2 Já ree̱ 15
15
Kjiꞌanga Asariyaa̱ kamá ree̱ nangi Jundáa̱
(2Kr 26:3-5,16-23)
1Nó xí kan yitonii̱ Jeroboaa̱n nga kamá nda̱ re xi chji̱a̱ni na̱xi̱ńdá Israee̱l, ítsꞌi̱yanii̱ nga atíxoma Asariyaa̱ ndií Amasiyaa̱, nda̱ ree̱ nangi Jundáa̱. 2Tjiꞌún jó noó kui nda̱a̱ nga ítsꞌi̱yanii̱ nga atíxoma, kó ichítié ko̱jo jó nó kamaá nga atíxoma ki̱a̱ na̱xi̱ńdáꞌniú Jerusale̱n, kó na̱aa̱n kui nda̱a̱, na̱ Jekoliyaa̱ kiꞌmí, xi chji̱a̱ni na̱xi̱ńdáꞌniú Jerusale̱n.
3Kó katsꞌén ni xi kixi̱ ngindyi̱ko̱n Néná, xikó má katsꞌén Amasiya̱ na̱ꞌmii̱. 4Ta̱nga kachjeꞌéxínjín ngi̱ndie nínga nkꞌaa̱, ngatꞌa̱ xota̱ na̱xi̱ńdaá, to̱kó katsꞌénkꞌasꞌien ngase kjo̱a̱tjó, ko̱jo ítí ngase nisijee̱n ki̱a̱ ngi̱ndie nínga nkꞌaa̱. 5Kó Néná katsjaá ngo chiꞌin xi tsꞌénkjátsón tji̱xin yojoná kuí nda̱ ree̱, ngaskande nga kꞌien, kó ngo ndiꞌa xi xín tikón soboá kisꞌijña. Kó Jotaa̱n ndií nda̱ ree̱ ki̱a̱ kisꞌijña kui ndiꞌaa̱, nga atíxomaa̱ xota̱ na̱xi̱ńdaá.
6Kó ngayeje ni xi ngase xi katsꞌén Asariyaa̱, a ki̱a̱jín kjitꞌa ki̱a̱ Chꞌo̱ Xo̱jo̱n nínga kjitꞌa ni xi katsꞌén já ree̱ nangi Jundáa̱. 7Kó Asariyaa̱ kꞌien, kó ki̱a̱ nijan kisꞌijñajo̱ xota̱ xi xchaá, kó ki̱a̱ nijan akjanijínjo̱ xi xchaá ki̱a̱ na̱xi̱ńdáꞌniuú Ndabii̱, kó Jotaa̱n ndií kui nda̱a̱, atíxoma ngajoo̱.
Nga kamá Sakariyaa̱ nda̱ ree̱ na̱xi̱ńdá Israee̱l
8Nó xí kantjiꞌún ján nga kisꞌijña Asariyaa̱, nda̱ re xi chji̱a̱ni nangi Jundáa̱, Sakariyaa̱ ndií Jeroboaa̱n, jun sá kamaá nga atíxoma na̱xi̱ńdá Israee̱l, ki̱a̱ na̱xi̱ńdáꞌniú Samaria̱. 9Kó katsꞌén ni xi ndajín ngindyi̱ko̱n Néná, xikó má katsꞌén xi xchaá, kó íjñámasienjín jé xí katsꞌén Jeroboaa̱n ndií Nabaa̱t, kui xi katsꞌén nga katsꞌénjé xota̱ Israee̱l.
10Kó Saluu̱n ndií Jabee̱, índa ngo ni kondraa̱ kui, kó katsꞌénꞌoón ngindyi̱ko̱n xota̱ na̱xi̱ńdaá nga katsꞌénkꞌién, kósꞌe̱ kui atíxoma ngajoo̱.
