1 Samuee̱ 8
8
Xota̱ Israee̱l tsíꞌá nga kꞌuieé ngo nda̱ re
1Kó ngije kamáxchá Samuee̱, ndií katsjáxaá nga kui xi ka̱ma nendiꞌamasiee̱n xota̱ Israee̱l. 2Ndií xí tjoón Joee̱l kiꞌmí, kó xi ma joó Abiyaa̱ kiꞌmí. Nga jó kui jaá xi kamá nendiꞌamasien ki̱a̱ na̱xi̱ńdáꞌniú Beersebaa̱. 3Ta̱nga ndií Samuee̱ ki̱a̱jín kijítji̱ngi ndi̱yà nínga kistsoꞌbá na̱ꞌmii̱, ta̱sá to̱n xi ndajíntsꞌèn kasako xi kamámejeén, kó to̱n iskjíbengí nga tsꞌenṉcha̱jo xotaa̱, ko̱jo katsꞌénndándí kjo̱a̱kixi̱i̱ nga.
4Kósꞌe̱ ngayeje xota̱ xi xchaá xota̱ Israee̱l kamátikó, kó kijíkoón Samuee̱ ki̱a̱ na̱xi̱ńdáꞌniú Ramaa̱, 5kó bi̱ katsoó:
—Jè kamáxchá jí, kó ndíi̱ ki̱a̱jín ndyi̱fítji̱ngi ndi̱yà xí tsꞌentje̱ ji, kuíni nga mejénjne̱ nga ta̱sá ngo nda̱ re xi ko̱tíxomajne̱, xikoó xi tjiín ngayeje na̱xi̱ńdá xí ngasee̱.
6Ta̱nga Samuee̱ tsjajín kamaá ni xi katsó kui xotaa̱, nga bi̱ katsó: Te̱ꞌéjne̱ ngo nda̱ re xi ko̱tíxomajne̱. Kósꞌe̱ Samuee̱ tsíchji̱a̱a̱ Néná, 7kó Néná, bi̱ katsoó Samuee̱:
—Ndaꞌyée̱ ngayeje ni xi ka̱tso̱o̱ xota̱ na̱xi̱ńdaá, ngatꞌa̱ jmí tsi ji xi ndyi̱tsꞌènchꞌoó, án boá xi ndyi̱tsꞌènchꞌóna, tsi̱ꞌe̱ nga ánjín xi kotixomáa̱ kui xotaa̱. 8Xikó má ndyi̱tsꞌèn kuí xotaa̱, ndeskande koó ni̱xtjin nga tsꞌaxié an ki̱a̱ nangi Ejiptoo̱, kó ngaskande ngotꞌe̱, nga je íjñámasienna, kó kje̱ꞌe ne ndyi̱tsꞌéndíkón, bo̱a̱ má ndyi̱tsꞌènjoo̱ ji ngotꞌe̱ nga. 9Ngotꞌe̱ ꞌne̱, ndaꞌyée̱ ni xi ka̱tso̱o̱, ta̱nga ꞌniú ndókjo̱e̱je ji, kó tꞌíyée̱ kótsꞌèn nga ndajín sa̱ꞌínjo̱ kui nda̱ re xi ko̱tíxomaa̱.
10Kó Samuee̱ katsóyaà kui xota̱ na̱xi̱ńdá xí ndyi̱míꞌá ngo nda̱ ree̱, ngayeje én xí Néná tsíchji̱a̱jo, 11nga bi̱ katsoó: Kui nda̱ re xi ko̱tíxomájnú jún, bi̱ sa̱ꞌínjo̱jnú: Kjo̱a̱ꞌniú sa̱ꞌiín ndíjnú nga ki̱a̱ sa̱ꞌínxátꞌaa̱, ko̱jo ki̱a̱ sa̱ꞌínkꞌíndoyá ngi̱yaa̱ karro̱ kjo̱a̱xcha̱án, kó kje̱ꞌe xí ndi̱je̱ kꞌuíndosoón, tsi̱ꞌe̱ nga ki̱a̱ ko̱e̱je̱tjoón karroo̱ kjo̱a̱xchán xí tsi̱ꞌe̱, 12kó tsja̱axaá xi ngito̱ko̱ ka̱ma tsi xi xki̱ ngo mi̱, ko̱jo tsi xi xki̱ ichítié jájún ko̱tíxomaa̱, kó kje̱ꞌe xí tsja̱axaá tsi̱ꞌe̱ nga ku̱i̱ꞌítji̱e̱ ni tjié ki̱a̱ tꞌanangii̱, ko̱jo xi kjo̱a̱ꞌáꞌyá cha̱a̱n ni tjieé, ko̱jo kje̱ꞌe xí sa̱ꞌínda ni xi niꞌánkjién nga má kjo̱a̱xcha̱án, ko̱jo ni xi niꞌánkjién tsi̱ꞌe̱ karro̱ kjo̱a̱xcha̱án.
