1 Samuee̱ 9
9
Samuee̱ ko̱jo Sauu̱l kasakoo̱ xkjín
1Kisꞌijña ngo nda̱ xi chji̱a̱ni xota̱ tji̱e̱e̱ Benjaa̱ xi achichí chꞌokon ko̱jo cho̱n kamá, xi kiꞌmí Sii̱, kui xi ndií Abiee̱l kamá, ndíndee̱ Seroo̱r, ndínde xi ma joó Bekoraa̱t, ndínde xi ma jaán Afiyaa̱, kó ngayejee̱ nga xota̱ tji̱e̱e̱ Benjaa̱ tsíchji̱a̱ni.
2Kó kui nda̱a̱ ngo ndí xí kiꞌmí Sauu̱l kisꞌijñaa̱, ngo nda̱ kjindí xí achichí tsjá kisꞌie. Ngi̱jii̱n ngayeje xota̱ Israee̱l kisꞌiejín ingojín nda̱ xi ꞌniú tsjá ngase kisꞌie xikoó kuí, ngatꞌa̱ nkꞌa ngase kamá, ta̱bo̱a̱jiín ngayeje xota̱ na̱xi̱ńdaá.
3Kó ngo ndi̱yà kichajá bórró ínchjín xí kisꞌiee̱ Sii̱, na̱ꞌmii̱ Sauu̱l, kó bi̱ katsoó Sauu̱l ndií:
—Tꞌenje̱ ji ngo nda̱ moso̱, kó tangíndyi̱sejnú bórró ínchjiín. 4Kósꞌe̱ kui jaá kijí, kó jaꞌa xtji̱e̱e̱n na̱xi̱ xi chji̱a̱ni xota̱ tji̱e̱e̱ Efraii̱n, ko̱jo ti̱ jaꞌa ki̱a̱ nangi Salisaa̱, ta̱nga kasakojiín kui cho̱o̱, sꞌe̱ kijí xtji̱e̱e̱n nangi Salii̱n, ta̱nga ti̱ kasakojiín ki̱a̱ nga, sꞌe̱ kijí xtji̱e̱e̱n nangi xi chji̱a̱ni xota̱ tji̱e̱e̱ Benjaa̱, ta̱nga jmí ni kasakojiín ki̱a̱a̱ nga. 5Kó nga jachó nangii̱ Suu̱f, Sauu̱l bi̱ katsoó ngo nda̱ moso̱ xi tsoꞌbájo̱:
—Ja̱bíꞌi̱n, ta̱sá tjianꞌoyá ngíñá, ngatꞌa̱ tsi ta̱ nda̱ ngase kjimaa̱ na̱ꞌmina kjo̱a̱a̱ ñá, ta̱bo̱a̱jiín kjo̱a̱a̱ kui bórró ínchjiín.
6Kó kui nda̱ mosoo̱, bi̱ katsoó:
—Kꞌi̱e̱ kui na̱xi̱ńdáꞌniuú tikón ngo nda̱ xi Néná chji̱a̱ni, kó ngayeje xota̱ xi bendikón, ngatꞌa̱ ngayeje ni xi chji̱a̱ kui, fotjosón boá. Ta̱sá tjianchóo̱n, tsi ta̱ ka̱tso̱yà cha̱n cha̱nná ndi̱yà nínga chjiéngá kongín.
7Kósꞌe̱ Sauu̱l, bi̱ katsoó kui nda̱ mosoo̱:
—Ta̱nga tsi ki̱a̱ kongín, mí ni xi xꞌi̱a̱a̱ kuí nda̱a̱. Ngatꞌa̱ pan xi ndyi̱a̱ stsaná jè je, jmíjínná ni xi xꞌi̱a̱a̱ kuí nda̱ xi chji̱a̱ni Néná. Mí ni xí tjínná.
8Kó kui nda̱ mosoo̱, ti̱ bi̱ ti̱ katsó nginií Sauu̱l:
—Kꞌi̱e̱ tikónna kꞌi̱e̱e̱ ján ngramo̱ to̱ntiboa, kuí boá nii̱ xi sa̱ꞌinkꞌasꞌièe̱n kui nda̱ xi chji̱a̱ni Néná, tsi̱ꞌe̱ nga ka̱tso̱yàná ñá ndi̱yà nínga kongín.
9Ni̱xtjin xchá jàn ki̱a̱ na̱xi̱ńdá Israee̱l, kjiꞌanga tjín xí asíyaá ngo ni Néná, bi̱ katsó:
¡Tjiàn nínga tikón xi bee!
