2 Xota̱ Korinto̱ 12

Bi̱ tsꞌén katsóyà Pabloo̱ nga ngaꞌniuú Kristoo̱ boá xi tikónni

1Kjénní nga jmí ni chjíjiín nga je kꞌoxié an yojona, ta̱nga chjiéngá bo̱a̱ sa̱ꞌin an, kuíni nga kuichjiájomájnúꞌun kjo̱a̱a̱ ni xi kamábe an, ko̱jo ni xi akóna Ndi̱a̱ná. 2Be án ngo nda̱ xi sꞌijii̱n Kristoo̱, xi je tienijón nónií nga tsangínjo̱ ngaskande xi ma ján ndiꞌakꞌajmii̱, bejín an tsi tsangínjo̱ ko̱jo yojo, axa̱ ta̱ a̱siénni̱xtjin tsí, ta̱nga Néná xí be kui nii̱. 3Kó ti̱ be án kui nda̱ xi tsangínjo̱ ndiꞌakꞌajmi jàn, tsi yojo ko̱jo tsi a̱si̱énni̱xtjii̱n ta̱ Néná tsí xi be, 4kui nda̱a̱ tsangínjo̱ ngi̱ndie tsjachoo̱n Néná, nínga tsintꞌié én xí ꞌniú tjiꞌmá xi kji̱e̱ ngo xota̱ nga̱sondiee̱ xi boeꞌéndieè nga ku̱i̱chji̱a̱. 5Ka̱mara̱na je kꞌoxié an yojona kjo̱a̱a̱ ni xi kamaá kui nda̱a̱, ta̱nga jmí tsi ti̱ an xi je kꞌoxié an yojona, je kꞌoxié an yojona, ta̱nga kjo̱a̱a̱ nga ngiti̱ jmíjínna ngaꞌniú. 6Ta̱nga tsi je kꞌoxié an yojona, kjo̱a̱tsobéjín bo̱a̱ tsi bo̱a̱ sa̱ꞌin an, ngatꞌa̱ ni xi ja̱koxi̱ boá ni xi xiyà an. Ta̱nga bo̱a̱jín sa̱ꞌin an, ngatꞌa̱ mejénjínna nga tjín xí tsꞌatio sa̱ꞌínkjó kjo̱a̱a̱ xikótsꞌèn be, ko̱jo xikótsꞌèn ntꞌié kjo̱a̱a̱ an.

7Kó tsi̱ꞌe̱ nga jejín kꞌo̱xié an yojona kjo̱a̱a̱ kui ni xi ꞌniú chjínií xi je akóna Néná, Néná je katsjána ngo kjo̱a̱ni̱ma̱ xi tsꞌénfoaꞌatio an, xikó maá tsi ngo ndaꞌyá sisꞌieén yojona. Ngo mosoo̱ xindajín Satanaa̱ tjítsꞌénkjaꞌationa kjo̱a̱ni̱ma̱, tsi̱ꞌe̱ nga jejín kꞌo̱xié an yojona, 8kjo̱a̱a̱ kui nii̱ je ján ndi̱yà tsíꞌáa̱ Ndi̱a̱ná tsi̱ꞌe̱ kjo̱a̱ꞌáxínna kui kjo̱a̱ni̱ma̱a̱, 9ta̱nga ta̱sá bi̱ katsóna: “Kjo̱a̱ndana boá xi machjieén, ngatꞌa̱ ngaꞌniúna ma tsijen kjin kjin ngi̱jii̱n xota̱ xi jmíjiín ngaꞌniú.” Kó kuíni nga je kꞌoxié an yojona, ngatꞌa̱ ngiti̱ jmíjínna ngaꞌniú, tsi̱ꞌe̱ nga bo̱a̱ tsꞌén xcha̱ ngaꞌniuú Kristoo̱ ngi̱jii̱n ni xi tsꞌen an. 10Ta̱ngatꞌaa̱ nga tjóna Kristoo̱, achichí tsja mana ngatꞌa̱ ngiti̱ jmíjínna ngaꞌniú, ko̱jo kjo̱a̱a̱ nga chꞌo ꞌmína, ko̱jo kjo̱a̱a̱ nga jmíjínna ni xi machjiénna, ko̱jo kjo̱a̱a̱ nga miyotji̱ngina, ko̱jo kjo̱a̱a̱ kjo̱a̱ni̱ma̱ xi tsꞌén foaꞌatio an. Ngatꞌa̱ kjiꞌanga jmíjínna ngaꞌniú, kjiꞌá boá nga ꞌniú ngase kjima an.

