2 Xota̱ Korinto̱ 11

Bi̱ tsꞌén katsóyà Pabloo̱ ni xi tsꞌén já apostro̱ ndisoo̱

1¡Achichíra̱ ndakjiꞌi tsi si̱ꞌanchíkjo̱a̱ chiíjnúꞌun, tsi xikoó ngo nda̱ xi tsobeé nga kuichjiájojnúꞌun! Ta̱ xikótsꞌénnií, ta̱nga ti̱ꞌanchíkjo̱a̱ chiíjnúꞌun. 2Ngatꞌa̱ kui kjo̱a̱chi̱ni̱ xi tjínna kjo̱a̱a̱ jún, Néná xí katsangiya. Ngatꞌa̱ an jè xikoó tsi katsjáa̱ jún, nga ta̱ ngo tsí xi̱ꞌin xi ku̱i̱xanjo̱jnú, kó kui xi̱ꞌii̱n kuí xí Kristoo̱. Mejénna nga xikoó ngo tsa̱kjìn xo̱ngò xí kji̱e̱ jmí xi̱ꞌin ꞌbéjiín, nga bo̱a̱ tsꞌén sa̱ꞌinkꞌasꞌienjnúꞌun. 3Ta̱nga nda̱ kjimana, nga xikótsꞌèn ye̱e̱ katsꞌénkjién kjo̱a̱mañaa̱ nga tsꞌenṉcha̱jo na̱ Ebaa̱, nga ti̱ bo̱a̱ ti̱ tsꞌén xi̱ꞌṉcha̱jojnú jún, tsi̱ꞌe̱ nga ka̱matsobéjii̱n kjo̱a̱kjíntakónjnú, kó jmí tsi tsjietsꞌén, ko̱jo tsi ngayeje takónjnú nga kongintjingíjnúu̱ Kristoo̱. 4Kui nii̱ tꞌíxiánjnúꞌun, ngatꞌa̱ boeꞌéjnúu̱ ngi̱ndie nga ngo xi kjo̱chó nga ku̱i̱ꞌíni̱jmìjnú kjo̱a̱a̱ ngo Kjiso̱ xi kje̱ꞌe, xikoó xi je kiꞌmíyàjne̱ ji̱n. Niꞌánjo̱ꞌójnú ngo a̱siénni̱xtjin xi kje̱ꞌe, xikoó xi je kiniꞌánjo̱ꞌojnú jún. Niꞌánjo̱ꞌójnú ngo éntjatsi̱e̱ xi kje̱ꞌe, xikoó xi je kiniꞌánjo̱ꞌojnú jún. 5Kó bee̱ko̱n an nga jmí tsi chichí ngase mana yojona, ngindyi̱ko̱n kui já apostro̱ yiꞌi xi tjiín. 6Ndatsi jmí tsi ꞌniú mana chji̱a̱ an ngindyi̱ko̱n xotaa̱, ta̱nga be án ni xi tsi̱ꞌe̱ Néná, kó kui nii̱ xi ngatsjéni̱xtjin ndyi̱bokojne̱ jún.

7Kjiꞌanga ini̱jmijnúꞌun éntjatsi̱e̱e̱ Néná jaꞌachjíjínjnúꞌun. Nga kui nii̱ katsꞌen an, ni̱ma̱takón ijñá an yojona, kó jún nkꞌa katsꞌenkꞌijñájnúꞌun. A katsꞌenjé án nga bo̱a̱ katsꞌen an. 8Kje̱ꞌe na̱ngo̱xi̱ jaꞌaxíi̱n to̱o̱n, tsi̱ꞌe̱ nga katsꞌen an xána nga katsꞌensénjnúꞌun. 9Kó kjiꞌanga kisꞌijñajinjnúꞌun nga kamáchjiénna ngo ni, jmíni̱xtjin nga jún iniéjnúꞌun yojona, ngatꞌa̱ kui ntsꞌié xí chji̱a̱ni nangi Masendonia̱ katsjána ngayeje ni xi kamáchjiénna. Ngojín chꞌià é xí katsꞌénniꞌínjnú jún kamá an, kó jmíni̱xtjin bo̱a̱ ka̱ma. 10Jmíjín xi ku̱i̱ꞌíchjaá kui kjo̱a̱tsja xi̱ꞌbi̱ ngayeje nangi Akaya̱. Be án nga ja̱koxi̱ boá ni xi tꞌíxián an, xikótsꞌèn ja̱koxi̱ Kristo̱ xi tikónjinna. 11Míkjo̱a̱a̱. A kjo̱a̱a̱ nga tjójínná jún. ¡Néná be nga achichí tjóna jún!

