2 Já ree̱ 19
19
Néná tsꞌaxiéꞌá nangi Jundáa̱
(2Kr 32:20-23; Isa 37:1-38)
1Kó nga tsintꞌié kuí nii̱ nda̱ re Esekiyaa̱, iskjíndiyájón ńjñoo̱, kó tsajá ngo ńjño tokjuie, sꞌe̱ kijí Ndiꞌaa̱ Néná. 2Kó katsangiya Eliakii̱n, nda̱ xi tikóntjoón ndiꞌaa̱, ko̱jo Sebnaa̱, nda̱ xi tsꞌénda xo̱jo̱o̱n, ko̱jo já xchá ngito̱ko̱o̱ chináꞌmii̱, nga ndyi̱yajá ńjño tokjuie nga, ki̱a̱ nínga tikón nda̱chji̱ni̱e̱ꞌe̱én Néná xi ꞌmí Isayaa̱ ndií Amoo̱, 3kó bi̱ tsó én xí katsangiyaa̱:
Bi̱ tsó Esekiyaa̱: ¡Ngotꞌe̱ ꞌne̱, ni̱xtjin nga nda̱ kjimáná boá, ko̱jo nga si̱ꞌanjéná, ko̱jo nga chꞌo kꞌuínná, ngatꞌa̱ ndií jè mejeén stse̱én, ta̱nga na̱ xi ku̱i̱ꞌé kui ndií, jmí ngaꞌniújiín tsi̱ꞌe̱ nga ku̱i̱ꞌé! 4Tsi ta̱ꞌa nga Néná, kui xi Nèe̱ kui ka̱mamejeén ku̱i̱ntꞌiè ngayeje ni xi tsó nda̱ ngito̱ko̱o̱ jájuún, kui xi katsangiya nda̱ ree̱ nangi Asiriaa̱, kui xi ndi̱a̱a̱, tsi̱ꞌe̱ nga chꞌo katsoó kui Néná xí tikoón, ko̱jo tsi̱ꞌe̱ nga sa̱ꞌinxchánjo̱ kjo̱a̱a̱ kui én xí je tsintꞌié Néná kui xi Nèe̱ kui, kuíni nga ndokjoée̱ Néná ngandaa̱ kui xota̱ xi tsꞌangi ngasee̱.
5Kósꞌe̱ já mosoo̱ nda̱ re Esekiyaa̱ jachó ngindyi̱ko̱n Isayaa̱. 6Kó Isayaa̱, bi̱ katsoó:
—Bi̱ tꞌínjnúu̱ ndi̱a̱jnú: Bi̱ tsó Néná: Ngata̱ ndakinjín má ji kjo̱a̱a̱ kui én xí je kandaꞌyé ji, kui xi já mosoo̱ nda̱ ree̱ nangi Asiriaa̱ chꞌo katsó nga An tsíchji̱a̱taꞌinna. 7Ngotꞌe̱ ꞌne̱, kꞌi̱e̱ sangiyáa kui ngo a̱siénni̱xtjin, kó ku̱i̱ntꞌiè ngo ni, kó ko̱e̱je̱ nginí nangii̱, kó ki̱a̱ nangii̱, Án boá xi sa̱ꞌin An nga ki̱cha̱ si̱ꞌankꞌienni.