11Kó ngayeje ni xi ngase xi katsꞌén Sakariyaa̱, ki̱a̱ kjitꞌa Chꞌo̱ Xo̱jo̱n nínga kjitꞌa ngayeje ni xi katsꞌén já re xi chji̱a̱ni na̱xi̱ńdá Israee̱l. 12Kuí bí kui eén xi katsó Néná nga tsíchji̱a̱jo Jeuu̱, nga bi̱ katsoó: Xota̱ tji̱e̱ tse̱, ngaskande xi ma nijoón tji̱e̱e̱ xota̱a̱ nga kuí boá xi ko̱tíxoma na̱xi̱ńdá Israee̱l. Kó bo̱a̱ kamá.
Nga atíxoma Saluu̱n na̱xi̱ńdá Israee̱l
13Kó Saluu̱n ndií Jabee̱, ítsꞌi̱yanii̱ nga atíxoma, nó xí kantjiꞌún nijón nga atíxoma nda̱ re Usiyaa̱ ki̱a̱ nangi Jundáa̱, kó ngo sá kamaá nga atíxoma ki̱a̱ na̱xi̱ńdáꞌniú Samaria̱, 14ngatꞌa̱ Menaee̱n ndií Ngandii̱, kijínijíngí nga jatjoni na̱xi̱ńdáꞌniú Tirsaa̱, sꞌe̱ kijí na̱xi̱ńdáꞌniú Samaria̱, kó ki̱a̱ katsꞌénꞌoón nga katsꞌénkꞌién Saluu̱n ndií Jabee̱, kó kui kisꞌijña ngajoo̱ nga atíxoma.
15Kó ngayeje ni xi ngase xi katsꞌén Saluu̱n ko̱jo ni xi índa, ki̱a̱ kjitꞌa Chꞌo̱ Xo̱jo̱n xi kjitꞌa ngayeje ni xi katsꞌén já ree̱ na̱xi̱ńdá Israee̱l.
Nga kama Menaee̱n ree̱ na̱xi̱ńdá Israee̱l
16Kó kui ni̱xtjin jàn Menaee̱n askjanjo̱ na̱xi̱ńdáꞌniú Tifsaa̱, ko̱jo ngayeje xota̱ xi síndo ki̱a̱a̱, ko̱jo ngayeje ndí nangi xi síndotꞌa kui ngi̱ndiee̱, ndeskande na̱xi̱ńdáꞌniú Tirsaa̱, ngatꞌa̱ kachjáxꞌájiín nga̱ntjo̱a̱a̱ kui ngi̱ndiee̱, kó kuíni nga askjanjo̱ni, kó iskjíxꞌá ndo̱bo̱a̱ndií ngayeje ínchjín xí ndyi̱yaꞌa ndií. 17Nó xí kantjiꞌún nijon nga kisꞌijña Asariyaa̱, nda̱ re xi chji̱a̱ni nangi Jundáa̱, Menaee̱n ndií Ngadii̱, ítsꞌi̱yanii̱ nga atíxoma, kó tie nó kamaá nga atíxoma na̱xi̱ńdá Israee̱l, ki̱a̱ na̱xi̱ńdáꞌniú Samaria̱. 18Kó ni xi ndajín katsꞌén ngindyi̱ko̱n Néná, kó ngayeje ni̱xtjin nga kisꞌijña nga íjñámasienjín jé xí katsꞌén Jeroboaa̱n ndií Nabaa̱t, kui xi katsꞌén nga katsꞌénjé xota̱ Israee̱l.
19Kó Puu̱l, nda̱ re xi chji̱a̱ni nangi Asiria̱ jachókjánjo̱ kui na̱xi̱ńdaá, kó Menaee̱n ngo mi̱ ma to̱ntiboa xi katsjaá Puu̱l, tsi̱ꞌe̱ nga ko̱síko̱jo nga ꞌniú kꞌuijñá kui ngi̱ndie nínga botixómá. 20Kó Menaee̱n xota̱ na̱xi̱ńdá Israee̱l tsꞌaxieé ngayeje kui to̱ntiboaa̱, kó índa nga xota̱ xi cho̱o̱n nga ngo nga ngo sa̱ꞌínkꞌasꞌiee̱n nda̱ ree̱ nangi Asiriaa̱ masien kilo̱ to̱ntiboa. Kósꞌe̱ nda̱ ree̱ nangi Asiriaa̱ xín kijí, kó ngiti̱ ki̱a̱jín kisꞌijña ngase kui na̱xi̱ńdaá ngijee̱.
