1 Samuee̱ 7
7
Samuee̱ atíxoma na̱xi̱ńdá Israee̱l
1Kósꞌe̱ jachó ki̱a̱a̱ xota̱ xi chji̱a̱ni na̱xi̱ńdáꞌniú Kiriaa̱t-Jearii̱n, kó kijíjo̱ koxa̱ kjo̱a̱ꞌbíndaa̱ Néná ki̱a̱ xtji̱e̱e̱n nangi nínga na̱xi̱i̱, kósꞌe̱ ki̱a̱ íjñá ki̱a̱ ndiꞌaa̱ Abinandaa̱b, kósꞌe̱ Eleasaa̱ ndií kui nda̱a̱ kiniꞌántsjie, tsi̱ꞌe̱ nga katseꞌéxaá nga kui xi skoón koxa̱ kjo̱a̱ꞌbíndaa̱ Néná.
2Kó ndeskande koó ni̱xtjin nga jachó koxa̱ kjo̱a̱ꞌbíndaa̱ ki̱a̱ na̱xi̱ńdáꞌniú Kiriaa̱t-Jearii̱n, ngije jaꞌa kan nó, ngayeje xota̱ Israee̱l achichí ni̱ma̱ katsó nga tsíchji̱a̱a̱ Néná. 3Kó Samuee̱, bi̱ katsoó ngayeje xota̱ Israee̱l:
Tsi ngayejeni ini̱ma̱jnú nga kji̱ndi̱báchon nginíjnúu̱ Néná, chjiéngá chja̱ꞌáxínjnú ngi̱jinjnú kui ne xi kje̱ꞌeé, ko̱jo na̱ ne Astaroo̱t, kó tꞌíjñandajnú ini̱ma̱jnú nga ta̱kuítsí Néná xí si̱ꞌanxátꞌajnúu̱, kó kuí boá xi kꞌo̱xiéꞌájnú ngi̱ya tsja xota̱ Filisteaa̱.
4Kósꞌe̱ xota̱ Israee̱l jaꞌáxín a̱sie̱én ne Baa̱l xi kisꞌiee̱, ko̱jo a̱sie̱én na̱ ne Astaroo̱t, kó ta̱kuítsí Néná xí katsꞌénxátꞌaa̱. 5Sꞌe̱ Samuee̱, bi̱ katsoó: Tꞌítikójnú ngayeje xota̱ Israee̱l ki̱a̱ na̱xi̱ńdáꞌniú Mispaa̱, kó ki̱a̱ kuichji̱a̱tjejnúꞌun nga kuichjiáa̱ Néná.
6Kó ki̱a̱ kamátikó xota̱ Israee̱l ki̱a̱ na̱xi̱ńdáꞌniú Mispaa̱, sꞌe̱ ki̱a̱ tsꞌaxié ndáfoa ki̱a̱a̱, kósꞌe̱ iskjitjón ngindyi̱ko̱n Néná, kó kui ni̱xtjii̱n katsꞌénkjaꞌa kjindiá yojoo̱, kó bi̱ katsó: ¡Kiniꞌánjéjne̱ kondra̱a̱ Néná!
Kó Samuee̱ kamá ngito̱ko̱o̱ xota̱ Israee̱l ki̱a̱ na̱xi̱ńdáꞌniú Mispaa̱. 7Kó nga tsintꞌié xota̱ Filisteaa̱ nga xota̱ Israee̱l je kamátikó ki̱a̱ na̱xi̱ńdáꞌniú Mispaa̱, já ngito̱ko̱o̱ xota̱ Filisteaa̱ kijínijíngí, tsi̱ꞌe̱ nga skjánjo̱ xota̱ Israee̱l. Kó nga tsintꞌié kuí nii̱ xota̱ Israee̱l, achichí katsakjónnií xota̱ Filisteaa̱. 8Kósꞌe̱ xota̱ Israee̱l, bi̱ katsoó Samuee̱: Ndokjoéràa̱ Néná kui xi Nejne̱ kjo̱a̱a̱ ji̱n, tsi̱ꞌe̱ nga kꞌo̱xiéꞌájne̱ ngi̱ya tsja xota̱ Filisteaa̱.
