2 Já ree̱ 14
14
Amasiyaa̱ kamá ree̱ nangi Jundáa̱
(2Kr 25:1-28)
1Nó xí ma joó nga atíxoma re Joaa̱ ndií Joakaa̱, ki̱a̱ na̱xi̱ńdá Israee̱l, ítsꞌi̱yanii̱ nga atíxoma Amasiyaa̱ ndií Joaa̱, ki̱a̱ nangi Jundáa̱. 2Kan ún noó nga ítsꞌi̱yanii̱ nga atíxoma, kó kan nijan nó kamaá nga atíxoma ki̱a̱ na̱xi̱ńdáꞌniú Jerusale̱n, kó na̱aa̱n Joandaa̱n kiꞌmí, xi chji̱a̱ni na̱xi̱ńdáꞌniú Jerusale̱n. 3Kó Amasiyaa̱ katsꞌén ni xi kixi̱ ngindyi̱ko̱n Néná, ndatsi jmí tsi bo̱a̱ katsꞌén xikoó Ndabi̱ kui xi kamá xota̱ xchaá, ta̱sá bo̱a̱ má katsꞌén xikó katsꞌén Joaa̱ na̱ꞌmii̱. 4Ta̱nga jmí tsi kachjeꞌéxín ngi̱ndie nínga nkꞌaa̱, ngatꞌa̱ xota̱ na̱xi̱ńdaá to̱kó ki̱a̱ katsꞌénkꞌién ko̱jo ítí nisijee̱n, kui ngi̱ndie nínga nkꞌaa̱.
5Kó ngije ꞌniú kisꞌijña ngi̱ndie nínga atíxoma, katsꞌénkjiesón já moso̱ xi katsꞌénkꞌién, nda̱ re xi kamá na̱ꞌmii̱. 6Ta̱nga katsꞌénkjiesónjín ndií kui xota̱ xi katsꞌénkꞌién na̱ꞌmii̱, xikótsꞌèn kjitꞌa xo̱jo̱n kjo̱a̱kitii̱ Moisee̱, nínga Néná atíxoma nga bi̱ tsó: Ka̱májín si̱ꞌankꞌien na̱ꞌmii̱, kjo̱a̱a̱ ndií, ti̱nde ka̱májín si̱ꞌankꞌien ndií, kjo̱a̱a̱ na̱ꞌmii̱, ta̱sá chjiéngá ko̱yà nga ngo nga ngo ta̱ngatꞌanii̱ jé xí katsꞌén kuí.
7Kó Amasiyaa̱ katsꞌénkjiesón tie mi̱ xota̱ tji̱e̱e̱ Endoo̱n ki̱a̱ nínga Soón Na̱xa̱a̱, kó nga katsꞌén kjo̱a̱xcha̱án, katsꞌéntsi̱ꞌe̱ na̱xi̱ńdáꞌniú Selaa̱, kó Joktee̱l ítꞌajaꞌén kui na̱xi̱ńdáꞌniuú, ngaskande ngotꞌe̱.
8Kósꞌe̱ Amasiyaa̱ katsangiyaa̱ já chji̱ni̱e̱ꞌén Jeoaa̱ ndií Joakaa̱, ndíndeè Jeuu̱, nda̱ ree̱ na̱xi̱ńdá Israee̱l, kó bi̱ katsoó:
Ja̱bíꞌi̱n, tsi̱ꞌe̱ nga xcha̱ kókón kje̱n. 9Kó Jeoaa̱, nda̱ re xi chji̱a̱ni na̱xi̱ńdá Israee̱l, bi̱ tsó én xí katsangiyaa̱ Amasiyaa̱, nda̱ ree̱ nangi Jundáa̱:
Yándáꞌyá xí tikón nangi Líbanoo̱, katsangiyaa̱ ngo én yákón xi tikón ki̱a̱ nangi Líbanoo̱, nga bi̱ katsoó: Te̱ꞌéndièe̱ nga ndí xíꞌínna ku̱i̱xanjo̱ tsa̱kjíi̱n. Kó nga jaꞌa ngo cho̱ tamá ki̱a̱ kꞌijñaá nangi Líbanoo̱, katsjánié kui yándáꞌyaá. 10Ja̱koxi̱ boá nga jè kiniꞌíi̱n nga ikixkénje̱ ji xota̱ tji̱e̱e̱ Endoo̱n, kó kamá nkꞌakon ini̱màa̱. ¡Ja̱ je ꞌnaxié ji yojòo̱, ta̱nga ti̱ndyinra ji ndiꞌàa̱! Míkjo̱a̱a̱ nga mejeén si̱ꞌin ji ngo ni xi ndajín kjiꞌi, tsi̱ꞌe̱ nga kꞌo̱ka ji, ko̱jo xota̱ tji̱e̱e̱ Jundáa̱ nga.
