2 Já ree̱ 17
17
Xota̱ Asiriaa̱ katsꞌeén xota̱ Israee̱l
1Nó tiejó nga kisꞌijña Akaa̱, nda̱ re xi chji̱a̱ni nangi Jundáa̱, Oseaa̱ ndií Elaa̱, ítsꞌi̱yanii̱ nga atíxoma na̱xi̱ńdá Israee̱l ki̱a̱ na̱xi̱ńdáꞌniú Samaria̱, kó nijan nó kamaá nga atíxoma. 2Kó ni xi ndajín katsꞌén ngindyi̱ko̱n Néná, ndatsi jmí tsi bo̱a̱ kjiꞌi ni xi katsꞌén, xikoó já re xi kisꞌińdo ngindiee̱ nga kisꞌijña kui.
3Kó nda̱ re Salmanasaa̱ kijínijíngí nga kijíkjánjo̱ kui nda̱ re xi chji̱a̱ni nangi Asiriaa̱, kó Oseaa̱, mosoo̱ kui nda̱a̱ kamá, kó katsꞌénkꞌasꞌiee̱n to̱n xi machjítjé ni. 4Ta̱nga nda̱ ree̱ nangi Asiriaa̱, kamákjiín nga Oseaa̱ índa ngo ni xi ndajín kondra̱ tsi̱ꞌe̱, ngatꞌa̱ katsangiyaa̱ xota̱ chji̱ni̱e̱ꞌén Soo̱, nda̱ re xi chji̱a̱ni nangi Ejiptoo̱, kó ngiti̱ íchjíjiín to̱n xi machjítjé ni, nda̱ ree̱ nangi Asiriaa̱, xikó katsꞌén xki̱ nó, kuíni nga nda̱ ree̱ nangi Asiriaa̱ katsangisꞌien ndo̱bo̱a̱yà Oseaa̱. 5Kósꞌe̱ nda̱ ree̱ nangi Asiriaa̱ kijínijíngí nga kijíkjánjo̱ ngayeje kui nangii̱, kó kijínijíngí ki̱a̱ na̱xi̱ńdáꞌniú Samaria̱, nínga ján nó kamaá nga íchjáꞌyá nga askjanjo̱ kui ngi̱ndiee̱. 6Nó xí ma nijan nga atíxoma Oseaa̱, nda̱ re xi chji̱a̱ni nangi Asiriaa̱, katsꞌéntsi̱ꞌe̱ nangi Samaria̱, kó kijíjo̱ ꞌniú xota̱ Israee̱l nínga síndo xota̱ Asiriaa̱, kó ki̱a̱ katsꞌénkꞌíndo ki̱a̱ nangi Alaa̱j, ko̱jo nangi Aboo̱r tꞌa xo̱ngàndántꞌié Ngosaa̱n, ko̱jo na̱xi̱ńdáꞌniú nínga síndo xota̱ Mendiaa̱.
7Kui nii̱ xi kamá, ngatꞌa̱ xota̱ Israee̱l katsꞌénjé kondra̱a̱ Néná, kui xi Nee̱ kui, kui xi tsꞌaxiéni ki̱a̱ nangi Ejiptoo̱, kjiꞌanga faraoo̱n, nda̱ ree̱ nangi Ejiptoo̱ atíxomaa̱ kui xotaa̱, ko̱jo nga katsꞌéndikón kje̱ꞌe ne, 8kó ki̱a̱ kijítji̱ngi kjo̱a̱xcha̱á xota̱ na̱xi̱ńdá xí kisꞌińdo kui ngi̱ndiee̱, kui xi Néná tsꞌaxié xikótsꞌen kijí xota̱ Israee̱l, ko̱jo ki̱a̱ kijítji̱ngi kui kjo̱a̱kiti xi katsꞌénda já re xi chji̱a̱ni na̱xi̱ńdá Israee̱l. 9Kó xota̱ Israee̱l ꞌma ꞌma katsꞌén ni xi kixi̱jín kondra̱a̱ Néná, ngatꞌa̱ katsꞌénda ngi̱ndie nínga nkꞌa ngayeje na̱xi̱ńdáꞌniuú, ndeskande nínga síndo tarieé, ngaskande ki̱a̱ ngi̱ndie nínga ꞌniuú na̱xi̱ńdáꞌniú xi tjíchjáꞌyaá, 10kó katsꞌénda xó nkꞌa, ko̱jo a̱sie̱én na̱ ne Aseraa̱ nga ngo nga ngo tji̱ngi̱, ko̱jo ngindiee̱ ngayeje yá xí síndo tsingá, 11kó ki̱a̱ ítí nisije̱n ngayeje kui ngi̱ndie nínga nkꞌaa̱, xikó katsꞌén xota̱ na̱xi̱ńdá xí Néná tsꞌaxié, xikótsꞌèn kijí kui xotaa̱. Kó achichí ni xi ndajín xi katsꞌén nga katsꞌénkjaán kjo̱a̱xcha̱án Néná, 12ngatꞌa̱ ki̱a̱ katsꞌénxátꞌaa̱ kje̱ꞌe ne xi tsꞌénda xotaa̱, kui xi Néná ja̱bo̱a̱ je bi̱ katsoó: Ka̱májín si̱ꞌánjnú kui nii̱.
