2 Já ree̱ 13
13
Nga kamá Joakaa̱ ree̱ na̱xi̱ńdá Israee̱l
1Nó kan ján nga kisꞌijña Joaa̱ ndií Okosiyaa̱, re xi chji̱a̱ni nangi Jundáa̱, ítsꞌi̱yanii̱ nga atíxoma Joakaa̱ ndií Jeuu̱ na̱xi̱ńdá Israee̱l, ki̱a̱ na̱xi̱ńdáꞌniú Samaria̱, kó tjiꞌún jó nó kamaá nga atíxoma ki̱a̱a̱. 2Kó ni xi ndajín katsꞌén ngindyi̱ko̱n Néná, ngatꞌa̱ ki̱a̱ kijítji̱ngi ngayeje jé xí katsꞌén Jeroboaa̱n ndií Nabaa̱t, kui xi katsꞌén nga ngatsꞌénjé xota̱ Israee̱l, kó íjñámasienjín kui jeé. 3Kó kjo̱a̱xcha̱án Néná kjindibánié xota̱ Israee̱l, kó kjín ndi̱yà nga katsꞌénkꞌasꞌien ngi̱ya tsja Asaee̱l, nda̱ ree̱ nangi Siria̱, ko̱jo ngi̱ya tsja Bee̱n-Andaa̱nd ndií Asaee̱l.
4Ta̱nga Joakaa̱ tsíchji̱a̱a̱ Néná, kó Néná tsintꞌieé, ngatꞌa̱ kamábe kjo̱a̱ni̱ma̱ xi ndyi̱foaꞌatio xota̱ Israee̱l, ko̱jo kamábe kótsꞌèn nga nda̱ ree̱ nangi Siriaa̱ katsꞌénkjaꞌatio kjo̱a̱ni̱ma̱. 5Kó Néná katsjaá xota̱ Israee̱l ngo xi tsꞌaxiéꞌá, tsi̱ꞌe̱ nga jatjoꞌa ngi̱ya tsja xota̱ Siriaa̱, kó xota̱ Israee̱l ki̱a̱ kisꞌińdo nginí ndiꞌańjñoo̱ xikoó ngasꞌe̱. 6Ta̱nga katsꞌénkjinjiín yojoo̱ jé xí katsꞌén xota̱ ndiꞌaa̱ Jeroboaa̱n, kui xi katsꞌén nga katsꞌénjéní xota̱ Israee̱l, kó ta̱sá kuí nii̱ xi katsꞌén, kó a̱sie̱én na̱ ne Aseraa̱, ti̱ ki̱a̱ kisꞌijña ki̱a̱ na̱xi̱ńdáꞌniú Samariaa̱ nga. 7Ngatꞌa̱ Joakaa̱, ta̱ ngi ichítié tsí kamá jájún ndi̱je̱, ko̱jo tie karreta̱, ko̱jo tie mi̱ jájún xi ꞌbítso̱ma yise xi kisꞌie ngasee̱, ngatꞌa̱ nda̱ ree̱ nangi Siriaa̱ katsꞌénkjié kui xotaa̱, kó bo̱a̱ katsꞌénjo̱ xikó maá xa̱ xi ꞌbé nínga niꞌántsjie to ndso̱ko̱a̱a̱n ṉño̱paa̱n.
8Kó ngayeje ni xi ngase xi katsꞌén Joakaa̱, ko̱jo ngaꞌniú xí kisꞌiee̱ nga katsꞌén kjo̱a̱xcha̱án, a ki̱a̱jín kjitꞌa ki̱a̱ Chꞌo Xo̱jo̱n xi kjitꞌa ngayeje ni xi katsꞌén já ree̱ na̱xi̱ńdá Israee̱l. 9Kó Joakaa̱ ki̱a̱ nijan akjanijín nínga kisꞌinijín xota̱ xi xchaá, ki̱a̱ na̱xi̱ńdáꞌniú Samaria̱, kó Jeoaa̱ ndií kui nda̱a̱ kisꞌijña nda̱ re ngijee̱.
