2 Já ree̱ 23

1Kósꞌe̱ nda̱ ree̱ katsangiyakjaꞌá tsi̱ꞌe̱ nga nijan kamátikójo̱ ngayeje xota̱ xi xchaá nangi Jundáa̱, ko̱jo xi chji̱a̱ni na̱xi̱ńdáꞌniú Jerusale̱n. 2Kó kijínijíngí nda̱ ree̱ ki̱a̱ Ndiꞌaa̱ Néná, ko̱jo ngayeje já xí chji̱a̱ni nangi Jundáa̱, ko̱jo ngayeje xota̱ xi síndo na̱xi̱ńdáꞌniú Jerusalee̱n, ko̱jo já chináꞌmii̱, ko̱jo jáchji̱ni̱e̱ꞌe̱én, ko̱jo ngayeje xota̱ na̱xi̱ńdaá, ndeskande xota̱ xi xi̱xi̱i̱, ngaskande xota̱ xi xchaá, kó katsꞌényà ngindyi̱ko̱n ngayeje kui xotaa̱, ngayeje én xí kjitꞌa kui Cho̱ Xo̱jo̱n nínga kjitꞌa kjo̱a̱ꞌbíndaa̱, kui xi kasako ki̱a̱ Ndiꞌaa̱ Néná. 3Kó nda̱ ree̱ ki̱a̱ kasasienkixi̱ tꞌa kui yáseé, kó ngo ni índa ngindyi̱ko̱n Néná, nga Néná ko̱e̱je̱tji̱ngii̱, ko̱jo nga sa̱ꞌínkjatjosón kjo̱a̱botíxomaa̱, ko̱jo ni xi tsóyà Kuí, ko̱jo Kjo̱a̱kitii̱, kó nga ngayeje ini̱ma̱a̱, ko̱jo ngayeje kjo̱a̱mindyioo̱n nga sa̱ꞌínkjatjosón én xí índajo̱ xi kjitꞌa kui Chꞌo̱ Xo̱jo̱o̱n. Kó ngayeje xota̱ na̱xi̱ńdaá katsꞌénjo̱ꞌo kui kjo̱a̱ꞌbíndaa̱.

Josiyaa̱ kijítji̱ngi kjo̱a̱kitii̱ Néná

(2Kr 34:3-7)

4Kósꞌe̱ nda̱ ree̱ katsjákjo̱a̱a̱ chináꞌmi xi ꞌniú nkꞌa xaá xi ꞌmí Ilsiyaa̱, ko̱jo já chináꞌmi xi ma joó xi botixómaá, ko̱jo já xí konda nga̱ntjo̱a̱a̱ Ndiꞌaa̱ Néná, tsi̱ꞌe̱ nga kꞌo̱xiéni ki̱a̱ Ndiꞌandikoón Néná ngayeje ni xi kiniꞌánda xi tsi̱ꞌe̱ ne Baa̱l, ko̱jo xi tsi̱ꞌe̱ na̱ ne Aseraa̱, ko̱jo xi tsi̱ꞌe̱ ngayeje ni xi tjín nkꞌa jàn, kó ki̱a̱ ítí ndi̱tsee̱n na̱xi̱ńdáꞌniú Jerusalee̱n, ki̱a̱ nínga tikón kꞌijñá xi ꞌmí Sendroo̱n, kó ndisoo̱ kui nii̱, ki̱a̱ kijíjo̱ na̱xi̱ńdáꞌniú Betee̱l. 5Kó jaꞌáxiín xaá já chináꞌmi xi tsꞌéndíkón kui ni xi ne katsoó, kui xi já ree̱ xi chji̱a̱ni nangi Jundáa̱ katsjáxaá, tsi̱ꞌe̱ nga kui xi ku̱i̱ꞌítí nisije̱n ki̱a̱ ngi̱ndie nínga nkꞌaa̱ na̱xi̱ńdáꞌniú Jundáa̱, ko̱jo ngi̱ndie xi síndo nga ngo foaꞌatjiyajoo̱n na̱xi̱ńdáꞌniú Jerusalee̱n, ko̱jo kui xi ítií nisije̱n ne Baa̱l, ko̱jo tsꞌueé, ko̱jo saá, ko̱jo chi̱bo̱a̱ xi bokó ndiꞌakꞌajmii̱, ko̱jo ngayeje ńño xi tjín nkꞌa jàn. 6Kó ti̱ tsꞌaxié a̱sie̱én na̱ ne Aseraa̱, ki̱a̱ ndi̱tsen Ndiꞌaa̱ Néná, kó ki̱a̱ kijíjo̱ ndi̱tsee̱n na̱xi̱ńdáꞌniú Jerusalee̱n, ki̱a̱ nínga tikón xo̱ngàndántꞌié Sendroo̱n, kó ki̱a̱ ítí kui ngi̱ndiee̱ ngaskande nga ndiso kamá, kó kui ndisoo̱, ki̱a̱ indyiá ki̱a̱ na̱ngo̱xi̱mikꞌiee̱n kui na̱xi̱ńdáꞌniuú. 7Kó ti̱ katsꞌénkjatsón ndiꞌaa̱ xota̱ Sondoma̱ xi katsꞌénmasien yojoo̱ nga katsꞌéntsjajo̱ a̱sie̱én kui ni xi ne katsoó kui xotaa̱, kui xi kisꞌińdo ki̱a̱ Ndiꞌaa̱ Néná, nínga ínchjiín katsꞌénda ndiꞌańjño xi tsi̱ꞌe̱ na̱ ne Aseraa̱.