9Kó Samuee̱ iskjíbé ngo ndií cho̱tsa̱nga̱ xi sꞌe̱ katsén má, kó Néná katsꞌénkꞌasꞌien ndo̱jò ndójo̱ò ngo kjo̱a̱tjó, kó ꞌniú tsíchji̱a̱a̱ Néná kjo̱a̱a̱ xota̱ Israee̱l, kó Néná tsintꞌieé. 10Kó tji̱e̱nga Samuee̱ tjítsꞌénkꞌásꞌién kui kjo̱a̱tjó xi ꞌbítí nganda tsi̱ꞌe̱ Néná, xota̱ Filisteaa̱ jachótiña tsi̱ꞌe̱ nga kjánjo̱ xota̱ Israee̱l. Ta̱nga Néná ꞌniú katsꞌéntsen cho̱ꞌo̱n kui ni̱xtjii̱n ki̱a̱ nínga síndo xota̱ Filisteaa̱, kó kui xotaa̱ katsakjónní, kó xota̱ Israee̱l katsꞌeén.
11Kó xota̱ Israee̱l jatjoni na̱xi̱ńdáꞌniú Mispa̱, kó tsangatji̱ngii̱ xota̱ Filisteaa̱, kó ki̱cha̱ndojó katsꞌénꞌónii̱ ngaskande ngindiee̱ na̱xi̱ńdáꞌniú Bee̱t-Kaa̱r.
12Jaskan Samuee̱ iskjíbé ngo ndi̱jo̱ xi íjñá ngamasiee̱n na̱xi̱ńdáꞌniú Mispaa̱ ko̱jo na̱xi̱ńdáꞌniú See̱n, kó Ebee̱n-Esee̱r, ítꞌajaꞌén kuí ndi̱jo̱o̱, ngatꞌa̱ bi̱ katsó: Ngaskande kꞌi̱e̱e̱ nga tsꞌénbosikójoná Néná. 13Kó bo̱a̱ tsꞌén nga ni̱ma̱kjo̱a̱ ikꞌíjñá xota̱ Filisteaa̱, kó nginijánjín tsꞌasꞌien ngase nangii̱ xota̱ Israee̱l. Kó ngayeje ni̱xtjin nga kisꞌijña Samuee̱, nga Néná kondra̱ kamánii̱ xota̱ Filisteaa̱. 14Kó xota̱ Israee̱l katseꞌéꞌoyá nginí ngayeje na̱xi̱ńdáꞌniú xí xota̱ Filisteaa̱ kachjeꞌéxiín, ndeskande na̱xi̱ńdáꞌniú Ekroo̱n, ngaskande na̱xi̱ńdáꞌniú Ngaa̱t. Bo̱a̱ tsꞌén nga xota̱ Israee̱l jaꞌáxiín tꞌanangii̱ ngi̱ya tsja xota̱ Filisteaa̱. Kó kisꞌiee̱ kjo̱a̱xió xota̱ Israee̱l, ko̱jo xota̱ Amoraa̱.
15Kó ngayeje ni̱xtjin nga kisꞌijña Samuee̱ nga ngito̱ko̱o̱ xota̱ Israee̱l kamá. 16Kó xki̱ nó xki̱ nó kijí ki̱a̱ na̱xi̱ńdáꞌniú Betee̱l, ko̱jo na̱xi̱ńdáꞌniú Ngilngaa̱l, ko̱jo na̱xi̱ńdáꞌniú Mispa̱, kó ki̱a̱ katsꞌénseén kjo̱a̱xtii̱ xota̱ Israee̱l ki̱a̱ ngayeje kui ngi̱ndiee̱. 17Jaskan kijí nginí na̱xi̱ńdáꞌniú Ramaa̱, ngatꞌa̱ ki̱a̱ kisꞌijña ndiꞌaa̱, kó ti̱ ki̱a̱ katsꞌéndajin kjo̱a̱ xi kisꞌiee̱ xota̱ Israee̱l nga, ko̱jo ti̱ ki̱a̱ katsꞌéndaa̱ ngo ṉchandikón Néná.
Currently Selected:
1 Samuee̱ 7: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
