2 Já ree̱ 24
24
1Kó ni̱xtjin nga atíxoma Joasii̱n, Nabukondonosoo̱r nda̱ re xi chji̱a̱ni nangi Babilonia̱ kijínijíngí nga kijítsꞌèntsi̱ꞌe̱ kui ngi̱ndiee̱. Kó Joasii̱n ján nó kamá mosoo̱ kui nda̱a̱, ta̱nga jaskan asíkjo ni xi katsꞌénkjó, kó kondra̱ kisꞌijñanii̱. 2Kósꞌe̱ Néná katsangiya kondraa̱ Joasii̱n xtín jájún xi chji̱a̱ni nangi Kalndea̱, ko̱jo xi chji̱a̱ni nangi Siria̱, ko̱jo xi chji̱a̱ni xota̱ tji̱e̱e̱ Moaa̱b, ko̱jo xi chji̱a̱ni xota̱ tji̱e̱e̱ Amoo̱n, kó kui jaá kanangiya tsi̱ꞌe̱ nga sa̱ꞌínkjié nangi Jundáa̱, xikó má katsó eén Néná nga katsꞌénkíchji̱a̱ jáchji̱ni̱e̱ꞌe̱én, kui xi mosoo̱ kui kamá. 3Ja̱koxi̱ boá nga Néná boá xi bo̱a̱ katsoó nga kui nii̱ xi kamá kondraa̱ Jundáa̱, tsi̱ꞌe̱ nga jaꞌáxín ngindyi̱ko̱n kui, ta̱ngatꞌanii̱ jé xí katsꞌén Manasee̱, ko̱jo kjo̱a̱a̱ ngayeje ni xi katsꞌén, 4ko̱jo kjo̱a̱a̱ kui jiín xota̱ xi jmí jéjiín xi iskjitjón, ngatꞌa̱ íkitsie má ki̱a̱ na̱xi̱ńdáꞌniú Jerusale̱n, jiín xota̱ xi jmí jéjiín, kó Néná kamámejénjiín katsꞌénjetakoón.
5Kó ngayeje ni xi ngase xi katsꞌén Joasii̱n, a ki̱a̱jín kjitꞌa ki̱a̱ Cho̱ Xo̱jo̱n nínga kjitꞌa ngayeje ni xi katsꞌén já ree̱ nangi Jundáa̱. 6Kó kꞌien Joasii̱n, kó ki̱a̱ nijan kisꞌijñajo̱ xota̱ xi xchaá, kó Joakii̱n ndií atíxoma ngajoo̱. 7Kó nda̱ ree̱ nangi Ejiptoo̱ nginijánjín jatjo ngase ki̱a̱ nangii̱, ngatꞌa̱ nda̱ ree̱ nangi Babilonia̱ katsꞌéntsi̱ꞌe̱ ngayeje nangi xi kuí mára tsi̱ꞌe̱ kamá, ndeskande ndejèꞌ xi tikón nangi Ejiptoo̱, ngaskande ndejèꞌ Éufratee̱.
Nga kamá re Joakii̱n ki̱a̱ nangi Jundáa̱
(2Kr 36:9-10)
8Kjiꞌanga kamá tjiꞌún ján noó Joakii̱n ítsꞌi̱yanii̱ nga atíxoma, kó ján sá kamaá nga atíxoma ki̱a̱ na̱xi̱ńdáꞌniú Jerusale̱n. Na̱aa̱n na̱ Neusta̱ kiꞌmí, tsa̱kji̱ín Elnataa̱n kamá, xi chji̱a̱ni na̱xi̱ńdáꞌniú Jerusale̱n. 9Kó katsꞌén ni xi ndajín ngindyi̱ko̱n Néná, xikó maá ngayeje ni xi katsꞌén na̱ꞌmii̱.
10Kui ni̱xtjin jàn já mosoo̱ Nabukondonosoo̱r, nda̱ re nangi Babiloniaa̱ kijínijíngí nga kijíkjánjo̱ na̱xi̱ńdáꞌniú Jerusale̱n, kó íchjáꞌyá kui na̱xi̱ńdaá. 11Kó Nabukondonosoo̱r, nda̱ ree̱ nangi Babiloniaa̱, ti̱ jachó nga askjanjo̱ kui na̱xi̱ńdáꞌniuú nga, ko̱jo já mosoo̱, kó jaꞌatjiyajoo̱n kui ngi̱ndiee̱. 12Kósꞌe̱ Joakii̱n, nda̱ re xi chji̱a̱ni nangi Jundáa̱, katsꞌénkjiékjo̱a̱ ngindyi̱ko̱n nda̱ ree̱ nangi Babiloniaa̱, kui ko̱jo na̱aa̱n, ko̱jo mosoo̱, ko̱jo já ngito̱ko̱o̱, ko̱jo já eunukoo̱, kó xi ma jii̱n nó nga atíxoma, nda̱ ree̱ nangi Babiloniaa̱ ndo̱bo̱a̱yà katsangisꞌien.
