2 Xota̱ Korinto̱ 9

Bi̱ tsꞌén katsóyà Pabloo̱ xikótsꞌèn chja̱ꞌásón chji̱e̱ xi ko̱na̱ngíyaá xota̱ na̱ngo̱xi̱ xi chji̱a̱ni Jundea̱

1Nde chjiénjín nga xo̱jo̱n kuitꞌajnúꞌun, kjo̱a̱a̱ chji̱e̱ xi tjítjoꞌásón tsi̱ꞌe̱ xota̱ na̱ngo̱xi̱ tsjiee̱ Néná, xi síndo nangi Jundea̱, 2ngatꞌa̱ jè be an nga mejénjnú ko̱si̱ko̱jójnú. Tsjá kamána nga kixiyàa̱ kui nii̱ xota̱ xi chji̱a̱ni nangi Masendonia̱, kó bo̱a̱ kixiáa̱n nga xota̱ xi chji̱a̱ni Akaya̱ ndeskande koó nó xí ikitjá je síndonda nga tsja̱a kuí chji̱e̱e̱. Kjiꞌanga xota̱ xi chji̱a̱ni Masendonia̱ tsintꞌie kuí nii̱ mejeén ngayejee̱ nga kamámejeén asíko̱jo. 3Ta̱nga tsꞌéntsangiyajnúꞌun já ntsꞌie xi̱ꞌbi̱, tsi̱ꞌe̱ nga jmí tsi ta̱kjo̱a̱nda ka̱ma nga tsja kamána kjo̱a̱a̱ jún, ta̱sá ti̱ndyiondajnú xikó kixianjnúꞌun. 4Ti̱ꞌankjínjnúu̱ takónjnú, kókjiꞌi kjo̱a̱soboá kꞌuiéjne̱ ji̱n ko̱jo tsi jún, tsi tjín xota̱ Masendonia̱ xi kongínjo̱jne̱, kó jún kji̱e̱ tikóndajínjnú kui chji̱e̱e̱. 5Kó kuíni nga katsꞌenkjó án nga ꞌniú tsíꞌáa̱ kui já ntsꞌiee̱, tsi̱ꞌe̱ nga ko̱e̱je̱tjón nga ko̱e̱je̱katsijenjnú, kó ko̱síko̱jójnú nga ku̱i̱ꞌíjñanda kui chji̱e̱ xi jún ko̱e̱ꞌéjnú kiꞌmíjnú. Bo̱a̱ tsꞌén nga je sꞌi̱jñanda kui chji̱e̱ xi ngayeje takónjnú nga ko̱e̱ꞌéjnú, kó jmí tsi xikoó tsi ngo kjo̱a̱ꞌniú nga ko̱e̱ꞌéjnú.

6Ngatjaꞌátsjienjnú kui nii̱: Xota̱ xi chiboa ꞌbítji̱e̱, chiboa cha̱n foaꞌátikó. Kó xota̱ xi tsie ꞌbítji̱e̱, tsie cha̱n foaꞌátikó. 7Nga ngo nga ngojnú te̱ꞌéjnú xikó kjiꞌi ndibánií ini̱ma̱jnú, kó jmí tsi ngayejejín takónjnú, ko̱jo jmí tsi kjo̱a̱a̱ kjo̱a̱ꞌniú nga ko̱e̱ꞌéjnú. Ngatꞌa̱ Néná tjórií xota̱ xi tsja tjiín nga tsjá ni xi tsjá. 8Kó Néná tjiín ngaꞌniú tsi̱ꞌe̱ nga tsja̱ajnú ngayeje to̱ko̱ya kjo̱a̱nda, tsi̱ꞌe̱ nga ngatsjéni̱xtjin kꞌuiéjnú ngayeje ni xi chjiénjnú, kó ngaskande tsꞌatio ngase kꞌuiéjnú, tsi̱ꞌe̱ nga ka̱ma ko̱si̱ko̱jójnú xota̱ xi ngasee̱. 9Xikó tsꞌén kjitꞌa xo̱jo̱n eén Néná nínga bi̱ tsoó:

Ni xi tjiín kuí katsꞌénkjaꞌasón nga katsjaá xota̱ ni̱ma̱a̱,

kó kjo̱a̱kixi̱ tsi̱ꞌe̱ ngatsjéni̱xtjin tikón.

10Néná xí tsjá xojmá xí sꞌitji̱e̱e̱, kó ti̱ tsjá nichiniee̱ nga. Kó ti̱ bo̱a̱ ti̱ tsꞌén tsja̱ajnú jún ngayeje ni xi chjiénjnú, kó sa̱ꞌínkjín ni nda xi ndyi̱ꞌbítji̱e̱jnú, tsi̱ꞌe̱ nga ka̱ma ko̱si̱ko̱jójnú kje̱ꞌe xota̱. 11Kjín to̱ko̱ya kjo̱a̱cho̱n kꞌuiéjnú, kó ka̱ma ngayeje takónjnú ko̱si̱ko̱jójnú xotaa̱. Ni xi jún ko̱na̱ngíyajo̱jne̱ ji̱n, kuí xí sa̱ꞌín nga kjín ngase xota̱ xi tsja̱á ndokꞌóchjì Néná. 12Kjiꞌanga tjifíjoo̱ kui kjo̱a̱bosíko̱joo̱ xota̱ na̱ngo̱xi̱ tsjiee̱, tjímongínjoo̱ ni xi chjieén, kó bo̱a̱ tsꞌén kjín xota̱ xi tsja̱á ndokꞌóchjì Néná. 13Nga ko̱si̱ko̱jó kuí xotaa̱ sa̱ꞌíntsjaà Néná, ngatꞌa̱ jún kandaꞌyáꞌénjnú éntjatsi̱e̱e̱ Jesukristoo̱ xi timatji̱ngijnú, ko̱jo kjo̱a̱a̱ nga ngayeje takónjnú nga ndyi̱bosíko̱jojnú xota̱ xi̱ꞌba̱, ko̱jo ngayeje xota̱ xi ngasee̱. 14Kó kjiꞌanga kui xotaa̱ ku̱i̱chji̱a̱a̱ Néná, ku̱i̱chji̱a̱tjéjnú kjo̱a̱a̱ nga tjoó jún, ko̱jo kjo̱a̱a̱ kui kjo̱a̱nda je xi je katsjájnú Néná. 15¡Ndokꞌóchji̱ì Néná kjo̱a̱a̱ ni xi tsjáná! ¡Nde jmíjínná ngo én kó kꞌuíi̱n kjo̱a̱nda je xi ta̱ katsjá tsíná!

Currently Selected:

2 Xota̱ Korinto̱ 9: MAIX

Highlight

Compare

Copy