2 Já ree̱ 1
1
Nga kꞌien Okosiyaa̱
1Ngije kꞌien Akaa̱b, xota̱ tji̱e̱e̱ Moaa̱b kondra̱ kijínii̱ xota̱ Israee̱l.
2Kó ngo ndi̱yà Okosiyaa̱ tsꞌákangíni ki̱a̱ nga̱ntjo̱a̱masienkjaá ndiꞌa nkꞌa xi tikoón ki̱a̱ nangi Samaria̱, kó tsiejénꞌón, kó katsangiya já chji̱ni̱e̱ꞌén, xí bi̱ katsoó: Tangínjnú kó tasíyàjnúu̱ Baa̱l-Sebuu̱b, kui xi nee̱ na̱xi̱ńdáꞌniú Ekroo̱n, tsi̱ꞌe̱ nga xcha̱jnú tsi ka̱mandaya an. 3Kósꞌe̱ ndítsjie xi Néná tsíchji̱a̱jo nda̱ xi ꞌmí Eliyaa̱ xi chji̱a̱ni nangi Tisbee̱, kó bi̱ katsoó:
Ti̱sítji̱n ji, kó tꞌenchíi̱n xota̱ chji̱ni̱e̱ꞌe̱én nda̱ ree̱ nangi Samaria̱, kó bi̱ tꞌíi̱n: A kjo̱a̱a̱ jmíjín Néná kꞌi̱e̱ na̱xi̱ńdá Israee̱l nga Baa̱l-Sebuu̱b, ne xi chji̱a̱ni nangi Ekroo̱n ndyi̱mongínkasiyájnúu̱ ngo ni. 4Kuíni nga bi̱ tsóni Néná:
Ngiti̱ ku̱i̱stji̱njín ji kui ṉchan xi titsjajnisén ji, kó ta̱sá ko̱yè jí.
Kósꞌe̱ kijí nginí Eliyaa̱. 5Kó kjiꞌanga kui já chji̱ni̱e̱ꞌe̱én jachókón nginií nda̱ ree̱, bi̱ katsoó:
—Ánní nga kjindibá nginíjnú.
6Kó kui jaá bi̱ katsó:
—Kjo̱a̱a̱ nga ngo nda̱ kasakojne̱ xi bi̱ katsójne̱: Tangín nginíjnú, kó tangínchon nginíjnúu̱ kui nda̱ re xi katsangiyajnú, kó bi̱ tꞌínjnúu̱: Bi̱ tsó Néná: A kjo̱a̱a̱ nga jmíjín xò Néná kꞌi̱e̱ na̱xi̱ńdá Israee̱l, nga Baa̱l-Sebuu̱b, ne xi chji̱a̱ni nangi Ekroo̱n tinangiye ji nga ko̱si̱yaa̱ ngo ni. Kuí xó ni nga ngiti̱ ku̱i̱stji̱njín xò jí ki̱a̱ nga̱són ṉchan nínga titsjajni ji, kó ja̱koxi̱ xò boá nga ko̱yè jí.
7Kósꞌe̱ nda̱ ree̱, bi̱ katsó nga asíyaá:
—Kó kjíꞌí kui nda̱ xi kasakojnú, xi bo̱a̱ katsójnú.
8Kó kui jaá bi̱ katsó:
—Ngo nda̱ xi yajá ngo ńjño xi tsja̱a̱ cho̱ kamándani, kó ngo tji̱xin tjíkjá ndáyaá.
Kósꞌe̱ bi̱ katsójne̱ kui nda̱a̱:
—Eliyaa̱ boá, nda̱ xi chji̱a̱ni nangi Tisbee̱.
9Kósꞌe̱ katsangiyaa̱ ngo nda̱ xi ngito̱ko̱o̱ ichítié já, ko̱jo nga ichítié kui jaá tji̱e̱njo nga kijíkoón kui nda̱a̱, ngatꞌa̱ ki̱a̱ tikón ki̱a̱ nga̱soón na̱xi̱i̱, kó bi̱ katsoó kui nda̱a̱:
—¡Ji nda̱ xi chji̱a̱ni Néná, nda̱ ree̱ tsꞌénbotixómá nga ti̱tjaje̱n xò jí!
10Kó Eliyaa̱, bi̱ katsoó kui nda̱ ngito̱ko̱o̱ xi ichítié já tsoꞌbájoo̱:
—Tsi ja̱koxi̱ nga nda̱ xi tsi̱ꞌe̱ Néná boá án, ¡ngatjandibajén ndiꞌí ndiꞌakꞌajmi jàn, kó ngatsꞌenkjieé jí ko̱jo nga ichítié já xí tjimájoo̱!