12Ta̱nga ni xi tsꞌen an, ta̱kó sa̱ꞌinra an, tsi̱ꞌe̱ nga tsjandièjàa̱n kui xota̱ xi mejeén nga ka̱ma xikoó ji̱n, tsi̱ꞌe̱ nga je kꞌo̱xié yojoo̱. 13Ngatꞌa̱ ta̱ xota̱ apostro̱ ndiso tsí bo̱a̱, kó kuí boá xi ndyi̱ꞌboṉcha̱jo maña̱ xotaa̱ nga apostroo̱ Kristoo̱ ndyi̱tsoó yojoo̱. 14Kó ngata̱ ma ndikónjínjnú, ngatꞌa̱ ti̱kuii xindajín Satanaa̱ tsꞌénkjátsónyá maña̱ yojoo̱, nga ndítsjiee̱ Néná tsoó yojoo̱. 15Kó kuíni, ngata̱ fíndikónjínjnú nga tjín xota̱ xi bosikójo xindajín xi tsꞌénkjátsónyá maña̱ yojoo̱, nga xota̱ xi tsꞌén ni xi ndaa̱ ma. ¡Ta̱nga kjo̱chó ni̱xtjin nga sa̱ko̱ó chjií ni xi katsꞌén!

Bi̱ tsꞌén katsóyà Pabloo̱ nga kjín kjo̱a̱ni̱ma̱ jaꞌatio ta̱ngatꞌanii̱ xaá

16Ti̱ bo̱a̱ ti̱ xian nginíjnúꞌun, nga ngojín xi sa̱ꞌínkjó nga tsobéna, ta̱nga tsi bo̱a̱ tsꞌén niꞌánkjójnú, te̱ꞌéndièjnúꞌun nga kuichjiájojnúꞌun xikoó ngo xi tsobeé, tsi̱ꞌe̱ nga je kꞌo̱xié chií an yojona. 17Ni xi chji̱a̱ an, chjiá án ta̱nga jmí tsi Ndi̱a̱ná xi tsꞌéntsjána ni xi kuichjiá án, ta̱xkiya chjiá án ngatꞌa̱ ma kon an nga je ꞌboxié an yojona. 18Kó nga achichí má xota̱ xi je ꞌboxié yojoo̱ kjo̱a̱a̱ ni xi tsꞌén, kuíni nga ti̱ bo̱a̱ ti̱ sa̱ꞌin an nga, nga je kꞌoxié an yojona.

19Achichí kjínkónjnú jún, kuíni nga tsja májnú nga ndaꞌyájnúu̱ xota̱ xi tsobeé. 20Niꞌánchíkjo̱a̱jnúu̱ tsi tjín xí moso̱ xi kastiñá sa̱ꞌínjnú, ko̱jo tsi tjín xí kꞌo̱ṉcha̱jojnú, ko̱jo tsi tjín xí sa̱ꞌínchejéjnú ni xi tsa̱jún, ko̱jo tsi tjín xí je kꞌo̱xiéjnú yojoo̱, ko̱jo tsi tjín xí ko̱tꞌa tꞌanijonjnú. 21Ta̱nga ji̱n jmí tsi bo̱a̱ tsꞌén tajá kiniꞌánjo̱jne̱ jún xikoó kui xotaa̱, achichí soboá mana nga bo̱a̱ xian an.

