2 Já ree̱ 16
16
Nga kamá Akaa̱ ree̱ nangi Jundáa̱
(2Kr 28:1-27)
1Nó tjiꞌún jó nga atíxoma Pekaa̱ ndií Remaliyaa̱, ítsꞌi̱yanii̱ nga atíxoma Akaa̱ ndií Jotaa̱n, nda̱ ree̱ nangi Jundáa̱. 2Kan noó Akaa̱ nga ítsꞌi̱yanii̱ nga atíxoma, kó tjiꞌún ngo nó kamaá nga atíxoma ki̱a̱ na̱xi̱ńdáꞌniú Jerusale̱n, ta̱nga katsꞌénjín ni xi kixi̱ ngindyi̱ko̱n Néná, xikó katsꞌén Ndabii̱ xota̱ xi xchaá. 3Ta̱sá bo̱a̱ katsꞌén xikó katsꞌén já re xi chji̱a̱ni na̱xi̱ńdá Israee̱l, kó ngaskande ndií katsꞌénkꞌasꞌien ngi̱jin ndiꞌií, xikó kjiꞌi ni xi ta̱nisién ꞌniú chꞌokjiꞌi xi katsꞌén kui xota̱ na̱xi̱ńdá xí Néná, ja̱ bo̱a̱ je tsꞌaxié xikótsꞌèn kijí xota̱ Israee̱l. 4Kó ti̱ katsꞌénkꞌién ko̱jo ítí nisije̱n ki̱a̱ ngi̱ndie nínga nkꞌaa̱, ko̱jo nínga tji̱ngi̱i̱, ko̱jo ngindie ngayeje yá xí tsingá kisꞌijñaa̱.
5Kósꞌe̱ Resii̱n, nda̱ ree̱ nangi Siriaa̱, ko̱jo Pekaa̱ ndií Remaliyaa̱, nda̱ ree̱ Israee̱l, kijí nijíngí na̱xi̱ńdáꞌniú Jerusale̱n nga kijíkjánjo̱ Akaa̱, ta̱nga kamájín katsꞌeén. 6Kui ni̱xtjin jàn Resii̱n, nda̱ ree̱ nangi Siriaa̱, katsꞌéntsi̱ꞌe̱ nginí nangi Elaa̱t, kó tsangatji̱ngii̱ xota̱ xi chji̱a̱ni Jundáa̱ ki̱a̱ nangi Elaa̱t, kó xota̱ Siriaa̱ jachó nangi Elaa̱t, ki̱a̱ ngindie nínga kisꞌińdo ngaskande ngotꞌe̱.
7Kósꞌe̱ Akaa̱ katsangiyaa̱ xota̱ chji̱ni̱e̱ꞌén Tinglaa̱t-Pilesee̱r, nda̱ ree̱ nangi Asiriaa̱, kó bi̱ katsoó: Mosòo̱ boá an ko̱jo ndíi̱, ndibénijíngí ji, kó chje̱ꞌéxínní ngi̱ya tsja nda̱ ree̱ nangi Siriaa̱, ko̱jo ngi̱ya tsja nda̱ ree̱ na̱xi̱ńdá Israee̱l, kui xi je an ndyi̱kjánjo̱na. 8Kó Akaa̱ iskjíbé to̱ntiboa, ko̱jo to̱nsinié xi kisꞌie ki̱a̱ Ndiꞌaa̱ Néná, ko̱jo nínga chjaꞌátjó to̱o̱n nda̱ ree̱, kó katsangiyaa̱ nda̱ ree̱ nangi Asiriaa̱ xikoó tsi ngo ni xi ta̱ katsjárií.
9Kó nda̱ ree̱ nangi Asiria̱, katsꞌénseén ni xi tsíꞌaá, kó kijínijíngí nda̱ ree̱ nangi Asiriaa̱, nga kijíkjánjo̱ na̱xi̱ńdáꞌniú Ndamasko̱, kó katsꞌéntsi̱ꞌe̱, kó kijíjo̱ꞌniú xota̱ xi kisꞌińdo na̱xi̱ńdáꞌniú Sii̱r, kó katsꞌénkꞌién Resii̱n.
10Kó kjiꞌanga nda̱ re Akaa̱ kijí ki̱a̱ na̱xi̱ńdáꞌniú Ndamasko̱, nga kijíkoón Tinglaa̱t-Pilesee̱r, nda̱ ree̱ nangi Asiriaa̱, kamábe ṉchandikón xí tikón ki̱a̱ na̱xi̱ńdáꞌniú Ndamasko̱, kó nda̱ re Akaa̱ katsangiya chináꞌmi ngito̱ko̱ Uriyaa̱, ko̱jo ngo chi̱bo̱a̱ kótsꞌèn kamánda kui ṉchandikoón, xikó má kjiꞌi xi niꞌándaa. 11Kó chináꞌmi ngito̱ko̱ Uriyaa̱ katsꞌénda ngo ṉchandikón, xikó má kjiꞌi chi̱bo̱a̱ xi katsangiya nda̱ re Akaa̱ nga kjindibáni na̱xi̱ńdáꞌniú Ndamasko̱, bo̱a̱ má kjiꞌi xi katsꞌénda chináꞌmi ngito̱ko̱ Uriyaa̱, ngindiee̱ nga kjo̱chó nginí ki̱a̱ na̱xi̱ńdáꞌniú Ndamasko̱, nda̱ re Akaa̱.
