1 Já ree̱ 22
22
Mikayiaa̱ tsíchji̱a̱tjón nga si̱ꞌanchaja Akaa̱b
(2Kr 18:1-34)
1Kó ján nó jaꞌa nga jmí kjo̱a̱xchán kisꞌiejiín xota̱ Siriaa̱ ko̱jo xota̱ Israee̱l. 2Ta̱nga xi ma ján noó, Josafaa̱t, nda̱ ree̱ nangi Jundáa̱ kijíjaya nga kijíkoón nda̱ ree̱ na̱xi̱ńdá Israee̱l. 3Kó nda̱ ree̱ na̱xi̱ńdá Israee̱l, bi̱ katsoó kui já mosoo̱:
—A yàjnú nga na̱xi̱ńdáꞌniú Ramoo̱t xi chji̱a̱ni nangi Ngalaa̱nd tsa̱ñá boá, kó jmí ni kiniꞌánjín ñá tsi̱ꞌe̱ nga kachjeꞌéxíi̱n ngi̱ya tsja nda̱ ree̱ nangi Siriaa̱.
4Kó bi̱ katsoó Josafaa̱t:
—A kꞌuínje̱jne̱ nga kongín ku̱i̱xkánjo̱jne̱ na̱xi̱ńdáꞌniú Ramoo̱t xi chji̱a̱ni nangi Ngalaa̱nd.
Kó Josafaa̱t, bi̱ katsoó nda̱ ree̱ na̱xi̱ńdá Israee̱l:
—Xi kókón ji, bo̱a̱ kón an, kó xi kókón xota̱ na̱xi̱ńdána, bo̱a̱ kón xikoó xota̱ na̱xi̱ńdáa̱, kó ndi̱je̱na bo̱a̱ kón xikoó ndi̱je̱ xi tse̱ nga. 5Kósꞌe̱ Josafaa̱t, bi̱ katsoó nda̱ ree̱ na̱xi̱ńdá Israee̱l:
—ꞌNiú míꞌaá ngotꞌe̱ ꞌne̱, nga Néná tasíyée̱.
6Kósꞌe̱ nda̱ ree̱ na̱xi̱ńdá Israee̱l ítikó jáchji̱ni̱e̱ꞌe̱én Néná, mara̱ nijón úchán já, kó bi̱ katsoó nga asíyaá:
—A kjuínkjánjo̱ án na̱xi̱ńdáꞌniú Ramoo̱t xi chji̱a̱ni nangi Ngalaa̱nd, axa̱ kjuínjín an.
Kó kui jaá bi̱ katsó:
—Tꞌennijíngí ji, ngatꞌa̱ Néná jè sa̱ꞌínkꞌasꞌien ngi̱ya ndse̱ ji nda̱ ree̱.
7Ta̱nga Josafaa̱t, bi̱ katsó:
—A jmíjín kꞌi̱e̱e̱ ingo nda̱chji̱ni̱e̱ꞌe̱én Néná xí ka̱ma ko̱si̱yáa̱ kuí ni xi mejénná ko̱si̱yáa̱ Néná.
8Kó nda̱ ree̱ na̱xi̱ńdá Israee̱l, bi̱ katsoó Josafaa̱t:
—Tikón ngase ngo nda̱ xi ka̱ma si̱ꞌankjién kuí nga ko̱si̱yáa̱ ni Néná, kó kuí boá xi Mikayiaa̱ ndií Imlaa̱, ta̱nga chꞌóna kui nda̱a̱, ngatꞌa̱ jmíni̱xtjin nga ni xi nda chji̱a̱ tjón kjo̱a̱a̱ an, ta̱soboá ni xi ndajín boá xi tsóyàtjón kjo̱a̱a̱ an.
Kó Josafaa̱t, bi̱ katsó:
—Ngata̱ bo̱a̱jín tsꞌén ndokjo̱e̱ ji nda̱ ree̱.