Nga atíxoma Jeoaa̱ ki̱a̱ na̱xi̱ńdá Israee̱l
10Nó kantjiꞌún jó nga tsꞌénbotixómá Joaa̱, re xi chji̱a̱ni nangi Jundáa̱, ítsꞌi̱yanii̱ nga atíxoma Jeoaa̱ ndií Joakaa̱ ki̱a̱ na̱xi̱ńdá Israee̱l nga kisꞌijña na̱xi̱ńdáꞌniú Samaria̱, kó tjiꞌún ngo nó kamaá nga atíxoma. 11Kó ni xi ndajín katsꞌén ngindyi̱ko̱n Néná, kó íjñámasienjín ngayeje jé xí katsꞌén Jeroboaa̱n ndií Nabaa̱t, kui xi katsꞌén nga katsꞌénjéní xota̱ Israee̱l, ta̱sá ti̱ bo̱a̱ ti̱ katsꞌén kuí nga.
12Ni xi ngase xi katsꞌén Jeoaa̱, ko̱jo ngayeje ngaꞌniú xí kisꞌiee̱ nga askjanjo̱ Amasiyaa̱, nda̱ ree̱ nangi Jundáa̱, a ki̱a̱jín kjitꞌa kui Chꞌo̱ Xo̱jo̱n xi kjitꞌa ngayeje ni xi katsꞌén já re xi na̱xi̱ńdá Israee̱l. 13Kó Jeoaa̱ kjiꞌanga kꞌien, ki̱a̱ nijan kisꞌijñajo̱ xota̱ xi xchaá, Jeroboaa̱n kisꞌijña ngajoo̱ nga kui atíxoma, kó Jeoaa̱ ki̱a̱ akjanijín ki̱a̱ na̱xi̱ńdáꞌniú Samaria̱ nínga kjiyojonijín já ree̱ na̱xi̱ńdá Israee̱l.
Nga kꞌien Eliseoo̱
14Kó kamáꞌoón Eliseoo̱, ngatꞌa̱ kisꞌiee̱ ngo chiꞌin xi katsꞌénkꞌién, kó Jeoaa̱, nda̱ ree̱ na̱xi̱ńdá Israee̱l, kijíjaya, kó askjandá ngindyi̱ko̱n Eliseoo̱, nga bi̱ katsó: ¡Ji na̱ꞌmi tsa̱ꞌa̱n, ji na̱ꞌmi tsa̱ꞌa̱n! ¡Jí boá xi karroo̱ na̱xi̱ńdá Israee̱l, ko̱jo xota̱ xi ꞌbíndosoón ndi̱je̱e̱!
15Kó Eliseoo̱, bi̱ katsoó:
—Chjábé jí ngo yáchjonyá ko̱jo jó yáyojó.
Kó Joaa̱ iskjíbé ngo yáchjonyá ko̱jo jó yáyojó. 16Kó Eliseoo̱, bi̱ katsoó nda̱ ree̱ na̱xi̱ńdá Israee̱l:
—Chjábé jí yáchjonyaá.
Kó kjiꞌanga Eliseoo̱ iskjíbé yáchjonyaá, ki̱a̱ íjñasón tsja nga̱soón tsja nda̱ ree̱, 17kó bi̱ katsoó:
—Chjáxꞌé ji nga̱ntjo̱a̱masienkjá xi tikón xtji̱e̱e̱n nínga fotjo tsꞌueé. Kó ngije iskjíxꞌaá kui nga̱ntjo̱a̱masienkjaá, Eliseoo̱ bi̱ katsó:
—Chji̱ní ji yáyojoó.
