1 Samuee̱ 10
10
1Kósꞌe̱ Samuee̱ iskjíbé ngo ramita̱ isti̱, kó indyiaá to̱ko̱ Sauu̱l, katsjaá ngo ndsó tꞌanijon, kó bi̱ katsoó:
—A mí tsí Néná boá xí je jaꞌájiin ji, tsi̱ꞌe̱ nga ji xi ka̱ma ji nda̱ ree̱ xota̱ na̱xi̱ńdá Israee̱l, xota̱ na̱xi̱ńdá xí tsi̱ꞌe̱ Néná. 2Ngotꞌe̱ ꞌne̱, ngije si̱ꞌinkjìnní yojòo̱, jó já sa̱ko̱ó ki̱a̱ tꞌa nga̱tsjo̱ó na̱ Rakee̱l, ki̱a̱ na̱xi̱ńdáꞌniú Selsa̱, nangi xi chji̱a̱ni xota̱ tji̱e̱e̱ Benjaa̱, kó kui jaá, bi̱ ka̱tso̱o̱: Jè kasako kui bórró ínchjín xí tsangíndyisejnú, ta̱nga na̱ꞌmíi̱ jè ngiti̱ nda̱jín kjimaa̱ kjo̱a̱a̱ kui bórró ínchjiín, ngatꞌa̱ kjo̱a̱a̱ jún boá nga achichí nda̱ kjimaa̱ ngotꞌe̱, kó bi̱ tsó: Mí xí sa̱ꞌin an kjo̱a̱a̱ ndína. 3Sꞌe̱ jaskan kꞌuínrá ji ki̱a̱a̱, ngaskande nga kjóchí ji nínga síndo yáꞌáxka̱ xi chji̱a̱ni na̱xi̱ Taboo̱r, kó ki̱a̱ kjo̱tjokjaá ján já xí ndyi̱fínijíngí nga sa̱ꞌíndikón Néná ki̱a̱ na̱xi̱ńdáꞌniú Betee̱l, kó ngo xi yaꞌa ján ndií tindso̱, ko̱jo ngo xi yaꞌa ján pan, ko̱jo ngo xi yaꞌa ngo ti̱jìtjíxin xí ndyi̱a̱ bino̱. 4Kui jaá sa̱ꞌíntindee̱, kó jó pan tsja̱á, chjábé jí kui paa̱n.
5Jaskan ngije kamá kui nii̱, ki̱a̱ kjóchí ji ki̱a̱ tji̱ngi̱i̱ Néná, nínga tikón ngo ngi̱ndie nínga síndo ngo xtín jájuún xi chji̱a̱ni xota̱ Filisteaa̱. Kó nga ku̱i̱tjásꞌi̱n ji na̱xi̱ńdáꞌniuú, ki̱a̱ sa̱ko̱ó ngo xtín jáchji̱ni̱e̱ꞌe̱én Néná xi ndyi̱fotjojenni ki̱a̱ na̱xi̱ nkꞌaa̱, xi tjimátjoón salterio̱, ko̱jo pandero̱, ko̱jo yána̱xo̱, ko̱jo arpa̱, kó kui jaá ndyi̱tsóyà én xí Néná katsjaá.
6Kósꞌe̱ A̱si̱énni̱xtjii̱n Néná ꞌniú kji̱ndi̱bánieé ji, kó nijan kꞌuiyé ji én xí Néná tsjá ko̱jo kui jaá nga, kó xikoó tsi nda̱ tja̱tsi̱e̱ ka̱ma ji.
7Kjiꞌanga je kamá ngayeje kui chi̱bo̱a̱a̱, ti̱ꞌin ji ngayeje ni xi ka̱ma si̱ꞌin ji, ngatꞌa̱ Néná boá xi tikónjoo̱ ji.
8Jaskan tꞌentjénní Ngilngaa̱l, ngatꞌa̱ ko̱jo an ki̱a̱ kjuinkjáꞌayindi̱ya̱à, tsi̱ꞌe̱ nga sa̱ꞌinkꞌasꞌien an kjo̱a̱tjó xi ꞌbítí, ko̱jo kjo̱a̱tjó tsi̱ꞌe̱ nga kjóndàa̱ Néná. Yito ni̱xtjin chiyé ji ngaskande nga kjóchókjaꞌaa, kó ki̱a̱ xiyaá ni xi chjiéngá si̱ꞌin ji.