21Kó ngayeje ni xi ngase xi katsꞌén Menaee̱n, a ki̱a̱jín kjitꞌa ki̱a̱ Chꞌo̱ Xo̱jo̱n nínga kjitꞌa ni xi katsꞌén já re xi chji̱a̱ni na̱xi̱ńdá Israee̱l. 22Kó Menaee̱n kꞌien, kó nijan kisꞌijñajo̱ xota̱ xi xchaá, kó Pekajiya̱ ndií kisꞌijña ngajoo̱.
Nga kamá Pekajiyaa̱ ree̱ na̱xi̱ńdá Israee̱l
23Nó ichítié nga kisꞌijña Asariyaa̱, nda̱ re xi chji̱a̱ni nangi Jundáa̱, Pekajiyaa̱ ndií Menaee̱n, ítsꞌi̱yanii̱ nga atíxoma na̱xi̱ńdá Israee̱l, ki̱a̱ na̱xi̱ńdáꞌniú Samaria̱, kó jó nó kamaá ki̱a̱a̱. 24Kó ni xi ndajín katsꞌén ngindyi̱ko̱n Néná, kó ki̱a̱ kijítji̱ngi jé xí katsꞌén Jeroboaa̱n ndií Nabaa̱t, kui xi katsꞌén nga katsꞌénjé xota̱ Israee̱l.
25Kó nda̱ xi asíko̱jo kui xi ꞌmí Pekaa̱ ndií Remaliyaa̱, nda̱ xi ngito̱ko̱o̱ ichítié já xí chji̱a̱ni nangi Ngalaa̱nd kamá, kondra̱ kisꞌijñanii̱, kó katsꞌénkꞌién kui ko̱jo Arngoo̱b, ko̱jo Ariee̱, ki̱a̱ na̱xi̱ńdáꞌniú xí chji̱a̱ni nangi Samaria̱. Sꞌe̱ kui kisꞌijña re ngajoo̱.
26Kó ngayeje ni xi ngase xi katsꞌén Pekajiyaa̱, kꞌi̱e̱ kjitꞌa Chꞌo̱ Xo̱jo̱n nínga kjitꞌa ngayeje ni xi katsꞌén já ree̱ na̱xi̱ńdá Israee̱l.
Nga kamá Pekaa̱ ree̱ na̱xi̱ńdá Israee̱l
27Nó ichítié ko̱jo jó nga kisꞌijña Asariyaa̱, nda̱ re xi chji̱a̱ni nangi Jundáa̱, ítsꞌi̱yani Pekaa̱ ndií Remaliyaa̱ nga atíxoma na̱xi̱ńdá Israee̱l, ki̱a̱ na̱xi̱ńdáꞌniú Samaria̱, kó kan nó kamaá nga atíxoma ki̱a̱a̱. 28Kó ni xi ndajín katsꞌén ngindyi̱ko̱n Néná, ngatꞌa̱ ki̱a̱ kijítji̱ngi jé xí katsꞌén Jeroboaa̱n ndií Nabaa̱t, kui xi katsꞌén nga katsꞌénjé xota̱ na̱xi̱ńdá Israee̱l.
