2 Já ree̱ 11
11
Na̱ Ataliyaa̱ atíxoma nangi Jundáa̱
(2Kr 22:10—23:21)
1Nga kamábe na̱ Ataliyaa̱ na̱aa̱n Okosiyaa̱ nga je kꞌien ndií, jastjíe̱n kó katsꞌénkjié ngayeje xota̱ tji̱e̱e̱ nda̱ ree̱. 2Ta̱nga na̱ Josabaa̱, tsa̱kji̱ín nda̱ re Joraa̱n, kui xi ndichja Okosiyaa̱ kamá, iskjíbé Joaa̱ ndií Okosiyaa̱, kó tsꞌaxié kjo̱a̱ꞌniú ki̱a̱ ngi̱jii̱n nínga síndo ndií nda̱ re xi tjíniꞌánkꞌieén, kó ki̱a̱ íjñaꞌma kui nda̱a̱, ki̱a̱ ngi̱yaꞌma nínga tikón xota̱chjo̱on xí katsꞌénxchá, ki̱a̱ ngi̱yaꞌma nínga fojña na̱ Ataliyaa̱, kó bo̱a̱ tsꞌén nga ikꞌíjñaꞌmanii̱ na̱ Ataliyaa̱, kó kiniꞌánkꞌiénjín. 3Kó jun nó kamaá nga kisꞌijñaꞌma ki̱a̱ ndiꞌaa̱ kui xota̱chjo̱on. Tji̱e̱nga na̱ Ataliyaa̱ kui atíxomaa̱ kui na̱xi̱ńdaá.
4Ta̱nga nó xí ma yitoo̱, Joyandaa̱ katsangiyakjaꞌá já ngito̱ko̱ xi úchán jájún botixómaá, ko̱jo já xí konda ndo̱bo̱a̱xa̱á, kó ki̱a̱ kijíjo̱ ki̱a̱ Ndiꞌaa̱ Néná, kó ngo ni índajo̱ kui jaá, sꞌe̱ ki̱a̱ Ndiꞌaa̱ Néná katsꞌén nga katsja tsꞌoa nga sa̱ꞌínkjatjosón kui nii̱, kósꞌe̱ akoó ndií nda̱ ree̱. 5Sꞌe̱ atíxomaa̱ nga bi̱ katsoó:
—Kuí nii̱ xi si̱ꞌánjnú: Ngo nga ján tjiín jún, xi skoón ndiꞌa nínga botixómá nda̱ ree̱ nga ni̱xtjin ndikón. 6Ingo nga ján tjiín, xi ki̱a̱ kꞌuíndo nga̱ntjo̱a̱ xi tikón xtji̱e̱e̱n na̱ngi, kó xi ngi ján tjiín, ki̱a̱ kꞌuíndo nga̱xto̱n nínga síndo já xí koón ndo̱bo̱a̱xa̱á, kó xki̱ ora̱ xchindàjnú ndiꞌa ndo̱bo̱a̱xa̱á. 7Kó xi ingi jó tjín xota̱ xi ndokjo̱a̱nijnú jún, ngayeje jún xi je kichindájnú nga ni̱xtjin ndikoón, ki̱a̱ xchindàjnú Ndiꞌaa̱ Néná, ki̱a̱ tꞌa nínga tikón nda̱ ree̱. 8Kó nda má chónjnúu̱ nga ngo foaꞌatjiyajoo̱n nda̱ ree̱, kó nga ngo nga ngojnú chꞌi̱a̱yindsa̱jnú ni xi niꞌánkjiénjnú, kó ta̱ꞌyaní xi kꞌo̱sꞌien nínga síndo kui jaá, chjiéngá si̱ꞌankꞌien. Kó ti̱ bo̱a̱ ti̱ tsꞌén ki̱a̱ tangínjo̱jnú nda̱ ree̱, kjiꞌanga kjo̱tjo ko̱jo tsi kjiꞌanga kꞌo̱sꞌien.
9Kó já ngito̱ko̱ xi úchán jájún botixómaá, katsꞌén ngayeje ni xi katsoó chináꞌmi Joyandaa̱, kó nga ngo nga ngo iskjíbé xtín xota̱ xi tsi̱ꞌe̱, xi tsꞌasꞌien ko̱jo xi jatjo nga ni̱xtjin ndikoón, kó kui jaá kijíkoón chináꞌmi Joyandaa̱. 10Kó kui chináꞌmii̱ katsꞌénkꞌasꞌiee̱n já ngito̱ko̱ xi úchán jájún botixómaá yáyojó ko̱jo ni xi ꞌbíchjánii̱ ni xi ndajiín, kui xi tsi̱ꞌe̱ nda̱ re Ndabii̱ kamá, kui xi síndo ki̱a̱ Ndiꞌaa̱ Néná.