13Ngayeje ndí xí ínchjínjnú kjo̱a̱ꞌniú sa̱ꞌiín nga ki̱a̱ sa̱ꞌínxájo̱, kó kuí boá xi sa̱ꞌínda ndásíje̱n, ko̱jo xi sa̱ꞌínchján nichinie, ko̱jo xi sa̱ꞌínda pan. 14Kó ti̱ kjo̱a̱ꞌáxínjnú tꞌanangijnú, ko̱jo nínga tjítji̱e̱jnú tostsi̱je̱è, ko̱jo toꞌaseituna̱, kó mosoo̱ tsja̱á kui nii̱. 15Kó kjo̱a̱ꞌáxínjnú tie nga úchaán ngayeje ni xi ka̱maxchájnú, ko̱jo tostsi̱je̱è, kó kui nii̱ sa̱ꞌínkꞌasꞌiee̱n xota̱ xi tsꞌénxájo̱ kui, ko̱jo moso̱ xi tsꞌénxátꞌaa̱ kui. 16Kó kjo̱a̱ꞌáxínjnú moso̱jnú xi chjo̱on xí xi̱ꞌin, ko̱jo cho̱yojo xi̱ꞌinjnú xi ꞌniú tsjákón ngasee̱, ko̱jo bórrójnú, tsi̱ꞌe̱ nga kui sa̱ꞌínkjién nga sa̱ꞌín xá xí tsi̱ꞌe̱. 17Kó ti̱ ꞌniú sa̱ꞌínjnú nga si̱ꞌankꞌasꞌienjnúu̱ tie nga úchaán cho̱tsa̱nga̱jnú, kó jún boá xi mosoo̱ kui ka̱majnú. 18Kó kjo̱chó ni̱xtjin nga ni̱ma̱ kꞌuínjnú kjo̱a̱a̱ kui nda̱ re xi jún kachjeꞌéjinjnú, ta̱nga Néná ngiti̱ ku̱i̱ntꞌiejínjnú.
19Ta̱nga xota̱ na̱xi̱ńdaá kamámejénjiín tsintꞌié ni xi katsó Samuee̱, kó ta̱sá bi̱ katsó:
—¡Jmí, ngatꞌiéjne̱ ngo nda̱ re xi ngatatixómájne̱! 20Kó ti̱ bo̱a̱ ti̱ kon ngatamajne̱ xikoó ngayeje na̱xi̱ńdá xí ngasee̱, kó rejne̱ xí ngatatixómájne̱, kó kuí ngatjítjónjne̱ nga ku̱i̱xkánjne̱ kjo̱a̱xchán xí kꞌuiéjne̱.
21Kó ngije tsintꞌié Samuee̱ ngayeje ni xi katsó xota̱ na̱xi̱ńdaá, katsóyaà Néná kuí nii̱. 22Kó Néná, bi̱ katsoó Samuee̱:
—Ndaꞌyée̱ ni xi ndyi̱chji̱a̱, kó chje̱ꞌéjin ji ngo re xi ko̱tíxomaa̱ kui xotaa̱. Kósꞌe̱ Samuee̱, bi̱ katsoó xota̱ Israee̱l:
—Tangín nginíjnú na̱xi̱ńdáꞌniú nínga tindyiónjnú.
Currently Selected:
1 Samuee̱ 8: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
