Xota̱ Ngalasia̱ 1

Bi̱ tsꞌén katsꞌéntinde Pabloo̱ xota̱ na̱ngo̱xi̱ xi chji̱a̱ni na̱xi̱ńdáꞌniú Ngalasia̱

1Án boá xi ꞌmína Pabloo̱, nda̱ apostro̱#1:1 “Xi kanangiyaa̱” tsó “nda̱ apostro̱” axa̱ “já apostro̱” nga én ngriengo̱. xi jmí tsi xotaa̱ xi katsangiya, ngatꞌa̱ Jesukristoo̱ ko̱jo Néná xí Na̱ꞌmi xi katsꞌénkjaꞌáꞌyaá kui, kuí boá xí katsjáxána. 2Án xí tjítsꞌentindejnúꞌun jún, ko̱jo ngayeje já ntsꞌie xi chji̱a̱ni na̱ngo̱xi̱i̱ na̱xi̱ńdáꞌniú Ngalasia̱: 3Ngatsjájnú kjo̱a̱ndaa̱ ko̱jo kjo̱a̱xioó Néná xí Na̱ꞌmii̱, ko̱jo Ndi̱a̱ná Jesukristoo̱, 4kui xi katsjá yojoo̱ nga kiniꞌánkꞌién ta̱ngatꞌanii̱ jéná, tsi̱ꞌe̱ nga kꞌo̱xiéꞌáná kui nga̱sondie xi ndajín xi tindyión kuí ni̱xtjii̱n, xikótsꞌèn kamámejeén Néná xí Na̱ꞌmii̱. 5Kui tsi̱ꞌe̱ ngatama kjo̱a̱jee̱ ngatsjéni̱xtjin. Bo̱a̱ kjiꞌi.

Bi̱ tsꞌén íni̱jmì Pabloo̱ nga jmíjín ingo éntjatsi̱e̱e̱ Néná

6Achichí kijíndikónna nga ta̱nisién tsá kiniꞌánkjinjnúu̱ yojojnú Néná, kui Néná xi tsíchji̱a̱jnú nga katsjájnú kjo̱a̱nda xi sakóná ngatꞌaa̱ Kristoo̱, ngatꞌa̱ kje̱ꞌe éntjatsi̱e̱ ndyi̱mongíntji̱ngíjnú. 7Nga ja̱koxi̱ jmíjín kje̱ꞌe éntjatsi̱e̱, ta̱ ni xi kjimá tsí nga tjín xota̱ xi ndyi̱mindyiátsobéjnú, kó mejeén nga ko̱síkjoyá éntjatsi̱e̱e̱ Kristoo̱. 8Ta̱nga ndatsi ngaskande ji̱n, ko̱jo tsi ngo ndítsjiee̱ ndiꞌakꞌajmii̱ xi ku̱i̱ꞌíni̱jmìjnú kje̱ꞌe éntjatsi̱e̱e̱ Néná, kjo̱a̱a̱ xi je ikꞌíni̱jmìjne̱, ngatꞌíko̱jonii̱. 9Xikó je kixianjnúꞌun ngasꞌe̱, ti̱ bo̱a̱ xian ngiñá an ngotꞌe̱: Tsi tjín xi ku̱i̱ꞌíni̱jmì kje̱ꞌe éntjatsi̱e̱e̱ Néná, xi kje̱ꞌe tsó xikoó xi je kiniꞌánkꞌasꞌienjnú, ngatꞌíko̱jonii̱.

10Ngatꞌa̱, a kjo̱a̱ndaa̱ xotaa̱ xí tsꞌénmongase an, axa̱ kjo̱a̱ndaa̱ Néná boá. Axa̱ xotaa̱ xí tsꞌéntsjàa̱ kjo̱a̱tsja. Ngatꞌa̱ tsi mejénna nga xotaa̱ xi tsja ka̱maa̱ ni xi sa̱ꞌin an, ja̱ ngiti̱ mosoo̱ Kristoo̱jín ka̱ma an tsobo̱a̱.