13Kó tsꞌaxiéni ki̱a̱a̱ ngayeje kjo̱a̱cho̱n xi tjín Ndiꞌaa̱ Néná, ko̱jo kjo̱a̱cho̱n xi tjín ndiꞌaa̱ nda̱ ree̱, kó katsꞌénxi̱ ngayeje ni xi niꞌánkjién xí to̱nsinié xi katsꞌénda Salomoo̱, nda̱ ree̱ na̱xi̱ńdá Israee̱l tsi̱ꞌe̱ Ndiꞌaa̱ Néná, xikó má katsó Néná nga tsíchji̱a̱. 14Kó kijíjo̱ꞌniú ngayeje xota̱ xi chji̱a̱ni na̱xi̱ńdáꞌniú Jerusale̱n, ko̱jo ngayeje já xí botixómaá, ko̱jo ngayeje jáxíꞌín xi ꞌniú chꞌokoo̱n, tie mi̱ kamá xota̱ xi kijíjo̱ꞌniuú, ko̱jo ngayeje xota̱ xi tsꞌénda ni tsjakoo̱n, ko̱jo xi chji̱ni̱e̱ki̱cha̱a̱, ta̱ kuí tsí xota̱ xi ꞌniú ni̱ma̱ xi jmí to̱njiín xi kisꞌińdo ngase. 15Kó ti̱ kijíjo̱ꞌniú ki̱a̱ nangi Babilonia̱ Joakii̱n, ko̱jo na̱aa̱n nda̱ ree̱, ko̱jo ínchjiín nda̱ ree̱, ko̱jo já eunukoo̱, ko̱jo xota̱ xi yandikón kui na̱xi̱ńdaá, kó kijíjo̱ꞌniú nga jatjoni na̱xi̱ńdáꞌniú Jerusale̱n, kósꞌe̱ kijíjo̱ nangi Babilonia̱. 16Ngayeje jájún xi fí kjo̱a̱xcha̱án, yito mi̱ kamá, ko̱jo já xí tsꞌénda ni tsjakoo̱n, ko̱jo já chji̱ni̱e̱ki̱cha̱a̱, xi ngo mi̱ kamá, ko̱jo ngayeje já xí chꞌokon xi fí kjo̱a̱xcha̱án, ko̱jo kui jaá, xi nda̱ ree̱ nangi Babilonia̱ kijíjo̱ꞌniú. 17Kó nda̱ ree̱ nangi Babilonia̱, Mataniyaa̱ tsinii̱ Joakii̱n, katsjáxaá nga kui xi kamá nda̱ re, kó asíkjoo̱ jaꞌeén kó Sendekiyaa̱ kiꞌmí.
Nga atíxomaa̱ Sendekiyaa̱
(2Kr 36:11-16; Jer 52:1-3)
18Kan ún noó Sendekiyaa̱ nga ítsꞌi̱yanii̱ nga atíxoma, kó tiengo nó kamaá nga atíxoma ki̱a̱ na̱xi̱ńdáꞌniú Jerusale̱n. Na̱aa̱n kui nda̱a̱ na̱ Amutaa̱l kiꞌmí, kó kui naa̱ tsa̱kji̱ín Jeremiyaa̱ boá, xi chji̱a̱ni nangi Libnaa̱. 19Kó katsꞌén ni xi ndajín ngindyi̱ko̱n Néná, xikó maá ngayeje ni xi katsꞌén Joasii̱n, 20ngatꞌa̱ Néná achichí katsꞌénxchán kondra̱a̱ na̱xi̱ńdáꞌniú Jerusalee̱n, ko̱jo kondra̱a̱ nangi Jundáa̱, ngaskande nga tsangatji̱ngii̱ ngindyi̱ko̱n kui.
Xota̱ Babiloniaa̱ katsꞌeén nangi Jundáa̱
(Jer 39:1-7; 52:3-11)
Kó Sendekiyaa̱ kondra̱a̱ nda̱ ree̱ nangi Babiloniaa̱ kamá.
Currently Selected:
2 Já ree̱ 24: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