8Kó katsjákjo̱a̱ nga jachó ki̱a̱a̱, ngayeje já chináꞌmi xi chji̱a̱ni na̱xi̱ńdáꞌniuú nangi Jundáa̱, kó bo̱a̱ katsó nga ngi̱ndie ndándí boá ngayeje ngi̱ndie nínga nkꞌaa̱, ki̱a̱ nínga já chináꞌmii̱ ítí nisije̱n, ndeskande nangi Ngabaa̱, ngaskande nangi Beersebaa̱, kó katsꞌénkjatsón ngi̱ndie xi nkꞌa, xi síndo ki̱a̱ nínga bitjasꞌi̱e̱nnii̱ nga̱ntjo̱a̱ jee̱ Josuee̱, nda̱ xtitjoón kui na̱xi̱ńdáꞌniuú, kui xi tikón xtji̱e̱e̱n ndsa̱ xí skoón nga̱ntjo̱a̱a̱ na̱xi̱ńdáꞌniuú. 9Ta̱nga já chináꞌmii̱ ngi̱ndie nínga nkꞌaa̱, katseꞌéndièjiín nga kijínijíngí ki̱a̱ ṉchandikoón Néná ki̱a̱ na̱xi̱ńdáꞌniú Jerusalee̱n, ndatsi kamá iskjinie pan xi jmí nisanjiín ngi̱jii̱n já ntsꞌi̱e̱.

10Kó ti̱ bo̱a̱ katsó nga ndándí boá Tofee̱t nga, kui xi tikón ki̱a̱ nangi soón Ndií Enoo̱n, tsi̱ꞌe̱ nga ngojín xi ndí xíꞌiín, ko̱jo tsi ndí ínchjiín ku̱i̱ꞌítí ki̱a̱ ngi̱jin ndiꞌií nga sa̱ꞌínkꞌasꞌiee̱n kjo̱a̱tjó ne xi ꞌmí Moloo̱k. 11Kó ti̱ jaꞌáxín ndi̱je̱e̱ já re xi chji̱a̱ni nangi Jundáa̱, kui xi katsꞌénkꞌasꞌiee̱n tsꞌueé, ki̱a̱ nínga bitjasꞌi̱e̱nnii̱ Ndiꞌaa̱ Néná, ki̱a̱ tꞌa ngi̱yaꞌmaa̱ nda̱ xi ꞌmí Nataa̱n-Melee̱k, kui nda̱ eunuko̱ xi atíxoma ndo̱bo̱a̱ xtitjoón, kó ítí karroo̱ tsꞌueé. 12Kó nda̱ ree̱, ti̱ katsꞌénkjatsón ṉchandikón xí já re xi chji̱a̱ni nangi Jundáa̱, katsꞌénda ki̱a̱ nga̱soón ndiꞌa nínga tikón Akaa̱, ko̱jo ṉchandikón xi katsꞌénda Manasee̱ nga jó ndi̱tsee̱n Ndiꞌaa̱ Néná, kó ki̱a̱ katsꞌénxi̱, kó ndisoo̱ ki̱a̱ atítsojo, ki̱a̱ xo̱ngàndántꞌié Sendroo̱n.