13Kó Néná katsꞌénxchánjo̱ nga katsꞌénkjién ngayeje jáchji̱ni̱e̱ꞌe̱én, ko̱jo já xí kotꞌasón, kó bi̱ katsoó: Ti̱ꞌankꞌoyàjnú yojojnú kjo̱a̱a̱ ndi̱yà xí ndajín xi ndyi̱mongínjnú, kó ti̱ꞌankjatjosónjnú kjo̱a̱botíxomana ko̱jo kjo̱a̱kitina, xikó kjiꞌi ngayeje Kjo̱a̱kiti xi An katsja an, kui xi katsjáa̱ xota̱ xi xchájnú, kui xi katsangiyáa̱ nga katsꞌénkjién án já moso̱na kui xi jáchji̱ni̱e̱ꞌe̱én. 14Ta̱nga kui xotaa̱ tsintꞌiéꞌénjín, kó ta̱sá katsꞌéntajá ini̱ma̱a̱, xikó katsꞌén xota̱ xi xchaá, kui xi kixi̱jín kamá ngindyi̱ko̱n Néná, kui xi Nee̱ kui. 15Kó katsꞌénchꞌó kjo̱a̱kitii̱, ko̱jo ni xi índajo̱ Néná xota̱ xi xchaá, ko̱jo ni xi atíxomaa̱ nga sa̱ꞌín katsaki, kó ta̱xkiya kijítji̱ngi ni xi jmí ni chjíjiín, kó ti̱ ni xi jmí ni chjíjiín kamá kui xotaa̱ nga, ko̱jo ki̱a̱ kijítji̱ngii̱ ni xi katsꞌén xota̱ na̱xi̱ńdá xí síndotꞌa nga ngo foaꞌatjiyajoo̱n, kjo̱a̱a̱ kui xi Néná atíxomaa̱ nga bo̱a̱jín sa̱ꞌín xikó ndyi̱tsꞌèn kuí xotaa̱. 16Kó índomasien ngayeje kjo̱a̱botíxomaa̱ Néná, kui xi Nee̱ kui, kó katsꞌénńdá nga katsꞌénda a̱sie̱én jó ndií cho̱yojo, ko̱jo a̱sie̱én na̱ ne Aseraa̱, kó katsꞌéndikón ngayeje ńño xi tjín nkꞌa jàn, ko̱jo ki̱a̱ katsꞌénxátꞌaa̱ ne Baa̱l. 17Kó ngaskande kjo̱a̱tjó xi ꞌbítí ngi̱jin ndiꞌií katsꞌén ndí xí xi̱ꞌii̱n ko̱jo ndí xí ínchjiín, ko̱jo katsꞌén kjo̱a̱tjiꞌe, ko̱jo askotꞌasón, kó ni xi ndajín katsꞌén ngindyi̱ko̱n Néná, tsi̱ꞌe̱ nga katsꞌénkjaán kjo̱a̱xcha̱án Kuí.
18Kuíni nga Néná achichí katsꞌénxchánjo̱ xota̱ Israee̱l, kó katsꞌénkjii̱n yojoo̱ kui xotaa̱, kó ta̱kuítsí xota̱ tji̱e̱e̱ Jundáa̱ xi kisꞌińdo ngase. 19Ta̱nga ti̱nde xota̱ tji̱e̱e̱ Jundáa̱ katsꞌénkjatjosónjín kjo̱a̱botíxomaa̱ Néná, kui xi Nee̱ kui nga, ta̱sá ki̱a̱ kijítji̱ngi kjo̱a̱xcha̱á xí je ndyi̱tsꞌèn xota̱ Israee̱l. 20Kósꞌe̱ Néná katsꞌénchꞌó ngayeje xota̱ tji̱e̱e̱ Israee̱l, kó katsꞌéndasee̱n ko̱jo katsꞌénkjaꞌatio kjo̱a̱ni̱ma̱, nga katsꞌénkꞌasꞌien ngi̱ya tsja xota̱ xi sa̱ꞌínchejeé, ngaskande nga tsangatji̱ngii̱ ngindyi̱ko̱n kui.
