2 Já ree̱ 22
22
Nga kamá Josiyaa̱ ree̱ nangi Jundáa̱
(2Kr 34:1-2)
1Jin nó tjiín Josiyaa̱ nga ítsꞌi̱yanii̱ nga atíxoma, kó kantjiꞌún ngo nó kamaá nga atíxoma ki̱a̱ na̱xi̱ńdáꞌniú Jerusale̱n. Na̱aa̱n kui nda̱a̱ na̱ Jendidaa̱ kiꞌmí, tsa̱kji̱ín Andayiaa̱ xi chji̱a̱ni Boskaa̱t. 2Kó katsꞌén ni xi kixi̱ ngindyi̱ko̱n Néná, kó ki̱a̱ kijítji̱ngi xikó katsꞌén Ndabii̱, kui xi xota̱ xi xchaá kamá, kó jmíni̱xtjin nga xín kijí, tsi xtji̱e̱e̱n nga fojnií, ko̱jo tsi xtji̱e̱e̱n nga skoón.
Xo̱jo̱n kjo̱a̱kitii̱
(2Kr 34:8-33)
3Xi ma tjiꞌún ján nó nga kisꞌijña re Josiyaa̱, katsangiya ki̱a̱ Ndiꞌaa̱ Néná, nda̱ xi ꞌmí Safaa̱n, kui xi tsꞌénda xo̱jo̱o̱n, xi ndií Asaliyaa̱, ko̱jo ndíndeè Mesulaa̱n kamá, kó bi̱ katsoó:
4Tꞌennijíngí ji nínga tikón chináꞌmi xi ꞌniú nkꞌa xaá xi ꞌmí Ilsiyaa̱, tsi̱ꞌe̱ nga skósoón kókjiꞌi to̱ntiboa xi je tikón ki̱a̱ Ndiꞌaa̱ Néná, kui xi katsjá xota̱ na̱xi̱ńdaá, ko̱jo xi jaꞌátikó já xí konda nga̱ntjo̱a̱a̱, 5kó nga niꞌánkꞌasꞌien ngi̱ya tsja xota̱ xi kotsijee̱n xá xí má nga niꞌándaya Ndiꞌaa̱ Néná, tsi̱ꞌe̱ nga kui to̱o̱n, ki̱a̱ si̱ꞌankꞌasꞌiee̱n xota̱ xi tsꞌéndáyá Ndiꞌaa̱ Néná, tsi̱ꞌe̱ nga sa̱ꞌíndaya nínga tjítsꞌen xoó kui Ndiꞌaa̱, 6kui xota̱ xi chji̱ni̱e̱ya̱á, ko̱jo já mostroo̱, ko̱jo já chji̱ni̱e̱xo̱ó, tsi̱ꞌe̱ nga kꞌo̱tsie yá, ko̱jo ndi̱jo̱ xi ka̱machjieén nga sa̱ꞌíndaya Ndiꞌaa̱, 7kó nga jmí xki̱ chji̱a̱ꞌájiín kjo̱a̱a̱ kui to̱ntiboa xi je kiniꞌánkꞌasꞌien ngi̱ya tsja, ngatꞌa̱ jè ya nga kixi̱ tsꞌén tsꞌénxá.
8Kósꞌe̱ chináꞌmi xi ꞌniú nkꞌa xaá xi ꞌmí Ilsiyaa̱, bi̱ katsoó nda̱ xi ꞌmí Safaa̱n, kui xi tsꞌénda xo̱jo̱o̱n: Jè kasakona ki̱a̱ Ndiꞌaa̱ Néná Chꞌo̱ Xo̱jo̱n Kjo̱a̱kitii̱. Kó Ilsiyaa̱ katsꞌénkꞌasꞌiee̱n kui xo̱jo̱o̱n Safaa̱n, kó katsꞌényà. 9Kó kui nda̱ xi tsꞌenda xo̱jo̱o̱n kui xi ꞌmí Safaa̱n, kijíkoón nda̱ ree̱, kó bi̱ katsoó nga katsóyaà: Mosòo̱ jè tsꞌaxié kui to̱ntiboa xi kasako ki̱a̱ na̱ngo̱xi̱i̱, kó jè katsꞌénkꞌasꞌiee̱n xota̱ xi ndyi̱tsꞌènxaá, tsi̱ꞌe̱ nga sa̱ꞌindaya Ndiꞌaa̱ Néná. 10Kó nda̱ xi ꞌmí Safaa̱n kui xi tsꞌenda xo̱jo̱o̱n, bi̱ katsó ngasee̱ nda̱ ree̱: Chináꞌmi xi ꞌmí Ilsiyaa̱ ngo Chꞌo̱ Xo̱jo̱n katsjána.