11Ta̱nga Amasiyaa̱ tsintꞌiéjín, kuíni nga kijínijíngí Jeoaa̱, nda̱ re xi chji̱a̱ni na̱xi̱ńdá Israee̱l, kó akoó kje̱n xkjín, kui ko̱jo Amasiyaa̱, nda̱ ree̱ nangi Jundáa̱, ki̱a̱ na̱xi̱ńdáꞌniú Bee̱t-Semee̱ kui xi nangi Jundáa̱. 12Kó xota̱ Israee̱l katsꞌénchaja xota̱ Jundáa̱, kó ngayejee̱ nga tsanga nínga síndo ndiꞌańjño xi tsi̱ꞌe̱. 13Kó Jeoaa̱, nda ree̱ na̱xi̱ńdá Israee̱l, ki̱a̱ katsoboá Amasiyaa̱, nda̱ ree̱ nangi Jundáa̱ ndií Joaa̱, ndíndeè Okosiyaa̱, ki̱a̱ na̱xi̱ńdáꞌniú Bee̱t-Semee̱, kó tsꞌasꞌien na̱xi̱ńdáꞌniú Jerusale̱n, kó akján xoó kui na̱xi̱ńdáꞌniuú, ndeskande nga̱ntjo̱a̱a̱ Efraii̱n, ngaskande nga̱ntjo̱a̱ xi tikón nijoo̱n, úchán ichítié ko̱jo kantié metro̱ kamá ngayeje kui xoó. 14Jaskan iskjíbé ngayeje to̱nsinié, ko̱jo to̱ntiboa, ko̱jo ngayeje ni xi kiniꞌánkjién ki̱a̱ Ndiꞌaa̱ Néná, ko̱jo kjo̱a̱cho̱o̱n ndiꞌaa̱ nda̱ ree̱, kó ti̱ katsoboá xota̱ nga, sꞌe̱ kijíꞌoyá nginí nangi Samaria̱.
15Kó ni xi ngase xi katsꞌén Jeoaa̱, ko̱jo kjo̱a̱xchán xí katsꞌén nga askjanjo̱ Amasiyaa̱, nda̱ ree̱ nangi Jundáa̱, a ki̱a̱jín kjitꞌa kui nii̱ ki̱a̱ Chꞌo̱ Xo̱jo̱n xi kjitꞌa ngayeje ni xi katsꞌén já ree̱ na̱xi̱ńdá Israee̱l. 16Kó Jeoaa̱ ki̱a̱ kisꞌijñajo̱ xota̱ xi xchaá, kó ki̱a̱ akjanijín nangi Samaria̱ nínga kjiyojonijín já re xi chji̱a̱ni na̱xi̱ńdá Israee̱l, kó Jeroboaa̱n ndií atíxoma ngajoo̱.
17Kó Amasiyaa̱ ndií Joaa̱, nda̱ ree̱ nangi Jundáa̱, tjiꞌún nó kisꞌijña ngase nga̱sondie, jaskan ngije kꞌien Jeoaa̱ ndií Joakaa̱, nda̱ ree̱ na̱xi̱ńdá Israee̱l. 18Kó ni xi ngase xi katsꞌén Amasiyaa̱, a ki̱a̱jín kjitꞌa ki̱a̱ Chꞌo̱ Xo̱jo̱n xi kjitꞌa ngayeje ni xi katsꞌén já ree̱ nangi Jundáa̱.