Bi̱ tsꞌén íni̱jmì Pabloo̱ kjo̱a̱a̱ xá xí katsꞌén

11Ta̱nga xiyàjnúꞌun kui nii̱ já ntsꞌie, nga kui éntjatsi̱e̱ xi je kixiyajnúꞌun, jmí tsi tsi̱ꞌe̱ xota̱ nga̱sondiee̱. 12Ngatꞌa̱ jmí tsi ngo xota̱ xi katsjána, ko̱jo tsi xi akóyána, kuí Jesukristoo̱ xi katsóyàna kui eén.

13Jè kandaꞌyájnú xikótsꞌèn kisꞌijña an ngasꞌe̱, nga kamábendikón an Néná xikótsꞌèn xota̱ jundíoo̱, ko̱jo kótsꞌèn nga an tsangatji̱ngíi̱ xota̱ na̱ngo̱xi̱i̱ Néná, ko̱jo nga kamámejénna katsꞌenkjié an. 14Xikó tsꞌén tikoón xota̱ jundíoo̱ nga kꞌuíndo ngindyi̱ko̱n Néná, achichí má xota̱ nangina xi nijan kamáxchájo̱ an xi katsꞌée̱n nga jaꞌatjóo̱n, ngatꞌa̱ ꞌniú ngase chi̱ni̱ kamá an nga katsꞌenkjatjosón an kjo̱a̱xcha̱á xota̱ xi xchána. 15Ta̱nga ngindiee̱ nga stse̱n án, Néná íjñátꞌaxínna kó katsjáxána, ngatꞌa̱ achichí je kjo̱a̱ndaa̱ kui. 16Kó ni̱xtjin nga kamámejeén akóna ndií, tsi̱ꞌe̱ nga kꞌuini̱jmì án éntjatsi̱e̱e̱ Néná ngi̱jii̱n xota̱ xi jundío̱jín, kó nde ngojín xota̱ xi asíyáa̱ tsi nda, ko̱jo tsi ndajínkjiꞌi kui nii̱. 17Ti̱nde kijíjín an na̱xi̱ńdáꞌniú Jerusale̱n nga kijíkatsijèe̱n kui já xí kamá apostro̱ ngindiee̱ nga kamá an, ta̱sá ti̱ kjiꞌa kijí an ngi̱ndie xi síndojin nangi Arabia̱, sꞌe̱ ti̱ kijí nginí an na̱xi̱ńdáꞌniú Ndamasko̱.

18Sꞌe̱ jaskan ngije jaꞌa ján nó, kijí an na̱xi̱ńdáꞌniú Jerusale̱n, tsi̱ꞌe̱ nga sku̱i̱e̱ an nda̱ xi ꞌmí Peé, kó tjiꞌún ni̱xtjin kamána ki̱a̱a̱ ko̱jo kui nda̱a̱, 19ta̱nga nde ingojín já apostro̱ xi ngasee̱ xi kamábe ngase an, ta̱kuítsí Sandiyaá kui xi ntsꞌi̱e̱ ma Ndi̱a̱ná Jesukristoo̱. 20Néná xí be nga ja̱koxi̱ boá ngayeje ni xi tsꞌénꞌbitꞌa an xo̱jo̱n.

21Sꞌe̱ jaskan kijí an ngi̱ndie xi síndo ngi̱jii̱n nangi Siria̱ ko̱jo nangi Silisia̱. 22Kó kui ni̱xtjin jàn nde kji̱e̱ bejínna xota̱ na̱ngo̱xi̱i̱ Kristoo̱ xi síndo nangi Jundea̱. 23Ta̱ bi̱ tsi katsó xotaa̱ nga tsíchji̱a̱: “Kui nda̱ xi tsangatji̱ngíná ngasꞌe̱, kuí boá xi ngotꞌe̱ ꞌne̱, tsꞌénꞌbini̱jmì éntjatsi̱e̱e̱ kui kjo̱a̱sꞌijin xi kje̱ꞌe ni̱xtjin kamámejeén katsꞌénkjié.” 24Kó kui xotaa̱ katsjaá kjo̱a̱je Néná ta̱ngatꞌanii̱ an.

Currently Selected:

Xota̱ Ngalasia̱ 1: MAIX

Highlight

Compare

Copy