1 Samuee̱ 6
6
Xota̱ Filisteaa̱ katsꞌénkjíꞌóyá nginí koxa̱a̱ kjo̱a̱ꞌbíndaa̱ Néná
1Kó koxa̱ kjo̱a̱ꞌbíndaa̱ Néná, yito sá kamaá nga kisꞌijña nangii̱ xota̱ Filisteaa̱. 2Kósꞌe̱ xota̱ Filisteaa̱ ítikó já chináꞌmii̱ ko̱jo xota̱ xi kotꞌasoón, kó bi̱ katsoó:
—Mí xí si̱ꞌanjne̱ kui koxa̱ kjo̱a̱ꞌbíndaa̱. Tꞌíyéjne̱ kótsꞌèn ka̱ma ko̱na̱ngíyá nginíjne̱ nínga kisꞌijña.
3Kó bi̱ katsó kui jaá:
—Tsi ko̱na̱ngíyá nginíjnú koxa̱ kjo̱a̱ꞌbíndaa̱ Nee̱ xota̱ Israee̱l, ngata̱ niꞌánkjítiyàjínjnú, ta̱sá te̱ꞌéjnú ngo chjí, tsi̱ꞌe̱ nga si̱ꞌanjetakoón ni xi ndajín xi kiniꞌánjnú. Bo̱a̱ tsí tsꞌén nga ka̱mandayajnú, kó xcha̱jnú míkjo̱a̱a̱ nga bo̱a̱ kjiꞌi ni xi katsꞌénjo̱jnú Nee̱ xota̱ Israee̱l.
4Kó bi̱ katsó xota̱ Filisteaa̱:
—Kó mí nii̱ bo̱a̱ xi si̱ꞌankꞌasꞌienjne̱, tsi̱ꞌe̱ nga si̱ꞌanjetakónjne̱.
Kó kui jaá, bi̱ katsó:
—Ún ni to̱nsinié xi ja̱kon ṉdo yiꞌi xi on má kon, ko̱jo ún ni to̱nsinié xi ja̱kon ndisien má kon, xikó kjiꞌi ma já ngito̱ko̱o̱ xota̱ Filisteaa̱, ngatꞌa̱ ti̱kuíní chiꞌin xi katsoboájnú jún, ko̱jo kui já ngito̱ko̱o̱ nga. 5Kó kuíni nga ti̱ꞌandajnú a̱si̱én xí ja̱kon ṉdo yiꞌi xi on má koón, ko̱jo a̱si̱én xí ja̱kon ndisien má koón, kui xi ndyi̱tsꞌénkjatsón tꞌanangijnú, kó te̱ꞌéjnúu̱ kjo̱a̱je Nee̱ xota̱ Israee̱l, tsi ta̱ nda ni̱xtjin kjo̱a̱ꞌajinda kjo̱a̱xcha̱án, kjo̱a̱a̱ jún ko̱jo ne xi tsa̱jún, ko̱jo na̱xi̱ńdájnú.
6Ánní nga niꞌántajájnú ini̱ma̱jnú, xikó katsꞌén xota̱ Ejiptoo̱ ko̱jo nda̱ faraoo̱n, nga katsꞌéntajá ini̱ma̱a̱. Jaskan ngije achichí nga ndajín katsꞌénjo̱ xota̱ Israee̱l, a katsjandièjínrií nga kjo̱tjo kui xotaa̱, kó jatjo ngijee̱.
7Kuíni nga mejénna nga si̱ꞌandajnú ngo karro̱ xi tja̱tsi̱e̱, kó chjábéjnú jó cho̱yojo xi ndyi̱tsꞌènxchá ndí xi kji̱e̱ jmíjín xi tsꞌénxájo̱, kó tꞌítaꞌniújnú kui cho̱yojoo̱ ki̱a̱ tꞌa karroo̱, ngata̱ boeꞌéndièjínjnú nga ki̱a̱ ko̱e̱je̱tji̱ngii̱ ndií.
