2 Xota̱ Korinto̱ 13
13
Bi̱ tsꞌén katsóyà Pabloo̱ xikó sa̱ꞌínjo̱ xota̱ na̱ngo̱xi̱ xi chji̱a̱ni na̱xi̱ńdáꞌniú Korintoo̱ nga kjo̱chókatsijee̱n
1Kuí bí xi̱ꞌbi̱, xi ma jaán ndi̱yà nga kjuínkátsijenjnúꞌun. Ngayeje ni xi ka̱mandajin chjiéngá tsi jó ko̱jo tsi ján chistiko̱ xi si̱ꞌankjién nga ku̱i̱chji̱a̱ ni xi be. 2Jè bo̱a̱ kixianjnúꞌun, kjiꞌanga jáchokónjnúꞌun xi ma joó ndi̱yà, kó ngotꞌe̱, ndatsi ki̱a̱jín tikòn an nga tjítsꞌenꞌindóo̱ kui xota̱ xi katsꞌénjé ngasꞌe̱, ko̱jo ngayeje xota̱ xi ngasee̱, nga tsi kjuín ngiñá an ni̱ma̱jín ka̱mana jún. 3Bo̱a̱ tsꞌén an ngatꞌa̱ ndyi̱mindyiséjnú ni xi ko̱kó nga eén Kristoo̱ boá xi tsꞌénchji̱a̱ an, ta̱nga Kristoo̱ ngi̱jinjnú bokó ngaꞌniuú, jmí tsi ki̱a̱ tikónjinjnú xikoó ngo xi jmíjiín ngaꞌniú. 4Ngatꞌa̱ ndatsi jmí ngaꞌniú kisꞌiejiín nga kꞌientꞌa kro xikoó ngo xota̱, ta̱nga tikón ngotꞌe̱, ta̱ngatꞌanii̱ ngaꞌniuú Néná. Ngatꞌa̱ ti̱ bo̱a̱ ti̱ tsꞌén ji̱n jmíjínjne̱ ngo ngaꞌniú xikoó kuí nga kꞌientꞌa kroo̱, ta̱nga ta̱ngatꞌanii̱ ngaꞌniuú Néná nga Kristoo̱ tikónjinjne̱ nganda tsa̱jún.
5Tsitsíjen cha̱n cha̱njnúu̱ yojojnú tsi sꞌijinjnú Kristoo̱. Chitꞌa so̱bo̱a̱jnú yojojnú. Axa̱, a yàjínjnú nga Jesukristoo̱ tikónjinjnú. Ngototo tsi ndajín tsꞌén jatjo xki̱i̱ nga kichitꞌajnú yojojnú. 6Ta̱nga skoyáa̱ nga xcha̱jnú jún nga nda tsꞌén jatjo xki̱jne̱ ji̱n, nga eén Kristoo̱ xi ndyi̱ndokjo̱a̱jne̱. 7Ndyi̱ndokjo̱a̱jne̱ Néná tsi̱ꞌe̱ nga si̱ꞌánjínjnú ni xi ndajínkjiꞌi, jmí tsi tsi̱ꞌe̱ nga xcha̱ nga ji̱n je kichitꞌajne̱ yojojne̱, kó nda jatjojne̱, ta̱sá tsi̱ꞌe̱ nga ni xi nda si̱ꞌánjnú jún, ndatsi xotaa̱ ndyi̱tsó nga ndajín tsꞌén jatjo xki̱jne̱. 8Ngatꞌa̱ ta̱ jmíjín ni xi ka̱ma si̱ꞌanjne̱ kondraa̱ ja̱koxi̱i̱ Jesukristoo̱, kuíni nga ta̱sá kjo̱a̱ndaa̱ ja̱koxi̱i̱ ni xi ndyi̱niꞌánjne̱. 9Achichí tsjá májne̱ nga tsó xotaa̱ nga ji̱n jmíjínjne̱ ngaꞌniú, kó nga jún tjínjnú ngaꞌniú xí tsjá Néná. Ta̱kó ndyi̱ndokjo̱a̱jne̱ Néná, tsi̱ꞌe̱ nga ka̱ma kixi̱ ndo̱jò ndójo̱jnú xikótsꞌèn mejeén kui. 10Kuíni nga kui xo̱jo̱o̱n tjítsꞌenꞌindójnúꞌun ngindiee̱ nga kjuínkátsijenjnúꞌun, tsi̱ꞌe̱ nga, nga kjóchó an tajájín sa̱ꞌinjo̱jnúꞌun, ngatꞌa̱ Ndi̱a̱ná xí katsjána kui xaá, jmí tsi tsi̱ꞌe̱ nga sa̱ꞌinkjiéjnúꞌun, ta̱sá tsi̱ꞌe̱ nga sa̱kó ngaꞌniújnú jún.
Pabloo̱ bi̱ tsꞌén katsꞌénkjietꞌa xo̱jo̱o̱n
11Kó nga fetꞌanii̱ ni xi xiyàjnúꞌun já ntsꞌie, mejénna nga kꞌuiéjnú kjo̱a̱tsja, ti̱ndyi̱séjnú nga xota̱ xi kixi̱ ndo̱jò ndójo̱ ka̱majnú, te̱ꞌéngaꞌniújnúu̱ xingi̱jnú, kó ti̱ bo̱a̱ ti̱ tsꞌén ngasꞌiejnú jún nga, ngatꞌiéjnú kjo̱a̱xió, kó bo̱a̱ tsꞌén nga Néná xi tjiín kjo̱a̱xioó, ko̱jo xi tjiín kjo̱a̱tjoó nga tꞌíjñajinjnú. 12Ti̱ꞌantindéjnú xingi̱jnú nga ngo nga ngojnú. 13Tinde xò bo̱a̱ tsó ngayeje xota̱ tsjiee̱ Néná.
14Kjo̱a̱ndaa̱ Ndi̱a̱ná Jesukristoo̱, kjo̱a̱tjoó Néná ko̱jo A̱si̱énni̱xtjii̱n Néná ngatꞌíndojo̱jnú ngatsjéni̱xtjin. Bo̱a̱ kjiꞌi.
Currently Selected:
2 Xota̱ Korinto̱ 13: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