21Kjiꞌanga Néná jaꞌáxínboaꞌá xota̱ Israee̱l ki̱a̱ ngi̱jii̱n xota̱ tji̱e̱e̱ Ndabii̱, kui xotaa̱ re katsꞌén Jeroboaa̱n ndií Nabaa̱t, kó Jeroboaa̱n katsꞌénkjii̱n yojoo̱ xota̱ Israee̱l, tsi̱ꞌe̱ nga ngiti̱ ki̱a̱jín kijítji̱ngini Néná, kó kui xotaa̱ katsꞌén jé xí ta̱nisién ꞌniú. 22Kó xota̱ Israee̱l bo̱a̱ katsꞌén xikoó ngayeje jé xí katsꞌén Jeroboaa̱n, kó íjñámasienjín kui nii̱, 23ngaskande nga Néná jaꞌáxín xota̱ Israee̱l ngindyi̱ko̱n kui, xikó má katsó nga katsꞌénkíchji̱a̱ jáchji̱ni̱e̱ꞌe̱én, kui xi mosoo̱, kó bo̱a̱ tsꞌén nga xota̱ Israee̱l tsangínjo̱ꞌniúní ki̱a̱ nangii̱, nga tsangínjo̱ nangi Asiria̱, ngaskande kui ni̱xtjii̱n.
Nda̱ ree̱ nangi Asiriaa̱ katsangiya xota̱ ki̱a̱ nangi Samaria̱
24Kó nda̱ ree̱ nangi Asiriaa̱ jachójo̱ xota̱ xi chji̱a̱ni nangi Babilonia̱, ko̱jo nangi Kutaa̱, ko̱jo nangi Abaa̱, ko̱jo nangi Amaa̱t, ko̱jo nangi Sefarbaii̱n, kó ki̱a̱ índo na̱xi̱ńdáꞌniú xí tjín ki̱a̱ nangi Samaria̱, ngajoo̱ xota̱ Israee̱l, kó kui xotaa̱, ki̱a̱ kisꞌińdo nangi Samaria̱, ko̱jo ki̱a̱ na̱xi̱ńdáꞌniuú. 25Ta̱nga kó nga katsakjónjínni Néná, kuíni nga kjiꞌanga ítsꞌi̱yanii̱ nga kisꞌińdo ki̱a̱a̱, Néná katsangiyaa̱ xandi̱je̱ kondra̱a̱ kui xota̱a̱, kó achichí má xota̱ xi jesoón. 26Kósꞌe̱ bi̱ kiꞌmií nda̱ ree̱ nangi Asiriaa̱: Kui xota̱ na̱xi̱ńdá xi kꞌinje̱ ji, kó ki̱a̱ ikꞌínde ji na̱xi̱ńdáꞌniuú nangi Samariaa̱, bejín kjo̱a̱xcha̱á ne xi tjín kuí nangii̱, kó kui Nee̱ katsangiya xandi̱je̱ ngi̱jii̱n kui xotaa̱, kó kui cho̱o̱ ndyi̱tsꞌènkꞌién, ngatꞌa̱ bejín kjo̱a̱xcha̱á Nee̱ kui tꞌanangii̱.
27Kó nda̱ ree̱ nangi Asiriaa̱, bi̱ katsó nga atíxoma: Tangínjo̱jnú kui ngi̱ndiee̱ ngo chináꞌmi xi kjindibájo̱nijnú jàn jàn, kó ki̱a̱ ngatjí, kó ki̱a̱ ngatꞌíjñá, kó ngatakoyaà kjo̱a̱xcha̱á Nee̱ kui tꞌanangii̱.