8Ngije kachjábéjnú kui koxa̱ kjo̱a̱ꞌbíndaa̱, ki̱a̱ tꞌíyájnú karroo̱, ko̱jo kui ni to̱nsinié xi jún ikꞌíchjíjnú kjo̱a̱a̱ kjo̱a̱tjó xi si̱ꞌankꞌasꞌienjnú ngatꞌa̱ kiniꞌánjéjnú, kó ngo koxa̱ tꞌíjñájnú xtji̱e̱e̱n nínga tikón kui koxa̱a̱, sꞌe̱ jaskan ngatjí ngijee̱.
9Tsitsíjenjnúu̱ nga tsi ki̱a̱ ko̱e̱je̱nijíngí xtji̱e̱e̱n na̱xi̱ńdáꞌniú Bee̱t-Semee̱, ja̱ kuí boá xi bo̱a̱ kjiꞌi ni xi ndajín xi katsꞌénjo̱ná ñá, ta̱nga tsi ki̱a̱jín ko̱e̱je̱nijíngí, ja̱ jè xcha̱ nga kuijín xi bo̱a̱ katsꞌénjo̱ná. ¡Ta̱xkiya kamá kui nii̱ tsobo̱a̱!
10Kó kui jaá, bo̱a̱ katsꞌén xikó kiꞌmií, iskjíbé jó cho̱yojo na̱an, kó ki̱a̱ ítꞌa kui karroo̱, tji̱e̱nga nchꞌoaá índoꞌniú ndií kui cho̱yojoo̱. 11Jaskan íjñaya koxa̱ kjo̱a̱ꞌbíndaa̱ Néná, ngi̱yaa̱ kui karroo̱, ko̱jo kui koxa̱ xi ndyi̱a̱ kui a̱sie̱én ndisiee̱n, ko̱jo a̱sie̱én kui ṉdo yiꞌi xi oo̱n xi to̱nsinieé.
12Kó kui cho̱yojoo̱, ki̱a̱ kijí xtji̱e̱e̱n ndi̱yà xi fíni na̱xi̱ńdáꞌniú Bee̱t-Semee̱, kó ki̱a̱ kijítji̱ngi kixi̱ kixi̱ nga tjimá ko̱jo nga ndyi̱kjandayà, kó jmíni̱xtjin tsi nga skoón ko̱jo tsi nga kixi̱i̱ kijí, tji̱e̱nga já ngito̱ko̱o̱ xota̱ Filisteaa̱, ki̱a̱ kijítji̱ngii̱ ngaskande tsindioó na̱xi̱ńdáꞌniú Bee̱t-Semee̱.
13Ngo ndi̱yà kjiꞌanga xota̱ na̱xi̱ńdáꞌniú Bee̱t-Semee̱, ndyi̱foaꞌátikó to ndso̱ko̱a̱n ṉño̱pan ki̱a̱ nangi soón, nga askotsijen, kamábe koxa̱ kjo̱a̱ꞌbíndaa̱ Néná, kó achichí tsja kamaá. 14Kó kui karroo̱ jachó ki̱a̱ kꞌijñá xí tsi̱ꞌe̱ Josuee̱, ki̱a̱ na̱xi̱ńdáꞌniú Bee̱t-Semee̱, kó ki̱a̱ kasasien, ki̱a̱ nínga tikón ngo ndi̱jo̱ xi ꞌniú je, kó kui jaá chikín katsꞌén yaá kui karroo̱, sꞌe̱ katsꞌénkꞌasꞌiee̱n Néná ngo kjo̱a̱tjó xi kui cho̱yojo ínchjiín. 15Kó xota̱ tji̱e̱e̱ Lebii̱ tsꞌenje̱ngi koxa̱ kjo̱a̱ꞌbíndaa̱ Néná, ko̱jo kui koxa̱ xi tikóntꞌaa̱ nínga síndo ni to̱nsinieé, kó nga̱soón kui ndi̱jo̱ jee̱ índo ngayeje kui nii̱, sꞌe̱ jáxíꞌín xi chji̱a̱ni na̱xi̱ńdáꞌniú Bee̱t-Semee̱ katsꞌénkjiesón cho̱, ko̱jo katsꞌénkꞌasꞌiee̱n kjo̱a̱tjó Néná.