Kó ngije iskjiní yá yojoó kui nda̱a̱, bi̱ katsó Eliseoo̱:
—¡Kuí boá kui yáyojoó xi kꞌo̱xiéꞌáni Ndi̱a̱ná! ¡Jo̱o̱n, kuí boá kui yáyojoó xi sa̱ꞌin nga skjánjo̱ xota̱ Siriaa̱! Ngatꞌa̱ jí boá si̱ꞌinꞌíi̱n xota̱ Siriaa̱ ki̱a̱ nangi Afee̱k ngaskande nga kju̱i̱e̱.
18Kó bi̱ katsó ngase:
—Chjábé jí yáyojoó.
Kó ngije iskjíbé nda̱ ree̱ na̱xi̱ńdá Israee̱l, bi̱ katsoó:
—¡Tjaní ji tꞌanangii̱! Kó nda̱ ree̱ ján ndi̱yà tsꞌanié tꞌanangii̱, sꞌe̱ xió kisꞌijña. 19Kósꞌe̱ nda̱ xi chji̱a̱ni Néná katsꞌénxchánjo̱, kó bi̱ katsoó:
—¡Tsi ún ko̱jo tsi jun ndi̱yà akjaní ji, kiniꞌínꞌínríi̱ xota̱ Siriaa̱ ngaskande nga kiniꞌínkjié ji katsaki! Ta̱nga ngotꞌe̱ ꞌne̱, ta̱ ján tsí ndi̱yà nga si̱ꞌíi̱n xota̱ Siriaa̱.
20Kó kꞌien Eliseoo̱, kó akjanijín. Kó ngije jaꞌa ingo nó, jachó ki̱a̱ tꞌanangii̱ ngo xtín xota̱ xi ndajín xi chji̱a̱ni xota̱ tji̱e̱e̱ Moaa̱b. 21Kó kjiꞌanga tjifónijín ngo nda̱, kiꞌmíyaà nga ngo xtín já xí ndajín ndyi̱ndibá, kó tsꞌajmi kui yojo kꞌiee̱n ki̱a̱ ngi̱ya nga̱tsjo̱ó Eliseoo̱, kó nga kisitꞌaa̱ kui yojo kꞌiee̱n ńdaa̱ Eliseoo̱, jaꞌáꞌyá nginií, kó jastjíe̱n nga̱soón se. 22Kó Asasee̱l nda̱ ree̱ nangi Siriaa̱, tsie kjo̱a̱ni̱ma̱ katsꞌénkjaꞌatio xota̱ Israee̱l ngayeje ni̱xtjin nga kisꞌijña Joakaa̱.
23Ta̱nga Néná kamáni̱ma̱a̱ kui xotaa̱, kó askotsijee̱n, ta̱ngatꞌanii̱ ni xi índajo̱ Abraa̱n, ko̱jo Isaa̱, ko̱jo Jakoo̱b, kó kamámejénjiín katsꞌénkjié, ti̱nde kamámejénjiín tsꞌaxié kui xotaa̱ ngindyi̱ko̱n kui ngaskande ngotꞌe̱.
24Kó kꞌien Asaee̱l, nda̱ ree̱ nangi Siriaa̱, kó Bee̱n-Andaa̱nd ndií kui nda̱a̱ kisꞌijña ngajoo̱. 25Kósꞌe̱ Jeoaa̱ ndií Joakaa̱, jaꞌáxiín ngi̱ya tsja Bee̱n-Andaa̱nd ndií Asaee̱l, kui na̱xi̱ńdáꞌniú xí kui nda̱a̱ jaꞌáxiín nga askjanjo̱ kjo̱a̱xcha̱án Joakaa̱ na̱ꞌmi. Kó ján ndi̱yà katsꞌeén Jeoaa̱ nga askjanjo̱ kui nda̱a̱, kó kasakoꞌoyá nginií na̱xi̱ńdáꞌniú xí chji̱a̱ni nangi Israee̱l.
Currently Selected:
2 Já ree̱ 13: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