13Kó kui nda̱ ree̱ ti̱ bo̱a̱ katsó nga ndándí boá kui ngi̱ndie nínga nkꞌa xi kisꞌińdo na̱xi̱ńdáꞌniú Jerusalee̱n, kui xi síndo xtji̱e̱e̱n kje̱n kui na̱xi̱ńdaá, xtji̱e̱e̱n na̱ngii̱ na̱xi̱ xi ndándií, kui xi nda̱ re Salomoo̱, xi chji̱a̱ni na̱xi̱ńdá Israee̱l katsꞌénda tsi̱ꞌe̱ na̱ ne Astaroo̱t, a̱sie̱én kui ne xi achichí chꞌokjiꞌi xota̱ Sindonioo̱, ko̱jo ne Kemoo̱, a̱sie̱én ne xi achichí chꞌokjiꞌi xota̱ Moaa̱b, ko̱jo ne Milkoo̱n, a̱sie̱én ne xi achichí chꞌo kjiꞌii̱ xota̱ Amoo̱n. 14Kó ti̱ katsꞌénxi̱ ngayeje kui a̱sie̱én, kó tsꞌatójó a̱sie̱én na̱ ne Aseraa̱, kó kui ngi̱ndiee̱ íkitsie má ńdaa̱ xota̱. 15Ti̱ bo̱a̱ ti̱ tsꞌén katsꞌénxi̱ ṉchandikón xi tikón na̱xi̱ńdáꞌniuú Betee̱l, ko̱jo kui ngi̱ndie nínga nkꞌa xi katsꞌénda Jeroboaa̱n ndií Nabaa̱t, kui xi katsꞌén nga katsꞌénjéní xota̱ Israee̱l, katsꞌénkjatsón kui ṉchaa̱n, ko̱jo kui ngi̱ndie nínga nkꞌaa̱, kó ítí kui nii̱, kó ndiso kamá, kó ti̱ ítí kui na̱ ne Aseraa̱ nga.

16Kó nga jachó nginí Josiyaa̱, kamábe nga̱tsjo̱ó xí síndo ki̱a̱ na̱xi̱i̱, kó katsangiya tsi̱ꞌe̱ nga kachjaꞌáꞌyá kui ńdaa̱ ki̱a̱ kui nga̱tsjo̱ó, kó ki̱a̱ ítí nga̱són ṉchandikoón, kó bo̱a̱ katsó nga ndándí boá kui ngi̱ndiee̱, xikó má katsó eén Néná, xi kui nda̱ xi chji̱a̱ni Néná katsóyàtjón nga ka̱ma kui nii̱. 17Kó bi̱ katsó nga asíyá Josiyaa̱:

—Mí a̱si̱én bo̱a̱ xi tikón kꞌi̱e̱e̱.

Kó xota̱ xi chji̱a̱ni kui na̱xi̱ńdáꞌniuú, bi̱ katsó:

—Kuí bí nga̱tsjo̱ó nda̱ chji̱ni̱e̱ꞌe̱én Néná kui xi kjindibáni nangi Jundáa̱, kui xi katsóyàtjón xikoó ngo chji̱ni̱e̱ꞌe̱én Néná, kjo̱a̱a̱ kui ni xi kiniꞌín ji kondra̱a̱ kui ṉchandikón xí tikón ki̱a̱ na̱xi̱ńdáꞌniú Betee̱l.

18Kó bi̱ katsó kui nda̱ ree̱:

—Xióchònjnú, ngata̱ ngojín xi tsꞌénjo̱ kui ńdaa̱.

Kó bo̱a̱ tsꞌén nga jmí ni kamájiín ńdaa̱, ko̱jo ńdaa̱ nda̱chji̱ni̱e̱ꞌe̱én Néná xí kjindibáni nangi Samariaa̱.

