2 Já ree̱ 25
25
Nga kijí ngindie jàn na̱xi̱ńdáꞌniú Jerusalee̱n
(Jer 39:1-7; 52:3-11)
1Kó xi ma nijan nó nga atíxoma Sendekiyaa̱, ni̱xtjin tiee̱, sá xí ma tiee̱ kui noó, Nabukondonosoo̱r, nda̱ ree̱ nangi Babiloniaa̱, jachójo̱ ngayeje jájuún nga jachókjánjo̱ na̱xi̱ńdáꞌniú Jerusale̱n, kó jaꞌatjiyajoo̱n kui na̱xi̱ńdáꞌniuú, kó yején ndi̱yà tsi̱ꞌe̱ nga skjánjo̱. 2Kó kui na̱xi̱ńdáꞌniuú ikꞌíchjáꞌyá ngaskande xi ma tiengo nó nga kisꞌijña nda̱ re Sendekiyaa̱.
3Kó ni̱xtjin xi ma nijaa̱n, xi ma nijoón kui saá, ngo kjindiá xí ꞌniú kamá kui na̱xi̱ńdáꞌniuú, kó ngiti̱ kisꞌiejiín nichinie xota̱ xi chji̱a̱ni kui tꞌanangii̱. 4Kó ngije katjoxꞌá ngo ndi̱yà ki̱a̱ kui na̱xi̱ńdáꞌniuú, tji̱e̱nga xota̱ Kalndeaa̱ íchjáꞌyá kui na̱xi̱ńdáꞌniuú nga ngo foaꞌatjiyajoo̱n, ngayeje jájuún tsanga nga jñoó ki̱a̱ xtji̱e̱e̱n nga̱ntjo̱a̱a̱, ki̱a̱ ngi̱jii̱n nga jó kui xó xí tikón ki̱a̱ tꞌa nínga kjiꞌii̱ ni tjié nda̱ ree̱, kó nda̱ re Sendekiyaa̱ kijí xtji̱e̱e̱n ndi̱yà xi fí nangi Arabaa̱.
5Ta̱nga jájuún xota̱ Kalndea̱ kijítji̱ngii̱ nda̱ ree̱, kó ki̱a̱ jachótji̱ngii̱ ki̱a̱ nangi soón na̱xi̱ńdáꞌniú Jerikoo̱, kó ngayeje jájuún kastsojoboa. 6Kó kandobá nda̱ ree̱, sꞌe̱ tsangínjo̱ ngindyi̱ko̱n nda̱ ree̱ nangi Babilonia̱, ki̱a̱ na̱xi̱ńdáꞌniú Riblaa̱, kó ki̱a̱ katseꞌéjeé. 7Kó ngindyi̱ko̱n nda̱ ree̱ kiniꞌánkꞌién nga jó ndií Sendekiyaa̱, kó kaꞌnaxié ndyi̱ko̱n Sendekiyaa̱, sꞌe̱ ikꞌítꞌaꞌniúní ńꞌniúki̱cha̱ bronse̱ nga tsangínjo̱ na̱xi̱ńdáꞌniú Babilonia̱.
Nga katsꞌénkjatsón Ndiꞌaa̱ Néná Nabusarandaa̱n
(2Kr 36:17-21; Jer 39:8-10; 52:12-30)
8Ni̱xtjin xi ma yitoo̱ sá xi ma uún, nó tjiꞌún ján nga atíxomaa̱ Nabukondonosoo̱r, nda̱ ree̱ nangi Babilonia̱, kui nda̱ xi ꞌmí Nabusarandaa̱n, nda̱ ngito̱ko̱o̱ já xí koón já xí síndo ndo̱bo̱a̱ya̱à, xi mosoo̱ nda̱ ree̱ nangi Babilonia̱ kamá, jachó ki̱a̱ na̱xi̱ńdáꞌniú Jerusale̱n, 9kó ítí Ndiꞌaa̱ Néná, ko̱jo ndo̱bo̱a̱xa̱á nda̱ ree̱, ko̱jo ngayeje ndiꞌa xi tjín na̱xi̱ńdáꞌniú Jerusale̱n, kó ti̱ ítí ngayeje ndiꞌaa̱ já xí yandikoón. 10Kó ngayeje jájuún xota̱ Kalndea̱ kui xi nijan kisꞌijñajo̱ nda̱ ngito̱ko̱ xi koo̱n já xí síndo ndo̱bo̱a̱ya̱à, katsꞌénkjatsón ngayeje xó xí jaꞌatjiyajonnii̱ na̱xi̱ńdáꞌniú Jerusalee̱n. 11Kó xota̱ na̱xi̱ńdá xí ngase xi kisꞌińdo ngase ngi̱jii̱n na̱xi̱ńdáꞌniuú, ko̱jo kui já xí katsꞌénkjiékjo̱a̱ xi nijan kamá nda̱ ree̱ nangi Babiloniaa̱, ko̱jo xi ngasee̱, Nabusarandaa̱n, nda̱ ngito̱ko̱o̱ já xí koón xota̱ xi síndo ndo̱bo̱a̱ya̱à kijíjo̱ꞌniú. 12Ta̱nga nda̱ ngito̱ko̱o̱ já xí koón xota̱ xi síndo ndo̱bo̱a̱ya̱à, índo chiboa xota̱ xi ni̱ma̱ xi jmí to̱njiín kui na̱xi̱ńdaá, tsi̱ꞌe̱ nga ki̱a̱ sa̱ꞌínxájin ńꞌniuú tostsi̱je̱è ko̱jo tꞌanangii̱.