Sauu̱l kijí nginí ndiꞌaa̱
9Kó kjiꞌanga katsꞌénkꞌafóyá Sauu̱l, tsi̱ꞌe̱ nga sa̱ꞌínkjii̱n yojoo̱ Samuee̱, Néná asíkjo ini̱ma̱a̱, kó ngayeje kui chi̱bo̱a̱ xi je kiꞌmíyaà nga ka̱ma, ti̱ kjiꞌa kamá kui ni̱xtjii̱n.
10Kó kjiꞌanga jachó ki̱a̱ tji̱ngi̱i̱, ngo xtín jáchji̱ni̱e̱ꞌe̱én Néná jachókoón Sauu̱l, kó A̱si̱énni̱xtjii̱n Néná kisꞌijñajii̱n, kó kui nda̱a̱, ítsꞌi̱yanii̱ nga tsíchji̱a̱ én xí Néná katsjaá.
11Kó kjiꞌanga ngayeje xota̱ na̱xi̱ńdá xí ja̱bo̱a̱ je be kui nda̱a̱, kamábe nga ki̱a̱ nijan tsꞌénchji̱a̱ én xí Néná tsjá ko̱jo kui jáchji̱ni̱e̱ꞌe̱én, ja̱kꞌi̱e̱ ja̱ngaján bi̱ katsoó xkjín: Mí xí kamaá ndií Sii̱. A ki̱a̱ nijan tikón Sauu̱l ki̱a̱ ngi̱jii̱n jáchji̱ni̱e̱ꞌe̱én Néná nga. 12Kó ngo nda̱ xi tikón ki̱a̱a̱, bi̱ katsó:
—Kó ꞌyání bo̱a̱ xi na̱ꞌmii̱ kui xotaa̱.
Kuíni nga bi̱ tsꞌén kandokjo̱a̱ kui énkjínkoón: A ko̱jo Sauu̱l boá xí tikón ngi̱jii̱n jáchji̱ni̱e̱ꞌe̱én Néná nga.
13Kó ngije ngiti̱ tsíchji̱a̱jín ngase Sauu̱l, kijí Ndiꞌandikoón. 14Kó tsinii̱ Sauu̱l, bi̱ katsoó kui ko̱jo kui nda̱ mosoo̱:
—Ñá tsangínjnú.
Kó bi̱ katsó kui nda̱a̱:
—Bórró ínchjiín tsangíndyiséjne̱, kó nga kasakojínjne̱, Samuee̱ tsangínchonjne̱.
15Kó bi̱ katsó ngase tsinii̱ Sauu̱l:
—ꞌNiú míꞌaá nga tꞌíyéní ni xi katsójnú Samuee̱.
16Kó Sauu̱l, bi̱ katsoó tsinii̱:
—Jè katsóyà cha̱n cha̱njne̱ nga je kasako bórró ínchjiín.
Ta̱nga katsóyàjiín ni xi katsoó Samuee̱, kjo̱a̱a̱ nga kui xi ko̱tíxoma ngi̱ndie nínga botíxomaa̱.
Nga kamá re Sauu̱l
17Jaskan Samuee̱ ítikó xota̱ na̱xi̱ńdaá ngindyi̱ko̱n Néná ki̱a̱ na̱xi̱ńdáꞌniú Mispaa̱, 18kó bi̱ katsoó xota̱ na̱xi̱ńdá Israee̱l:
Bi̱ tsó Néná, kui xi Nee̱ xota̱ Israee̱l: Án boá xi tsꞌaxiéjnúꞌun ki̱a̱ nangi Ejiptoo̱, kó tsꞌaxiéꞌájnúꞌun ngi̱ya tsja xota̱ Ejiptoo̱, ko̱jo ngi̱ya tsja ngayeje re xi katsꞌénkjaꞌatiójnú kjo̱a̱ni̱ma̱, 19ta̱nga jún, ngotꞌe̱ ꞌne̱, jè kiniꞌánchꞌójnú Néná, kui xi ꞌboxiéꞌájnú kjo̱a̱a̱ ngayeje kjo̱a̱ni̱ma̱, ko̱jo kjiꞌanga nda̱ májnú, kó jè bi̱ kiꞌmíjnúu̱: Jmí, mejénjne̱ nga ngo re kꞌuiéjne̱. Kuíni nga ngotꞌe̱ ꞌne̱, chjiéngá kongínjnú ngindyi̱ko̱n Néná, xki̱ xtín xota̱ tji̱e̱e̱, ko̱jo xtín xota̱ ndiꞌaa̱.