Kó kjindibáni ndiꞌí ndiꞌakꞌajmi jàn, kó katsꞌénkjié kui nda̱ ngito̱ko̱o̱, ko̱jo nga ichítié kui já xí tjimájo̱. 11Kó nda̱ ree̱ ti̱ katsangiya nginí ingo ngito̱ko̱ xi ichítié já tsꞌénxájo̱, ko̱jo nga ichítié kui jaá, kó bi̱ katsoó kui nda̱a̱:
—¡Ji nda̱ xi tsi̱ꞌe̱ Néná, bi̱ tsó nda̱ ree̱:
Tsá xò ti̱tjaje̱n ji!
12Kó Eliyaa̱, bi̱ katsó:
—Tsi ja̱koxi̱ nga nda̱ xi tsi̱ꞌe̱ Néná boá án, ngatjandibajén ndiꞌí ndiꞌakꞌajmi jàn, kó ngatsꞌenkjieé jí ko̱jo kui já xí ichítié xi tsꞌentje̱je ji.
Kó kjindibájénni ndiꞌí ndiꞌakꞌajmi jàn xi katsꞌénkjié kui nda̱a̱, ko̱jo kui xi ichítié já xí tsoꞌbájo̱.
13Kó kui nda̱ ree̱ ti̱ katsangiya nginí ingo nda̱ ngito̱ko̱ xi ichítié já tsꞌénxájo̱ ma jaán ndi̱yà, kó ti̱ kijíjo̱ nginí xi ichítié já xí tsꞌénxájo̱, ta̱nga kui nda̱ ngito̱ko̱ xi kanangiya xi ma jaán ndi̱ya̱à, kijí, kó asiéntikoó kje̱n Eliyaa̱, kó bi̱ katsoó nga ꞌniú tsíꞌaá:
—Ji nda̱ xi tsi̱ꞌe̱ Néná, ꞌniú míꞌaá nga si̱ꞌinchjíníi̱ ngindyikin ji kjo̱a̱mindyionna, ko̱jo kjo̱a̱mindyioo̱n kui já xí ichítié xí tjimájo̱na. 14Ndiꞌí xí kjindibájénni ndiꞌakꞌajmii̱ katsꞌénkjié nga jó kui já ngito̱ko̱o̱ já xí ichítié xi tjón kanangiyaa̱, ko̱jo kui já xí ichítié xí tjimájo̱ nga ngo nga ngo, ngotꞌe̱ ꞌne̱, ¡mejénna nga xche̱ndikín jí kjo̱a̱mindyionna!
15Kósꞌe̱ kui ndítsjiee̱ Néná, bi̱ katsoó Eliyaa̱:
—Tꞌenja̱ye ji ko̱jo kui nda̱a̱, kó ngata̱ ndakinjín máa̱. Kó Eliyaa̱ jastjíe̱n, sꞌe̱ kijíjo̱ kui nda̱a̱ nínga tikón nda̱ ree̱. 16Kó bi̱ katsoó: Bi̱ tsó Néná: Kjo̱a̱a̱ nga chji̱ni̱e̱ꞌén kanangiye ji, tsi̱ꞌe̱ nga ko̱síyaá Baa̱l-Sebuu̱b, ne xi chji̱a̱ni nangi Ekroo̱n, kó xikoó tsi jmíjín Néná, kꞌi̱e̱ na̱xi̱ńdá Israee̱l, nínga ka̱ma ko̱si̱ye ji, kjo̱a̱a̱ eén, kuíni nga kju̱i̱stji̱njín ji nga̱són ṉchan nínga titsjajni ji, kó ta̱sá ko̱yè jí.
17Kó kꞌien nda̱ ree̱, xikó má katsó Néná nga tsíchji̱a̱jo nda̱chji̱ni̱e̱ꞌén Eliyaa̱. Kó Joraa̱n kisꞌijña ngajoo̱ nga atíxoma, ngatꞌa̱ Okosiyaa̱ jmí ndí kisꞌiejiín. Kui nii̱ xi kamá nó xí ma joó nga kisꞌijña Joraa̱n ndií Josafaa̱t, nda̱ ree̱ nangi Jundáa̱.
18Kó ni xi ngase xi katsꞌén Okosiyaa̱, a ki̱a̱jín kjitꞌa ki̱a̱ xo̱jo̱n xi kjitꞌa ni xi katsꞌén já re xi chji̱a̱ni nangi Israee̱l.
Currently Selected:
2 Já ree̱ 1: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
