2 Já ree̱ 21
21
Nga kamá Manasee̱ ree̱ nangi Jundáa̱
(2Kr 33:1-20)
1Tiejó noó Manasee̱ nga ítsꞌi̱yanii̱ nga atíxoma, kó ichítié ko̱jo ún nó kamaá nga atíxoma ki̱a̱ na̱xi̱ńdáꞌniú Jerusale̱n, kó na̱aa̱n kui nda̱a̱ Epsibaa̱ kiꞌmí. 2Kó ni xi ndajín katsꞌén ngindyi̱ko̱n Néná, xikó kjiꞌi ni xi ndándí xí katsꞌén, xota̱ na̱xi̱ńdá xí Néná tsꞌaxié kui ngi̱ndiee̱, xikó tsꞌén kijí xota̱ Israee̱l. 3Ngatꞌa̱ ti̱ katsꞌénda nginí kui ngi̱ndie nínga nkꞌaa̱ ne xi katsꞌénkjatsón Esekiyaa̱, kui xi na̱ꞌmii̱, kó katsꞌéndaa̱ ṉchandikón ne Baa̱l, ko̱jo katsꞌénda a̱sie̱én na̱ ne Aseraa̱, xikó katsꞌén Akaa̱b, nda̱ ree̱ na̱xi̱ńdá Israee̱l, kó asieéntikoó ngayeje ńño xi tjín nkꞌa jàn, kó ki̱a̱ katsꞌénxátꞌaa̱ kui nii̱. 4Kó ti̱ katsꞌénda ṉchandikón ki̱a̱ Ndiꞌaa̱ Néná, kui xi ja̱bo̱a̱ je bi̱ katsóni Néná: Ki̱a̱ na̱xi̱ńdáꞌniú Jerusale̱n kꞌuijñá an jaꞌénna. 5Kó ti̱ katsꞌénda ṉchandikón, tsi̱ꞌe̱ ngayeje ńño xi tjín nkꞌa jàn ki̱a̱ nga jó ndi̱tsen Ndiꞌaa̱ Néná.
6Kó ndií ngi̱jin ndiꞌií ítí, xikoó ngo kjo̱a̱tjó nga katsꞌénkꞌasꞌien, kó askotꞌasón ko̱jo katsꞌén kjo̱a̱tjiꞌe, kó índo xota̱ xi kotꞌasón, nga tsꞌénkjién xota̱ xi je jesoón. Kó katsꞌén ngase ni xi ndajín ngindyi̱ko̱n Néná, tsi̱ꞌe̱ nga katsꞌénkjaán kjo̱a̱xcha̱án. 7Kó ngo a̱sie̱én na̱ ne Aseraa̱ íjñá ki̱a̱ Ndiꞌaa̱ Néná, kui xi katsꞌénda kui, kjo̱a̱a̱ kui Ndiꞌaa̱, Néná bi̱ katsoó Ndabii̱ ko̱jo Salomoo̱: Kꞌi̱e̱ kui Ndiꞌaa̱ ko̱jo ki̱a̱ na̱xi̱ńdáꞌniú Jerusale̱n, kui ngi̱ndie xi An jaꞌajin An ngi̱jii̱n ngayeje xota̱ tji̱e̱e̱ xota̱ Israee̱l, ki̱a̱ boá nínga kꞌuijñá An Jaꞌénna ngatsjéni̱xtjin, 8kó ngiti̱ tsjandièjín An nga xota̱ Israee̱l xín si̱ꞌankjí, kjo̱a̱a̱ ki̱a̱ tꞌanangi xi katsjáa̱ xota̱ tji̱e̱ xchaá, ta̱nga nga tsꞌénkjátjosón ngayeje ni xi je kixiáa̱n, ko̱jo ngayeje kjo̱a̱kiti xi katsjaá Moisee̱, kui xi moso̱na kamá.
9Ta̱nga kui xotaa̱, tsintꞌiéjín, ngatꞌa̱ Manasee̱ atíxomaa̱ tsi̱ꞌe̱ nga ni xi ndajín ngase katsꞌén, ꞌniú ngase ndajín ni xi katsꞌén kuí, ta̱bo̱a̱jiín xota̱ na̱xi̱ńdá xí Néná katsꞌénkjié xikótsꞌèn kijí xota̱ Israee̱l. 10Kósꞌe̱ Néná tsíchji̱a̱jo nga katsꞌénkjién jáchji̱ni̱e̱ꞌe̱én, nga bi̱ katsoó:
11Ta̱ngatꞌanii̱ nga Manasee̱, nda̱ ree̱ nangi Jundáa̱ katsꞌén ni xi ta̱nisién ꞌniú ndándí, kó ꞌniú ndajín ngase ni xi katsꞌén, ta̱bo̱a̱jiín ni xi katsꞌén xota̱ Amoo̱r, xi kisꞌińdo ngindiee̱ kui, kó ti̱ bo̱a̱ ti̱ katsꞌén nga katsꞌénjé xotaa̱ nangi Jundáa̱ kjo̱a̱a̱ kui ni xi ne katsoó, 12kuíni nga, bi̱ katsóni Néná, kui xi Nee̱ xota̱ Israee̱l: Ngotꞌe̱ ꞌne̱, Án boá xi jéꞌe̱jóo̱ ngo ni xi ꞌniú ndajín na̱xi̱ńdáꞌniú Jerusale̱n, ko̱jo nangi Jundáa̱, ngo ni xi kjiꞌanga ngayeje xi ku̱i̱ntꞌiè achichí ni xi ka̱maa̱ ti̱xa̱nijon.