Pabloo̱ bi̱ tsꞌén akó nga nda̱ kamaá xota̱ na̱ngo̱xi̱ xi chji̱a̱ni na̱xi̱ńdáꞌniú Korinto̱

11Xikó maá tsi ngo nda̱ xi tsobeé kjima an, nga je ꞌboxié an yojona, ta̱nga jún xí kiniꞌánjnúꞌun kjo̱a̱ꞌniú nga bo̱a̱ katsꞌen an. Jún xí chjiéngá kiniꞌántsjájnúꞌun katsaki, ngatꞌa̱ jmí tsi chiboa ngase chjií an ta̱bo̱a̱jiín kui já xí apostro̱ yiꞌi ndyi̱tsoó yojoo̱, ndatsi bo̱a̱ xian an nga jmí ni chjíjiín an. 12Kisꞌiena kjo̱a̱chiyákón nga katsꞌenxájinjnúꞌun, kó kjo̱a̱ndikoón, ko̱jo chi̱bo̱a̱a̱, ko̱jo ni xi katsꞌen an nga katsꞌenkjién án ngaꞌniuú Néná, kuí nii̱ xi bokó nga ja̱koxi̱ nga nda̱ apostroo̱ Néná boá an. 13Ngatꞌa̱ mí ni xi kasakoo̱ xota̱ na̱ngo̱xi̱ xi ngasee̱ xi kasakojínjnú jún. Ta̱ ngototo nga júnjín iniéjnúꞌun yojona nga kisꞌijñajinjnúꞌun, xikó katsꞌenjo̱ an xota̱ na̱ngo̱xi̱ xi ngasee̱. ¡Ti̱ꞌanjetakónjnúꞌun nga ndajínkjiꞌi ni xi katsꞌenjo̱jnúꞌun, nga bo̱a̱ katsꞌen an!

14Jè tikónda an tsi̱ꞌe̱ nga kjuínkátsijenjnúꞌun xi ma jaán ndi̱yà, kó ti̱nde ngotꞌe̱, jmí tsi jún kꞌuiniéjnúꞌun yojona. Ngatꞌa̱ jmí tsi ni xi tjínjnú jún xi tsꞌénmongase an, jún xí tsꞌénmongasejnúꞌun. Xi xchaá xí chjiéngá kjo̱a̱ꞌátjó tsi̱ꞌe̱ nga tsja̱á ndií, jmí tsi ndií xi kjo̱a̱ꞌátjó tsi̱ꞌe̱ nga tsja̱á xi xchaá. 15Kó kuíni nga an, nga xikoó tsi na̱ꞌmijnú má an, achichí tsja ka̱mana nga sa̱ꞌínkjién yeje an ni xi tjínna, kó ngaskande yojona ngatjie tsi ta̱ngatꞌanii̱ nganda tsa̱jún. Tsi bo̱a̱ tsꞌén ꞌniú tjóna jún, a chiboa ngase ka̱matjójnú jún an.

16Ja̱ je yàjnú nga jmí tsi jún iniéjnúꞌun yojona, ta̱nga tjín xota̱ xi ndyi̱tsó nga an, ngo xò nda̱ maña̱ xi tsꞌenṉcha̱jojnúꞌun jún. 17Kjiꞌanga tjín xí katsangiyajnúꞌun, a tsꞌenṉcha̱jojnú nga to̱n tsíꞌájnú. 18Titoo̱ ꞌniú tsíꞌáa̱ tsi̱ꞌe̱ nga ko̱e̱je̱katsijenjnú, kó katsangiyajo̱ an ingo nda̱ ntsꞌié. Axa̱ tsꞌenṉcha̱jojnú Titoo̱. A mí tsi ja̱koxi̱ nga Titoo̱, ko̱jo an ti̱ bo̱a̱ ti̱ tsꞌén tjíjinjne̱. A mí tsi ti̱kuii ni ndyi̱niꞌánjne̱ nga.

19A ndyi̱niꞌánkjójnú nga ndyi̱chjiáꞌájne̱ jún ngo kjo̱a̱niꞌánjetakón. Ngindyi̱ko̱n Néná nga ngatꞌaa̱ Kristoo̱ nga ndokjo̱a̱jne̱. Jún xota̱ xi tjójne̱, ngayeje ni xi niꞌánjne̱ tsi̱ꞌe̱ nga tjisákó ngaꞌniújnú boá. 20Ngatꞌa̱ nda̱ kjimana tsi kjiꞌanga kjuínkátsijenjnúꞌun bo̱a̱jín tsꞌén sa̱kóna jún xikótsꞌèn mejénna an, kó nga bo̱a̱jín tsꞌén sa̱kójnú an xikótsꞌèn mejénjnú jún. Nda̱ kjimana tsi ndyi̱bokjángájnú yojojnú, tsi tjínjnú kjo̱a̱ꞌontakón, ko̱jo tsi tjínjnú kjo̱a̱xti, ko̱jo tsi tjínjnú kjo̱a̱ndikonkón, ko̱jo tsi tjínjnú kjo̱a̱ndokjo̱a̱taꞌin, ko̱jo tsi tjínjnú ényà, ko̱jo tsi tjínjnú kjo̱a̱nkꞌatakón, ko̱jo tsi tjínjnú kjo̱a̱xchán. 21Ti̱ nda̱ kjimana nga tsi kjiꞌanga kjóchokón nginíjnú an, Néná sa̱ꞌínni̱ma̱takónna ngi̱jinjnú, kó ngaskande skja̱ndá mára an kjo̱a̱a̱ kui xota̱ xi katsꞌénjé ngasꞌe̱, kó kji̱e̱ tsꞌénkꞌoyàjín yojoo̱ kjo̱a̱a̱ ni ndándí xí ndyi̱tsꞌèn, ko̱jo nga ndyi̱tsꞌèn kjo̱a̱tondo̱, ko̱jo xi ndyi̱tsꞌènkꞌásꞌieén yojoo̱ ni xi chꞌokjiꞌii̱.

Currently Selected:

2 Xota̱ Korinto̱ 12: MAIX

Highlight

Compare

Copy