11Kó jájún xi konda kui ngi̱ndiee̱, nga ngo nga ngo iskjíbé ni xi tsꞌénkjién nga kján, ndeskande xtji̱e̱e̱n na̱nginii̱ Ndiꞌaa̱ Néná, ngaskande xtji̱e̱e̱n nínga ta̱ꞌin, kó ki̱a̱ askotsijen xtji̱e̱e̱n ṉchandikoón ko̱jo na̱ngo̱xi̱i̱, nga ngo foaꞌatjiyajoo̱n nda̱ ree̱. 12Kósꞌe̱ Joyandaa̱ tsꞌaxié ndií nda̱ ree̱, kó íjñaá ngo ni ꞌbíꞌá toko to̱ko̱, ko̱jo katsjaá Chꞌo̱ Xo̱jo̱n Kjo̱a̱kitii̱, kósꞌe̱ katsjáxaá nga nda̱ re kamá, kó katsangijon isti̱, kó ngayeje xotaa̱ nga katsꞌéntsen tsja, nga bi̱ katsó: ¡Tsie ngatamaa̱ nda̱ ree̱!
13Kó nga tsintꞌié na̱ Ataliyaa̱ nga askjandáyà xota̱ na̱xi̱ńdaá, tsanga má nga kijí nínga síndo xota̱ na̱xi̱ńdaá ki̱a̱ Ndiꞌaa̱ Néná. 14Kó askotsijen, sꞌe̱ kamábe nga ki̱a̱ tikón nda̱ ree̱, ki̱a̱ tꞌa nínga tikón yáseé, xikótsꞌèn tikón kjo̱a̱xcha̱á, kó jáxaá ko̱jo já xí tsꞌénkjánié tjioo̱, ki̱a̱ nijan kisꞌińdotꞌaa̱ nda̱ ree̱, kó ngayeje xota̱ na̱xi̱ńdaá tsja kamaá, kó katsꞌénkjanie tjioo̱. Kósꞌe̱ na̱ Ataliyaa̱ iskjíndiyá ńjñoo̱, kó ꞌniú askjandáyá nga bi̱ katsó: ¡Ndajín kiniꞌánjnú, ndajín kiniꞌánjnú!
15Kó chináꞌmi Joyandaa̱, tsíchji̱a̱jo já ngito̱ko̱ xi úchán jájún botixómaá, kó bi̱ katsoó: ¡ꞌNa̱xiéjnú kui naa̱ kꞌi̱e̱e̱, kó nga chindá, kó xi ko̱e̱je̱tji̱ngii̱, ki̱cha̱ ti̱ꞌankꞌiènnijnú! Ngatꞌa̱ chináꞌmii̱ boá xi bi̱ katsó nga atíxoma: ¡Ka̱májín ki̱a̱ si̱ꞌankꞌien ki̱a̱ Ndiꞌaa̱ Néná! 16Sꞌe̱ katseꞌéndieè nga jaꞌa, kó ki̱a̱ jatjoni ndi̱yà nínga ꞌbosꞌien jájún ndi̱je̱e̱, ki̱a̱ nínga tikón ndiꞌaa̱ nda̱ ree̱, ki̱a̱ kiniꞌánkꞌién na̱ Ataliyaa̱.
17Kó Joyandaa̱ ngo ni índajo̱ Néná, ko̱jo nda̱ ree̱, nga kuí boá kui xotaa̱ xi ka̱ma xota̱ na̱xi̱ńdaá Néná, kó ti̱ bo̱a̱ ti̱ katsꞌénjo̱ nda̱ ree̱ ko̱jo xota̱ na̱xi̱ńdaá nga. 18Kó ngayeje xota̱ na̱xi̱ńdá xí chji̱a̱ni kui nga̱sondiee̱ kijí na̱ngo̱xi̱i̱ ne Baa̱l, kó katsꞌénkjatsón kjin kjin ngayeje ṉchandikoón ko̱jo a̱sie̱én kui nee̱, kó ti̱ katsꞌénkꞌién Mataa̱n chináꞌmii̱ ne Baa̱l, ki̱a̱ kje̱n nínga síndo kui ṉchandikoón.
Kó kui chináꞌmii̱ índo jájún xi askondá Ndiꞌaa̱ Néná. 19Jaskan kijíjo̱ já ngito̱ko̱ xi úchán jájún botixómaá, ko̱jo já ngito̱ko̱o̱ jájuún, ko̱jo jájún xi konda na̱xi̱ńdaá, ko̱jo ngayeje xota̱ na̱xi̱ńdá xí chji̱a̱ni ngayeje nga̱sondiee̱, kó katsꞌénkjatjajen nda̱ ree̱ ndeskande ki̱a̱ Ndiꞌaa̱ Néná, kó tsꞌasꞌien ndiꞌa ndo̱bo̱a̱xa̱á ki̱a̱ xtji̱e̱e̱n ndi̱ya̱à jájún xi konda na̱xi̱ńdaá, kó ki̱a̱ kisꞌijñasón nda̱ ree̱ ngi̱ndie nínga botixómá já ree̱. 20Kó ngayeje xota̱ na̱xi̱ńdaá tsja kamaá, kó na̱xi̱ńdáꞌniú kisꞌiee̱ kjo̱a̱xió, ngatꞌa̱ ki̱a̱ ndiꞌa ndo̱bo̱a̱xa̱á katsꞌénkꞌién na̱ Ataliyaa̱.
Joaa̱ kamá ree̱ nangi Jundáa̱
21Yito noó Joaa̱ nga ítsꞌi̱yanii̱ nga atíxoma.
Currently Selected:
2 Já ree̱ 11: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