9Kósꞌe̱ nda̱ ree̱ na̱xi̱ńdá Israee̱l, tsíchji̱a̱a̱ ngo nda̱ xi tjiín xá, kó bi̱ katsoó:
—Tsá ndibéje̱ní Mikayiaa̱ ndií Imlaa̱.
10Kó nda̱ ree̱ na̱xi̱ńdá Israee̱l, ko̱jo Josafaa̱t, nda̱ ree̱ nangi Jundáa̱, ki̱a̱ xió síndo nga síndosón nga ngo nga ngo ki̱a̱ nga̱són yáxíríe̱ ndikoón, nga ndyi̱yajá ńjño ndaa̱, ki̱a̱ ngi̱ndie nínga bitjasꞌi̱e̱nnii̱ na̱xi̱ńdáꞌniú Samaria̱, kó ngayeje jáchji̱ni̱e̱ꞌe̱én Néná nga tsíchji̱a̱ én xí Néná tsjá ngindyi̱ko̱n kui jaá. 11Kó Sendekiyaa̱ ndií Kenanaa̱, katsꞌénda ndi̱ja̱ xi ki̱cha̱, kó bi̱ katsó: Bi̱ tsó Néná: Kuí bí kui nii̱ xi si̱ꞌinkjìn jí nga ku̱i̱xkénje̱ ji xota̱ Siriaa̱, ngaskande nga si̱ꞌinkjie ji.
12Kó ngayeje jáchji̱ni̱e̱ꞌe̱én Néná, ti̱ bo̱a̱ ti̱ tsꞌén katsóyàtjón ngayejee̱, nga bi̱ katsó: Tꞌennijíngí ji na̱xi̱ńdáꞌniú Ramoo̱t xi chji̱a̱ni nangi Ngalaa̱nd, kó ti̱ꞌin ji, ngatꞌa̱ Néná boá xi ngi̱ya tsja nda̱ ree̱ je katsꞌénkꞌasꞌien kui ngi̱ndiee̱.
13Kó kui nda̱chji̱ni̱e̱ꞌe̱én xi kijíkjaꞌá Mikayiaa̱, bi̱ katsoó:
—Jáchji̱ni̱e̱ꞌe̱én Néná, ta̱ ngo nda̱ kjíma nga ndyi̱tsóyà ni nda tsi̱ꞌe̱ nda̱ ree̱, ngotꞌe̱ ꞌne̱ ti̱ bo̱a̱ ti̱ tsꞌén ndókjo̱e̱ ji xikó ndyi̱tsó kui jaá, kó ni xi nda ndókjo̱e̱ ji.
14Ta̱nga Mikayiaa̱, bi̱ katsoó:
—Ja̱koxi̱ boá nga tikón Néná, nga ni xi ka̱tso̱na Néná boá xi kuíchji̱a̱ an.
15Kó nga jachó ngindyi̱ko̱n nda̱ ree̱, nda̱ ree̱, bi̱ katsó:
—Mikayiaa̱, a kongínki̱xkánjo̱jne̱ na̱xi̱ńdáꞌniú Ramoo̱t nangi xi chji̱a̱ni Ngalaa̱nd, axa̱ si̱ꞌankjiejne̱kjo̱a̱.
Kó bi̱ katsó Mikayiaa̱:
—Tꞌennijíngí, kó nda ko̱e̱je̱e̱, kó Néná ngi̱ya tsja nda̱ ree̱ sa̱ꞌínkꞌasꞌien kui na̱xi̱ńdáꞌniuú.
16Ta̱nga nda̱ ree̱, bi̱ katsoó:
—Kótjín ndi̱yà bo̱a̱ xiáa̱n nga ko̱e̱ꞌé ji ndso̱ꞌbe nga ta̱soboá ni xi ja̱koxi̱ xí ko̱ndókjo̱e̱jení nga si̱ꞌinkjìn ji jaꞌeén Néná.