19Kó ki̱a̱ na̱xi̱ńdáꞌniú Jerusale̱n, índa tsi̱ꞌe̱ nga skjánjo̱ Amasiyaa̱, kó kui nda̱a̱ ki̱a̱ tsanga na̱xi̱ńdáꞌniú Lakii̱, ta̱nga ngaskande kui ngi̱ndiee̱ ikiyotji̱ngii̱, kó ki̱a̱ kiniꞌánkꞌién. 20Kó yojo kꞌiee̱n, ngo ndi̱je̱ ikꞌíjñasoón nga tsangínjo̱ ki̱a̱ na̱xi̱ńdáꞌniú Jerusalee̱n, kó ki̱a̱ nijan akjanijín nínga kjiyojonijín xi xchaá, ki̱a̱ na̱xi̱ńdáꞌniuú Ndabii̱. 21Kósꞌe̱ ngayeje xota̱ na̱xi̱ńdá Jundáa̱ iskjíbé Asariyaa̱, kui nda̱ xi sꞌe̱ tsí tjiꞌún jó noó, kó kui katseꞌéxaá tsi̱ꞌe̱ nga atíxoma ngajoo̱ Amasiya̱ na̱ꞌmii̱ kui nda̱a̱. 22Kuí boá xi iskjininkꞌa nginí na̱xi̱ńdáꞌniú Elaa̱t, kó kasako nginií nangi xota̱ tji̱e̱e̱ Jundáa̱, jaskan ngije kꞌien nda̱ ree̱, nga akjanijínjo̱ xi xchaá.
Kjiꞌanga atíxoma Jeroboaa̱n xi ma joó, ki̱a̱ na̱xi̱ńdá Israee̱l
23Nó tjiꞌuún nga kisꞌijña re Amasiyaa̱ ndií Joaa̱, re xi chji̱a̱ni nangi Jundáa̱, Jeroboaa̱n ndií Jeoaa̱, ítsꞌi̱yanii̱ nga atíxoma na̱xi̱ńdá Israee̱l, ki̱a̱ na̱xi̱ńdáꞌniú Samaria̱, kó yichán ngo nó kamaá nga atíxoma ki̱a̱a̱. 24Kó ni xi ndajín katsꞌén ngindyi̱ko̱n Néná, kó ki̱a̱ kijítji̱ngi ngayeje jé xí katsꞌén Jeroboaa̱n ndií Nabaa̱t, kui xi katsꞌén nga katsꞌénjé xota̱ Israee̱l.
25Kuí boá xi katsꞌéndaya nginí ndi̱yà tsindioó na̱xi̱ńdá Israee̱l, ndeskande nínga bitjasꞌi̱e̱nnii̱ na̱xi̱ńdáꞌniú Amaa̱t, ngaskande ndáchíkón Arabaa̱, xikó má katsó eén Néná, kui xi Nee̱ xota̱ Israee̱l, nga katsꞌénkíchji̱a̱ nda̱ mosoo̱, xi ꞌmí Jonaa̱ ndií Amitai̱, nda̱chji̱ni̱e̱ꞌe̱én Néná xi chji̱a̱ni nangi Ngaa̱t-Efee̱r. 26Ngatꞌa̱ Néná boá xi kamábe nga tsie kjo̱a̱ni̱ma̱ ndyi̱foaꞌatio xota̱ Israee̱l, ta̱ bo̱a̱a̱ xi moso̱ xi kastiñá, ko̱jo tsi xi tjimándé, kó nde jmíjín xi kamámejeén asíko̱jo xota̱ Israee̱l, 27ta̱nga Néná kamámejénjiín nga sa̱ꞌínkjié jaꞌeén xota̱ Israee̱l kui nga̱sondiee̱, kuíni nga tsꞌaxiéꞌáni, nga katsꞌénkjién tsja Jeroboaa̱n ndií Joaa̱.
28Kó ngayeje ni xi ngase xi katsꞌén Jeroboaa̱n, ko̱jo ngayeje kjo̱a̱xchán xí katsꞌén nga askjan, ko̱jo kótsꞌèn katsꞌéntsi̱ꞌe̱ nginí na̱xi̱ńdáꞌniú Ndamasko̱, ko̱jo na̱xi̱ńdáꞌniú Amaa̱t, ngi̱ndie xi ja̱bo̱a̱ je tsi̱ꞌe̱ Jundáa̱ katsaki, a ki̱a̱jín kjitꞌa kui Chꞌo̱ Xo̱jo̱n nínga kjitꞌa ngayeje ni xi katsꞌén já ree̱ na̱xi̱ńdá Israee̱l. 29Kó Jeroboaa̱n kꞌien, kó ki̱a̱ nijan kisꞌijñajo̱ xota̱ xi xchaá, ko̱jo já ree̱ na̱xi̱ńdá Israee̱l, kó Sakariyaa̱ ndií kui nda̱a̱, kisꞌijña ngajoo̱.
Currently Selected:
2 Já ree̱ 14: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