13Kó xota̱ Kalndeaa̱ katsꞌénkjatsón nga akján yásé xi ki̱cha̱ bronse̱ xi kisꞌińdoo̱ Ndiꞌaa̱ Néná, ko̱jo ngindiee̱ kui yáseé, ko̱jo nínga kixindyia ndáfoa, xi ki̱cha̱ bronse̱ kamándanii̱ xi kisꞌińdo ki̱a̱ Ndiꞌaa̱ Néná, kó kijíjo̱ ngayeje kui ki̱cha̱ bronsee̱ ki̱a̱ nangi Babilonia̱. 14Ti̱ kijíjo̱ ni xi mindyia ndáfoaa̱, ko̱jo ni xi niꞌántsjiejónni ṉchandikoón, ko̱jo ni xi mindyia ndisoo̱, ko̱jo ki̱cha̱chꞌa̱a̱, ko̱jo ngayeje ni xi ki̱cha̱ bronse̱ kamándani xi katsꞌénkjién nga katsꞌéndikón Néná. 15Ko̱jo ni xi ꞌbítíyá nisijee̱n, ko̱jo tasa̱ yiꞌii̱, ko̱jo ni xi to̱nsinié kamándanii̱, ko̱jo ngayeje ni xi to̱ntiboaa̱, ngayeje kui nii̱ xi kijíjo̱ ngito̱ko̱o̱ já xí koón xota̱ xi síndo ndo̱bo̱a̱ya̱à.
16Nga jó kui yáseé, ko̱jo kui ni xi mindyia ndáfoaa̱, ko̱jo ngindiee̱ yáseé Ndiꞌaa̱ Néná xí katsꞌénda Salomoo̱, nde kamájín kichisoón kótjín é kuí ki̱cha̱ bronsee̱ ngayeje kui nii̱. 17Nga nkꞌaa̱ kui yáseé jin metro̱ kamá, kó nga̱soón kui yáseé kisꞌijñaa̱ ngo to̱ko̱ xi ki̱cha̱ bronse̱ kamándani xi ngo metro̱ ko̱jo kantjiꞌún sentímetro̱ kamá nga nkꞌa, kó nga̱soón to̱ko̱ kui yáseé kisꞌijñaa̱ ngo nda̱ꞌya xi akjatꞌaa̱ to ngrananda̱ nga ngo foaꞌatjiyajoo̱n, xi ngayejee̱ nga ki̱cha̱ bronse̱ kamándani, kó ti̱ bo̱a̱ ti̱ kisꞌie xikoó xi ma joó yáseé nga kisꞌiee̱ nda̱ꞌya.
18Kósꞌe̱ nda̱ ngito̱ko̱o̱ já xí koón xota̱ xi síndo ndo̱bo̱a̱ya̱à, iskjíbé Serayiaa̱ kui xi chináꞌmi ngito̱ko̱o̱, ko̱jo Sofoniyaa̱ kui xi chináꞌmi xi ma joó, ko̱jo ján já xí koón ndiꞌa nínga botíxomaa̱, 19kó ki̱a̱ na̱xi̱ńdáꞌniuú iskjíbé ngo nda̱ eunuko̱ xi askoo̱n jájuún, ko̱jo ún já xí tsjaá kjo̱a̱botíxoma nda̱ ree̱, xi kisꞌińdo ki̱a̱ na̱xi̱ńdáꞌniuú, ko̱jo nda̱ xi tsꞌénda xo̱jo̱o̱n, kui xi ngito̱ko̱o̱ jájuún xi índonda xota̱a̱ na̱xi̱ńdaá, ko̱jo ichítié ko̱jo tie jáxíꞌín xi chji̱a̱ni kui na̱xi̱ńdaá xi kisꞌińdo ki̱a̱ kui na̱xi̱ńdáꞌniuú. 20Kó kui jaá xi kijíjo̱ Nabusarandaa̱n, nda̱ ngito̱ko̱o̱ já xí koón xota̱ xi síndo ndo̱bo̱a̱ya̱à, kó ki̱a̱ kijíjo̱ ki̱a̱ na̱xi̱ńdáꞌniú Riblaa̱ nínga tikón nda̱ ree̱ nangi Babilonia̱. 21Kó nda̱ ree̱ nangi Babiloniaa̱ katsꞌénꞌoón, kó katsꞌénkjiesón ki̱a̱ na̱xi̱ńdáꞌniú Riblaa̱, ki̱a̱ nangii̱ Amaa̱t. Kó bo̱a̱ tsꞌén nga tsangínjo̱ ꞌniú Jundáa̱ nga kaꞌnaxiéni ki̱a̱ nangii̱.