28Kó ngo chináꞌmi xi kjindibájo̱ni nangi Samaria̱, ki̱a̱ jachókꞌíjñá na̱xi̱ńdáꞌniú Betee̱l, kó akóyaá kótsꞌèn chjiéngá sku̱i̱e̱ndikón Néná. 29Ta̱nga nga ngo nga ngo na̱xi̱ńdaá to̱kó katsꞌéndara ngase ne xi katsꞌéndikón, kó ki̱a̱ índo ngi̱ya ndiꞌandikón xí síndo nínga nkꞌaa̱, kui xi xota̱ xi chji̱a̱ni nangi Samariaa̱ katsꞌénda, tsi̱ꞌe̱ nga ngo nga ngo na̱xi̱ńdáꞌniú nínga kisꞌińdo. 30Kó bo̱a̱ tsꞌén já xíꞌín xi chji̱a̱ni nangi Babiloniaa̱, katsꞌéndaa̱ ngo a̱si̱én Sukoo̱t-Benoo̱t, kó xi chji̱a̱ni nangi Kutaa̱, katsꞌéndaa̱ ngo a̱si̱én Nerngaa̱l, kó xi chji̱a̱ni nangi Amaa̱t, katsꞌéndaa̱ ngo a̱si̱én Asimaa̱. 31Xota̱ tji̱e̱e̱ Ee̱b katsꞌénda ne Nibaa̱ ko̱jo Tartaa̱k, kó xota̱ xi chji̱a̱ni Sefarbaii̱n, ndií ítí ngi̱jin ndiꞌií nga katsꞌénkꞌasꞌiee̱n ngo kjo̱a̱tjó, nga katsꞌéndikón ne Andramelee̱k ko̱jo Anamelee̱k, kui ne xi chji̱a̱ni Sefarbaii̱n. 32Ndatsi kui xotaa̱ kamábendikón Néná, kó ngi̱jii̱n kui katsjáxaá chináꞌmi xi katsꞌenxá ki̱a̱ ngi̱ndie nínga nkꞌaa̱, kui xi katsꞌénkꞌasꞌiee̱n kjo̱a̱tjó ki̱a̱ ndiꞌandikón xí síndoo̱ ngi̱ndie nínga nkꞌaa̱. 33Kó ti̱ kjiꞌaa̱ nga katsꞌéndikón Néná, ti̱ katsꞌéntsjaà ne xi xi kisꞌiee̱ kui nga, xikó kjiꞌi kjo̱a̱xcha̱á kui na̱xi̱ńdá nínga tsangínjo̱. 34Kó ngaskande ngotꞌe̱, to̱kó bo̱a̱ ndyi̱tsꞌèn xikoó kui kjo̱a̱xcha̱á xí kisꞌiee̱ ngasꞌe̱: Nga tsakjónjín Néná, ti̱nde bo̱a̱jín ndyi̱tsꞌèn xikó tsó kjo̱a̱kitii̱ ko̱jo kjo̱a̱botíxomaa̱ kui xi Néná katsjaá xota̱ tji̱e̱e̱ Jakoo̱b, kui nda̱ xi Israee̱l ítꞌajaꞌén kuí. 35Kó Néná ja̱bo̱a̱ jè índajo̱ ngo ni, nga bi̱ katsoó:
Ngata̱ ndakonjínmájnú kje̱ꞌe ne, ti̱nde ngata̱ bosiénjínjnúu̱ tikónjnú, ti̱nde ngata̱ ki̱a̱jín niꞌánxátꞌajnúu̱, ti̱nde ngata̱ niꞌánkꞌasꞌiénjínjnúu̱ kjo̱a̱tjó, 36ta̱kuítsí Néná xí ti̱ꞌantsjàjnúu̱, kui xi tsꞌaxiéjnú ki̱a̱ nangi Ejiptoo̱ nga katsꞌénkjién ngaꞌniuú, ko̱jo nga yejéntie tsja, Kuí boá xi chjiéngá xcha̱ndikónjnú, kó Kuí boá xi ko̱si̱e̱njnúu̱ tikójnú, ko̱jo kuí boá xi si̱ꞌankꞌasꞌienjnúu̱ kjo̱a̱tjó. 37Ndyiojón ndyiojón ti̱ꞌankjatjosónjnú kjo̱a̱kiti ko̱jo kjo̱a̱botíxoma xi katsꞌénꞌindójnúꞌun, kó ngata̱ ndakonjínmájnú ne xi kje̱ꞌe, 38ngata̱ niꞌánchíyájínjnú ni xi indajo̱jnúꞌun jún, ti̱nde ngata̱ ndakonjínmájnú kje̱ꞌe ne, 39Néná xí Nejnú, Kuí boá xi cha̱ndikónjnú, kó Kuí boá xi kꞌo̱xiéꞌájnú ngi̱ya tsja ngayeje kondra̱jnú.
40Ta̱nga kui xotaa̱ tsintꞌiéjín, kó ta̱sá bo̱a̱ katsꞌén xikó kjiꞌi kjo̱a̱xchá xí kisꞌiee̱ ngasꞌe̱. 41Kó bo̱a̱ tsꞌén nga kui xota̱ na̱xi̱ńdaá katsꞌéndikón Néná, ta̱nga ti̱ kjiꞌa katsꞌéntsjaà a̱sie̱én ni xi ne katsoó nga, kó ti̱ bo̱a̱ ti̱ katsꞌén ndií, ko̱jo ndíndee̱, xikó katsꞌén xi xota̱ xchaá, ti̱ bo̱a̱ ti̱ katsꞌén ngaskande ngotꞌe̱ nga.
Currently Selected:
2 Já ree̱ 17: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