19Kó Josiyaa̱ ti̱ jaꞌáxín ngayeje ndiꞌandikón xi síndo nínga nkꞌaa̱ na̱xi̱ńdáꞌniú xí chji̱a̱ni nangi Samaria̱, kui xi katsꞌénda já re xi chji̱a̱ni na̱xi̱ńdá Israee̱l, tsi̱ꞌe̱ nga katsꞌénkjaán kjo̱a̱xcha̱án Néná, kó bo̱a̱ katsꞌeén xikó katsꞌeén ngayeje ni xi kamánda ki̱a̱ na̱xi̱ńdáꞌniú Betee̱l. 20Kó ti̱ ki̱a̱ nga̱soón kui ṉchandikoón katsꞌénkjiesón ngayeje já chináꞌmi xi chji̱a̱ni ngi̱ndie nínga nkꞌaa̱, kó ki̱a̱ ítí ńdaa̱ xotaa̱ nga, sꞌe̱ jaskan kijí nginí na̱xi̱ńdáꞌniú Jerusale̱n. 21Kósꞌe̱ jaskan nda̱ ree̱, bi̱ katsoó nga katsjákjo̱a̱a̱ ngayeje xota̱ na̱xi̱ńdaá: Ti̱ꞌánjnú sꞌué paskuaa̱ tsi̱ꞌe̱ Néná, kui xi Nejnú má, xikótsꞌèn kjitꞌa Chꞌo̱ Xo̱jo̱o̱n kjo̱a̱ꞌbíndaa̱. 22Nga ja̱koxi̱ jmí ni̱xtjin kamá kui sꞌué paskuaa̱, ndeskande ni̱xtjin nga nendiꞌamasiee̱n atíxoma ki̱a̱ na̱xi̱ńdá Israee̱l, ti̱nde kamájín ni̱xtjin nga atíxoma já ree̱ ki̱a̱ na̱xi̱ńdá Israee̱l, ko̱jo nangi Jundáa̱. 23Nó tjiꞌún ján nga atíxoma nda̱ re Josiyaa̱, kiniꞌán kui sꞌué paskuaa̱ nganda tsi̱ꞌe̱ Néná ki̱a̱ na̱xi̱ńdáꞌniú Jerusale̱n.

24Kó ti̱ bo̱a̱ ti̱ tsꞌén Josiyaa̱ katsꞌénkjié ngayeje xota̱ xi tsꞌénkjién kjo̱a̱tjiꞌee̱, ko̱jo xi kotꞌasoón ni xi sꞌe̱ ka̱ma, ko̱jo a̱sie̱én nee̱, ko̱jo ngayeje ni xi ne katsoó kui xi ta̱nisién ꞌniú chꞌokoo̱n, xi kisꞌie ki̱a̱ nangi Jundáa̱, ko̱jo na̱xi̱ńdáꞌniú Jerusale̱n, tsi̱ꞌe̱ nga jatjosón én xí kjitꞌa Kjo̱a̱kiti xi kjitꞌa kui Chꞌo̱ Xo̱jo̱o̱n, kui xi chináꞌmi Ilsiyaa̱ kasakoo̱ ki̱a̱ Ndiꞌaa̱ Néná.

25Kisꞌiejín ingo re xi bo̱a̱ katsꞌén, xikó katsꞌén kui ngindiee̱ nga kisꞌijña kui, kui xi ngayejeni ini̱ma̱a̱ nga kijítji̱ngi Néná, ko̱jo ngayeje kjo̱a̱mindyioo̱n, ko̱jo ngayeje ngaꞌniuú, xikó kjiꞌi ngayeje ni xi kjitꞌa kjo̱a̱kitii̱ Moisee̱, kó ti̱nde jaskan ngije atíxoma kui, kisꞌiejín ingo nda̱ re xi bo̱a̱ má katsꞌén.

26Kó ndatsi ngayeje kui nii̱ xi kamá, Néná to̱kó ꞌniú katsꞌénxchánjo̱ra xota̱ Jundáa̱, kjo̱a̱a̱ ngayeje ni xi katsꞌén Manasee̱ nga katsꞌénkjaán kjo̱a̱xcha̱án Néná. 27Kó bi̱ katsó Néná: Ti̱ kjo̱a̱ꞌáxín An xota̱ tji̱e̱e̱ Jundáa̱ ngindyikón Án, xikótsꞌèn jaꞌáxín An xota̱ Israee̱l nga, kó sa̱ꞌinchꞌó An kui na̱xi̱ńdáꞌniú xi jaꞌajin An, kui xi na̱xi̱ńdáꞌniú Jerusalee̱n, ko̱jo kjo̱a̱a̱ kui ndiꞌa nínga bi̱ kixian An: Ki̱a̱ boá nínga kꞌuijñá Jaꞌénna.