17Kósꞌe̱ bi̱ katsó Mikayiaa̱:
—Kamábe an nga ngayeje xota̱ Israee̱l ki̱a̱ kastsojoboa ngi̱jin na̱xi̱i̱, xikó maá cho̱tsa̱nga̱ xi jmí ndi̱a̱jiín, kó Ndi̱a̱ná, bi̱ katsó: Kui xotaa̱ jmíjiín ndi̱a̱, ta̱sá ngatjíꞌoyá xió xió nginí ndiꞌaa̱.
18Kó nda̱ ree̱ na̱xi̱ńdá Israee̱l, bi̱ katsoó Josafaa̱t:
—A mí tsí je bo̱a̱ kixiaan nga kui nda̱a̱, jmí ni nda xi tsóyatjón kjo̱a̱a̱ an, ta̱soboá ni xi ndajín boá xi chji̱a̱.
19Kósꞌe̱ bi̱ katsó Mikayiaa̱:
—Kuíni nga ndaꞌyájnúu̱ én xí chji̱a̱ Néná, xi bi̱ tsoó: Kamábe an Néná nga tikón nínga botixómá, kó ngayeje jájuún ndiꞌakꞌajmii̱ ki̱a̱ síndotikó, nga fojnií ko̱jo nga skoón kui. 20Kó bi̱ katsó Néná: ꞌYá xí kꞌo̱ṉcha̱jo Akaa̱b, tsi̱ꞌe̱ nga ko̱e̱je̱nijíngí nga skjánjo̱ na̱xi̱ńdáꞌniú Ramoo̱t xi chji̱a̱ni nangi Ngalaa̱nd, kó ki̱a̱ ngatꞌáka. Kó ngo xi bo̱a̱ tsꞌén tsíchji̱a̱, kó ingo xi kje̱ꞌe tsꞌén tsíchji̱a̱. 21Kó ngo a̱siénni̱xtjin jachó ngindyi̱ko̱n Néná, kó bi̱ katsó: Án boá xi kꞌoṉcha̱jo an. Sꞌe̱ Néná bi̱ katsó: Kótsꞌèn bo̱a̱ si̱ꞌin ji. 22Sꞌe̱ bi̱ katsó kui a̱si̱énni̱xtjii̱n: An kjo̱tjo an, kó án boá xi ngo a̱siénni̱xtjin xi ndiso ka̱ma an xi sa̱ꞌínkíchji̱a̱ ngayeje jáchji̱ni̱e̱ꞌe̱én. Kó Néná, bi̱ katsó: Ja̱koxi̱ boá nga ka̱ma kꞌuindíseje̱ ji, kó si̱ꞌin nga bo̱a̱ sa̱ꞌín, ja̱ tꞌen ji, kó bo̱a̱ ti̱ꞌin ji. 23Kó ngotꞌe̱ ꞌne̱, Néná boá xi íjñajii̱n ngo a̱siénni̱xtjin xi ndiso tsꞌoa ngayeje jáchji̱ni̱e̱ꞌée̱n, ngatꞌa̱ Néná boá xi je bo̱a̱ katsó, nga ni xi ndajín xi ka̱maa̱ ji.
24Kósꞌe̱ Sendekiyaa̱ ndií Kenanaa̱ kijíkóntiñaa̱ Mikayiaa̱, kó ngo tji̱ngo̱ yeꞌeé tꞌanijon, kó bi̱ katsoó:
Ñá kjindibáni A̱si̱énni̱xtjii̱n Néná tsi̱ꞌe̱ nga ji tsíchji̱a̱joo.
25Kó Mikayiaa̱, bi̱ katsoó:
—Ngotꞌe̱ ꞌne̱, ki̱a̱ xche̱ ji kui nii̱, kjiꞌanga kꞌuin jí ngo ngi̱yaꞌma tsi̱ꞌe̱ nga kꞌuindyinꞌmí ji.