8Nga tsintꞌié kuí nda̱ ngito̱ko̱o̱, nga nda̱ ree̱ nangi Asiriaa̱, je kijíni ki̱a̱ na̱xi̱ńdáꞌniú Lakii̱, kijíꞌoyá nginí, kó ki̱a̱ kamábe nga nangi Libnaa̱ tsꞌénkjánjo̱. 9Ta̱nga nga tsintꞌié nga Tirakaa̱, nda̱ re xi chji̱a̱ni nangi Etiopía̱, je jatjo nga kijíkjánjo̱, katsangiya nginí xota̱ chji̱ni̱e̱ꞌén nda̱ re Esekiyaa̱, nga bi̱ katsoó:
10Bi̱ tꞌínjnúu̱ Esekiyaa̱, nda̱ ree̱ nangi Jundáa̱: Ngata̱ ꞌboṉcha̱jojiín Nèe̱, kui xi kjimaꞌnítakín ji, nga bi̱ se ji: Na̱xi̱ńdáꞌniú Jerusale̱n si̱ꞌankꞌasꞌienjín ngi̱ya tsja nda̱ ree̱ nangi Asiriaa̱. 11Jí boá xi je kandaꞌyé ji ni xi je katsꞌén já re xi chji̱a̱ni Asiriaa̱ ngayeje kui tꞌanangii̱, nga katsꞌénkjié. Kó a ka̱ma kjo̱tjoꞌaa yojòo̱ ji. 12Kui ne xi kisꞌiee̱ na̱xi̱ńdaá, a kamárií tsꞌaxiéꞌá kui xotaa̱ nga katsꞌénkjié xota̱ xi xchána kui ngi̱ndie jàn, xikoó, nangi Ngosaa̱n, ko̱jo nangi Araa̱n, ko̱jo nangi Resee̱f, ko̱jo xota̱ tji̱e̱e̱ Endee̱n, xi kisꞌińdo ki̱a̱ nangi Telasaa̱r. 13Ñá tikón nda̱ ree̱ nangi Amaa̱t, ko̱jo tsi nda̱ ree̱ nangi Arfaa̱nd, ko̱jo tsi nda̱ ree̱ na̱xi̱ńdáꞌniú Sefarbaii̱n, ko̱jo tsi xi chji̱a̱ni nangi Ee̱n, ko̱jo tsi xi chji̱a̱ni nangi Ibaa̱.
14Kó Esekiyaa̱ iskjíbé kuí xo̱jo̱n xi katsꞌénkꞌasꞌiee̱n já chji̱ni̱e̱ꞌe̱én, kó katsꞌényà, sꞌe̱ kijínijíngí Ndiꞌaa̱ Néná, kó Esekiyaa̱ ki̱a̱ yejéntie kui xo̱jo̱o̱n ngindyi̱ko̱n Néná. 15Kó Esekiyaa̱ tsíchji̱a̱a̱ Néná, kó bi̱ katsó:
¡Ji Ne, Ji xi Nee̱ xota̱ Israee̱l, Ji xi ki̱a̱ botíxome Ji ngi̱jii̱n keruu̱b! ¡Ta̱ Jí tsí xi Ne Ji, ngi̱jii̱n ngayeje ngi̱ndie nínga botíxoma xi tjín nga̱sondiee̱! ¡Jí boá xi kiniꞌínde Ji ndiꞌakꞌajmii̱ ko̱jo tꞌanangii̱! 16Tasínijìnní Ji Ne, kó ndaꞌyéní, chjáxꞌé Ji ndyikin, kó tsitsíjin Ji. Ndaꞌyé Ji ngayeje én xí katsangiya Senakerii̱b, nga chꞌo katsó nga tsíchji̱a̱taꞌin kui Néná xí tikoón. 17Ja̱koxi̱ boá, Ji Ne, nga já re xi chji̱a̱ni nangi Asiriaa̱, je katsꞌénkjié ngayeje nangii̱ ko̱jo tꞌanangi xi tjiín, 18kó ki̱a̱ ngi̱jin ndiꞌií je tsꞌajmijin nee̱, ngatꞌa̱ nga kui nii̱ jmí tsi kui xi Néná, ni xi katsꞌénda tsja xotaa̱ boá, ni xi yá ko̱jo xi ndi̱jo̱ boá, kuíni nga katsꞌénkjatsónní. 19Ngotꞌe̱ ꞌne̱, Ji Ne, Ji xi Nejne̱, ꞌniú míꞌaá nga ko̱ꞌna̱xiéꞌéjne̱ ngi̱ya tsja kui jaá, tsi̱ꞌe̱ nga sku̱i̱e̱ ngayeje ngi̱ndie nínga botíxoma xi tjín tꞌanangii̱, nga ta̱ Jí tsí Ji Ne, Jí xi Néná boá Ji.
