̱ji̱ì kjo̱a̱bo̱ya boá xi tjiín!
Kó nde kamájín iskjinie kui nii̱. 41Ta̱nga bi̱ katsó Eliseoo̱:
—Ndibájo̱jnú ndso̱ko̱a̱n ṉño̱pan.
Kó indyiaá ngi̱yaa̱ kui ti̱jì, sꞌe̱ bi̱ katsó:
—Te̱ꞌée̱ kui xotaa̱ tsi̱ꞌe̱ nga skji̱ni̱e̱.
Kó ngiti̱ jmí ni xi ndajín, kisꞌiejín ngi̱yaa̱ kui ti̱ji̱í.
42Kósꞌe̱ jachó ngo nda̱ xi chji̱a̱ni nangi Baa̱l-Salisaa̱, xi jachójoo̱ nda̱ xi tsi̱ꞌe̱ Néná paa̱n ni xi xi tjón kamáxchaá, ko̱jo kan pan xi sebanda̱ ko̱jo to ndso̱ko̱a̱n ṉño̱pan kamándani, kó bi̱ katsó Eliseoo̱ nga atíxoma:
—Te̱ꞌéjnúu̱ kui xotaa̱ tsi̱ꞌe̱ nga skji̱ni̱e̱.
43Ta̱nga kui nda̱ mosoo̱, bi̱ katsó:
—Kótsꞌèn ka̱mana kꞌuijñá an kui nii̱ ngindyi̱ko̱n úchán xota̱.
Kó bi̱ katsó Eliseoo̱:
—Te̱ꞌéjnúu̱ kui xotaa̱ tsi̱ꞌe̱ nga skji̱ni̱e̱, ngatꞌa̱ jè bi̱ katsó Néná: Skji̱ni̱e̱, kó ngaskande kꞌo̱ngi ngase.
44Kósꞌe̱ Ngiesii̱ índo kui nii̱ ngindyi̱ko̱n kui xotaa̱, kó iskjinie, ko̱jo tsꞌangi ngasee̱, xikó má katsó én xí tsíchji̱a̱ Néná.
Currently Selected:
2 Já ree̱ 4: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