16Ngije kamábe kui nii̱ nga ún já ngito̱ko̱o̱ xota̱ Filisteaa̱, ti̱kuii ni̱xtjin kijí nginí na̱xi̱ńdáꞌniú Ekroo̱n. 17Kuí bí kui ṉdo yiꞌi xi on xi to̱nsinié xi katsꞌénkꞌasꞌiee̱n Néná xota̱ Filisteaa̱, xikoó tsi ngo kjo̱a̱tjó, tsi̱ꞌe̱ nga katsꞌénjetakoón jeé: Ngo kiniꞌánkꞌasꞌien kjo̱a̱a̱ na̱xi̱ńdáꞌniú Asndoo̱nd, ko̱jo ngo kiniꞌánkꞌasꞌien kjo̱a̱a̱ na̱xi̱ńdáꞌniú Ngasaa̱, ko̱jo ngo kiniꞌánkꞌasꞌien kjo̱a̱a̱ na̱xi̱ńdáꞌniú Askaloo̱n, ko̱jo ngo kiniꞌánkꞌasꞌien kjo̱a̱a̱ na̱xi̱ńdáꞌniú Ngaa̱t, ko̱jo ngo kiniꞌánkꞌasꞌien kjo̱a̱a̱ na̱xi̱ńdáꞌniú Ekroo̱n. 18Kó kui ndisien xi to̱nsinieé, bo̱a̱ kjiꞌi kamá xikó kjiꞌi na̱xi̱ńdáꞌniú xí kisꞌiee̱ nga ún já ngito̱ko̱o̱ xota̱ Filisteaa̱, ko̱jo kui na̱xi̱ńdáꞌniú xí xó tjíchjáꞌyánii̱, ko̱jo ngayeje ndí nangi xi̱xi̱ xi jmí xójiín nga ngo foaꞌatjiyajoo̱n.
Kó ndi̱jo̱ xi ꞌniú je nínga ikꞌíjñá koxa̱ kjo̱a̱ꞌbíndaa̱ Néná, to̱kó ki̱a̱ tikón ki̱a̱ kꞌijñá nínga atíxoma Josuee̱, ki̱a̱ na̱xi̱ńdáꞌniú Bee̱t-Semee̱, ngaskande ngotꞌe̱. 19Kósꞌe̱ Néná katsꞌénkjiesón xota̱ xi chji̱a̱ni na̱xi̱ńdáꞌniú Bee̱t-Semee̱, ngatꞌa̱ askotsijenyá ngi̱yaa̱ koxa̱ kjo̱a̱ꞌbíndaa̱ Néná. Kó ichítié mi̱ ko̱jo kan jáxíꞌín xi jesón. Kó xota̱ na̱xi̱ńdaá askjandá, ngatꞌa̱ Néná achichí má xota̱ xi katsꞌénꞌoón nga katsꞌénkjiesón. 20Kósꞌe̱ xota̱ xi chji̱a̱ni na̱xi̱ńdáꞌniú Bee̱t-Semee̱, bi̱ katsó: ꞌYá xí ka̱maa̱ nga kꞌuijñá ngindyi̱ko̱n kui Néná xí tsjiee̱. Ñání ka̱ma ko̱nangíyá kui koxa̱ kjo̱a̱ꞌbíndaa̱ Néná, tsi̱ꞌe̱ nga ngiti̱ kꞌi̱e̱jín kꞌuijñájinná.
21Kósꞌe̱ katsangiyaa̱ chji̱ni̱e̱ꞌén xota̱ xi chji̱a̱ni na̱xi̱ńdáꞌniú Kiriaa̱t-Jearii̱n, nga bi̱ katsoó: Xota̱ Filisteaa̱ jè katsjáꞌóyá nginí koxa̱ kjo̱a̱ꞌbíndaa̱ Néná, kuíni nga ndibajáyájnú ꞌne̱, kó tangínjo̱jnú.
Currently Selected:
1 Samuee̱ 6: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
