2 Já ree̱ 3
3
Nga kamá re Joraa̱n ki̱a̱ na̱xi̱ńdá Israee̱l
1Nó tjiꞌún ján nga kisꞌijña Josafaa̱t nda̱ ree̱ nangi Jundáa̱, Joraa̱n ndií Akaa̱b kamá ree̱ na̱xi̱ńdá Israee̱l ki̱a̱ na̱xi̱ńdáꞌniú Samaria̱, kó tiejó nó kamaá nga atíxoma. 2Kó ni xi ndajín katsꞌén ngindyi̱ko̱n Néná, ndatsi bo̱a̱jín má ta̱ katsꞌén xikoó na̱ꞌmii̱ ko̱jo na̱aa̱n, ngatꞌa̱ jaꞌáxín a̱sie̱én ne Baa̱l xi katsꞌénda na̱ꞌmii̱. 3Ta̱nga katsꞌénkꞌasꞌiee̱n yojoo̱ ngayeje jé xí katsꞌén Jeroboaa̱n ndií Nabaa̱t, kó ta̱ngatꞌanii̱ kui nga katsꞌénjé xota̱ Israee̱l, kó íjñámasienjín kui nii̱.
Moaa̱b askjanjo̱ na̱xi̱ńdá Israee̱l
4Kósꞌe̱ Mesaa̱ nda̱ ree̱ nangi Moaa̱b, kui xi achichí cho̱tsa̱nga̱ katsꞌénxchá, úchán mi̱ ndií cho̱tsa̱nga̱, ko̱jo úchán mi̱ cho̱tsa̱nga̱ xi jaꞌatji ndi̱ja̱a̱ xi kisꞌiee̱ tsa̱nga̱, xi katsꞌénkꞌasꞌiee̱n nda̱ ree̱ na̱xi̱ńdá Israee̱l nga íchjítjéni yojoo̱. 5Ta̱nga ngije kꞌien Akaa̱b, nda̱ ree̱ nangi Moaa̱b, kondra̱ kijínii̱ nda̱ ree̱ na̱xi̱ńdá Israee̱l. 6Kó kui ni̱xtjin jàn nda̱ re Joraa̱n jatjoni nangi Samaria̱, kó kijíkꞌíxki̱ ngayeje xota̱ Israee̱l. 7Kó ti̱ katsangiyaa̱ én Josafaa̱t, nda̱ ree̱ nangi Jundáa̱, nga bi̱ katsoó: Nda̱ ree̱ nangi Moaa̱b kondra̱na je tikón, a kꞌuínje̱jne̱ nga kongínki̱xkánjo̱jne̱ xota̱ tji̱e̱e̱ Moaa̱b.
Kó bi̱ katsó Josafaa̱t: Kjuínjoo̱, ngatꞌa̱ bo̱a̱ kón an xikoó jí, kó xota̱ na̱xi̱ńdána bo̱a̱ kon xikoó xota̱ na̱xi̱ńdáa̱, kó ndi̱je̱na bo̱a̱ kon xikoó xi tse̱. 8Kó bi̱ katsó ngase:
—Kó ñá ndi̱yà nínga kongín.
Kó bi̱ katsó Joraa̱n:
—Ndi̱yà xí fíni nangi kixií nangi Endoo̱n.
9Kósꞌe̱ kijí nda̱ ree̱ na̱xi̱ńdá Israee̱l, ko̱jo nda̱ ree̱ nangi Jundáa̱, ko̱jo nda̱ ree̱ nangi Endoo̱n, kó yito ni̱xtjin jaꞌatjiyajoo̱n nangi kixií, ngaskande nga ngiti̱ jmí ndáfoa kisꞌiejiín ndiꞌańjño nínga kisꞌińdo ko̱jo cho̱ xi kisꞌiee̱. 10Kósꞌe̱ nda̱ ree̱ na̱xi̱ńdá Israee̱l, bi̱ katsó: ¡Ann a bo̱a̱! ¡Néná boá xi jeꞌejo̱ nga ján kui já re xi̱ꞌbi̱, tsi̱ꞌe̱ nga ngi̱ya tsja xota̱ Moaa̱b sa̱ꞌínkꞌasꞌien!