Ngatꞌa̱ nda̱chji̱ni̱e̱ꞌe̱én Néná, nda̱ xi be kiꞌmií. 10Kó bi̱ katsoó Sauu̱l nda̱ mosoo̱:
—Ndakjiꞌi ni xi kase ji, tjiàn tsobo̱a̱.
Kó kijí ki̱a̱ na̱xi̱ńdáꞌniú nínga tikón nda̱ xi chji̱a̱ni Néná.
11Kó kjiꞌanga ndyi̱fí xtji̱e̱e̱n nínga fínijíngií kui na̱xi̱ńdáꞌniuú, kamábe ínchjín xo̱ngò xí ndyi̱fíkjaꞌá ndáfoa ndáńchꞌií, kó bi̱ katsoó nga asíyaá kui ínchjiín:
—A kꞌi̱e̱ bí nínga tikón nda̱ xi bee.
12Kó kui ínchjiín, bi̱ katsó:
—Jo̱o̱n, kꞌi̱e̱ bí nínga tikón, ki̱a̱ kje̱n ji, tsá ndibé jí tsobo̱a̱, ngatꞌa̱ ngotꞌe̱ kjo̱e̱ꞌé kuí na̱xi̱ńdáꞌniuú, ngatꞌa̱ xota̱ na̱xi̱ńdaá ngo kjo̱a̱tjó sa̱ꞌínkꞌasꞌien ki̱a̱ Ndiꞌandikoón. 13Ngije ku̱i̱tjásꞌi̱e̱njnú na̱xi̱ńdáꞌniuú, ti̱ndyi̱séjnú, ngindiee̱ nga ko̱e̱je̱nijíngí Ndiꞌandikoón, tsi̱ꞌe̱ nga skji̱ni̱e̱ nichinie, ngatꞌa̱ xota̱ na̱xi̱ńdaá jmí ni skji̱ni̱e̱jín ngaskande nga kjo̱e̱ꞌé kuí xotaa̱, ngatꞌa̱ kuí boá xi tsꞌénchíkonñé kjo̱a̱tjó xi niꞌánkꞌasꞌiee̱n, kósꞌe̱ jaskan skji̱ni̱e̱ xota̱ xi kiꞌmíyaà. Tangínnijíngijnú tsobo̱a̱, ngatꞌa̱ tji̱e̱n má sa̱kójnú kui xotaa̱.
14Kósꞌe̱ kui jaá kijínijíngí ki̱a̱ na̱xi̱ńdáꞌniuú, kó ngije jachó ngamasiee̱n kui ngi̱ndiee̱, kamábe nga Samuee̱ ki̱a̱ tsꞌéndibá xtji̱e̱e̱n nínga síndo kui jaá, tsi̱ꞌe̱ nga ko̱e̱je̱ ki̱a̱ Ndiꞌandikoón. 15Ngo ni̱xtjin ngindiee̱ nga kjo̱chó Sauu̱l ki̱a̱a̱, Néná katsóyaà ngo ni Samuee̱, nga bi̱ katsoó:
16Ndyiojón kui chi̱bo̱a̱a̱, sangiyaa ngo nda̱ xi chji̱a̱ni xota̱ tji̱e̱e̱ Benjaa̱, tsi̱ꞌe̱ nga ji ko̱e̱ꞌéxée̱ nga kui xi ko̱tíxomaa̱ xota̱ na̱xi̱ńdána Israee̱l, kuí boá xi kꞌo̱xiéꞌá xota̱ na̱xi̱ńdána ngi̱ya tsja xota̱ Filisteaa̱, ngatꞌa̱ an, jè kamábe an xota̱ na̱xi̱ńdána, nga ni̱ma̱ ndyi̱kjandayà kó ngaskande an je jeꞌetꞌana kui nii̱.
17Kó kjiꞌanga Samuee̱ kamábe Sauu̱l, Néná bi̱ katsoó:
—¡Kꞌi̱e̱ tikón kꞌi̱e̱e̱ kui nda̱ xi kixiaan, kuí boá xi ko̱tíxomaa̱ xota̱ na̱xi̱ńdána!
18Kó Sauu̱l kijíkóntiñaa̱ Samuee̱ ki̱a̱ nga̱ntjo̱a̱a̱ na̱xi̱ńdáꞌniuú, kó bi̱ katsoó:
—Ngo kjo̱a̱nda míꞌaá, tꞌíyéní ñání tikón ndiꞌaa̱ nda̱ xi bee.