29Kui ni̱xtjin jàn nga kisꞌijña Pekaa̱, nda̱ ree̱ na̱xi̱ńdá Israee̱l, jachó nda̱ Tinglaa̱t-Pilesee̱r, nda̱ ree̱ nangi Asiriaa̱, kó katsꞌéntsi̱ꞌe̱ na̱xi̱ńdáꞌniú Ijoo̱n, ko̱jo na̱xi̱ńdáꞌniú Abee̱t-Betee̱t-Maakaa̱, ko̱jo na̱xi̱ńdáꞌniú Janoaa̱, ko̱jo na̱xi̱ńdáꞌniú Sendee̱, ko̱jo na̱xi̱ńdáꞌniú Asoo̱r, ko̱jo na̱xi̱ńdáꞌniú Ngalaa̱nd, ko̱jo na̱xi̱ńdáꞌniú Ngalilea̱, ko̱jo ngayeje nangii̱ xota̱ tji̱e̱e̱ Neftalii̱, kó kijíjo̱ꞌniú xota̱ xi chji̱a̱ni nangi Asiria̱.
30Kó nó kan nga kisꞌijña Jotaa̱n ndií Usiyaa̱, ndíndeè Elaa̱, índa ngo ni xi ndajín kondra̱a̱ Pekaa̱ ndií Remaliyaa̱, kó katsꞌénꞌoón, sꞌe̱ katsꞌénkꞌién, kó kui kisꞌijña ree̱ ngajoo̱.
31Kó ngayeje ni xi ngase xi katsꞌén Pekaa̱, ki̱a̱ kjitꞌa Chꞌo̱ Xo̱jo̱n xi kjitꞌa ngayeje ni xi katsꞌén já re xi chji̱a̱ni na̱xi̱ńdá Israee̱l.
Nga kamá Jotaa̱n ree̱ nangi Jundáa̱
(2Kr 27:1-9)
32Nó xí ma joó nga kisꞌijña Pekaa̱ ndií Remaliyaa̱, nda̱ ree̱ na̱xi̱ńdá Israee̱l, ítsꞌi̱yanii̱ nga atíxoma Jotaa̱n ndií Usiyaa̱, nda̱ ree̱ nangi Jundáa̱. 33Kan ún noó nga ítsꞌi̱yanii̱ nga atíxoma, kó tjiꞌún ngo nó kamaá nga atíxoma ki̱a̱ na̱xi̱ńdáꞌniú Jerusalee̱n, na̱aa̱n kui nda̱a̱ na̱ Jerusa̱ kiꞌmí, kó tsa̱kji̱ín Sandoo̱k kamá.
34Kó Jotaa̱n katsꞌén ni xi kixi̱ ngindyi̱ko̱n Néná, xikó má katsꞌén Usiya̱ na̱ꞌmii̱. 35Ta̱nga kachjeꞌéxínjín ngi̱ndie nínga nkꞌaa̱, ngatꞌa̱ xota̱ na̱xi̱ńdaá, to̱kó katsꞌénkꞌasꞌien kjo̱a̱tjó, ko̱jo ítí nisijee̱n ki̱a̱ nínga nkꞌaa̱. Kuí boá kui nda̱a̱ xi katsꞌénda nga̱ntjo̱a̱ xi ꞌniú nkꞌaá Ndiꞌaa̱ Néná.
36Kó ngayeje ni xi ngase xi katsꞌén Jotaa̱n, a ki̱a̱jín kjitꞌa ki̱a̱ Chꞌo̱ Xo̱jo̱n nínga kjitꞌa ngayeje ni xi katsꞌén já ree̱ nangi Jundáa̱.
37Kui ni̱xtjin jàn Néná ítsꞌi̱yanii̱ nga katsangiya kondra̱a̱ nangi Jundáa̱ nda̱ xi ꞌmí Resii̱n, nda̱ ree̱ nangi Siria̱, ko̱jo Pekaa̱ ndií Remaliyaa̱.
38Kó Jotaa̱n kꞌien, kó ki̱a̱ nijan kisꞌijñajo̱ xota̱ xi xchaá, nga akjanijín ki̱a̱ na̱xi̱ńdáꞌniú Ndabii̱, kó Akaa̱ ndií kui nda̱a̱, kisꞌijña ngajoo̱.
Currently Selected:
2 Já ree̱ 15: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