Xota̱ xi tsꞌangii̱ nangi Ejiptoo̱ tsanga
22Kó Nabukondonosoo̱r, nda̱ ree̱ nangi Babiloniaa̱, katsjáxaá Jendalíyaa̱ ndií Aikaa̱n, ndíndeè Safaa̱n, tsi̱ꞌe̱ nga kui xi kꞌuijñátjoón xota̱ na̱xi̱ńdá xi índo ki̱a̱ nangi Jundáa̱. 23Kó nga tsintꞌié ngayeje já ngito̱ko̱o̱ jájuún, ko̱jo kui jaá, nga nda̱ ree̱ nangi Babiloniaa̱ katsjaá xá Jendalíyaa̱ nga kui xi kamá xtitjón, kijíkoón Jendalíyaa̱ ki̱a̱ nangi Mispaa̱, Ismaee̱l ndií Netaniyaa̱, ko̱jo Jonataa̱n ndií Kareaa̱, ko̱jo Serayiaa̱ ndií Tanumee̱t, nda̱ xi chji̱a̱ni nangi Netofaa̱t, ko̱jo Jaasaniyaa̱ ndií nda̱ xi chji̱a̱ni Maakaa̱t, kui nda̱a̱ ko̱jo xota̱a̱. 24Kósꞌe̱ Jendalíyaa̱ katsjaá tsꞌoa kui jaá, ko̱jo já xí nijan tjimájo̱, kó bi̱ katsoó: Ngata̱ ndakonjínmájnú nga mosoo̱ xota̱ Kalndea̱ ka̱majnú, ki̱a̱ ti̱ndyiónjnú kui tꞌanangii̱, ti̱ꞌanxátꞌajnúu̱ nda̱ ree̱ nangi Babilonia̱, kó nda tsꞌén ku̱i̱ndyionjnú.
25Ta̱nga sá xi ma yitoo̱, jachó nda̱ xi ꞌmí Ismaee̱l ndií Netaniyaa̱, ndíndeè Elisamaa̱, kui xi xota̱ tji̱e̱e̱ re kamá, kó tie já nijan jachójo̱, kó katsꞌénꞌoón Jendalíyaa̱, kó katsꞌénkꞌién, kó ki̱a̱ nijan jesónjo̱ xota̱ Jundáa̱, ko̱jo xota̱ Kalndea̱ xi nijan kisꞌińdojo̱ ki̱a̱ na̱xi̱ńdáꞌniú Mispaa̱. 26Kó jastjíe̱n ngayeje xota̱ na̱xi̱ńdaá, xi xchá xí kjindí, ko̱jo já ngito̱ko̱o̱ xtín jájuún, kó kijí nangi Ejipto̱, ngatꞌa̱ katsakjónnií xota̱ Kalndeaa̱.
Nga ikꞌíjñandé nda̱ re Joakii̱n
(Jer 52:31-34)
27Nó xi kantjiꞌún jó nga tsangínjo̱ꞌniú Joakii̱n, nda̱ re xi chji̱a̱ni nangi Jundáa̱, ni̱xtjin kan yitoo̱ sá xi ma tiejoó, nda̱ re Ebii̱l-Merondaa̱k, xi chji̱a̱ni nangi Babilonia̱, nó tjón nga atíxoma, íjñandé Joakii̱n, nda̱ re xi chji̱a̱ni nangi Jundáa̱ kó tsꞌaxié ndo̱bo̱a̱yà, 28kó achichí nda tsíchji̱a̱jo, kó nkꞌa ngase xá xí katsjaá, ta̱bo̱a̱jiín já re xi ngasee̱, xi nijan kisꞌińdo ki̱a̱ nangi Babilonia̱. 29Kó asíkjo ńjño xi tsajá nga kisꞌijña ndo̱bo̱a̱yà, kó ngatsjéni̱xtjin nga iskjinie nichinie ngindyi̱ko̱n nda̱ ree̱, nga kisꞌijña nga̱sondie. 30Kó ndyiojón ndyiojón katseꞌeé nichinie xi katsangiyaa̱ nda̱ ree̱, ngayeje ni̱xtjin nga kisꞌijña nga̱sondie.
Currently Selected:
2 Já ree̱ 25: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