Ta̱nga tsi tjín xí maá nga je ꞌboxié yojoo̱, ja̱ ti̱ bo̱a̱ ti̱ ka̱ma sa̱ꞌin an nga, ndatsi kjo̱a̱tsobé boá kui nii̱. 22A xota̱ ebreo̱ boá kui jaá. Ja̱ ti̱ kuí án nga. A xota̱ Israee̱l boá. Ja̱ ti̱ kuí án nga. A xota̱ tji̱e̱e̱ Abraa̱n boá. Ja̱ ti̱ kuí án nga. 23A xota̱ mosoo̱ Kristoo̱ boá kui jaá. Xikoó tsi tsobéna nga chjiá án. ꞌNiú ngase je katsꞌenxá an ta̱bo̱a̱jiín kui jaá, kjín ndi̱yà je akjaꞌyana ndo̱bo̱a̱yà, ti̱ kjín ndi̱yà je akjana, kó ti̱ kjín ndi̱yà nga je mején ma niꞌánkꞌiénna. 24Ún ndi̱yà nga xota̱xá jundíoo̱ katsjákjo̱a̱ nga kiniꞌánjéna, nga akjana kantjiꞌún nijón ńꞌniú, xikótsꞌèn tikoón nga botíjé kuí jaá. 25Ján ndi̱yà jè akjana yá. Ngo ndi̱yà nga tsꞌaya xtínna ndi̱jo̱ xotaa̱. Ján ndi̱yà kitingíndió tjotso je xi kijíyà an. Ngo ni̱xtjin ngo ni̱xtji̱e̱n je kitsjiensón an ndáchíkoón. 26Achichí kjín ndi̱yà xi je kistsoꞌbá an ta̱jñàní, kuíni nga je kamábe an ndikoón ndejèꞌ, ndikoón xota̱chejé, ndikoón ngi̱jii̱n xota̱ nangina, ko̱jo ngi̱jii̱n xota̱ xi jundío̱jín, ndikoón ni xi ma ngi̱jii̱n na̱xi̱ńdáꞌniuú, ndikoón ni xi ma nínga jno̱o̱, ko̱jo ngi̱jin ndáchíkoón, ndikoón ngi̱jii̱n xota̱ ndiso xi ti̱xꞌi̱a̱n ntsꞌié ndyi̱tsó. 27Jè tsie xá xí katsꞌen an xi katsꞌénkjiendana. Kjín ni̱xtjin indyiáńjñáa̱ yojona. Jè jaꞌatio an bojó ko̱jo xíndá. Kjín ndi̱yà jaꞌatio an kjindiá nga jmí ni iskjíni̱e̱jín an. Kjín ndi̱yà jaꞌatio an nchꞌàn, ko̱jo nga jmí ńjño kisꞌiejínna.

28Kui nii̱, ko̱jo kje̱ꞌe ngase ni xi je kamána, kó ngaskande ndyiojón ndyiojón nda̱ kamána kjo̱a̱a̱ ngayeje xota̱ na̱ngo̱xi̱i̱. 29Tsi tjín xi ma oo̱n, kó ngaskande xikoó tsi ko̱jo an ma onna. Achichí xti mana kjo̱a̱a̱ kui xota̱ xi ndyi̱tsꞌènchajá kje̱ꞌe xota̱. 30Tsi chjiéngá je kꞌoxié an yojona, ta̱sá mejénna nga je kꞌoxié an yojona ngatꞌa̱ ngiti̱ jmíjínna ngaꞌniú. 31Néná kui xi Na̱ꞌmii̱ Ndi̱a̱ná Jesukristoo̱ be nga ja̱koxi̱ boá ni xi tsꞌénchji̱a̱ an, kó kuí boá xi nganiꞌántsjaà ta̱ kjiꞌání. 32Kjiꞌanga kisꞌijña an na̱xi̱ńdáꞌniú Ndamasko̱, nda̱ xtitjón xi tsꞌénxátꞌaa̱ nda̱ re Aretaa̱, índo jájuún xi askondá nga̱ntjo̱a̱a̱ na̱xi̱ńdáꞌniuú tsi̱ꞌe̱ nga stso̱bo̱a̱na. 33Ta̱nga tjín xota̱ xi ngo ni̱se̱nyá íyána, tsi̱ꞌe̱ nga katsꞌénkjatjajenna ngo nga̱ntjo̱a̱masienkjá xi tikoón ki̱a̱ xoó na̱xi̱ńdáꞌniuú, kó bo̱a̱ tsꞌén jatjoꞌma an ngi̱ya tsja kui xtitjoón.

Currently Selected:

2 Xota̱ Korinto̱ 11: MAIX

Highlight

Compare

Copy