2 Já ree̱ 12
12
Ki̱a̱ atíxoma Joaa̱ nangi Jundáa̱
(2Kr 24:1-27)
1Nó xí ma yitoni nga tsꞌénbotixómá Jeuu̱, ítsꞌi̱yanii̱ nga atíxoma Joaa̱, kó yichán nó kamaá nga atíxoma ki̱a̱ na̱xi̱ńdáꞌniú Jerusale̱n. Na̱aa̱n Joaa̱ na̱ Sibia̱ kiꞌmí, kó na̱xi̱ńdáꞌniú Beersebaa̱ chji̱a̱ni.
2Kó Joaa̱ ni xi kixi̱ katsꞌén ngindyi̱ko̱n Néná, ngayeje ni̱xtjin nga chináꞌmi Joyandaa̱ akóyaá ni xi sa̱ꞌín. 3Ta̱nga kachjeꞌéxínjín ngi̱ndie nínga nkꞌaa̱, nínga katsꞌéndikón nee̱ kui xotaa̱, ngatꞌa̱ to̱kó katsꞌénkꞌasꞌienra ngase kjo̱a̱tjó, ko̱jo ítíra ngase nisije̱n ki̱a̱ nínga nkꞌaa̱.
4Kó Joaa̱, bi̱ katsoó já chináꞌmii̱:
Ngayeje to̱n xi je kamángaá xotaa̱ nga tsꞌenkꞌásꞌién ki̱a̱ Ndiꞌaa̱ Néná, kui to̱n xi íchjítjé yojoo̱ nga ngo nga ngo xotaa̱, xikó kjiꞌi xi je tikón nga bo̱a̱ kjiꞌi xi sa̱ꞌínkꞌasꞌien, ko̱jo xikó kjiꞌi to̱n xi ngayejekon nga fochójo̱ Ndiꞌaa̱ Néná, 5já chináꞌmii̱ nganiꞌánkꞌasꞌiee̱n kui to̱o̱n, kó nga ngo nga ngo xota̱ ndiꞌaa̱ ngatsꞌénkꞌásꞌién kuí, kó nga niꞌándaya nga̱ntjo̱a̱a̱ Ndiꞌaa̱ Néná, nínga tjín nínga je katsen xoó.
6Nó xí kan jaán nga kisꞌijña nda̱ re Joaa̱, já chináꞌmii̱ kji̱e̱ tsꞌéndáyájín nínga katsen xoó Ndiꞌaa̱ Néná. 7Kó nda̱ re Joaa̱ tsíchji̱a̱a̱ chináꞌmi xi ꞌniú nkꞌa xaá xi ꞌmí Joyandaa̱, ko̱jo já chináꞌmi xi ngasee̱, kó bi̱ katsoó: Ánní nga kji̱e̱ niꞌándajínjnú nínga katsen xoó Ndiꞌaa̱ Néná. Ngotꞌe̱ ꞌne̱, ngiti̱ chjábéjínjnú to̱o̱n xota̱ ndiꞌajnú, ta̱sá ti̱ꞌankꞌasꞌiénjnú, tsi̱ꞌe̱ nga si̱ꞌandaya nínga katsen xoó Ndiꞌaa̱ Néná.
8Kó já chináꞌmii̱ nda kasasiee̱n nga ngiti̱ iskjíbejín ngase to̱o̱n xota̱ na̱xi̱ńdaá, ti̱nde kuijín xi katseꞌéxaá tsi̱ꞌe̱ nga sa̱ꞌíndaya nínga katsen xoó Ndiꞌaa̱ Néná. 9Ta̱nga chináꞌmi xi ꞌniú nkꞌa xaá xi ꞌmí Joyandaa̱, iskjíbé ngo koxa̱ xi katsꞌéndaa̱ ngo ti̱xa̱ ki̱a̱ tsꞌoa, sꞌe̱ ki̱a̱ íjñá tꞌa ṉchandikoón, xtji̱e̱e̱n nínga kixi̱i̱, xikó tsꞌén bitjasꞌi̱e̱nni ki̱a̱ Ndiꞌaa̱ Néná, kó já chináꞌmi xi askondá nga̱ntjo̱a̱a̱, ki̱a̱ indyiá ngayeje to̱n xi kiniꞌánkꞌasꞌien ki̱a̱ Ndiꞌaa̱ Néná. 10Kó bo̱a̱ tsꞌén kjiꞌanga kamábe kui jaá nga achichí kamá to̱ntiboa xi kixindyia ngi̱yaa̱ kui koxa̱a̱, nda̱ xi tsꞌénda xo̱jo̱o̱n nda̱ ree̱, ko̱jo chináꞌmi xi ꞌniú nkꞌa xaá jachókꞌíxki̱ kui to̱n xi kasako ki̱a̱ Ndiꞌaa̱ Néná, kósꞌe̱ stsa indyiá nga jaꞌátjó kui to̱o̱n. 11Kó kui to̱o̱n ki̱a̱ kiniꞌánkꞌasꞌiee̱n já xí síndotjoón xá xí kamá ki̱a̱ Ndiꞌaa̱ Néná, kó kui to̱o̱n xi kiniꞌánkjién nga ikꞌíchjií já chji̱ni̱e̱ya̱á, ko̱jo já xí katsꞌéndaya Ndiꞌaa̱ Néná, 12ko̱jo já chji̱ni̱e̱xo̱ó, ko̱jo já xí botie chji̱ni̱e̱ ndi̱jo̱o̱, ko̱jo kitsꞌítsié yá xí kamáchjieén, ko̱jo ndi̱jo̱ xi kiti chji̱ni̱e̱ tsi̱ꞌe̱ nga kiniꞌándaya nínga je jatson xoó Ndiꞌaa̱ Néná, ko̱jo ngayeje ni xi kamáchjieén, tsi̱ꞌe̱ nga kiniꞌándaya kui Ndiꞌaa̱.