26Kósꞌe̱ nda̱ ree̱ na̱xi̱ńdá Israee̱l, bi̱ katsó:
—Chjábé jí Mikayiaa̱, kó tꞌenjee̱ Amoo̱n, nda̱ xtitjoón na̱xi̱ńdáꞌniuú, ko̱jo Joaa̱ ndií nda̱ ree̱, 27kó bi̱ tꞌíi̱n: Kui nii̱ xi tsó nda̱ ree̱: Nangísꞌiénjnú ndo̱bo̱a̱yà kuí nda̱a̱, kó ta̱ pan ko̱jo ndáfoa tsí xi te̱ꞌéjnúu̱, tsi̱ꞌe̱ nga kjo̱a̱ꞌa kjo̱a̱ni̱ma̱ ngaskande nga nda kjoéꞌe̱ ngiñá an.
28Kó Mikayiaa̱, bi̱ katsoó:
—Tsi xió kjoéꞌe̱ nginí ji, jmí tsi án xi katsꞌénkjiénna Néná nga tsíchji̱a̱ an.
Kó bi̱ katsó ngase:
—Ndaꞌyájnúꞌun jún ngayeje xota̱ na̱xi̱ńdá.
Xota̱ Siriaa̱ katsꞌeén Akaa̱b
(2Kr 18:28-34)
29Kósꞌe̱ tji̱e̱n má nda̱ ree̱ na̱xi̱ńdá Israee̱l, ko̱jo Josafaa̱t nda̱ ree̱ nangi Jundáa̱ kijí nijíngí na̱xi̱ńdáꞌniú Ramoo̱t xi chji̱a̱ni nangi Ngalaa̱nd. 30Kó nda̱ ree̱ na̱xi̱ńdá Israee̱l, bi̱ katsoó Josafaa̱t: An, kje̱ꞌe sa̱ꞌinkꞌié án yojona nga kjuín án kjo̱a̱xcha̱án, ta̱nga ji che̱jera ji ńjñóo̱ xi chejé nga re ji.
Kó nda̱ ree̱ na̱xi̱ńdá Israee̱l kje̱ꞌe kisꞌie, kósꞌe̱ kijí ngi̱jii̱n kjo̱a̱xcha̱án.
31Ta̱nga nda̱ ree̱ nangi Siriaa̱, ja̱ bo̱a̱ jè katsjaákjo̱a̱ nga kantié jó já ngito̱ko̱o̱ karro̱ kjo̱a̱xcha̱án nga bi̱ katsoó: Ngata̱ xota̱ xi xi̱xi̱ ko̱jo xi xchájín xi bixkánjo̱jnú, ta̱kuítsí nda̱ ree̱ na̱xi̱ńdá Israee̱l xi ti̱xkánjo̱jnú.
32Kó kjiꞌanga já ngito̱ko̱o̱ karro̱ kjo̱a̱xcha̱án kamábe Josafaa̱t, bi̱ tsꞌén katsꞌénkjó: Ja̱koxi̱ nga kuí xi̱ꞌbi̱ xi nda̱ ree̱ na̱xi̱ńdá Israee̱l.
Kó kui jaá kijíkóntiñaa̱ tsi̱ꞌe̱ nga skjánjo̱ kui nda̱a̱, ta̱nga nda̱ re Josafaa̱t ꞌniú askjandáyà. 33Kósꞌe̱ nga kamábe já ngito̱ko̱o̱ karro̱ kjo̱a̱xcha̱án nga kuijín xi nda̱ ree̱ na̱xi̱ńdá Israee̱l, xín kijí.
34Kó ngo nda̱ ta̱xkiya yeꞌé ngo yáyojó, kó nda̱ ree̱ na̱xi̱ńdá Israee̱l kastiee̱, ki̱a̱ yeꞌeé ngi̱jii̱n nínga kjitꞌa ki̱cha̱ xi boꞌmá ni̱se̱e̱n, kó nda̱ ree̱, bi̱ katsoó nda̱ xi tsꞌénxájo̱ karro̱ kjo̱a̱xcha̱án: Ti̱tjetjíyé ji, kó ꞌna̱xiéní kꞌi̱e̱ kui ngi̱ndiee̱, ngatꞌa̱ je kiniꞌánꞌónna.
