2 Xota̱ Korinto̱ 10

Bi̱ tsꞌén kijíjindojo̱ Pabloo̱ xá xí Néná katsjaá

1Ngindyi̱ko̱n Kristo̱ xi tjoó, ko̱jo xi nda tsꞌénjo̱ xotaa̱, an Pabloo̱, ngo ni kuichjiájojnúꞌun ngatꞌa̱ tjín xota̱ xi tsó nga chi̱ni xò án nga ki̱a̱ tikónjinjnúꞌun, ta̱nga tajá xò chji̱a̱ an nga ki̱a̱jín tikónjinjnúꞌun. 2ꞌNiú míꞌájnúꞌun nga kjiꞌanga kjuínkónjnúꞌun, ngata̱ jmí kjo̱a̱ꞌniú niꞌánjínjnúꞌun nga tajá sa̱ꞌinjo̱jnúꞌun. Ngatꞌa̱ tjíngoo̱ ko̱n an nga tajá sa̱ꞌinjo̱ an kui xi ndyi̱tsó nga xikoó tsi xota̱ ta̱ chiboa ndyi̱ꞌnaxiéjne̱ yojojne̱. 3Kjénní nga kui nga̱sondiee̱ tindyión ji̱n, ta̱nga jmí tsi bo̱a̱ tsꞌén ndyi̱bixkánjne̱ xikótsꞌèn kján xotaa̱ kui nga̱sondiee̱. 4Ngatꞌa̱ kui ni xi ni xi tjíbixkánjo̱ ndyi̱ꞌmìi̱, jmí tsi nii̱ kui nga̱sondiee̱, ngaꞌniuú Néná boá, ngaꞌniú xi ka̱maa̱ sa̱ꞌínkjatsón ngaꞌniuú ni xi ndajiín. 5Kó bo̱a̱ tsꞌén si̱ꞌanchajajne̱ ta̱jmì énní, ko̱jo kjo̱a̱nkꞌatakón xi sakó ngaꞌniuú xi ꞌbíchjaá xotaa̱ nga sku̱i̱e̱ Néná, tsi̱ꞌe̱ nga ko̱sikjoyájne̱ kjo̱a̱kjíntakoón xotaa̱, kó ku̱i̱ntꞌiéꞌeén Kristoo̱. 6Kó jè tindyiondajne̱ nga si̱ꞌanjéjne̱ ta̱ꞌyaní xi ku̱i̱ntꞌiéꞌénjín, ta̱nga chjiéngá jún tjón je nda kandaꞌyáꞌénjnú.

7Jún xi tsitsíjenjnúu̱ ni xi ya sónkꞌaá. Tsi tjín xí sꞌijii̱n nga Kristoo̱ chji̱a̱ni, nga tsꞌénkjó nga ko̱jo ji̱n ki̱a̱ ndokjo̱a̱niji̱n Kristoo̱ xikoó kui. 8Soboájín mana nga je kꞌoxié an yojona kjo̱a̱a̱ xá xí tjínjne̱, ngatꞌa̱ Ndi̱a̱ná xí katsjájne̱ kui xaá, tsi̱ꞌe̱ nga sa̱kó ngaꞌniújnú jún, kó jmí tsi tsi̱ꞌe̱ nga si̱ꞌankjiejnú. 9Mejénjínna nga kuindyiandikónjnúꞌun kjo̱a̱a̱ xo̱jo̱n xi tsꞌéntsangiyajnúꞌun, 10ngatꞌa̱ nga ja̱koxi̱ tjín xota̱ xi tsó, nga xo̱jo̱nna achichí xò tajá ko̱jo ꞌniú xò chji̱a̱, ta̱nga nga an má xò xí tikónjinjnúꞌun inda xò an, kó nga chꞌo xò énna. 11Ta̱nga kui xota̱ xi tsó kui nii̱, chjiéngá sku̱i̱e̱ nga xikótsꞌèn ndokjo̱a̱jne̱ nga xo̱jo̱n nga kjin tindyiónjnú, ti̱ bo̱a̱ ti̱ kon ka̱majne̱ nga ki̱a̱ má ku̱i̱ndyionjo̱jne̱ jún.

12Ngatꞌa̱ ka̱májín takónjne̱ nga nijan ka̱majne̱ kui xota̱ xi ti̱kuii yojoo̱ nda ndyi̱ꞌboxié. Kui xotaa̱ bejín ni xi ndyi̱tsꞌèn nga ndyi̱tsaton kjo̱a̱chꞌáṉcha̱ nga ndyi̱ꞌbochi̱bo̱a̱jo yojoo̱, nga ndyi̱tsꞌènkjién kjo̱a̱kjíntakón xi tsi̱ꞌe̱. 13Ta̱nga ji̱n nga ꞌne̱, ta̱ ngototo xá xí katseꞌéjne̱ ji̱n xi je ꞌnaxiénijne̱ yojojne̱. Ku̱i̱tja̱tiójínjne̱ tsindió xí íjñaá Néná xájne̱, tsi̱ꞌe̱ nga jáchójne̱ ngaskande nínga tindyiónjnú jún. 14Kuíni nga jmí tsi ndyi̱bitjatiójne̱ nga je ndyi̱ꞌnaxiéjne̱ yojojne̱, xikoó tsi jáchójínjne̱ nínga tindyiónjnú. Ja̱koxi̱ nga ji̱n boá xi tjón jáchochonjne̱ nga ikꞌíni̱jmìjne̱ éntjatsi̱e̱e̱ Kristoo̱. 15Kó jmí tsi ji̱n xi je ko̱ꞌna̱xiéjne̱ yojojne̱ kjo̱a̱a̱ xá xí katsꞌén kje̱ꞌe xota̱. Ta̱sá ndyi̱chiyájne̱ nga ꞌniú ngase sꞌi̱jinjnú Néná, tsi̱ꞌe̱ nga tsie ngase xá xí ka̱ma si̱ꞌanjne̱ ngi̱jinjnú. 16Kó bo̱a̱ tsꞌén nga kjin ngase kongínjne̱ nga kꞌuiníjmi̱jne̱ éntjatsi̱e̱e̱ Kristoo̱, ngi̱ndie xi kjin ngase manii̱ nínga tindyiónjnú. Ta̱nga jmí tsi ki̱a̱ kongínjne̱, nínga kje̱ꞌe xí je katsꞌénxá, tsi̱ꞌe̱ nga jejín ko̱ꞌna̱xiéjne̱ yojojne̱ kjo̱a̱a̱ xá xí katsꞌén kje̱ꞌe xota̱.

17Tsi tjín xí mejeén nga je kꞌo̱xié yojoo̱, bo̱a̱ nga tsꞌén, ta̱nga kjo̱a̱a̱ ni xi Ndi̱a̱ná katsꞌénjo̱. 18Ngatꞌa̱ kuijín xi si̱ꞌanjo̱ꞌo kui xi nda tsꞌénꞌboxié yojoo̱. Kuí xí si̱ꞌanjo̱ꞌo kui xi Néná nda tsꞌén ku̱i̱chji̱a̱ kjo̱a̱a̱ kui.

Currently Selected:

2 Xota̱ Korinto̱ 10: MAIX

Highlight

Compare

Copy