13Ta̱nga kui to̱n xi kiniꞌánkꞌasꞌien ki̱a̱ Ndiꞌaa̱ Néná, jmí tasa̱ xi to̱ntiboa kiniꞌándajín, ti̱nde jmí ni xi mindyia xꞌué, ti̱nde jmí tasa̱ yiꞌi, ti̱nde jmí tjio, ti̱nde ngojín ni xi to̱nsinié, ko̱jo tsi ni xi to̱ntiboa kamándani, 14ta̱sá kui to̱o̱n, ki̱a̱ kiniꞌánkꞌasꞌiee̱n xota̱ xi katsꞌén kui xaá, kó kui to̱o̱n xi katsꞌénkjién nga katsꞌéndaya Ndiꞌaa̱ Néná. 15Kó jmí xki̱ kichjiáꞌájiín já xí kiniꞌánkꞌasꞌiee̱n kui to̱o̱n, tsi̱ꞌe̱ nga katsꞌén kui xaá, ngatꞌa̱ achichí kixi̱ kamá. 16Kui to̱ntiboa xi machjítjéni jeé, ko̱jo kui to̱ntiboa xi machjítjéni ni xi konnii̱ xotaa̱, ki̱a̱jín kiniꞌánkꞌasꞌien Ndiꞌaa̱ Néná, ngatꞌa̱ tsi̱ꞌe̱ chináꞌmii̱ boá kui to̱o̱n.
17Kui ni̱xtjin jàn, Asaee̱l, nda̱ ree̱ nangi Siriaa̱ kijínijíngí nga kijíkjánjo̱ xotaa̱ na̱xi̱ńdáꞌniú Ngaa̱t, kó katsꞌéntsi̱ꞌe̱ kui ngi̱ndiee̱. Kó Asaee̱l katsꞌénkjó nga ko̱e̱je̱kjánjo̱ na̱xi̱ńdáꞌniú Jerusale̱n, 18ta̱nga Joaa̱, nda̱ ree̱ nangi Jundáa̱, iskjíbé ngayeje ni ndikón xi katsꞌénkꞌasꞌiee̱n Néná xota̱ xi xchaá, kui xi Josafaa̱t, ko̱jo Joraa̱n, ko̱jo Okosiyaa̱, ko̱jo ni ndikón xí kuí katsꞌénkꞌasꞌiee̱n, ko̱jo ngayeje to̱nsinié xi kisꞌie ki̱a̱ ngi̱jin kjo̱a̱cho̱o̱n Ndiꞌaa̱ Néná, ko̱jo ndiꞌaa̱ nda̱ ree̱, kó katsangiyaa̱ nda̱ re Asaee̱l xi chji̱a̱ni nangi Siria̱, kósꞌe̱ Asaee̱l jatjoni na̱xi̱ńdáꞌniú Jerusale̱n.
19Kó ni xi ngase xi katsꞌén Joaa̱, a ki̱a̱jín kjitꞌa ki̱a̱ Chꞌo̱ Xo̱jo̱n xi kjitꞌa ngayeje ni xi katsꞌén já ree̱ nangi Jundáa̱.
20Kó já mosoo̱, ítsꞌi̱yanii̱ nga índa xtín nga kondra̱a̱ Joaa̱ kisꞌińdo, sꞌe̱ katsꞌénkꞌién Joaa̱ ki̱a̱ ndiꞌaa̱ Miloo̱, kjiꞌanga tsꞌénfí na̱xi̱ńdáꞌniú Silaa̱, 21ngatꞌa̱ já mosoo̱ kui xi Josakaa̱r ndií Simeaa̱t, ko̱jo Josabaa̱nd ndií Somee̱r, kuí boá xi katsꞌénꞌoón, kó kꞌien kui nda̱a̱, kó ki̱a̱ nijan kisꞌinijínjo̱ xota̱ xi xchaá ki̱a̱ na̱xi̱ńdáꞌniú Ndabii̱. Kó Amasiyaa̱ ndií nda̱ re Joaa̱ atíxoma ngajoo̱.
Currently Selected:
2 Já ree̱ 12: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