20Kósꞌe̱ Isayaa̱ ndií Amoo̱, bi̱ katsó én xí katsangiyaa̱ Esekiyaa̱: Bi̱ tsó Néná, Kui xi Nee̱ xota̱ Israee̱l: Jè tsintꞌie An ni xi ꞌniú kichjiéꞌéní kjo̱a̱a̱ Senakerii̱b, nda̱ ree̱ nangi Asiriaa̱. 21Kuí bí kui eén xi katsó Néná kjo̱a̱a̱ kui:
Tsꞌènchꞌoóri, kó mojnókiee̱, ndí tsa̱kji̱ín xo̱ngo̱ò na̱xi̱ńdáꞌniú Sioo̱n,
tsꞌéntíyà maá to̱ko̱ nga̱xten ji, ndí tsa̱kji̱ín xo̱ngo̱ò na̱xi̱ńdáꞌniú Jerusalee̱n.
22ꞌYá xí timojnéché ji, kó ꞌyá xí chꞌo tꞌísée̱.
ꞌYá xí ꞌniú kandokjo̱e̱je ji, kó nkꞌakon kamá ji nga kitsitsijìi̱n.
¡Kondra̱a̱ Nda̱ Tsjie xi chji̱a̱ni na̱xi̱ńdá Israee̱l boá!
23Kó já chji̱ni̱e̱ꞌée̱n boá xi kiniꞌínkjín jí nga akajnéché ji Néná, kó bi̱ kase ji:
Ta̱ngatꞌanii̱ nga kjín má karro̱ kjo̱a̱xchánna,
kuíni nga jachó nijíngí an nga̱són nkꞌaá na̱xi̱i̱,
nínga ꞌniú niꞌin má nga bitjasꞌi̱e̱nnii̱ nangi Líbanoo̱,
kósꞌe̱ tsatie an yákón xi ꞌniú nkꞌaá, ko̱jo yásipree̱ xi nda ngasee̱,
kó ki̱a̱ je tsꞌasꞌienjin an ngi̱ndie nínga ꞌniú ꞌmá ngasee̱,
ki̱a̱ nínga ꞌniú ngase tsingá yá xí tjiín.
24Jè katsꞌenda an ndáńchꞌi̱, kó jè katsꞌe an ndáfoa xi tjín kje̱ꞌe nangi,
kó ndsa̱ko án boá xi je katsꞌénxíni ngayeje ndejèꞌ xi tjín nangi Ejiptoo̱.
25A jmíni̱xtjin kandaꞌyé ji nga ndeskande ni̱xtjin xchá jàn,
nga Án boá xi bo̱a̱ katsꞌen An, kó nga ndeskande ni̱xtjin xchá jàn,
nga Án boá xi índa An kui nii̱.
Kó ngotꞌe̱ ꞌne̱, Án boá xi tjítsꞌen An nga kji̱ndi̱bá,
tsi̱ꞌe̱ nga ngi̱ndie xi je ixóndó si̱ꞌin ji kui na̱xi̱ńdáꞌniú xí xó tjíchjáꞌyánii̱.
26Kó xota̱ xi síndo ki̱a̱a̱, ngiti̱ jmí ngaꞌniú kisꞌiejiín,
kó soboá kamaá nga kichajá,
bo̱a̱ kon kamá xikó maá kꞌijñá xí tjín ngi̱jin kꞌijñaá,
ko̱jo xikó maá xka̱ xi chjindié,
ko̱jo xikó maá xka̱ sa̱si̱e̱ xi sꞌijon ngo ndiꞌa,
kui xi xíꞌniú ngindiee̱ nga maxchá.
27Ta̱nga be Án kótsꞌèn tindyin ji, ko̱jo kótsꞌèn fotje ji,
ko̱jo kótsꞌèn bitjasꞌi̱n ji, ko̱jo kótsꞌèn nga An niꞌínxchínje̱ní.
28Kó ta̱ngatꞌanii̱ nga An tiniꞌínxchínje̱ní,
ko̱jo ta̱ngatꞌanii̱ nga kjo̱a̱nkꞌakòo̱n je jachó ngaskande tji̱bo̱a̱nijon Án,
kuíni nga kꞌuijñáa̱ ki̱cha̱ntꞌi̱u̱a̱ ńtjen ji,
kó kꞌuijñáa̱ ngo ki̱cha̱ xi niꞌánkasiénni ndso̱ꞌba ndso̱ꞌbe ji,
kó ki̱a̱ sa̱ꞌinkjí ngiñaá ndi̱yà nínga kjindibéni ji.
