2 Já ree̱ 20
20
Néná katsꞌéndojó ngase ni̱xtjin nga kisꞌijña Esekiyaa̱
(2Kr 32:24-26; Isa 38:1-22)
1Kui ni̱xtjin jàn, nda̱ xi ꞌmí Esekiyaa̱ kamáꞌoón, kó je mejeén ko̱ya katsaki, kó jachókoón nda̱chji̱ni̱e̱ꞌe̱én Néná xi ꞌmí Isayaa̱ ndií Amoo̱, kó bi̱ katsoó: Bi̱ tsó Néná: Tꞌíjñinde ji ndiꞌàa̱, ngatꞌa̱ jè ko̱yè jí, kó ngiti̱ ku̱i̱ndyinjín ngase ji.
2Kósꞌe̱ Esekiyaa̱ ki̱a̱ yején kje̱n nínga tikón xoó, kó tsíchji̱a̱a̱ Néná nga bi̱ katsó: 3ꞌNiú míꞌaá Ji Ne, ꞌniú míꞌaá nga ngatjaꞌátsjiee̱n kótsꞌèn nga kixi̱ ko̱jo nga ngayejeni ini̱ma̱na nga tsoꞌbá an, nga ni xi nda tjítsꞌen an ngindyikin Ji. Kó Esekiyaa̱ achichí askjandá. 4Kó ngindiee̱ nga ko̱e̱je̱ Isayaa̱ ki̱a̱ ngamasiee̱n ndi̱tsee̱n, Néná tsíchji̱a̱jo Isayaa̱, kó bi̱ katsoó:
5Tꞌen nginí ji, kó bi̱ tꞌíi̱n Esekiyaa̱, kui xi ngito̱ko̱o̱ xota̱ na̱xi̱ńdána: Bi̱ tsó Néná, Kui xi Nee̱ xota̱ xi xcháa̱ Ndabii̱: Jè tsintꞌie An nga kandokjo̱e̱ ji, kó jè kamábe An ndándyíkin ji, ngotꞌe̱ ꞌne̱ Án boá xi sa̱ꞌindayaa, kó xi ma jaán ni̱xtjin kꞌuin jí Ndiꞌaa̱ Néná. 6Kó tjiꞌún nó kosón ngasée̱ ni̱xtjin nga ku̱i̱ndyin ji nga̱sondie, kó sa̱ꞌindeé ji, ko̱jo kui na̱xi̱ńdáꞌniuú ngi̱ya tsja nda̱ ree̱ nangi Asiriaa̱, kó skóo̱n kui na̱xi̱ńdáꞌniuú ta̱ngatꞌanii̱ An, ko̱jo ta̱ngatꞌanii̱ Ndabii̱, kui xi moso̱na.
7Kó nda̱ chji̱ni̱e̱ꞌe̱én Néná xi ꞌmí Isayaa̱, bi̱ katsó: Chjábéjnú nda̱ꞌyo̱o̱ toꞌingo̱. Kó tsangínjoo̱ kui nii̱, kó katsangijon ki̱a̱ nínga oo̱n Esekiyaa̱, sꞌe̱ kamándaya. 8Kó Esekiyaa̱, ja̱ bo̱a̱ jè bi̱ katsoó Isayaa̱:
—Mí chi̱bo̱a̱ xi kꞌuiéna nga Néná boá xi sa̱ꞌíndayana, ko̱jo nga xi ma ján ni̱xtjin kjuín nijíngí an Ndiꞌaa̱ Néná.
9Kó Isayaa̱, bi̱ katsoó:
—Kuí bí kui chi̱bo̱a̱ xi tsja̱á Néná, nga Néná sa̱ꞌínkjatjosón kui ni xi je katsó: A tie chi̱bo̱a̱a̱ tji̱nkꞌi̱e̱én ko̱e̱je̱ xtji̱e̱e̱n kje̱n, axa̱ xtji̱e̱e̱n nga̱xto̱n.
10Kó Esekiyaa̱, bi̱ katsó:
—Nde niꞌínjín kjiꞌi tsi tji̱nkꞌi̱e̱én tie chi̱bo̱a̱ ko̱e̱je̱ xtji̱e̱e̱n kje̱n, ta̱nga ka̱májín tsi xtji̱e̱e̱n nga̱xto̱n ko̱e̱je̱ni.
11Kósꞌe̱ nda̱chji̱ni̱e̱ꞌe̱én Néná xi ꞌmí Isayaa̱ tsíchji̱a̱a̱ Néná, kó Néná íjñá nginí ngi̱ndiee̱ nga tie kui chi̱bo̱a̱a̱ ki̱a̱ nínga tikón mára chi̱bo̱a̱a̱ oraa̱ Akaa̱.