13Kó Án jè yejen An ńchjón ki̱a̱ nga̱soón na̱xi̱ńdáꞌniú Jerusalee̱n, ko̱jo jè íjñáa̱ plomoo̱ xota̱ ndiꞌaa̱ Akaa̱b, kó sa̱ꞌintsjie An na̱xi̱ńdáꞌniú Jerusalee̱n, xikótsꞌèn niꞌántsjie ngo ti̱bo̱a̱ xi ꞌbítsakján nga niꞌánxí. 14Kó kꞌuijñámasien An xota̱ xi ngase xi tsa̱ꞌa̱a̱n, kó ngi̱ya tsja kondra̱a̱ sa̱ꞌinkꞌasꞌièe̱n, kó kuí boá xi ka̱ma xikoó ni xi sakoó ngayeje xota̱ kondra̱ xi fí kjo̱a̱xcha̱án, 15ngatꞌa̱ ni xi ndajín katsꞌén ngindyikón Án, kó jè katsꞌénkjaán kjo̱a̱xchánna, ndeskande ni̱xtjin nga xota̱ tji̱e̱ xchaá jatjoni nangi Ejipto̱, ngaskande ngotꞌe̱.
16Kó Manasee̱ achichí jiín xota̱ xi jmí jéjiín iskjitjón, ngaskande nga kisꞌikitsieni ngayeje na̱xi̱ńdáꞌniú Jerusalee̱n, ndeskande ngo nga̱nde, kó ngaskande xi ingo nga̱ndee̱, kó kje̱ꞌení jé xí katsꞌén, nga katsꞌénjé xotaa̱ nangi Jundáa̱, tsi̱ꞌe̱ nga katsꞌén ni xi ndajín ngindyi̱ko̱n Néná.
17Kó ni xi ngase xi katsꞌén Manasee̱, ko̱jo ngayeje jé xí katsꞌén, a ki̱a̱jín kjitꞌa ki̱a̱ Chꞌo̱ Xo̱jo̱n nínga kjitꞌa ni xi katsꞌén já ree̱ nangi Jundáa̱. 18Kó kꞌien Manasee̱ kó ki̱a̱ nijan kisꞌijñajo̱ xota̱ xi xchaá, sꞌe̱ ki̱a̱ akjanijín nínga tjitjíe̱ ni ki̱a̱ ndiꞌaa̱, ki̱a̱ nínga tjitjíe̱ ni tjieé nda̱ xi ꞌmí Usaa̱, kó Amoo̱n ndií Manasee̱, kisꞌijña re nga atíxoma ngajoo̱.
Nga kamá Amoo̱n nda̱ ree̱ nangi Jundáa̱
(2Kr 33:21-25)
19Kan jó noó Amoo̱n nga ítsꞌi̱yanii̱ nga atíxoma, kó jó nó kamaá nga atíxoma ki̱a̱ na̱xi̱ńdáꞌniú Jerusale̱n. Na̱aa̱n na̱ Mesulemee̱t kiꞌmí, kó kuí boá xi tsa̱kji̱ín Aruu̱, xi chji̱a̱ni nangi Jotbaa̱ kamá. 20Kó katsꞌén ni xi ndajín ngindyi̱ko̱n Néná, xikó má katsꞌén Manase̱ na̱ꞌmii̱. 21Kó ki̱a̱ kijítji̱ngi ngayeje ni xi ndajín xi katsꞌén na̱ꞌmii̱, kó katsꞌénxátꞌaa̱ ni xi ne tsoó xotaa̱, kui xi katsꞌénxátꞌaa̱ na̱ꞌmii̱ nga, kó asiéntꞌaa̱tikoó kui nii̱, 22kó índomasien Néná, kui Ne xi katsꞌendikón xota̱ xi xchaá, kó ngiti̱ ki̱a̱jín kijítji̱ngi ndi̱yà xí tsi̱ꞌe̱ Néná.
23Kó já mosoo̱ Amoo̱n, índa ngo ni kondra̱ tsi̱ꞌe̱ kui nda̱ ree̱, kó katsꞌénkꞌién nda̱ ree̱, ti̱ ki̱a̱ ndiꞌaa̱. 24Kósꞌe̱ xota̱ na̱xi̱ńdaá, katsꞌénkꞌién ngayeje já xí índa kui nii̱ kondra̱a̱ nda̱ re Amoo̱n, kó xota̱ na̱xi̱ńdaá katsꞌén nga Josiya̱ ndií kui nda̱a̱ atíxoma ngajoo̱.
25Kó ni xi ngase xi katsꞌén Amoo̱n, a ki̱a̱jín kjitꞌa ki̱a̱ Chꞌo̱ Xo̱jo̱n nínga kjitꞌa ni xi katsꞌén já ree̱ nangi Jundáa̱. 26Kó tjín xí ki̱a̱ yínijín Amoo̱n ki̱a̱ nga̱tsjò xí tsi̱ꞌe̱, ki̱a̱ nínga tjitjieé ni tjié nda̱ xi ꞌmí Usaa̱, kó Josiya̱ ndií kui nda̱a̱, atíxoma ngajoo̱.
Currently Selected:
2 Já ree̱ 21: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
