Esndraa̱ 1
1
Nda̱ re Siroo̱ katsjandiè nga kijíꞌoyá nginí xota̱ jundíoo̱
1Nó tjón nga kisꞌijña re Siroo̱, kui nda̱ xi atíxoma nangi Persia̱, tsi̱ꞌe̱ nga jatjosón eén Néná xi tsíchji̱a̱ Jeremiyaa̱, Néná katsꞌénꞌniútakón a̱si̱én ni̱xtjii̱n Siroo̱, nda̱ ree̱ nangi Persia̱, tsi̱ꞌe̱ nga ngayeje ngi̱ndie nínga botixómá ka̱tso̱yà nga én ko̱jo nga xo̱jo̱n, kui nii̱: 2Bi̱ tsó Siroo̱, nda̱ ree̱ nangi Persia̱: Ngayeje ngi̱ndie nínga botíxoma xi tjín nga̱sondiee̱, án boá xi katsꞌénkꞌasꞌienna Néná, kui Néná xí tsi̱ꞌe̱ nkꞌajmii̱, kó kuí má bo̱a̱ xi katsjákjo̱a̱na nga an xi sa̱ꞌindàa̱ ndiꞌa ki̱a̱ na̱xi̱ńdáꞌniú Jerusale̱n, kui xi tikón ki̱a̱ nangi Jundáa̱. 3Tsi tjín xí kꞌi̱e̱ síndojinná xí chji̱a̱ni xota̱ na̱xi̱ńdaá, Néná ngatasikójo, kó ngatjínijíngí ki̱a̱ na̱xi̱ńdáꞌniú Jerusale̱n, xi tikón nangi Jundáa̱, kó ngatsꞌénda Ndiꞌaa̱ Néná, kui Néná xí tsi̱ꞌe̱ xota̱ Israee̱l, kui Néná xi tikón ki̱a̱ na̱xi̱ńdáꞌniú Jerusalee̱n. 4Kó ngayeje xota̱ xi kꞌo̱ngii̱, ta̱ nínga síndo, xota̱ tꞌa ndiꞌaa̱ ngatasikójo nga tsja̱á to̱ntiboa, ko̱jo to̱nsinié, ko̱jo ni xi tjiín, ko̱jo cho̱ xi tsꞌénxchá, ko̱jo chji̱e̱ xi ngayeje kon nga tsja̱a, tsi̱ꞌe̱ nga ka̱mana Ndiꞌaa̱ Néná ki̱a̱ na̱xi̱ńdáꞌniú Jerusale̱n.
5Kósꞌe̱ kisꞌińdonda ngito̱ko̱o̱ xtín xota̱ ndiꞌa xi chji̱a̱ni xota̱ tji̱e̱e̱ Jundáa̱, ko̱jo xi chji̱a̱ni xota̱ tji̱e̱e̱ Benjaa̱, ko̱jo já chináꞌmii̱, ko̱jo xota̱ tji̱e̱e̱ Lebii̱, ko̱jo ngayeje xota̱ xi Néná katsꞌénꞌniútakón tsi̱ꞌe̱ nga ko̱e̱je̱nijíngí na̱xi̱ńdáꞌniú Jerusale̱n, nga ko̱e̱je̱ tsꞌénda Ndiꞌaa̱ Néná. 6Kó ngayeje xota̱ tꞌa ndiꞌaa̱ asíko̱jo nga katsjaá ni xi to̱ntiboa, ko̱jo xi to̱nsinié, ko̱jo ni xi tjiín, ko̱jo cho̱ tjié, ko̱jo ni tsjakon, kje̱ꞌení chji̱e̱ xi ngayeje ini̱ma̱a̱ katsꞌénkꞌasꞌien. 7Kó re Siroo̱ tsꞌaxiéni ki̱a̱ Ndiꞌaa̱ Néná, kui ni xi nda̱ re Nabukondonosoo̱r tsꞌaxié ki̱a̱ na̱xi̱ńdáꞌniú Jerusale̱n, kósꞌe̱ ki̱a̱ índo ki̱a̱ na̱ngo̱xi̱i̱ nee̱. 8Nda̱ re Siroo̱ katsangiya nda̱ xi koo̱n to̱o̱n xi ꞌmí Mitríndatee̱ tsi̱ꞌe̱ nga tsꞌaxié kui nii̱, kó ngije íxki̱, ki̱a̱ katsꞌénkꞌasꞌiee̱n Sesbasaa̱r, nda̱ xtitjoón nangi Jundáa̱. 9Bi̱ kjiꞌi kamá kui nii̱: Kantié tasa̱ yiꞌi xi to̱nsinié, ko̱jo ngo mi̱ tasa̱ yiꞌi xi to̱ntiboa, ko̱jo kan nijan kichiro̱, 10ko̱jo kantié tasa̱ to̱nsinié, ko̱jo nijón úchán tasa̱ to̱ntiboa xi kje̱ꞌe kón, ko̱jo ingo mi̱ ni xi niꞌánkjién. 11Ngayeje kui ni xi niꞌánkjieén xi to̱nsinieé ko̱jo xi to̱ntiboaa̱, ún mi̱ nijón úchán kamá, kó Sesbasaa̱r kijíjo̱ kui nii̱ ki̱a̱ na̱xi̱ńdáꞌniú Jerusalee̱n, ko̱jo xota̱ xi kijíꞌoyá nginí na̱xi̱ńdáꞌniú Jerusale̱n nga jatjoni ki̱a̱ nangi Babilonia̱.
Currently Selected:
Esndraa̱ 1: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
