2 Já ree̱ 18
18
Nga kamá Esekiyaa̱ ree̱ nangi Jundáa̱
(2Kr 29:1-2)
1Nó xí ma jaán nga atíxoma Oseaa̱ ndií Elaa̱, nga kamá nda̱ ree̱ na̱xi̱ńdá Israee̱l, ítsꞌi̱yanii̱ nga atíxoma Esekiyaa̱ ndií Akaa̱, nda̱ ree̱ nangi Jundáa̱. 2Kan ún noó nga ítsꞌi̱yanii̱ nga atíxoma, kó kan nijan nó kamaá nga atíxoma ki̱a̱ na̱xi̱ńdáꞌniú Jerusale̱n. Na̱aa̱n na̱ Abi̱ kiꞌmí, kó kuí boá xi tsa̱kji̱ín Sakariyaa̱ kamá.
3Kó Esekiyaa̱ katsꞌén ni xi kixi̱ ngindyi̱ko̱n Néná, xikó katsꞌén Ndabii̱, xota̱ xi xchaá. 4Kuí boá xi katsꞌénkjié ngi̱ndie nínga nkꞌaa̱, kó katsꞌénxi̱ a̱sie̱én ne xi katsꞌénda xotaa̱, kó tsatie a̱sie̱én na̱ ne Aseraa̱, kó ti̱ katsꞌénxi̱ ye̱ xi ki̱cha̱ bronse̱ xi katsꞌénda Moisee̱ nga, ngatꞌa̱ ngaskande kui ni̱xtjin jàn xota̱ Israee̱l ítií nisijee̱n kui ye̱e̱, kó Nejustaa̱n ítꞌajaꞌén.
5Kó Néná, Kui xi Nee̱ xota̱ Israee̱l kamáꞌniátakón, kó ngindiee̱ nga ko̱tíxomaa̱ Esekiyaa̱, jmíjín ingo nda̱ xi bo̱a̱ katsꞌén xikoó kuí, ngi̱jii̱n ngayeje já ree̱ xi chji̱a̱ni nangi Jundáa̱. 6Ngatꞌa̱ ki̱a̱ kijítji̱ngi Néná, kó jmíni̱xtjin íjñámasien, ta̱sá katsꞌénkjatjosón kjo̱a̱botíxoma xi Néná atíxomaa̱ Moisee̱ nga sa̱ꞌín. 7Kó Néná asíko̱jo, kó nda kamaá ngayeje ni xi katsꞌén.
Kó kui nda̱a̱ kondra̱ kijínii̱ nda̱ ree̱ nangi Asiriaa̱, kó ngiti̱ katsꞌénxátꞌajiín. 8Kó ti̱ katsꞌénꞌoón xota̱ Filisteaa̱ ngaskande nangi Ngasa̱, ko̱jo tꞌanangii̱ kui ngi̱ndiee̱, ko̱jo ndeskande nínga síndo tarieé já xí tsóyà eén, ngaskande tꞌa xó xí tjichjáꞌyáni na̱xi̱ńdáꞌniuú.
Xota̱ Asiriaa̱ katsꞌéntsi̱ꞌe̱ nangi Samariaa̱
9Nó xí ma nijoón nga kisꞌijña nda̱ re Esekiyaa̱, kui xi nó xí ma yitoo̱ nga kisꞌijña nda̱ re Oseaa̱ ndií Elaa̱, nda̱ ree̱ na̱xi̱ńdá Israee̱l, nda̱ re Salmanasaa̱ xi chji̱a̱ni nangi Asiria̱, kijínijíngí nga kijíkjánjo̱ na̱xi̱ńdáꞌniú Samaria̱, kó íchjáꞌyá kui ngi̱ndiee̱ tsi̱ꞌe̱ nga askjanjo̱, 10kó ngije jaꞌa ján nó, katsꞌéntsi̱ꞌe̱ kui ngi̱ndiee̱. Nó xí ma juu̱n nga kisꞌijña Esekiyaa̱, kui nó xí ma nijaa̱n nga kisꞌijña Oseaa̱, nda̱ ree̱ na̱xi̱ńdá Israee̱l, kjiꞌa boá nga kachjábé nangi Samaria̱.
11Kó nda̱ ree̱ nangi Asiriaa̱, kijíjo̱ꞌniú xota̱ Israee̱l ki̱a̱ nangi Asiria̱, kó ki̱a̱ índo nangi Alaa̱j, ko̱jo nangi Aboo̱r, ki̱a̱ tꞌa xo̱ngàndántꞌié Ngosaa̱n, ko̱jo ki̱a̱ na̱xi̱ńdáꞌniú nínga síndo xota̱ Mendiaa̱, 12ngatꞌa̱ tsintꞌiéꞌénjiín nda̱a̱ Néná, kui xi Nee̱ kui, kó ta̱sá ngiti̱ katsꞌénkjatjosónjín ni xi índajo̱, ti̱nde tsintꞌiéjiín, ko̱jo bo̱a̱jín katsꞌén ngayeje ni xi Néná atíxomaa̱ mosoo̱ kui xi ꞌmí Moisee̱ nga sa̱ꞌín katsaki.