Kó Safaa̱n katsꞌényà kui Chꞌo̱ Xo̱jo̱o̱n ngindyi̱ko̱n nda̱ ree̱. 11Kó ngije tsintꞌié nda̱ ree̱ én xí kjitꞌa Chꞌo̱ Xo̱jo̱n Kjo̱a̱kitii̱, iskjíndiyá ńjño xi yajá. 12Kósꞌe̱ nda̱ ree̱, bi̱ katsó nga katsjaá ngo kjo̱a̱ chináꞌmi xi ꞌmí Ilsiyaa̱, ko̱jo Aikaa̱n ndií Safaa̱n, ko̱jo Akboo̱r ndií Mikayiaa̱, ko̱jo nda̱ xi tsꞌénda xo̱jo̱o̱n kui xi ꞌmí Safaa̱n, ko̱jo Asayiaa̱, nda̱ mosoo̱ nda̱ ree̱:
13Tangínjnú, kó tasíyàjnúu̱ Néná kjo̱a̱a̱ an, ko̱jo kjo̱a̱a̱ xota̱ na̱xi̱ńdaá, ko̱jo kjo̱a̱a̱ ngayeje nangi Jundáa̱, kjo̱a̱a̱ kui én xí kjitꞌa kui Chꞌo̱ Xo̱jo̱n xi je kasakoo̱, ngatꞌa̱ achichí ꞌniú tjitsꞌénxchán Néná, kondra̱ tsa̱ñá, ta̱ngatꞌanii̱ nga xota̱ tji̱e̱ xcháná tsintꞌiéꞌénjiín én xí kjitꞌa kui Chꞌo̱ Xo̱jo̱o̱n, tsi̱ꞌe̱ nga bo̱a̱ sa̱ꞌín ngayeje ni xi xi je kjitꞌa tsi̱ꞌe̱ tsa̱ñá.
14Kósꞌe̱ chináꞌmi Ilsiyaa̱, ko̱jo Aikaa̱n, ko̱jo Akboo̱r, ko̱jo Safaa̱n, ko̱jo Asayiaa̱, kijíkoón na̱ chji̱ni̱e̱ꞌe̱én Néná xi ꞌmí na̱ Hulndaa̱, chjo̱ón Saluu̱n ndií Tikbaa̱, ndíndeè Araa̱, nda̱ xi konda ńjño ndaa̱, kui xi kisꞌijña ki̱a̱ ngi̱ndie xi ma joó na̱xi̱ńdáꞌniú Jerusalee̱n, kó tsíchji̱a̱jo kui xota̱chjo̱on. 15Kó kui naa̱, bi̱ katsoó:
—Bi̱ tsó Néná, kui xi Nee̱ xota̱ Israee̱l: Bi̱ tꞌíi̱n kui nda̱ xi An asíyána ngo ni: 16Bi̱ tsó Néná: Ngotꞌe̱ ꞌne̱, Án boá xi tsꞌényaꞌáa̱ ngo ni xi ta̱nisién ndajín kui ngi̱ndiee̱, ko̱jo ngayeje xota̱ xi ki̱a̱ síndoo̱, xikó tsó én xí chji̱a̱ ki̱a̱ Chꞌo̱ Xo̱jo̱n xi katsꞌényà nda̱ ree̱ nangi Jundáa̱, 17ngatꞌa̱ An índomasienna, kó ne xi kje̱ꞌe, ítií nisije̱n tsi̱ꞌe̱ nga katsꞌénxtína kjo̱a̱a̱ ngayeje ni xi katsꞌénda tsja, kó kuíni nga kjo̱a̱xchánna je ku̱i̱ꞌítíni kui ngi̱ndiee̱, kó ngiti̱ ka̱májín si̱ꞌankꞌo ndiꞌií. 18Ta̱nga nda̱ ree̱ nangi Jundáa̱, kui xi katsangiyajnú tsi̱ꞌe̱ nga ko̱si̱yájnúu̱ ngo ni Néná, bi̱ tꞌínjnúu̱: Bi̱ tsó Néná, kui xi Nee̱ xota̱ Israee̱l: Én xí je kandaꞌyé, ji kjo̱tjosón boá, 19ta̱nga kó nga ini̱màa̱ xikoó tsi chjindié, ko̱jo nga ni̱ma̱kjo̱a̱ kiniꞌín ji yojòo̱ ngindyi̱ko̱n Néná, nga kandaꞌyé ji ni xi je kixian An kondra̱a̱ kui ngi̱ndiee̱, ko̱jo kondraa̱ xota̱ xi ki̱a̱ síndoo̱, nga jè si̱ꞌankjie, ko̱jo nga ni xi ndajín ka̱maa̱, kó nga kachjéndiyé ji ńjñóo̱, kó nga kichieꞌé jí ngindyikón Án, ja̱ ti̱ jè tsintꞌiee̱ nga, tsó Néná. 20Kuíni nga ngotꞌe̱ ꞌne̱, Án boá xi skjíbeé, kó ki̱a̱ nijan kꞌuijñaá nínga síndo xota̱ xi xcháa̱, kó xió tsꞌén kongínjoo̱ nga̱tsjò nínga kjónijiín, kó ngiti̱ sku̱i̱e̱jín ndyikin ji ngayeje ni xi ndajín, xi An kjoéꞌe̱jòo̱ kui ngi̱ndiee̱.
Kó kui jaá, kijíjoo̱ kui eén nda̱ ree̱.
Currently Selected:
2 Já ree̱ 22: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