29Kó kuí nii̱ xi chi̱bo̱a̱ ka̱maa̱ ji Esekiyaa̱:
Kui noó xi̱ni̱ ji ni xi ka̱maxchaá to xi je ixoó, kó xi ma joó noó xi̱ni̱ ji ni xi jmí tsi xá ikꞌítji̱e̱nii̱, ta̱nga xi ma jaán noó, kꞌuítji̱e̱jnú ni tjié, kó chja̱ꞌáꞌyájnú cha̱a̱n, kó kꞌuitji̱e̱jnú tostsi̱je̱è, kó xi̱ni̱e̱jnú to xi ko̱a̱ja̱a̱.
30Kó kui xota̱ xi kꞌo̱ngi ngasee̱, kui xi xota̱ tji̱e̱e̱ Jundáa̱, ti̱ kꞌuieé nginí ja̱ma̱ ndeskande ngindiee̱, kó ko̱a̱ja̱a̱ to xtji̱e̱e̱n nkꞌa jàn. 31Ngatꞌa̱ ki̱a̱ na̱xi̱ńdáꞌniú Jerusale̱n kjo̱tjo xota̱ xi kꞌo̱ngii̱, kó ki̱a̱ na̱xi̱ Sioo̱n kjo̱tjoni xota̱ xi kjo̱tjoꞌaa̱. ¡Kjo̱a̱chi̱ni̱i̱ Néná xí tsi̱ꞌe̱ jájuún boá xi sa̱ꞌín kui nii̱!
32Kuíni nga bi̱ tsóni Néná kjo̱a̱a̱ nda̱ ree̱ nangi Asiriaa̱: Kꞌo̱sꞌienjín kꞌi̱e̱ kui na̱xi̱ńdáꞌniuú, ti̱nde jmí yáyojó skji̱níjín, ti̱nde ko̱e̱je̱tiñájín nga ko̱a̱ꞌa̱ ni xi ꞌbíchjaá ni xi ndajiín, ti̱nde jmí xó nínga ma bitjani sa̱ꞌíndajín. 33Ti̱kuii ndi̱yà nínga kjindibáni, ti̱ ki̱a̱a̱ ko̱e̱je̱ꞌoyá nginí, kó jmíni̱xtjin kꞌo̱sꞌien kui na̱xi̱ńdáꞌniuú, tsó Néná. 34Ngatꞌa̱ Án boá xi kꞌoxiéꞌá An kui na̱xi̱ńdáꞌniuú, ta̱ngatꞌanii̱ An, ko̱jo ta̱ngatꞌanii̱ Ndabii̱, nda̱ xi moso̱na.
35Kó kui ni̱xtji̱e̱e̱n, ndítsjie xi Néná jatjo, kó katsꞌénꞌoón nga katsꞌénkꞌién úchán ichítié ko̱jo kantjiꞌún mi̱ xota̱, ki̱a̱ nínga síndo ndiꞌańjñoo̱ xota̱ Asiriaa̱, kó nga jastjíe̱n nga ta̱jñóyaà, ngayejee̱ nga je jesón. 36Kósꞌe̱ Senakerii̱b, nda̱ re xi chji̱a̱ni nangi Asiriaa̱, jatjoni, kó kijí nginí na̱xi̱ńdáꞌniú Nínibe̱, kó ki̱a̱ kisꞌijña kui ngi̱ndiee̱. 37Kó kjiꞌanga Senakerii̱b sikoóntikoó ki̱a̱ na̱ngo̱xi̱i̱ ne Nisroo̱k, já xi ꞌmí Andramelee̱k ko̱jo Saresee̱r ki̱cha̱ndojó katsꞌénkꞌiénni, kósꞌe̱ tsanga ki̱a̱ nangi Araraa̱t, kó Esaa̱r-Andoo̱n ndií kui nda̱a̱, kisꞌijña ngajoo̱ nga atíxoma.
Currently Selected:
2 Já ree̱ 19: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