35Ta̱nga kui ni̱xtjii̱n ꞌniú ngase kamá kjo̱a̱xcha̱án, kó nda̱ ree̱, ki̱a̱ kisꞌijñaya ngo karro̱ kjo̱a̱xcha̱án kje̱n nínga síndo xota̱ Siriaa̱, kó nga kamángixoón, kꞌien, kó jiín ki̱a̱ katjon ngaskande ngi̱yaa̱ karro̱ kjo̱a̱xcha̱án. 36Kó ngije tsꞌatjé tsꞌueé, ngo nda̱ xi ꞌniú tsíchji̱a̱, kijí ngayeje ngi̱ndie nínga síndo xota̱ Israee̱l, nga bi̱ katsó: ¡Nga ngo nga ngojnú tangínjnú na̱xi̱ńdáꞌniújnú, nga ngo nga ngojnú tangínjnú nínga síndo nangijnú!
37Kó bo̱a̱ tsꞌén kꞌien nda̱ ree̱, kó tsangínjo̱ na̱xi̱ńdáꞌniú Samaria̱, kó ki̱a̱ akjanijín nda̱ ree̱ kui ngi̱ndiee̱. 38Kó tji̱e̱nga ngo xi aniéjón kui karro̱ kjo̱a̱xcha̱án, ki̱a̱ ti̱xa̱ xi ndyi̱a̱ ndáfoaa̱ ki̱a̱ na̱xi̱ńdáꞌniú Samaria̱, ńñaá katomájón jiín kui nda̱a̱. Kui ngi̱ndiee̱ ki̱a̱ aniéjón yojoo̱ ínchjínmasieén. Kó bo̱a̱ kamá xikó má katsó Néná nga ka̱ma.
39Ngayeje ni xi ngase xi katsꞌén Akaa̱b, ko̱jo ndiꞌa xi ndi̱ja̱a̱ ki̱ña̱ kamándani xi katsꞌénda, ko̱jo ngayeje na̱xi̱ńdáꞌniú xí katsꞌénda, a ki̱a̱jín kjitꞌa kui xo̱jo̱n xi kjitꞌa ni xi katsꞌén já ree̱ na̱xi̱ńdá Israee̱l. 40Kó kjiꞌanga kꞌien Akaa̱b ki̱a̱ nijan kisꞌijñajo̱ xi xchaá, kó ndií kui, xi ꞌmí Okosiyaa̱ kisꞌijña ngajoo̱.
Nga kamá Josafaa̱t nda ree̱ nangi Jundáa̱
(2Kr 20:31-37)
41Kó Josafaa̱t ndií Asaa̱, ítsꞌi̱yanii̱ nga atíxoma na̱xi̱ńdá Jundáa̱, nó xí ma nijoón nga Akaa̱b kamá nda̱ re xi chji̱a̱ni na̱xi̱ńdá Israee̱l. 42Josafaa̱t kantjiꞌún noó nga ítsꞌi̱yanii̱ nga atíxoma, kó kan ún nó kamaá nga atíxoma ki̱a̱ na̱xi̱ńdáꞌniú Jerusale̱n. Na̱aa̱n kui nda̱a̱ Asuba̱ kiꞌmí, kó kui xota̱chjo̱on na̱ Silii̱ boá xi kamá na̱aa̱n.