11Ta̱nga nda̱ re Josafaa̱t, bi̱ katsó:
—A jmíjín kꞌi̱e̱e̱ ngo nda̱chji̱ni̱e̱ꞌe̱én Néná, tsi̱ꞌe̱ nga kui si̱ꞌankjiénjne̱ nga ko̱si̱yajne̱ ngo ni Néná.
Kósꞌe̱ ngo nda̱ mosoo̱ nda̱ ree̱ na̱xi̱ńdá Israee̱l, bi̱ katsó:
—Kꞌi̱e̱ tikón kꞌi̱e̱e̱ Eliseoo̱ ndií Safaa̱t, kui xi asíko̱jo Eliyaa̱ nga indyiaá ndáfoa tsja.
12Kó Josafaa̱t, bi̱ katsó:
—Eén Néná boá xi tikoón kui nda̱a̱.
Kó Josafaa̱t nda̱ ree̱ na̱xi̱ńdá Israee̱l, ko̱jo nda̱ ree̱ nangi Endoo̱n nijan kijíjaya. 13Kó Eliseoo̱, bi̱ katsoó nda̱ ree̱ na̱xi̱ńdá Israee̱l:
—Mí ni xi tjínna kjo̱a̱a̱ ji. Tꞌenchíi̱n jáchji̱ni̱e̱ꞌe̱én na̱ꞌmíi̱ ko̱jo na̱áa̱n.
Ta̱nga nda̱ ree̱ na̱xi̱ńdá Israee̱l, bi̱ katsoó:
—Jmí, ngatꞌa̱ Néná jè ítikó nga ján kui já re xi̱ꞌbi̱, tsi̱ꞌe̱ nga sa̱ꞌínkꞌasꞌien ngi̱ya tsja xota̱ Moaa̱b.
14Kósꞌe̱ Eliseoo̱, bi̱ katsó:
—Ja̱koxi̱ boá nga tikón Ndi̱a̱ná xí tsi̱ꞌe̱ jájuún, kui xi ngindyi̱ko̱n kui tikón an, nga tsi ta̱ngatꞌajínnii̱ nga bendikón án Josafaa̱t, nda̱ ree̱ nangi Jundáa̱, nde sa̱ꞌinsénjaán, ti̱nde skotsijenjaán ji. 15Ta̱nga ngotꞌe̱ ꞌne̱, ndibájo̱jnúꞌun ngo xi maa̱ niꞌánkjanie ni fonie.
Kó tji̱e̱nga tjítsꞌénkjánié kui nda̱a̱ kui ni foniee̱, ngaꞌniuú Néná kjindibánié Eliseoo̱, 16kó bi̱ katsó:
Bi̱ tsó Néná: Ti̱ꞌandajnú kjín ndi̱yà xo̱ngà kuí nangi soón, 17ngatꞌa̱ bi̱ tsó Ndi̱a̱ná: Ngiti̱ xcha̱jínjnú tjo̱, ti̱nde ngiti̱ xcha̱jínjnú stseé, ta̱nga kui nangi soón sꞌi̱kitsie maá ndáfoa, kó ka̱ma sꞌi̱o̱jnú jún ko̱jo cho̱ tjiéjnú, ko̱jo cho̱ tamájnú. 18Kó tsi kui nii̱ xi chiboa ma ngindyi̱ko̱n Néná, ti̱ sa̱ꞌínkꞌasꞌien xota̱ Moaa̱b ngi̱ya ndsa̱jnú nga. 19Kó jún si̱ꞌantsa̱júnjnú nga ngo nga ngo na̱xi̱ńdáꞌniú xi ꞌniú tjíchjáꞌyaá, ko̱jo nga ngo nga ngo na̱xi̱ńdáꞌniú xí je kachjeꞌéjii̱n, kó kꞌuiéjnúu̱ ngayeje yá xí nda, kó kꞌuiꞌmájnú ngayeje ndáńchꞌi̱ xi tjiín ndáfoa, kó ndi̱jo̱ ku̱i̱ndyiájnú ngayeje tꞌanangi xi ndaa̱.