Chji̱ni̱e̱ꞌe̱én Néná xi chji̱a̱ni nangi Babilonia̱
(2Kr 32:27-31; Isa 39:1-8)
12Kui ni̱xtjin jàn Merondaa̱k-Balandaa̱n ndií Balandaa̱n, nda̱ ree̱ nangi Babilonia̱, katsangiyaa̱ ngo xo̱jo̱n, ko̱jo ngo ni xi ta̱ boeꞌéná Esekiyaa̱, ngatꞌa̱ tsintꞌié nga kamáꞌoón. 13Kó Esekiyaa̱ katsꞌénkjaꞌa kui já xí jachójo̱ kui nii̱, kó akoó ngayeje nínga tikón kjo̱a̱cho̱o̱n, ko̱jo to̱ntiboaa̱, ko̱jo to̱nsinieé, ko̱jo xka̱sijee̱n, ko̱jo isti̱ xi nda ngasee̱, ko̱jo ngayeje ni xi síndo nínga tikón kjo̱a̱cho̱o̱n. Ngayeje ni xi tjín ndiꞌaa̱, ko̱jo ngi̱ndie nínga atíxoma Esekiyaa̱ xi akoó kui jaá.
14Kósꞌe̱ nda̱chji̱ni̱e̱ꞌe̱én Néná xi ꞌmí Isayaa̱ kijíkoón nda̱ re Esekiyaa̱, kó bi̱ katsoó nga asíyaá:
—Mí ni xi katsoó kui jaá, kó ñá kjindibáni.
Kó Esekiyaa̱, bi̱ katsó:
—Xtji̱e̱e̱n nangi xi kjin boá nínga kjindibáni, ki̱a̱ ngi̱ndie xi chji̱a̱ni nangi Babilonia̱.
15Kó bi̱ ti̱ katsó nginí Isayaa̱:
—Kó mí ni bo̱a̱ xi je kamábe ki̱a̱ ndiꞌàa̱.
Kó Esekiyaa̱, bi̱ katsó:
—Ngayeje ni xi tjín ndiꞌana xi je kamábe, ngayeje kjo̱a̱cho̱nna xi je akóo̱.
16Kósꞌe̱ Isayaa̱, bi̱ katsoó Esekiyaa̱:
—Ndaꞌyé ji eén Néná: 17Sꞌe̱ kji̱ndi̱bá ni̱xtjin nga ngayeje ni xi tjín ngi̱ya ndiꞌàa̱, ko̱jo ngayeje ni xi je íjñatjó xota̱ xi xcháa̱ ngaskande ngotꞌe̱, kongínjo̱ ki̱a̱ nangi Babilonia̱, kó nde ngojín ni xi kꞌuíndo ngase. Tsó Néná. 18Kó ndí xí xota̱ tji̱e̱e̱ ka̱ma, kui xi ji kiniꞌínde ji kongínjo̱, kó kuí boá xi já eunuko̱ ka̱ma, kó ki̱a̱ kꞌuíndo ndiꞌa nínga botixómá nda̱ ree̱ nangi Babiloniaa̱.
19Kósꞌe̱ Esekiyaa̱, bi̱ katsoó Isayaa̱:
—Ndakjiꞌi kui eén Néná xí kandokjo̱e̱ ji.
Kó bi̱ katsó ngase:
—A bo̱a̱jín ka̱ma tsi kꞌuié kjo̱a̱xió, ko̱jo tsi ndatsꞌèn ku̱i̱ndyion ni̱xtjin nga kotíjña̱ an.
Nga kꞌien Esekiyaa̱
(2Kr 32:32-33)
20Kó ngayeje ni xi ngase xi katsꞌén Esekiyaa̱, ko̱jo ngayeje ngaꞌniú xí kisꞌiee̱, ko̱jo xi kótsꞌèn katsꞌénda ti̱xa̱ je xi mindyia ndáfoaa̱, ko̱jo nga katsꞌénda ngo xo̱ngà nínga jaꞌaya ndáfoaa̱ ngi̱jii̱n na̱xi̱ńdáꞌniuú, a ki̱a̱jín kjitꞌa ki̱a̱ Chꞌo̱ Xo̱jo̱n nínga kjitꞌa ngayeje ni xi katsꞌén já ree̱ nangi Jundáa̱. 21Kó Esekiyaa̱ kꞌien, kó ki̱a̱ nijan kisꞌijñajo̱ xota̱ xi xchaá, kó Manase̱ ndií kui nda̱a̱ atíxoma ngajoo̱.
Currently Selected:
2 Já ree̱ 20: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