43Kó Josafaa̱t, ki̱a̱ kijítji̱ngi ngayeje ni nda xi katsꞌén Asa̱ na̱ꞌmii̱, kó jmíni̱xtjin íjñámasien kui ndi̱ya̱à, kó ni xi kixi̱ boá xi katsꞌén ngindyi̱ko̱n Néná. Ta̱nga kachjeꞌéxínjín ngi̱ndie nínga nkꞌaa̱, ngatꞌa̱ xota̱ na̱xi̱ńdaá to̱kó katsꞌénkꞌasꞌien kjo̱a̱tjó, ko̱jo ítí nisije̱n kui ngi̱ndiee̱. 44Kó Josafaa̱t índajo̱ kjo̱a̱xió nda̱ ree̱ na̱xi̱ńdá Israee̱l. 45Ngayeje ni xi ngase xi katsꞌén Josafaa̱t ko̱jo ngaꞌniú xí kisꞌiee̱, ko̱jo kjo̱a̱xchán xí katsꞌén, a ki̱a̱jín kjitꞌa ki̱a̱ xo̱jo̱n xi kjitꞌa ni xi katsꞌén já ree̱ nangi Jundáa̱. 46Bo̱a̱ ti̱ tsꞌén Josafaa̱t katsꞌénkjié ngayeje jáxíꞌín xi katsꞌénmasien yojoo̱, nga katsꞌénkꞌasꞌiee̱n kjo̱a̱tjó kje̱ꞌe ne, xi kisꞌińdo ngase ni̱xtjin nga kisꞌijña Asaa̱ na̱ꞌmii̱ kui nda̱a̱. 47Kui ni̱xtjin jàn ki̱a̱ nangi Endoo̱n jmí re kisꞌiejiín, kó ngo nda̱ xtitjón kisꞌijña ngi̱ndie nínga botixómá nda̱ ree̱.
48Josafaa̱t katsꞌénda tjotso yiꞌi xikoó xi chji̱a̱ni nangi Tarsii̱, tsi̱ꞌe̱ nga ko̱e̱je̱ nangi Ofii̱r nga ko̱e̱je̱kjaꞌá to̱nsinié, ta̱nga kamájiín nga kijí kui ngi̱ndiee̱, ngatꞌa̱ ki̱a̱ Esioo̱n-Ngébee̱r jatson kui tjotso yiꞌii̱.
49Kósꞌe̱ Oseaa̱ ndií Akaa̱b, bi̱ katsoó Josafaa̱t:
—Ngatjí moso̱na ko̱jo moso̱ tse̱ ngi̱ya tjotso yiꞌii̱.
Ta̱nga Josafaa̱t kamámejénjiín kijí. 50Kó kꞌien Josafaa̱t, kó ki̱a̱ nijan kisꞌijñajo̱ xota̱ xi xchaá, nga nijan akjanijínjo̱, ki̱a̱ na̱xi̱ńdáꞌniuú Ndabii̱, kó Joraa̱n ndií kui nda̱a̱ kisꞌijña ngajoo̱.
Nga kamá Okosiyaa̱ ree̱ na̱xi̱ńdá Israee̱l
51Nó tjiꞌún joó nga kamá Josafaa̱t nda̱ ree̱ nangi Jundáa̱, Okosiyaa̱ ndií Akaa̱b, ítsꞌi̱yanii̱ nga atíxoma na̱xi̱ńdá Israee̱l ki̱a̱ na̱xi̱ńdáꞌniú Samaria̱, kó jó nó kamaá nga atíxoma na̱xi̱ńdá Israee̱l. 52Kó ni xi ndajín katsꞌén ngindyi̱ko̱n Néná, kó bo̱a̱ katsꞌén xikó katsꞌén na̱ꞌmii̱, ko̱jo xikó katsꞌén na̱aa̱n, ko̱jo xikó katsꞌén Jeroboaa̱n ndií Nabaa̱t, kó ta̱ngatꞌanii̱ kui nga katsꞌénjé xota̱ Israee̱l, 53kó ki̱a̱ katsꞌénxátꞌaa̱ ne Baa̱l, kó asieéntikoó nga katsꞌéndikón, kó kui nii̱ xi katsꞌénkjaán kjo̱a̱xcha̱án Ndi̱a̱ná, kui xi Nee̱ xota̱ Israee̱l, kó bo̱a̱ katsꞌén xikó má katsꞌén na̱ꞌmii̱.
Currently Selected:
1 Já ree̱ 22: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