Nga kꞌien Josiyaa̱

(2Kr 35:20-27)

28Kó ngayeje ni xi ngase xi katsꞌén Josiyaa̱ a ki̱a̱jín kjitꞌa ki̱a̱ Chꞌo̱ Xo̱jo̱n nínga kjitꞌa ngayeje ni xi katsꞌén já ree̱ nangi Jundáa̱. 29Kui ni̱xtjin jàn, nda̱ farao̱n Nekaoo̱, nda̱ re xi chji̱a̱ni nangi Ejiptoo̱, kijínijíngí nga kijíkjánjo̱ nda̱ ree̱ nangi Asiriaa̱, ki̱a̱ tꞌa ndejèꞌ Éufratee̱, kó nda̱ re Josiyaa̱ kijíkjánjo̱ kui nda̱a̱, ta̱nga nga kamábe kui nii̱ kui nda̱ ree̱, ki̱a̱ katsꞌénkꞌién ki̱a̱ nangi Mengindo̱. 30Kó já mosoo̱ kijíjo̱ yojo kꞌiee̱n, ndeskande ki̱a̱ nangi Mengindoo̱, ngaskande na̱xi̱ńdáꞌniú Jerusale̱n, kó ki̱a̱ yínijín ki̱a̱ nga̱tsjo̱ó. Kósꞌe̱ jaskan xota̱ na̱xi̱ńdaá iskjíbé Joakaa̱ ndií Josiyaa̱, kó kui jaꞌájin, sꞌe̱ katsꞌén re ngajoo̱ na̱ꞌmii̱.

Nga kamá Joakaa̱ ree̱ nangi Jundáa̱

(2Kr 36:1-4)

31Kan ján noó Joakaa̱ nga ítsꞌi̱yanii̱ nga atíxoma, kó ján sá kamaá nga atíxoma ki̱a̱ na̱xi̱ńdáꞌniú Jerusale̱n. Na̱aa̱n kui nda̱a̱ Amutaa̱l kiꞌmí, kó tsa̱kji̱ín Jeremiyaa̱ kamá, xi chji̱a̱ni nangi Libnaa̱. 32Kó Joakaa̱ ni xi ndajín katsꞌén ngindyi̱ko̱n Néná, xikó má katsꞌén xota̱ xi xchaá.

33Kó nda̱ farao̱n Nekaoo̱ katsangisꞌien ndo̱bo̱a̱yà Joakaa̱ ki̱a̱ na̱xi̱ńdáꞌniú Riblaa̱, xi tikón ki̱a̱ nangi Amaa̱t, tsi̱ꞌe̱ nga ki̱a̱jín atíxoma ki̱a̱ na̱xi̱ńdáꞌniú Jerusalee̱n, kó atíxoma nga ka̱machjítjé ni, ki̱a̱ tꞌanangii̱, xi ján mi̱ ján úchán to̱ntiboa, ko̱jo kantié ján kilo̱ to̱nsinié. 34Kó nda̱ farao̱n Nekaoo̱ katsjaá xá Eliakii̱n ndií Josiyaa̱, nga kui xi ko̱tíxoma ngajoo̱ na̱ꞌmii̱, kó asíkjo jaꞌeén, kó Joasii̱n ítꞌajaꞌén, kó iskjíbé Joakaa̱, sꞌe̱ kijíjo̱ nangi Ejipto̱, kó ki̱a̱ kꞌien kui nda̱a̱.

Nga atíxoma Joasii̱n

(2Kr 36:5-8)

35Kó Joasii̱n katsꞌénkꞌasꞌiee̱n nda̱ ree̱ to̱ntiboaa̱ ko̱jo to̱nsinieé, ta̱nga ꞌniú katsꞌeén na̱xi̱ńdaá tsi̱ꞌe̱ nga katsjá kuí to̱o̱n, xikó katsó ni xi atíxoma nda̱ faraoo̱n, kó ꞌniú katsꞌeén xota̱ na̱xi̱ńdaá, nga sa̱ꞌínkꞌasꞌien ni xi tjiín, ko̱jo to̱ntiboaa̱, ko̱jo to̱nsinieé, sꞌe̱ tsja̱á nda̱ ree̱ Nekaoo̱.

36Kan ún noó Joasii̱n nga ítsꞌi̱yanii̱ nga atíxoma, kó tiengo nó kamaá nga atíxoma ki̱a̱ na̱xi̱ńdáꞌniú Jerusale̱n. Na̱aa̱n kui nda̱a̱ na̱ Sebunda̱ kiꞌmí, kó na̱xchaá na̱ Pendayia̱ kiꞌmí, xi chji̱a̱ni nangi Rumaa̱. 37Kó katsꞌén ni xi ndajín ngindyi̱ko̱n Néná, xikó má katsꞌén xota̱ xi xchaá.

Currently Selected:

2 Já ree̱ 23: MAIX

Highlight

Copy

Compare