20Kó nga ta̱jño̱ó nga kamángindyiojón, chi̱bo̱a̱a̱ nga kiniꞌánkꞌasꞌien kui kjo̱a̱tjoó, kisꞌie ndáfoa ndi̱yà xí fíni nangi Endoo̱n, kó kui ngi̱ndiee̱, kisꞌikitsié má ndáfoa.
21Kó ngayeje xota̱ Moaa̱b tsintꞌié nga já ree̱ kijínijíngí nga kijíkjánjo̱ kui xotaa̱, kó kandokjo̱a̱a̱ nga kamátikó xota̱ xi sꞌe̱ tsí kjimaa̱ boaꞌa ni xi kjánjoo̱ ko̱jo xi je ꞌniú maá nga, kó ki̱a̱ kisꞌińdo nínga tikón tsindioó. 22Kjiꞌanga jastjíe̱n nga ndibáꞌásie̱én nga kamángindyiojón, tsꞌueé je tikón ꞌna̱ ꞌna̱ nga̱són ndáfoaa̱, kó xota̱ Moaa̱b ta̱ kjin kamábeni nga kui ndáfoaa̱ iní kamá xikoó jín, 23kó bi̱ katsó: ¡Jín boá! Kjénní nga kui já ree̱ xi̱ꞌbi̱ xi ja̱kꞌi̱e̱ ja̱ngaján ndyi̱kjánjo̱ xkjín, kó nga ngo nga ngo je katsꞌénkꞌién xkjín. Ngotꞌe̱ ꞌne̱, jún xota̱ Moaa̱b, ¡chjábéjnú ni xi kiniꞌánjnú!
24Ta̱nga nga jachó ki̱a̱ kꞌijñaá na̱xi̱ńdá Israee̱l, jastjíe̱n xota̱ Israee̱l, kó askjanjo̱ xota̱ Moaa̱b, kó katsꞌeén xota̱ Moaa̱b, kui xi tsanga ngindyi̱ko̱n kui jaá, kó xota̱ Israee̱l tsangatji̱ngii̱, ko̱jo katsꞌénkꞌién xota̱ Moaa̱b. 25Kó katsꞌénkjatsón ngayeje na̱xi̱ńdáꞌniuú, ko̱jo ngayeje tjín tꞌanangi xi ndaa̱, kó ńgó ńgó kuí jaá tsꞌajmi ndi̱jo̱o̱, kó yíꞌmá ngayeje ndáńchꞌi̱ xi tjitjoó ndáfoa, kó yeꞌeé ngayeje yá xí nda, kó ngaskande na̱xi̱ńdáꞌniú Kii̱r-Aresee̱t ta̱ ndi̱jo̱ tsí xi índo ngase, ngatꞌa̱ jájún xi ndyi̱yaꞌa ndi̱jo̱ ndayajoo̱ jaꞌatjiyajoo̱n kui ngi̱ndiee̱, kó katsꞌénkjié.
26Kó nga kamábe nda̱ ree̱ nangi Moaa̱b nga je kjima ꞌniú kuí kjo̱a̱xcha̱án kondra̱ tsi̱ꞌe̱, ítikó yito úchán jáxíꞌín xi tsja kixi̱i̱ tsꞌénkjiénni ki̱cha̱ndojoó, tsi̱ꞌe̱ nga skjánjo̱ nda̱ ree̱ nangi Endoo̱n, ta̱nga kamájiín. 27Kósꞌe̱ iskjíbé ndí tjoón kui xi chjiéngá ko̱tíxoma ngajoo̱ katsaki, kó katsꞌénkꞌién, sꞌe̱ kjo̱a̱tjó xi ꞌbítí ki̱a̱ nga̱són xó xí tjíchjáꞌyáni kui na̱xi̱ńdaá katsꞌén nga katsꞌénkꞌasꞌien. Kó achichí katsꞌénxchán kondraa̱ xota̱ Israee̱l, kó xota̱ xi tsangaboaꞌáni kui ngi̱ndiee̱, kijíꞌoyá nginí nangii̱.
Currently Selected:
2 Já ree̱ 3: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