Nda̱ ree̱ nangi Asiriaa̱ katsꞌéntsi̱ꞌe̱ nangi Jundáa̱
(2Kr 32:1-19; Isa 36:1-22)
13Kó nó xí tienijoón nga kisꞌijña re Esekiyaa̱, kui nda̱ xi ꞌmí Senakerii̱b, nda̱ re xi chji̱a̱ni nangi Asiriaa̱, kijínijíngí nga kijíkjánjo̱ ngayeje na̱xi̱ńdáꞌniú xi tjíchjáꞌyá xi síndo nangi Jundáa̱, kó katsꞌéntsi̱ꞌe̱ ngayeje kui ngi̱ndiee̱. 14Kósꞌe̱ Esekiyaa̱ nda̱ ree̱ nangi Jundáa̱, katsangiyaa̱ én nda̱ ree̱ nangi Asiriaa̱ xi tikón ki̱a̱ na̱xi̱ńdáꞌniú Lakii̱, nga bi̱ katsoó: Ki̱a̱jiín ni xi katsꞌen an, kó ta̱sá ti̱ꞌinkjìnní yojòo̱, kó jo̱ꞌo xian án ngayeje ni xi séní.
Kósꞌe̱ nda̱ ree̱ nangi Asiriaa̱, katsꞌeén kjo̱a̱ꞌniú nda̱ ree̱ nangi Jundáa̱ xi ꞌmí Esekiyaa̱, nga nijan mi̱ nijan úchán kilo̱ to̱ntiboa ko̱jo nga ichítié ko̱jo yichán kilo̱ to̱nsinié sa̱ꞌínkꞌasꞌiee̱n. 15Kó Esekiyaa̱ katsꞌénkꞌasꞌiee̱n ngayeje kui to̱ntiboaa̱, ko̱jo kui to̱nsinieé, kó ki̱a̱ iskjíbéní xi kisꞌie ki̱a̱ Ndiꞌaa̱ Néná, ko̱jo nínga chjaꞌátjó to̱o̱n nda̱ ree̱. 16Kui ni̱xtjin jàn Esekiyaa̱ jaꞌáxiín to̱nsinié xi kjijon nga̱ntjo̱a̱a̱ Ndiꞌaa̱ Néná, ko̱jo kui xi kjijon ki̱a̱ yángandee̱ nga̱ntjo̱a̱a̱, kui to̱nsinié xi ti̱kuii nda̱ re Esekiyaa̱ katsangiya nga akjajon, kó katsjaá nda̱ ree̱ nangi Asiriaa̱.
17Jaskan nda̱ ree̱ nangi Asiriaa̱ ndeskande na̱xi̱ńdáꞌniú Lakii̱, ngaskande na̱xi̱ńdáꞌniú Jerusale̱n katsangiya kui já xí nkꞌa xaá kui xi Tartaa̱n, ko̱jo Rabsarii̱, ko̱jo Rabsasee̱, ko̱jo ngo tjín jájún kondra̱a̱ nda̱ re Esekiyaa̱. Kó kijínijíngí, kó jachó ki̱a̱ na̱xi̱ńdáꞌniú Jerusale̱n, kó nga jachó, ki̱a̱ kisꞌińdo ki̱a̱ tꞌa ndáńchꞌi̱ xi tikón xtji̱e̱e̱n nínga nkꞌaa̱, ki̱a̱ nínga tikón ndi̱ya̱à Kꞌijñaá nda̱ xí Monieé. 18Kósꞌe̱ kandokjo̱a̱a̱ nda̱ ree̱, kó kijíkoón kui jaá, nda̱ xi ꞌmí Eliakii̱n ndií Ilsiyaa̱, nda̱ xi tikóntjoón ndo̱bo̱a̱xa̱á, ko̱jo Sebnaa̱, nda̱ xi tsꞌénda xo̱jo̱o̱n, ko̱jo Joaa̱ ndií Asaa̱f, nda̱ xi tsóyà ni xi maa̱.