12Kó ngije jachó nda̱ ree̱ nga kjindibáni na̱xi̱ńdáꞌniú Ndamasko̱, kó nga kamábe ṉchandikoón, kijíkóntiñaa̱ kui ṉchaa̱n, kósꞌe̱ katsꞌénkꞌasꞌien kjo̱a̱tjó ki̱a̱a̱, 13kó ítí kjo̱a̱tjó xi ꞌbítí ki̱a̱a̱ ko̱jo katsꞌénkꞌasꞌien kjo̱a̱tjó, kó iskjitjónjón nisije̱n kui nii̱, ko̱jo jiín cho̱ xi katsꞌénkꞌasꞌien kjo̱a̱a̱ kjo̱a̱xioó ki̱a̱ ṉchandikoón.
14Kó kui ṉchandikón xi ki̱cha̱ bronsee̱, xi tikón ngindyi̱ko̱n Néná, xín íjñá, kó ki̱a̱ kijíjo̱ xtji̱e̱e̱n ngamasiee̱n ṉchandikoón ko̱jo na̱ngo̱xi̱i̱ Néná, ki̱a̱ xtji̱e̱e̱n ta̱ꞌii̱n nínga tikón ṉchandikoón. 15Kó nda̱ re Akaa̱, bi̱ katsoó chináꞌmi ngito̱ko̱ Uriyaa̱:
Ki̱a̱ nga̱soón kui ṉchandikón xí jee̱, ki̱a̱ tꞌítí ji kjo̱a̱tjó xi ꞌbítí nga ta̱jño̱ó, ko̱jo kjo̱a̱tjoó ni xi maxchá jno̱o̱ xi ꞌbítí nga kamángixoón, ko̱jo kjo̱a̱tjó xi ꞌbítí nda̱ ree̱, ko̱jo kjo̱a̱tjó xi ni xi maxchá jno̱o̱, ko̱jo kjo̱a̱tjó xi ꞌbítí ngayeje xota̱ na̱xi̱ńdá xí chji̱a̱ni kui tꞌanangii̱, ko̱jo kjo̱a̱tjó xi ni xi maxchá jno̱o̱, kó chjetjénjén ji jiín kui cho̱o̱ xi kiniꞌánkꞌieén, ta̱nga kui ṉchandikón xí ki̱cha̱ bronsee̱ tsa̱ꞌa̱n boá, tsi̱ꞌe̱ nga ki̱a̱ kosíyáa̱ ni Néná.
16Kó chináꞌmi Uriyaa̱ bo̱a̱ má katsꞌén xikó má katsoó nda̱ re Akaa̱. 17Kó nda̱ re Akaa̱ tsatie yátie xi síndoo̱ kui ngindiee̱ yáseé, kó jaꞌáxiín nínga síndo ngi̱ndie nínga mindyia ndáfoaa̱, kó ki̱a̱ kijíjo̱ ki̱a̱ ndáchíkoón, kui xi síndosón cho̱yojo xi̱ꞌin xi ki̱cha̱ bronsee̱, kó ki̱a̱ índo nga̱són tꞌanangi nínga kjiyaa̱ ndi̱jo̱o̱. 18Kó ta̱ngatꞌanii̱ nda̱ ree̱ nangi Asiriaa̱, nga asíkjo nga̱ntjo̱a̱a̱ nga ni̱xtjin ndikoón kui xi tikón ki̱a̱ Ndiꞌaa̱ Néná, kui xi kiniꞌánda ki̱a̱ ngi̱ya kjii̱n, ko̱jo kui nga̱ntjo̱a̱ xi tikón xtji̱e̱e̱n ndi̱tsee̱n, kui xi je tikónda tsi̱ꞌe̱ nda̱ ree̱ nangi Asiriaa̱.
19Kó ngayeje ni xi ngase xi katsꞌén Akaa̱, a ki̱a̱jín kjitꞌa ki̱a̱ Chꞌo̱ Xo̱jo̱n nínga kjitꞌa ngayeje ni xi katsꞌén já ree̱ nangi Jundáa̱. 20Kó kjiꞌanga kꞌien nda̱ re Akaa̱ ki̱a̱ nijan kisꞌijñajo̱ xi xota̱ xi xchaá, kó ki̱a̱ nijan akjanijínjo̱ na̱xi̱ńdáꞌniuú Ndabii̱, kó ndií Akaa̱ xi ꞌmí Esekiyaa̱, kisꞌijña ngajoo̱.
Currently Selected:
2 Já ree̱ 16: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