19Kó Samuee̱, bi̱ katsoó Sauu̱l:
—Án boá kui nda̱a̱ xi se ji, ndibénijíngí ji kꞌi̱e̱ Ndiꞌandikoón, kó nijan xi̱ni̱e̱ nichinie ji ko̱jo an, ndyiojón ta̱jñó sa̱ꞌinkixotꞌaa, kó xiyàa̱ ngayeje ni xi tjíjin takín ji. 20Kó kjo̱a̱a̱ kui bórró ínchjín xi je ján ni̱xtjinnii̱ nga kichajaá, ngata̱ nda̱jín maá kjo̱a̱a̱ kui cho̱o̱, ngatꞌa̱ jè kasako. Kó ja̱ ꞌyání bo̱a̱ xi tsoboaá nga sa̱ko̱ó ni xi nda ngasee̱ kꞌi̱e̱ Israee̱l, a mí tsi ji boá, ko̱jo tsi̱ꞌe̱ xota̱ ndiꞌaa̱ na̱ꞌmíi̱ boá.
21Kó Sauu̱l, bi̱ katsó:
—A mí tsí xota̱ tji̱e̱e̱ Benjaa̱ boá an, kui xtín xota̱ xi ꞌniú chichí ngase ngi̱jii̱n xota̱ tji̱e̱e̱ Israee̱l, kó xtín xota̱ ndiꞌana, a mí tsí kuí boá xi ꞌniú chichí ngase ngi̱jii̱n xota̱ tji̱e̱e̱ Benjaa̱. Ja̱ kó míkjo̱a̱a̱ nga bo̱a̱ kjiꞌi ni xi tꞌísení.
Sauu̱l ka̱ma nda̱ ree̱ na̱xi̱ńdá Israee̱l
22Kósꞌe̱ Samuee̱ tsíchji̱a̱a̱ Sauu̱l ko̱jo nda̱ mosoo̱, kó kijíjo̱ ki̱a̱ ngi̱ya nínga ꞌbíndo xotaa̱, kó katsjaá nga ki̱a̱ kꞌuijñá ngi̱ndie xi ꞌniú ndikón ngasee̱, ngi̱jii̱n kui xota̱ xi kiꞌmíyaà xi jachó kui ngi̱ndiee̱, xi mara̱ tsi ta̱ kantié jáxíꞌín. 23Kó Samuee̱, bi̱ katsoó nda̱ xi tsꞌénda nichiniee̱:
—Ndibéje̱ ji kui nichinie xi katsjaa, kui xi bo̱a̱ kixiaan nga kꞌuijñítꞌaxín ji.
24Kósꞌe̱ kui nda̱ xi tsꞌénda nichiniee̱ iskjininkꞌa ngo ti̱ꞌmi̱í kui cho̱o̱, ko̱jo ni xi tikón nga̱soón, kó ngindyi̱ko̱n Sauu̱l íjñá. Kósꞌe̱ Samuee̱, bi̱ katsó:
—Jéꞌe̱n, kꞌi̱e̱ tikón kꞌi̱e̱e̱ nichinie xi ijñátꞌaxín an, tꞌíjñí ji ngindyikin, kó chi̱ni̱ ji, ngatꞌa̱ kui nii̱ kachjaꞌátjó boá tsi̱ꞌe̱ ni̱xtjin xi je tikóndaa̱, kjiꞌanga kixiyàa̱ xota̱a̱.
Kó kui ni̱xtjii̱n, Sauu̱l iskjiniejo̱ nichinie Samuee̱. 25Kó ngije jatjajenni ki̱a̱ Ndiꞌandikoón nga kijí na̱xi̱ńdáꞌniuú, Samuee̱ tsíchji̱a̱jo Sauu̱l ki̱a̱ nkꞌaa̱ ndiꞌaa̱.
26Kó nga kamángindyiojón ngije tjisísi̱e̱én, Samuee̱ tsíchji̱a̱a̱ Sauu̱l ki̱a̱ nkꞌaa̱ ndiꞌaa̱, kó bi̱ katsoó: ¡Ti̱sítji̱n ji, ngatꞌa̱ mejénna nga sa̱ꞌinkixotꞌaa!
Kósꞌe̱ jastjíe̱n Sauu̱l, kó nga joó jatjoni kui ngi̱ndiee̱. 27Kó nga ndyi̱fotjajen nínga fetꞌanii̱ na̱xi̱ńdáꞌniuú, Samuee̱ bi̱ katsoó Sauu̱l:
—Bo̱a̱ tꞌíi̱n kui nda̱ mosoo̱ nga ngatjaꞌatjónná. Ta̱nga ji chiyérachií ngotjón, tsi̱ꞌe̱ nga xiyaá én xí Néná katsjána.
Kó kui nda̱ mosoo̱ kijítjón.
Currently Selected:
1 Samuee̱ 9: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