20Kó Samuee̱ tsíchji̱a̱a̱ ngayeje xota̱ tji̱e̱e̱ xota̱ Israee̱l, tsi̱ꞌe̱ nga ko̱e̱je̱kon tiñaa̱, kó Benjaa̱ kachjeꞌéjin nga kiniꞌán kjo̱a̱chꞌáṉchaa̱. 21Kó katsjaákjo̱a̱ xota̱ tji̱e̱e̱ Benjaa̱ nga kji̱ndi̱bákón tiñaa̱ xki̱ xtín xota̱ ndiꞌa, kó xtín xota̱ ndiꞌaa̱ Matrii̱ kachjeꞌéjin nga kiniꞌán kjo̱a̱chꞌáṉchaa̱, sꞌe̱ ki̱a̱ kachjeꞌéjin Sauu̱l, ndií Sii̱. Ta̱nga nga ikindyisé, ngiti̱ kasakojín. 22Kósꞌe̱ ti̱ asíyá nginií Néná nga bi̱ kiꞌmií:
—A jè jeꞌe kui nda̱a̱ kꞌi̱e̱e̱.
Kó Néná, bi̱ katsó:
—Ki̱a̱ tikónꞌmá ki̱a̱ ngi̱jii̱n chꞌiaà.
23Kósꞌe̱ tsanga má nga kijíkjaꞌá Sauu̱l, kó kjiꞌanga akó ki̱a̱ ngamasiee̱n ngayeje xotaa̱, kamáyá nga ndeskande nga̱són tjiaa̱, ngaskande nkꞌa jàn, nga ꞌniú nkꞌa kamá ta̱bo̱a̱jiín ngayeje xota̱ na̱xi̱ńdaá. 24Kó Samuee̱, bi̱ katsoó ngayeje xota̱ na̱xi̱ńdaá:
—A je kamáyàjnú kui nda̱ xi Néná jè jaꞌájii̱n, jmíjín ingo xi xikoó kuí, ngi̱jii̱n ngayeje xota̱ na̱xi̱ńdaá.
Kósꞌe̱ ngayeje xotaa̱ askjandáyátsjá má nga bi̱ katsó: ¡Tsie ngatamaa̱ nda̱ ree̱! 25Jaskan Samuee̱ katsóyaà xota̱ na̱xi̱ńdaá kjo̱a̱kiti xi yaꞌanii̱ nínga botixómá ngo nda̱ re, kó ki̱a̱ íjñá ngo chꞌo̱ xo̱jo̱n xi akó ki̱a̱ ngindyi̱ko̱n Néná, sꞌe̱ jaskan Samuee̱ katsꞌénkixotꞌa ngayeje xota̱ na̱xi̱ńdaá, kó nga ngo nga ngo kijí ndiꞌaa̱. 26Kó ko̱jo Sauu̱l kijí ndiꞌaa̱ nga, ki̱a̱ na̱xi̱ńdáꞌniú Ngabaa̱, kó kijíjo̱ já xí chꞌokon ngasee̱, kui xi Néná katsꞌénjo̱ ini̱ma̱a̱.
27Ta̱nga tjín xota̱ xi ꞌniú ndajín, xi bi̱ katsó:
Kótsꞌèn ka̱maa̱ nga kui nda̱a̱ xi kꞌo̱xiéꞌáná. Kó katsꞌénchꞌó, kó nde ngo ni katsꞌénkꞌasꞌiénjiín Sauu̱l, ta̱nga kui nda̱a̱ ta̱ katsꞌén chi̱ni tsí yojoo̱.
Currently Selected:
1 Samuee̱ 10: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