19Kó nda̱ xi nkꞌa xaá kui xi Rabsasee̱, bi̱ katsoó:
—Bi̱ tꞌínjnúu̱ ngotꞌe̱ má Esekiyaa̱: Bi̱ tsó nda̱ ree̱ xi ꞌniú yandikoón, xi chji̱a̱ni nangi Asiriaa̱: Ñá ndíbánií kjo̱a̱ꞌniátakón xi tjiín jí. 20A niꞌínkjé jí nga ni xi ꞌbíndaa̱ ko̱jo ngaꞌniuú, tsi̱ꞌe̱ nga ka̱ma ngo kjo̱a̱xchán, a ta̱ én tsí bo̱a̱. ꞌYá kuií bo̱a̱ xi kjimaꞌnítakín ji tsi̱ꞌe̱ nga kondra̱ tsa̱ꞌa̱n tindyin ji. 21A kuí yáxá xto xi tikón ki̱a̱ nangi Ejiptoo̱ xi kjimaꞌnítakín ji, kui xi kjiꞌanga tjín xí ki̱a̱ bosíko̱jo̱ni yojoo̱ nga bóꞌniú, kui yaá foaꞌaxtikjaá tsja. Bo̱a̱ tsꞌénjo̱ faraoo̱n, nda̱ ree̱ nangi Ejiptoo̱ ngayeje xota̱ xi kui kjimaꞌniátakón. 22Kó tsi jún bi̱ ꞌmíjnúꞌun: Ji̱n, Néná kui xi Ndi̱a̱jne̱ boá xi kjimaꞌniátakónjne̱. A ti̱ kuijín boá kui nee̱, kui xi Esekiyaa̱ boá xi katsꞌénkjié ngi̱ndie nínga nkꞌaa̱ ko̱jo ṉchandikoón, nga bi̱ katsoó xota̱ xi chji̱a̱ni nangi Jundáa̱, ko̱jo na̱xi̱ńdáꞌniú Jerusale̱n, nga ki̱a̱ ko̱siéntꞌaa̱tikoó ngindyi̱ko̱n kui ṉchandikón xí tikón ki̱a̱ na̱xi̱ńdáꞌniú Jerusalee̱n.
23Ngotꞌe̱ ꞌne̱, ꞌniú míꞌaá nga ngo kjo̱a̱chꞌáṉcha̱ ti̱ꞌinje̱ ji ndi̱a̱na, kui xi nda̱ ree̱ nangi Asiriaa̱, kó jó mi̱ ndi̱je̱ tsjaa, tsi tjiín xota̱ xi ka̱ma kꞌuíndosoón. 24Kótsꞌèn mani takín nga niꞌínchꞌí ji ngo nda̱ ngito̱ko̱ xi ngindie ngase xaá, xi mosoo̱ ndi̱a̱na ma, nga karro̱ kjo̱a̱xcha̱án ko̱jo já xí ꞌbíndosoón ndi̱je̱ xi chji̱a̱ni nangi Ejiptoo̱ kjimaꞌnítakín ji. 25A án boá xi kjindibánijíngí an nga jéꞌe̱ tsꞌenkjié an kui ngindiee̱, kó nga asíyájáa̱n Néná, ngatꞌa̱ Néná boá xi bi̱ katsóna: Tꞌennijíngí ji kui ngindiee̱, kó ti̱ꞌinkjie ji.
26Kósꞌe̱ Eliakii̱n ndií Ilsiyaa̱, ko̱jo Sebnaa̱, ko̱jo Joaa̱, bi̱ katsoó nda̱ ngito̱ko̱ xi nkꞌa xaá kui xi Rabsasee̱:
—ꞌNiú chjiáꞌájne̱ ji nga ko̱ndókjo̱e̱je ji mosòo̱ én aramea̱, ngatꞌa̱ ji̱n makjínjne̱ kui eén, kó nga én jundío̱jín xi ndokjo̱e̱jejne̱ ngindyi̱ko̱n xota̱ xi síndo nga̱són xoó na̱xi̱ńdáꞌniuú.
27Ta̱nga kui nda̱ ngito̱ko̱ xi nkꞌa xaá kui xi Rabsasee̱, bi̱ katsoó:
—A ndi̱a̱na boá xi katsangiyana tsi̱ꞌe̱ nga ji ko̱jo ndi̱a̱ tse̱ xi kuichjiájo an kui eén, kó jmí tsi kui xota̱ xi síndo nga̱soón xoó kui na̱xi̱ńdáꞌniú, kui xi ta̱ chjién tsí nga ngaskande yeꞌee̱ skji̱ni̱e̱, ko̱jo tsi ngaskande ti̱kuii ndándóbo̱a̱a̱ kꞌuí.
28Kósꞌe̱ nda̱ ngito̱ko̱ xi nkꞌa xaá kui xi Rabsasee̱ kasasienkixi̱, kó ꞌniú tsíchji̱a̱ nga katsꞌénkjién én jundío̱, nga bi̱ katsó:
—¡Ndaꞌyájnúu̱ én xí tsó nda̱ re xi ꞌniú yandikoón, kui xi nda̱ ree̱ nangi Asiriaa̱! 29Bi̱ tsó nda̱ ree̱: Ngata̱ boeꞌéndièjínjnú nga kꞌo̱ṉcha̱jojnú Esekiyaa̱, ngatꞌa̱ ka̱májiín nga kui xi kꞌo̱xiéꞌájnú ngi̱ya ndsa̱ án. 30Kó ngata̱ boeꞌéndièjínjnú nga Esekiyaa̱ sa̱ꞌín, nga jún ka̱maꞌniátakónjnú Néná, nga bi̱ ka̱tso̱jnú: Ja̱koxi̱ boá nga Néná kꞌo̱xiéꞌáná, kó kui na̱xi̱ńdáꞌniuú ki̱a̱jín si̱ꞌankꞌasꞌien ngi̱ya tsja nda̱ ree̱ nangi Asiriaa̱. 31Ngata̱ niꞌánsénjínjnúu̱ Esekiyaa̱, ngatꞌa̱ bi̱ tsó nda̱ ree̱ nangi Asiriaa̱: Tꞌíndajo̱jnúꞌun kjo̱a̱xió, kó ti̱ꞌankjiéjnúkjo̱a̱, kó nga ngo nga ngojnú ka̱ma xi̱ni̱e̱jnú tostsi̱je̱è xí jún ka̱maxchájnú, ko̱jo toꞌingo̱ xi kꞌuiéjnú, ko̱jo nga ngo nga ngojnú ka̱ma sꞌi̱o̱jnú ndáfoaa̱ ndáńchꞌi̱jnú, 32ngaskande nga kji̱ndi̱bá an, kó kjuínjo̱jnúꞌun ngo nangi xi xikoó nangi xi tsa̱jún, ngo nangi nínga kꞌuié ni xi maxchá jno̱o̱, ko̱jo tostsi̱je̱è xí tsjá binoo̱, ko̱jo nínga kꞌuié pan, ko̱jo tostsi̱je̱è, ko̱jo ngo nangi nínga kꞌuié toꞌolibo̱, ko̱jo isti̱, ko̱jo ntsjién. Kó bo̱a̱ tsꞌén ku̱i̱ndyionjnú, kó ko̱yàjínjnú. Ngata̱ niꞌánsénjínjnúu̱ Esekiyaa̱, ngatꞌa̱ kuí boá xi tsꞌénꞌboṉcha̱jojnú nga bi̱ tsójnú: Néná boá xi kꞌo̱xiéꞌáná. 33A tjínrií ngo ne kui na̱xi̱ńdaá xi tsꞌaxiéꞌá nangii̱ ngi̱ya tsja nda̱ ree̱ nangi Asiriaa̱. 34Ñá síndo nee̱ nangi Amaa̱t, ko̱jo nangi Arfaa̱nd. Ñá síndo nee̱ nangi Sefarbaii̱n, ko̱jo nangi Enaa̱, ko̱jo nangi Ibaa̱. A kamárií nga tsꞌaxiéꞌá kui xotaa̱ na̱xi̱ńdá xí chji̱a̱ni nangi Samariaa̱ ngi̱ya ndsa̱ an. 35ꞌYá ne xi tjín ngi̱jii̱n na̱xi̱ńdaá xi je kamaá nga tsꞌaxiéꞌá nangii̱ ngi̱ya ndsa̱ an, tsi̱ꞌe̱ nga Néná kꞌo̱xiéꞌáni na̱xi̱ńdáꞌniú Jerusalee̱n ngi̱ya ndsa̱ an.
36Ta̱nga xota̱ na̱xi̱ńdaá xió kisꞌińdo, nde ngo ni katsójín, ngatꞌa̱ ngo kjo̱a̱ je katsjá nda̱ ree̱, xi bi̱ tsó: Ngata̱ ndokjo̱a̱ꞌájínjnú. 37Kósꞌe̱ Eliakii̱n ndií Ilsiyaa̱, kui nda̱ xi tikóntjoón ndiꞌaa̱ nda̱ ree̱, ko̱jo Sebnaa̱, nda̱ xi tsꞌénda xo̱jo̱o̱n, ko̱jo Joaa̱ ndií Asaa̱f, ko̱jo nda̱ xi tsóyà ni xi maa, jachókoón Esekiyaa̱, nga je iskjíndiyá ńjño xi ndyi̱yajá, kó katsóyaà én xí tsíchji̱a̱ nda̱ xi nkꞌa xaá xi katsangiya nda̱ ree̱ nangi Asiriaa̱.
Currently Selected:
2 Já ree̱ 18: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
